لُوقا دی اِنجیل 19:1-48
19 فیر یسوع یریحو چ آیا تے اوہ شہر وچوں لنگھ رہیا سی۔
2 اوتھے زکائی ناں دا اِک امیر بندہ سی جیہڑا ٹیکس لین والیاں دا افسر سی۔
3 اوہ ویکھنا چاہندا سی کہ یسوع کون اے۔ پر اوہنوں ویکھ نہ سکیا کیونکہ بِھیڑ بوہت زیادہ سی تے اوہدا قد وی چھوٹا سی۔
4 ایس لئی اوہ یسوع نُوں ویکھن لئی بھج کے اَگے گیا تے جنگلی اِنجیر دے اِک درخت تے چڑھ گیا کیونکہ یسوع نے اوتھوں لنگھنا سی۔
5 جدوں یسوع اوتھے پونچیا تے اوہنے اُتے ویکھ کے اوہنوں کہیا: ”زکائی، چھیتی نال تھلے اُتر آ کیونکہ اَج مَیں تیرے گھر ٹھہراں گا۔“
6 ایہہ سُن کے زکائی فوراً تھلے اُتر آیا تے جدوں یسوع اوہدے گھر گیا تے اوہ اوہنوں بڑی خوشی نال ملیا۔
7 ایہہ ویکھ کے سارے لوک بُڑبُڑ کرن لگ پئے: ”ویکھو! اوہ اِک گُناہگار بندے دے گھر مہمان بن کے گیا اے۔“
8 پر زکائی نے کھلو کے مالک یسوع نُوں کہیا: ”مالک، مَیں اپنی اَدھی دولت غریباں نُوں دے دَواں گا تے جنہاں نُوں مَیں لُٹیا* اے، اوہناں نُوں چار گُنا واپس کراں گا۔“
9 ایہہ سُن کے یسوع نے اوہنوں کہیا: ”اَج تیرے گھرانے نُوں نجات مِل گئی اے کیونکہ تُوں وی ابراہام دا پُتر ایں۔
10 انسان دا بیٹا بھٹکے ہوئے لوکاں نُوں لبھن تے بچان آیا اے۔“
11 جدوں اوہدے شاگرد ایہہ گلاں سُن رہے سن تے اوہنے اِک ہور مثال دِتی کیونکہ اوہ یروشلم دے نیڑے سی تے شاگرد سوچ رہے سن کہ جیویں ای اوہ اوتھے پونچن گے تے خدا دی بادشاہی آ جائے گی۔
12 ایس لئی یسوع نے کہیا: ”اِک نواب اِک دُور دے ملک گیا تاکہ اوتھوں بادشاہی کرن دا حق لے کے واپس آئے۔
13 جان توں پہلاں اوہنے اپنے دس غلاماں نُوں بلا کے اوہناں نُوں بوہت ساری چاندی* دِتی تے کہیا: ”میرے واپس آن تک ایہدے نال کاروبار کرو۔“
14 پر نواب دے اپنے ملک دے لوک اوہدے توں نفرت کردے سن تے اوہناں نے کجھ آدمیاں* نُوں اوہدے کول ایہہ پیغام دین لئی گھلیا: ”اَسی نئیں چاہندے کہ تُوں ساڈا بادشاہ بنیں۔“
15 جدوں اوہ بادشاہی کرن دا حق لے کے واپس آیا تے اوہنے اپنے اوہناں غلاماں نُوں بلوایا جنہاں نُوں اوہنے چاندی دِتی سی تاکہ اوہناں کولوں حساب لوے کہ کاروبار کر کے اوہناں نے کِنّی کمائی کیتی اے۔
16 ایس لئی پہلے غلام نے آ کے کہیا: ”مالک، مَیں تیری چاندی نال دس گُنا چاندی ہور کمائی اے۔“
