لُوقا دی اِنجیل 20:1-47
20 اِک دن جدوں یسوع ہیکل چ لوکاں نُوں تلیم دے رہیا سی تے خوشخبری سُنا رہیا سی تے وڈے کاہن تے شریعت دے عالم کجھ بزرگاں نال اوہدے کول آئے
2 تے اوہنوں پچھیا: ”سانوں دَس کہ تینوں ایہہ کم کرن دا اِختیار کتھوں ملیا اے؟ کنہے دِتا اے تینوں ایہہ اِختیار؟“
3 یسوع نے اوہناں نُوں کہیا: ”مَیں وی توانوں اِک سوال پچھنا واں۔ تُسی مینوں دَسو:
4 یوحنا نُوں بپتسمہ* دین دا اِختیار کنہے دِتا سی؟ خدا* نے یاں انساناں نے؟“
5 اوہ اِک دُوجے نُوں کہن لگ پئے: ”جے اَسی کہیا: ”خدا نے،“ تے اوہ سانوں کہوے گا: ”فیر تُسی اوہدا یقین کیوں نئیں کیتا؟“
6 پر جے اَسی کہیا: ”انساناں نے،“تے لوک سانوں پتھراں نال مار دین گے کیونکہ اوہ یوحنا نُوں نبی من دے نیں۔“
7 ایس لئی اوہناں نے کہیا: ”سانوں نئیں پتہ کہ یوحنا نُوں کنہے اِختیار دِتا سی۔“
8 یسوع نے اوہناں نُوں کہیا: ”فیر مَیں وی توانوں نئیں دَسدا کہ مینوں ایہہ سارے کم کرن دا اِختیار کنہے دِتا اے۔“
9 فیر اوہنے لوکاں نُوں ایہہ مثال دِتی: ”اِک آدمی نے انگوراں دا باغ لایا تے اوہ ایہنوں ٹھیکےداراں نُوں دے کے آپ اِک لمے عرصے لئی کسے ہور ملک چلا گیا۔
10 جدوں انگوراں دا موسم آیا تے اوہنے باغ دی پیداوار چوں اپنا حصہ لین لئی اپنے اِک غلام نُوں ٹھیکےداراں کول گھلیا۔ پر ٹھیکےداراں نے اوہنوں کُٹیا تے خالی ہتھ واپس بھیج دِتا۔
11 فیر اوہنے اِک ہور غلام نُوں گھلیا۔ ٹھیکےداراں نے اوہنوں وی کُٹیا تے بےعزت کر کے خالی ہتھ واپس بھیج دِتا۔
12 فیر اوہنے تیجے غلام نُوں گھلیا۔ اوہناں نے اوہنوں وی زخمی کیتا تے باغ چوں کڈھ دِتا۔
13 ایہہ ویکھ کے باغ دے مالک نے کہیا: ”ہُن مَیں کیہہ کراں؟ اِنج کرنا واں کہ اپنے پیارے پُتر نُوں گھلنا واں۔ اوہ ایہدا تے لحاظ کرن گے۔“
14 جدوں ٹھیکےداراں نے اوہنوں ویکھیا تے اوہناں نے اِک دُوجے نُوں کہیا: ”ایہی جے وارث۔ آؤ اَسی ایہنوں مار کے باغ تے قبضہ کر لئیے۔“
15 ایس لئی اوہناں نے اوہنوں باغ چوں کڈھ کے جانوں مار دِتا۔ ہُن باغ دا مالک اوہناں نال کیہہ کرے گا؟
16 اوہ آ کے اوہناں ٹھیکےداراں نُوں مار دَوے گا تے باغ دُوجے ٹھیکےداراں نُوں دے دَوے گا۔“
ایہہ سُن کے لوکاں نے کہیا: ”خدا نہ کرے کہ اِنج ہوئے!“
17 پر اوہنے اوہناں وَل ویکھ کے کہیا: ”فیر پاک کلام چ لکھی ایس گل دا کیہہ مطلب اے کہ ”جیہڑے پتھر نُوں مستریاں نے ردّ کیتا، اوہی کونے دا سب توں خاص پتھر بن گیا“؟
18 جیہڑا وی ایس پتھر تے ڈِگے گا، اوہ ٹوٹے ٹوٹے ہو جائے گا تے جدے تے ایہہ پتھر ڈِگے گا، اوہ کُچلیا جائے گا۔“
19 یسوع دی مثال سُن کے شریعت دے عالم تے وڈے کاہن سمجھ گئے کہ اوہ اوہناں بارے ای گل کر رہیا اے۔ ایس لئی اوہ اوسے ویلے اوہنوں پھڑنا چاہندے سن، پر لوکاں توں ڈردے سن۔
20 اوہ موقع لبھ رہے سن کہ کسے نہ کسے طرحاں یسوع نُوں پھسا کے اعلیٰ افسراں تے حاکم دے حوالے کر دین۔ ایس لئی اوہناں نے چوری چھپے کجھ بندیاں نُوں پیسے دِتے تاکہ اوہ یسوع دے سامنے نیک ہون دا دِکھاوا کرن تے اوہنوں اوہدیاں ای گلاں وچ پھسا دین۔
21 اوہناں بندیاں نے یسوع نُوں کہیا: ”اُستاد، سانوں پتہ اے کہ تیریاں گلاں تے تیری تلیم صحی اے۔ نالے تُوں کسے دی طرفداری وی نئیں کردا سگوں تُوں خدا دی راہ دی صحی صحی تلیم دینا ایں۔
22 سانوں دَس کہ کیہہ سانوں بادشاہ* نُوں ٹیکس دینا چاہی دا اے یاں نئیں؟“
