لُوقا دی اِنجیل 23:1-56
23 ایس لئی اوہ سارے اُٹھے تے یسوع نُوں پیلاطُس کول لے گئے۔
2 فیر اوہناں نے اوہدے تے ایہہ اِلزام لانے شروع کر دِتے: ”اَسی آپ ویکھیا اے کہ ایہہ بندہ ساڈی قوم نُوں بغاوت کرن تے بھڑکاندا اے، بادشاہ* نُوں ٹیکس دین توں منع کردا اے تے اپنے آپ نُوں بادشاہ تے مسیح کہندا اے۔“
3 فیر پیلاطُس نے یسوع نُوں پچھیا: ”کیہہ تُوں یہودیاں دا بادشاہ ایں؟“ یسوع نے جواب دِتا: ”تُوں آپ ای کہہ دِتا اے۔“
4 فیر پیلاطُس نے وڈے کاہناں تے باقی لوکاں نُوں کہیا: ”میرے خیال چ ایہہ بندہ بےقصور اے۔“
5 پر اوہ کہندے رہے: ”ایہہ بندہ سارے یہودیہ دے لوکاں نُوں اپنی تلیم نال بھڑکاندا اے۔ ایہنے ایہہ کم گلیل توں شروع کیتا سی تے ہُن ایتھے وی آ گیا اے۔“
6 ایہہ سُن کے پیلاطُس نے پچھیا: ”کیہہ ایہہ بندہ گلیل توں اے؟“
7 جدوں پیلاطُس نُوں پتہ چلیا کہ یسوع بادشاہ ہیرودیس دے علاقے توں اے تے اوہنے یسوع نُوں ہیرودیس دے کول گھل دِتا جیہڑا اوس ویلے یروشلم وچ سی۔
8 یسوع نُوں ویکھ کے ہیرودیس بڑا خوش ہویا۔ اوہ کافی عرصے توں یسوع نُوں ملنا چاہندا سی کیونکہ اوہنے اوہدے بارے بوہت کجھ سُنیا سی تے اوہنوں امید سی کہ یسوع کوئی معجزہ کرکے وکھائے گا۔
9 ایس لئی اوہ یسوع کولوں کافی دیر تک پچھگچھ کردا رہیا، پر اوہنے کوئی جواب نہ دِتا۔
10 پر وڈے کاہن تے شریعت دے عالم وار وار اُٹھ کے بڑے غصے چ یسوع تے اِلزام لاندے رہے۔
11 فیر ہیرودیس نے اپنے سپاہیاں نال مِل کے یسوع دی بےعزتی کیتی تے اوہنوں شاندار کپڑے پوا کے اوہدا مذاق اُڈایا تے فیر اوہنوں واپس پیلاطُس کول گھل دِتا۔
12 پہلاں ہیرودیس تے پیلاطُس اِک دُوجے دے دُشمن ہوندے سن۔ پر اوس دن توں اوہناں چ دوستی ہو گئی۔
13 فیر پیلاطُس نے وڈے کاہناں، حاکماں تے لوکاں نُوں بلایا
14 تے اوہناں نُوں کہیا: ”تُسی ایہنوں ایس اِلزام چ میرے کول لیائے او کہ ایہہ لوکاں نُوں بغاوت کرن لئی بھڑکاندا اے۔ ویکھو مَیں تواڈے سامنے ایہدے کولوں پچھگچھ کیتی اے، پر ایہدے تے لائے گئے سارے اِلزام بےبنیاد ثابت ہوئے نیں۔
15 نالے ہیرودیس دی نظر چ وی ایہہ بےقصور اے۔ ایس لئی اوہنے واپس ایہنوں ساڈے کول گھل دِتا اے تے ویکھو، ایہنے ایہو جیہا کوئی کم نئیں کیتا کہ ایہنوں موت دی سزا دِتی جائے۔
16 ایس لئی مَیں ایہنوں کوڑے لوا کے چھڈ دَواں گا۔“
17 —*
18 پر لوک اُچی اُچی کہن لگ پئے: ”مار دے ایس بندے نُوں* تے برابا نُوں چھڈ دے۔“
19 (برابا ایس لئی قید چ سی کیونکہ اوہنے قتل کیتا سی تے شہر دے لوکاں نُوں حکومت دے خلاف بغاوت کرن لئی بھڑکایا سی۔)
20 پیلاطُس نے فیر لوکاں نال گل کیتی کیونکہ اوہ یسوع نُوں چھڈنا چاہندا سی۔
21 پر اوہ اُچی اُچی کہن لگ پئے: ”ایہنوں سُولی تے چڑھا دے! چڑھا دے ایہنوں سُولی تے!“
22 پیلاطُس نے تیجی واری اوہناں توں پچھیا: ”پر کیوں، ایہنے کیہہ جُرم کیتا اے؟ میری نظر چ تے ایہنے ایہو جیہا کوئی کم نئیں کیتا کہ ایہنوں موت دی سزا دِتی جائے۔ ایس لئی مَیں ایہنوں کوڑے لوا کے چھڈ دَواں گا۔“