17 اوہنے کہیا: ”شاباش چنگے غلام، تُوں اِک چھوٹا جیہا کم بڑی وفاداری نال کیتا اے۔ ایس لئی مَیں تینوں دس شہراں دا مختار بنانا واں۔“
18 فیر دُوجے غلام نے آ کے کہیا: ”مالک، مَیں تیری چاندی نال پنج گُنا چاندی ہور کمائی اے۔“
19 نواب نے اوہنوں وی کہیا: ”مَیں تینوں پنج شہراں دا مختار بنانا واں۔“
20 فیر اِک ہور غلام نے آ کے کہیا: ”مالک، ایہہ لے اپنی چاندی۔ مَیں ایہنوں کپڑے چ لویٹ کے رکھ دِتا سی۔
21 اصل چ مینوں تیرا ڈر سی کیونکہ تُوں بڑا سخت آدمی ایں۔ تُوں اوہ پیسہ کڈھانا ایں جیہڑا تُوں جمع نئیں کرایا تے اوس فصل نُوں ہڑپ کر لینا ایں جیہڑی تُوں نئیں بیجی۔“
22 نواب نے اوہنوں کہیا: ”بھیڑے غلام، تیری اپنی گل تینوں غلط ثابت کر رہی اے۔ جے تینوں پتہ سی کہ مَیں بڑا سخت آدمی آں تے مَیں اوہ پیسہ کڈھانا واں جیہڑا مَیں جمع نئیں کرایا تے اوہ فصل ہڑپ لینا واں جیہڑی مَیں نئیں بیجی
23 تے فیر تُوں میری چاندی ساہوکاراں* کول کیوں نئیں رکھوائی؟ اِنج واپس آ کے مینوں میری چاندی نال منافع وی مِلدا۔““
24 ”فیر نواب نے اوتھے کھلوتے بندیاں نُوں کہیا: ”ایہدے کولوں چاندی لے کے اوہنوں دے دَوو جنہے دس گُنا چاندی کمائی اے۔“
25 پر اوہناں نے کہیا: ”مالک، اوہدے کول تے پہلاں ای اینی ساری چاندی اے۔“
26 نواب نے جواب دِتا: ”مَیں توانوں کہنا واں کہ جدے کول ہے وے، اوہنوں ہور دِتا جائے گا۔ پر جدے کول نئیں اے، اوہدے کولوں اوہ وی لے لیا جائے گا، جو اوہدے کول ہے وے۔
27 نالے میرے اوہناں دُشمناں نُوں ایتھے بلاؤ جیہڑے نئیں چاہندے سن کہ مَیں اوہناں دا بادشاہ بناں تے اوہناں نُوں میرے سامنے مار دَوو۔““
28 ایہہ گلاں کہن دے بعد یسوع نے یروشلم وَل* اپنا سفر جاری رکھیا۔
29 جدوں اوہ بیتفگے تے بیتعنیاہ پونچیا جیہڑے زیتون دے پہاڑ تے وَسے ہوئے نیں تے یسوع نے اپنے دو شاگرداں نُوں بھیجیا
30 تے کہیا: ”اوہ پِنڈ جیہڑا تُسی سامنے ویکھ رہے او، اوتھے جاؤ۔ پِنڈ چ وڑھدیاں سار ای توانوں اوتھے اِک جوان گدھا بنھیا ہویا نظر آئے گا جدے تے حالے تک کوئی وی سوار نئیں ہویا۔ اوہنوں کھول کے میرے کول لیاؤ۔
31 پر جے کوئی توانوں پچھے کہ ”ایہنوں کیوں کھول رہے او؟“ تے تُسی کہنا: ”مالک نُوں ایہدی ضرورت اے۔““
32 اوہ شاگرد اوتھوں چلے گئے تے سب کجھ اُنج ای ہویا جیویں یسوع نے کہیا سی۔
33 پر جدوں اوہ جوان گدھے نُوں کھول رہے سن تے اوہدے مالکاں نے اوہناں نُوں پچھیا: ”تُسی ایہنوں کیوں کھول رہے او؟“
