لُوقا دی اِنجیل 21:1-38
21 یسوع نے ویکھیا کہ امیر لوک ہیکل دے ہدیے دے ڈبیاں چ پیسے پا رہے نیں۔
2 فیر اوہنے اِک غریب بیوہ نُوں ویکھیا جنہے دو چھوٹے سِکّے* پائے جنہاں دی قیمت بوہت ای گھٹ سی۔
3 یسوع نے کہیا: ”مَیں توانوں سچ کہنا واں، ایس غریب بیوہ نے ساریاں نالوں بوہتا ہدیہ پایا اے
4 کیونکہ ساریاں نے اپنے وادھو پیسیاں چوں کجھ پایا۔ پر ایس غریب بیوہ کول اپنے گزارے لئی جو کجھ وی سی، اوہنے اوہ سارے دا سارا پا دِتا۔“
5 بعد چ کجھ لوک گل کر رہے سن کہ ہیکل نُوں کِنّے سوہنے سوہنے پتھراں تے اوہناں چیزاں نال سجایا گیا اے جیہڑیاں خدا لئی دِتیاں گئیاں نیں۔
6 یسوع نے کہیا: ”اوہ وقت آئے گا جدوں ایہہ ساریاں چیزاں جیہڑیاں تُسی ویکھ رہے او، ڈھا دِتیاں جان گیاں تے پتھر اُتے پتھر وی باقی نئیں رہوے گا۔“
7 اوہناں نے اوہنوں پچھیا: ”اُستاد، ایہہ ساریاں گلاں کدوں ہون گیاں تے اوس ویلے دی کیہہ نشانی ہوئے گی جدوں ایہہ سب کجھ ہوئے گا؟“
8 اوہنے کہیا: ”خبردار رہوو کہ تُسی گمراہ نہ ہو جاؤ کیونکہ میرے ناں توں بتھیرے آن گے تے کہن گے: ”مَیں اوہی* آں،“ تے ”اوہ ویلا نیڑے وے،“ پر تُسی اوہناں دے مغر نہ جانا۔
9 نالے جدوں تُسی لڑائیاں تے فساد* دِیاں خبراں سُنو گے تے ڈر نہ جانا کیونکہ پہلاں ایہہ سب کجھ ہونا لازمی اے۔ پر خاتمہ فوراً نئیں آئے گا۔“
10 فیر اوہنے اوہناں نُوں کہیا: ”اِک قوم دُوجی قوم اُتے تے اِک حکومت دُوجی حکومت اُتے حملہ کرے گی۔
11 وڈے وڈے زلزلے آن گے تے تھاں تھاں کال پین گے تے بیماریاں* پھیلن گیاں۔ نالے خوفناک منظر تے اسمان توں وڈیاں وڈیاں نشانیاں نظر آن گیاں۔
12 پر ایہہ ساریاں گلاں ہون توں پہلاں لوک توانوں پھڑن گے تے تواڈے تے ظلم کرن گے۔ اوہ توانوں عبادت گاہواں دے رہنماواں دے حوالے کرن گے تے قید چ پان گے۔ میرے ناں دی وجہ توں توانوں بادشاہواں تے حاکماں دے سامنے پیش کیتا جائے گا۔
13 پر اِنج توانوں گواہی دین دا موقع ملے گا۔
14 ایس لئی پکا ارادہ کر لوو کہ تُسی پہلاں توں ای زبانی ایہہ یاد نئیں کرو گے کہ تُسی اپنی صفائی چ کیہہ کیہہ کہنا اے
15 کیونکہ مَیں توانوں ایہو جہے لفظ تے ایہو جہی حکمت بخشاں گا جدا تواڈے سارے دُشمن کٹھے ہو کے وی مقابلہ نئیں کر سکن گے تے نہ ای اوہنوں غلط ثابت کر سکن گے۔
16 ایہدے علاوہ تواڈے ماں پیو، بھرا، رشتےدار تے دوست توانوں گِرفتار* کران گے تے تواڈے وچوں کجھ نُوں جانوں مار دین گے۔
17 میرے ناں دی وجہ توں سارے لوک تواڈے توں نفرت کرن گے۔
18 پر تواڈے سِر دے اِک وال نُوں وی نقصان نئیں ہوئے گا۔
19 تُسی آخر تک صبر نال برداشت کر کے اپنی جان بچا سکو گے۔
20 پر جدوں تُسی ویکھو کہ فوجاں نے یروشلم نُوں گھیر لیا اے تے سمجھ جانا کہ اوہدی تباہی دا ویلا نیڑے آ گیا اے۔