23 پر اوہناں نے اوہدی بالکل نہ سُنی سگوں ہور وی اُچی اُچی کہن لگ پئے کہ ایہنوں سُولی دِتی جائے۔ اوہناں نے ایناں رولا پایا کہ پیلاطُس نُوں اوہناں دی گل مننی پئی۔
24 ایس لئی اوہنے اوہناں دی منگ دے مطابق یسوع نُوں سزا سُنا دِتی۔
25 اوہنے لوکاں دے کہن تے برابا نُوں چھڈ دِتا جیہڑا حکومت دے خلاف بغاوت کرن تے قتل دے اِلزام چ قید سی۔ پر یسوع نُوں لوکاں دی مرضی مطابق موت دی سزا سُنائی۔
26 جدوں سپاہی یسوع نُوں لجا رہے سن تے اوہناں نُوں کُرینے دا رہن والا اِک بندہ نظر آیا جدا ناں شمعون سی۔ اوہ کھیتاں چوں آ رہیا سی۔ سپاہیاں نے اوہنوں پھڑ کے یسوع دی سُولی اوہدے موڈھیاں اُتے رکھ دِتی تے اوہنوں یسوع دے پچھے پچھے ٹُرن لئی کہیا۔
27 یسوع دے پچھے بوہت سارے لوک جا رہے سن۔ اوہناں چ کجھ عورتاں وی سن جیہڑیاں دُکھ دے مارے رو رو کے اپنی چھاتی پِٹ رہیاں سن تے ماتم کر رہیاں سن۔
28 یسوع نے مُڑ کے اوہناں عورتاں نُوں کہیا: ”یروشلم دی دِھیو، میرے لئی نہ رووو سگوں اپنے لئی تے اپنے بچیاں لئی رووو
29 کیونکہ ویکھو، اوہ دن آ رہے نیں جدوں لوک کہن گے: ”خوش نیں اوہ عورتاں جیہڑیاں بانجھ نیں۔ نالے اوہ عورتاں وی جنہاں نے بچے نئیں جمے تے اوہناں نُوں دودھ نئیں پیایا!“
30 اوہدوں لوک پہاڑاں نُوں کہن گے: ”سانوں لُکا لوو!“ تے پہاڑیاں نُوں کہن گے: ”سانوں ڈھک لوو!“
31 جے اوہ ہُن ایہہ کم کر رہے نیں جدوں درخت ہرا اے تے سوچو اوہ اوس ویلے کیہہ کرن گے جدوں درخت سُک جائے گا؟“
32 یسوع دے نال دو ہور مُجرم وی سن جنہاں نُوں موت دی سزا دین لئی لجایا جا رہیا سی۔
33 جدوں اوہ اوس جگہ پونچے جنہوں ”کھوپڑی“ کہیا جاندا اے تے سپاہیاں نے یسوع نُوں کِلّاں نال سُولی تے ٹنگ دِتا۔ نالے دونواں مُجرماں نُوں وی سُولی تے ٹنگ دِتا، اِک نُوں اوہدے سجے پاسے تے دُوجے نُوں کھبے پاسے۔
34 پر یسوع نے ایہہ دُعا کیتی: ”اَے باپ، ایہناں نُوں معاف کر دے کیونکہ ایہناں نُوں نئیں پتہ کہ ایہہ کیہہ کر رہے نیں۔“ فیر سپاہیاں نے یسوع دے کپڑے آپس چ وَنڈن لئی قرعہ پایا۔
35 اوتھے کھلوتے لوک ایہہ سب کجھ ویکھ رہے سن۔ پر یہودیاں دے رہنما اوہدا مذاق اُڈا رہے سن تے کہہ رہے سن: ”ایہنے دُوجیاں نُوں بچایا تے فیر اپنے آپ نُوں وی بچا کے ثابت کرے کہ ایہہ واقعی خدا دا چُنیا ہویا مسیح اے۔“
36 ایتھوں تک کہ سپاہیاں نے وی اوہدا مذاق اُڈایا تے اوہدے کول آ کے اوہنوں پین لئی کھٹی مے دِتی
37 تے کہیا: ”جے تُوں یہودیاں دا بادشاہ ایں تے فیر بچا اپنے آپ نُوں۔“
38 یسوع دی سُولی تے اِک تختی وی لائی گئی جدے تے لکھیا سی: ”ایہہ یہودیاں دا بادشاہ اے۔“
39 فیر یسوع نال سُولی تے ٹنگے اِک مُجرم نے اوہنوں طعنے ماردے ہوئے کہیا: ”تُوں تے مسیح ایں نا؟ تے فیر اپنے آپ نُوں وی بچا تے سانوں وی۔“