34 اوہناں نے کہیا: ”مالک نُوں ایہدی ضرورت اے۔“
35 فیر اوہ گدھے نُوں یسوع کول لیائے تے اوہناں نے اپنیاں چادراں گدھے اُتے پا دِتیاں تے یسوع نُوں اوہدے تے بیٹھایا۔
36 جیویں جیویں اوہ اَگے ودھ رہیا سی لوک اپنیاں چادراں راہ چ وچھان لگ پئے۔
37 جدوں اوہ اوس راہ تے پونچیا جیہڑی زیتون دے پہاڑ توں تھلے نُوں جاندی اے تے شاگرداں دی ساری بِھیڑ خوشیاں منان لگ پئی تے اُچی اُچی خدا دی وڈیائی کرن لگ پئی کیونکہ اوہناں نے بوہت سارے معجزے ویکھے سن۔
38 اوہ کہن لگ پئے: ”مبارک اے اوہ بادشاہ جیہڑا یہوواہ دے ناں تے آندا اے! اسمان چ سلامتی* تے اُچیاں تھانواں تے خدا دی وڈیائی ہووے!“
39 پر بِھیڑ وچوں کجھ فریسیاں نے اوہنوں کہیا: ”اُستاد، اپنے شاگرداں نُوں منع کر۔“
40 پر اوہنے کہیا: ”مَیں توانوں کہنا واں کہ جے ایہہ چپ رہے تے پتھر بول اُٹھن گے۔“
41 جدوں یسوع یروشلم دے نیڑے پونچیا تے اوہ شہر نُوں ویکھ کے رون لگ پیا
42 تے اوہنے کہیا: ”کاش کہ تُوں اوہناں گلاں نُوں سمجھ جاندا جنہاں نال تینوں سلامتی مِلدی۔ پر ہُن اوہناں گلاں نُوں تیریاں نظراں توں لُکا دِتا گیا اے
43 کیونکہ تیرے تے اوہ ویلا آن والا اے جدوں تیرے دُشمن تیرے آلے دَوالے نوکیلیاں لکڑاں دی واڑھ بنان گے تے تینوں گھیر لین گے تے ہر پاسیوں تیرے تے دَبا پان گے۔
44 اوہ تینوں تے تیرے بچیاں نُوں زمین تے پٹخا پٹخا کے مارن گے تے تیرے چ پتھر اُتے پتھر وی نئیں چھڈن گے کیونکہ تُوں اوس وقت نُوں نئیں پچھانیا جدوں تینوں پرکھیا جا رہیا سی۔“
45 فیر یسوع ہیکل چ گیا تے چیزاں ویچن والیاں نُوں باہر کڈھن لگ پیا
46 تے اوہناں نُوں کہیا: ”پاک کلام چ لکھیا اے کہ ”میرے گھر نُوں دُعا دا گھر کہیا جائے گا،“ پر تُسی ایہنوں ڈاکوؤاں دا اڈا بنا دِتا اے۔“
47 اوہ ہر روز ہیکل چ لوکاں نُوں تلیم دیندا رہیا۔ پر وڈے کاہن، شریعت دے عالم تے ہور کئی وڈے لوک اوہنوں جانوں مارنا چاہندے سن۔
48 پر اوہناں نُوں کوئی موقع نہ ملیا کیونکہ بوہت سارے لوک اوہدیاں گلاں سُنن لئی اوہدے نال نال رہندے سن۔
فٹ نوٹ
^ یاں، ”جھوٹھے اِلزام لا کے لُٹیا اے۔“
^ یونانی چ: ”دس مینا۔“ اِک مینا 340 گرام دا ہوندا سی۔ اِک مینا تقریباً 90 دن دی مزدوری دے برابر ہوندا سی۔
^ یونانی چ: ”سفیر۔“
^ یاں، ”بینک چ۔“
^ یونانی چ: ”یروشلم وَل اُتے نُوں۔“
^ یاں، ”خدا نال ساڈی صلح ہوئے۔“