21 اوہدوں جیہڑے یہودیہ چ ہون، اوہ پہاڑاں وَل بھج جان۔ جیہڑے یروشلم دے اندر ہون، اوہ ایہدے چوں نکل جان تے جیہڑے باہر ہون، اوہ اندر نہ آن
22 کیونکہ اوہناں دِناں چ خدا لوکاں دی عدالت* کرے گا تاکہ پاک کلام چ لکھیاں ساریاں گلاں پوریاں ہون۔
23 اوس زمانے دِیاں حاملہ عورتاں تے دودھ پیان والیاں ماواں تے افسوس کیونکہ ایس علاقے تے سخت مصیبت آئے گی تے ایہدے لوکاں تے قہر نازل ہوئے گا۔
24 اوہناں نُوں تلوار نال ماریا جائے گا تے غلام بنا کے ساریاں قوماں چ کھڑیا جائے گا تے قوماں* اوہدوں تک یروشلم نُوں پیراں تھلے مِدن گیاں جدوں تک قوماں دا طے کیتا ہویا ویلا پورا نئیں ہو جاندا۔
25 نالے سورج، چن تے تاریاں چ نشانیاں نظر آن گیاں تے زمین اُتے قوماں تکلیف دے مارے تڑفن گیاں تے سمندر دِیاں طوفانی لہراں دے شور دی وجہ توں اوہناں نُوں بچن دی کوئی راہ نئیں لبھے گی۔
26 زمین تے آن والیاں مصیبتاں بارے سوچ سوچ کے لوک اینے ڈر جان گے کہ اوہناں دی جان چ جان نئیں رہوے گی کیونکہ اسمان دِیاں طاقتاں ہلائیاں جان گیاں۔
27 فیر اوہ انسان دے بیٹے نُوں اِک بدّل چ بڑے اِختیار تے شان نال آندے ویکھن گے۔
28 پر جدوں ایہہ سارا کجھ ہونا شروع ای ہوئے تے سِر چُک کے سِدھے کھلو جانا کیونکہ تواڈی نجات دا ویلا نیڑے ہوئے گا۔“
29 فیر اوہنے ایہہ مثال وی دِتی: ”اِنجیر دے درخت تے دُوجے ہور درختاں بارے سوچو۔
30 جدوں اوہناں دے پتے نِکلن لگ پیندے نیں تے توانوں پتہ چل جاندا اے کہ گرمی دا موسم نیڑے وے۔
31 ایسے طرحاں جدوں تُسی ایہہ سب کجھ ہوندیاں ویکھو تے سمجھ جانا کہ خدا دی بادشاہی نیڑے وے۔
32 مَیں توانوں سچ کہنا واں کہ ایہہ پُشت اوہدوں تک ختم نئیں ہوئے گی جدوں تک ایہہ ساریاں گلاں پوریاں نہ ہو جان۔
33 اسمان تے زمین مِٹ جان گے، پر میریاں گلاں کدی نئیں مِٹن گیاں۔
34 پر خبردار رہوو* کہ بوہتا کھانا کھان، حدوں ودھ شراب پین تے زندگی دِیاں فکراں دی وجہ توں تواڈے دل بوجھ تھلے دَب نہ جان تے اوہ دن اچانک تواڈے تے
35 اِک پھندے وانگوں نہ آ پووے کیونکہ اوہ دن زمین تے رہن والے سارے انساناں تے آئے گا۔
36 ایس لئی جاگدے رہوو تے ہر ویلے اِلتجا کردے رہوو تاکہ تُسی ایہناں ساریاں گلاں توں بچ جاؤ جیہڑیاں ضرور ہون گیاں تے انسان دے بیٹے دے سامنے کھلو سکو۔“
37 یسوع دن دے ویلے ہیکل چ تلیم دیندا ہوندا سی۔ پر رات نُوں شہر توں باہر زیتون دے پہاڑ* تے رہندا سی۔
38 لوک اوہدیاں گلاں سُنن لئی سویرے سویرے ای ہیکل چ آ جاندے سن۔
فٹ نوٹ
^ یونانی چ: ”2 لپتون۔“ 2 لپتون تقریباً 10 منٹ دی مزدوری ہوندی سی۔
^ یعنی مسیح۔
^ یاں، ”بغاوت۔“
^ یاں، ”وباواں۔“
^ یاں، ”دھوکھادین گے۔“
^ یاں، ”سزا دے گا۔“
^ یاں، ”غیر یہودی قوماں۔“
^ یاں، ”اپنی سوچ تے چال چلن تے نظر رکھو۔“
^ یعنی پہاڑ تے کسے دے گھر جا کے ٹھہردا سی ۔