40 پر دُوجے مُجرم نے اوہنوں جِھڑکیا تے کہیا: ”کیہہ تینوں حالے وی خدا دا کوئی خوف نئیں؟ تینوں وی تے اوہی سزا ملی اے جیہڑی ایہنوں ملی اے۔
41 ساڈے نال تے اِنج ہونا وی چاہی دا اے کیونکہ اَسی اپنے کماں دا نتیجہ بھگت رہے آں۔ پر ایس بندے نے کوئی بھیڑا کم نئیں کیتا۔“
42 فیر اوہنے کہیا: ”اَے یسوع، جدوں تُوں بادشاہ بنیں گا* تے مینوں یاد کرِیں۔“
43 یسوع نے اوہنوں کہیا: ”مَیں اَج تیرے نال وعدہ کرنا واں کہ تُوں میرے نال فردوس* چ ہوئیں گا۔“
44 اوس ویلے دوپہر دے کوئی 12 وجے* ہوئے سن۔ پر فیر وی سارے ملک چ نھیرا چھا گیا جیہڑا دوپہر دے تقریباً 3 وجے* تک رہیا
45 کیونکہ سورج دی روشنی نہ رہی۔* فیر ہیکل دا پردہ* اُتوں لے کے تھلے تک پاٹ گیا
46 تے یسوع نے اُچی آواز چ کہیا: ”اَے باپ، مَیں اپنی جان تیرے حوالے کرنا واں۔“* ایہہ کہہ کے اوہنے دم توڑ دِتا۔*
47 ایہہ سب ویکھ کے اِک فوجی افسر خدا دی وڈیائی کرن لگ پیا تے اوہنے کہیا: ”ایہہ واقعی اِک نیک بندہ سی۔“
48 بوہت سارے لوک اوتھے بس ایہہ ویکھن آئے سن کہ یسوع نال کیہہ ہوئے گا۔ پر جدوں اوہناں نے ایہہ ساریاں گلاں ویکھیاں تے اوہ چھاتی پِٹدے ہوئے اپنے گھراں نُوں واپس چلے گئے۔
49 یسوع دے جانن والے کجھ فاصلے تے کھلوتے ہوئے سن۔ نالے جیہڑیاں عورتاں اوہدے نال گلیل توں آئیاں سن، اوہناں نے وی ایہہ سب کجھ ویکھیا۔
50 اوتھے یوسف ناں دا اِک بندہ سی جیہڑا چنگا تے نیک انسان سی۔ اوہ یہودیاں دی وڈی عدالت دا اِک ممبر سی۔
51 (اوہنے عدالت دی ایس* سازش تے کاروائی چ اوہناں دا ساتھ نئیں دِتا سی۔) اوہ یہودیہ دے شہر ارمتیاہ توں سی تے خدا دی بادشاہی دا اِنتظار کر رہیا سی۔
52 اوہنے پیلاطُس کول جا کے یسوع دی لاش منگی۔
53 فیر اوہنے لاش نُوں سُولی توں لا کے ودھیا لیلن دے کپڑے چ لویٹیا تے اوہنوں اوس قبر وچ رکھیا جیہڑی اوہنے چٹان چ بنوائی سی تے جدے چ پہلاں کسے دی لاش نئیں رکھی گئی سی۔
54 ایہہ سبت دی تیاری دا دن سی کیونکہ شام نُوں سبت شروع ہون والا سی۔
55 جیہڑیاں عورتاں یسوع دے نال گلیل توں آئیاں سن، اوہ وی قبر تے ویکھن گئیاں کہ اوہدی لاش نُوں کیویں رکھیا گیا اے۔
56 فیر اوہناں نے واپس جاکے مصالحے تے خوشبودار تیل تیار کیتے۔ پر شریعت دے حکم دے مطابق اوہناں نے سبت دے دن آرام* کیتا۔
فٹ نوٹ
^ یونانی چ: ”قیصر۔“
^ ایہہ ایت کئی پرانے نسخیاں وچ نئیں اے جدا مطلب اے کہ ایہہ اِلہامی کلام دا حصہ نئیں اے۔
^ یونانی چ: ”ایہنوں لے جا۔“
^ یونانی چ: ”جدوں تُوں اپنی بادشاہی چ آئیں گا۔“
^ یعنی عدن دے باغ ورگی سوہنی زمین۔
^ یونانی چ: ”چھیواں گھنٹہ۔“
^ یونانی چ: ”نواں گھنٹہ۔“
^ ایہہ نھیرا سورج گرہن دی وجہ توں نئیں ہویا سی۔ اصل چ ایہہ خدا دا اِک معجزہ سی۔
^ ایہہ پردہ پاک کمرے تے پاک ترین کمرے دے وچکار لگیا ہویا سی۔
^ یونانی چ: ”تیرے ہتھاں وچ سونپنا واں۔“
^ یاں، ”آخری ساہ لیا۔“
^ یعنی یسوع دے خلاف۔
^ یعنی سبت دا دن لنگھن دا اِنتظار کیتا۔