23 پر یسوع جان گیا کہ اوہ کِنّے مکار نیں۔ ایس لئی اوہنے اوہناں نُوں کہیا:
24 ”مینوں اِک دینار* لیا کے وکھاؤ۔ ایہدے تے کِدی تصویر تے کِدا ناں چھپیا ہویا اے؟“ اوہناں نے جواب دِتا: ”بادشاہ دا۔“*
25 یسوع نے اوہناں نُوں کہیا: ”ایس لئی فیر جیہڑیاں چیزاں بادشاہ* دِیاں نیں، اوہ بادشاہ نُوں دَوو تے جیہڑیاں چیزاں خدا دِیاں نیں، اوہ خدا نُوں دَوو۔“
26 اوہ لوکاں دے سامنے یسوع نُوں اوہدیاں گلاں چ نئیں پھسا سکے سگوں اوہدا جواب سُن کے حیران رہ گئے تے چپ ہو گئے۔
27 پر کجھ صدوقی جیہڑے نئیں من دے کہ مُردے زندہ ہون گے، یسوع کول آئے تے اوہنوں پچھیا:
28 ”اُستاد، موسیٰ نے لکھیا سی کہ ”جے کوئی آدمی بےاولاد مر جائے تے اوہدا بھرا اپنی بھابی نال ویاہ کر کے اپنے بھرا لئی اولاد پیدا کرے۔“
29 ساڈے ایتھے سَت بھرا سن۔ پہلے نے ویاہ کیتا تے اوہ بےاولاد مر گیا۔
30 ایسے طرحاں دُوجے نے
31 فیر تیجے نے ایتھوں تک کہ سَتاں بھراواں نے اوسے عورت نال ویاہ کیتا۔ پر اوہ سارے بےاولاد مر گئے۔
32 اَخیر چ اوہ عورت وی مر گئی۔
33 ہُن جدوں مُردیاں نُوں زندہ کیتا جائے گا تے اوہ کِدی بیوی ہوئے گی؟ کیونکہ سَتاں بھراواں نے اوہدے نال ویاہ کیتا سی۔“
34 یسوع نے اوہناں نُوں کہیا: ”ایس زمانے دے لوک ویاہ* کردے نیں۔
35 پر جیہڑے آن والے زمانے چ زندگی پان تے مُردیاں چوں زندہ ہون دے لائق ٹھہرن گے، اوہ ویاہ* نئیں کرن گے۔
36 اصل چ اوہ کدی نئیں مرن گے کیونکہ اوہ فرشتیاں وانگوں ہون گے۔ نالے اوہ خدا دے بچے ہون گے کیونکہ اوہناں نُوں مُردیاں چوں زندہ کیتا جائے گا۔
37 جتھوں تک مُردیاں دے زندہ ہون دی گل اے، موسیٰ نے بلدی جھاڑی والے واقعے چ یہوواہ بارے دَسیا سی کہ اوہ ”ابراہام دا خدا، اِضحاق دا خدا تے یعقوب دا خدا“ اے۔
38 اوہ مُردیاں دا نئیں سگوں زندہ لوکاں دا خدا اے کیونکہ اوہدی نظر چ اوہ سارے زندہ نیں۔“
39 ایہہ سُن کے شریعت دے کجھ عالماں نے کہیا: ”اُستاد، تُوں بالکل صحی کہیا۔“
40 ایہدے بعد اوہناں نے یسوع کولوں کوئی ہور سوال کرن دی جرأت نہ کیتی۔
41 فیر یسوع نے اوہناں نُوں پچھیا: ”لوک ایہہ کیوں کہندے نیں کہ مسیح داؤد دا پُتر اے؟
42 جد کہ داؤد نے آپ زبوراں وچ کہیا: ”یہوواہ نے میرے مالک نُوں کہیا کہ ”تُوں اوہدوں تک میرے سجے ہتھ بہہ
43 جدوں تک مَیں تیرے دُشمناں نُوں تیرے پیراں دی چونکی نہ بنا دَواں۔““
44 داؤد آپ اوہنوں مالک کہندا اے تے فیر اوہ اوہدا پُتر کیویں ہویا؟“
45 فیر جدوں سارے لوک یسوع دِیاں گلاں سُن رہے سن تے اوہنے اپنے شاگرداں نُوں کہیا:
46 ”شریعت دے عالماں توں خبردار رہوو جیہڑے لمے لمے چوغے پا کے پھرنا پسند کردے نیں تے چاہندے نیں کہ بازاراں چ لوک اوہناں نُوں سلام کرن۔ اوہ عبادتگاہ چ سب توں اَگے تے دعوتاں چ خاص تھانواں تے بیہنا پسند کردے نیں۔
47 اوہ بیوہ عورتاں دے گھراں* نُوں ہڑپ لیندے نیں تے دِکھاوے لئی لمیاں لمیاں دُعاواں کردے نیں۔ ایس لئی اوہناں نُوں ہور وی سخت سزا ملے گی۔“
فٹ نوٹ
^ یاں، ”ڈُبکی۔“
^ یونانی چ: ”اسمان توں۔“
^ یونانی چ: ”قیصر۔“
^ اِک رومی سِکّہ۔
^ یونانی چ: ”قیصر۔“
^ یونانی چ: ”قیصر۔“
^ یونانی چ: ”آدمی ویاہ کردے نیں تے عورتاں ویائیاں جاندیاں نیں۔“
^ یونانی چ: ”آدمی ویاہ نئیں کرن گے تے عورتاں ویائیاں نئیں جان گیاں۔“
^ یاں، ”جائیداد۔“
