لُوقا دی اِنجیل 5:1-39
5 اِک واری جدوں یسوع گنیسرت دی جھیل* دے کنارے کھلو کے خدا دے کلام دی تلیم دے رہیا سی تے لوکاں دی اِک وڈی بِھیڑ اوہدیاں گلاں سُن رہی سی تے اوہدے تے ڈِگ دی جا رہی سی۔
2 اوہنوں جھیل دے کنارے دو کشتیاں نظر آئیاں تے مچھیرے اوہناں چوں اُتر کے اپنے جال دھو رہے سن۔
3 یسوع شمعون پطرس دی کشتی چ چڑھ گیا تے اوہنوں کہیا: ”کشتی نُوں کنارے توں ذرا دُور لے جا۔“ فیر یسوع کشتی چ بہہ کے لوکاں نُوں تلیم دین لگ پیا۔
4 تلیم دین توں بعد اوہنے شمعون نُوں کہیا: ”کشتی نُوں ڈُونگے پانی چ لے چل تے مچھیاں پھڑن لئی جال سُٹ۔“
5 پر شمعون نے کہیا: ”اُستاد، اَسی ساری رات بڑی محنت کیتی اے۔ پر اِک وی مچھی ساڈے ہتھ نئیں آئی۔ پر تیرے کہن تے مَیں جال سُٹ دینا واں۔“
6 جدوں اوہناں نے جال سُٹے تے اوہناں چ اینیاں مچھیاں پھس گئیاں کہ جال پاٹن لگ پئے۔
7 ایس لئی اوہناں نے دُوجی کشتی چ اپنے ساتھیاں نُوں اشارہ کر کے بلایا۔ جدوں اوہناں نے آ کے مدد کیتی تے دونویں کشتیاں مچھیاں نال اینیاں بھر گئیاں کہ ڈُبن لگ پئیاں۔
8 ایہہ ویکھ کے شمعون نے یسوع اَگے گوڈے ٹیک کے کہیا: ”مالک، میرے کولوں چلا جا کیونکہ مَیں اِک گُناہگار انسان آں۔“
9 اوہنے ایہہ گل ایس لئی کہی سی کیونکہ اوہ تے اوہدے ساتھی اینیاں ساریاں مچھیاں پھڑن دی وجہ توں ہکے بکے رہ گئے سن۔
10 زبدی دے پُتراں یعقوب تے یوحنا دا وی ایہی حال سی جیہڑے ایس کاروبار چ شمعون دے ساتھی سن۔ پر یسوع نے شمعون نُوں کہیا: ”ڈر نہ، تُوں ہُن توں مچھیاں دی بجائے انساناں نُوں جمع کریں گا۔“
11 ایس لئی اوہ اپنیاں کشتیاں نُوں کنارے تے لیائے تے سب کجھ چھڈ چھڈا کے یسوع دے پچھے ٹُر پئے۔
12 اِک ہو ر موقعے تے جدوں یسوع اِک شہر چ سی تے ویکھو! اوتھے اِک بندہ سی جدا پورا جسم کوڑھ نال بھریا ہویا سی۔ جدوں اوہنے یسوع نُوں ویکھیا تے اوہنے اوہدے سامنے گوڈے ٹیک کے مِنت کیتی: ”مالک، جے تُوں چاہویں تے مینوں ٹھیک* کر سکنا ایں۔“
13 یسوع نے اپنا ہتھ ودھا کے اوہنوں چُھویا تے کہیا: ”ہاں، مَیں چاہنا واں۔ تُوں ٹھیک ہو جا۔“ اوسے ویلے اوہدا کوڑھ غائب ہو گیا۔
14 فیر یسوع نے اوہنوں حکم دِتا کہ اوہ ایہدے بارے کسے نُوں نہ دَسے تے کہیا: ”جا تے اپنے آپ نُوں کاہن نُوں وکھا تے پاک ہون دی وجہ توں موسیٰ دی شریعت دے مطابق نذرانہ پیش کر تاکہ کاہناں نُوں پتہ چل جائے کہ تُوں ٹھیک ہو گیا ایں۔“
15 یسوع بارے خبراں ہر پاسے پھیل دِیاں رہیاں تے بوہت سارے لوک اوہدیاں گلاں سُنن تے اپنیاں بیماریاں توں شفا پان لئی اوہدے کول آندے رہے۔
16 پر اوہ اکثر دُعا کرن لئی ویران تھانواں تے چلا جاندا سی۔
17 اِک دن اوہ اِک گھر چ تلیم دے رہیا سی۔ اوتھے فریسی تے شریعت دے اُستاد وی بیٹھے ہوئے سن جیہڑے گلیل تے یہودیہ دے سارے پِنڈاں تے یروشلم توں آئے سن۔ یہوواہ نے یسوع نُوں بیماراں نُوں شفا دین دی طاقت بخشی سی۔
18 کجھ لوک فالج دے مارے اِک بندے نُوں منجی تے پا کے اوتھے لیائے۔ اوہ اوہنوں یسوع کول اندر لجان دی کوشش کر رہے سن۔
19 پر اوتھے اینے زیادہ لوک سن کہ اوہ اوہنوں اندر نہ لجا سکے۔ ایس لئی اوہ چھت تے چڑھ گئے تے اوہنوں منجی سمیت وڈے سارے مورے وچوں یسوع دے سامنے تھلے اُتار دِتا۔
20 اوہناں دے ایمان نُوں ویکھ کے یسوع نے کہیا: ”پُتر، تیرے گُناہ معاف ہو گئے نیں۔“
21 ایہہ سُن کے شریعت دے عالم تے فریسی اِک دُوجے نُوں کہن لگ پئے: ”خدا دے خلاف کفر بکن والا ایہہ کون اے؟ بھلا خدا دے علاوہ وی کوئی گُناہ معاف کر سکدا اے؟“
22 پر یسوع جان گیا کہ اوہ کیہہ سوچ رہے نیں، ایس لئی اوہنے کہیا: ”تُسی اپنے دل چ کیہہ سوچ رہے او؟
23 تواڈے خیال چ کیہہ کہنا سوکھا اے، ایہہ کہ ”تیرے گُناہ معاف ہو گئے نیں“ یاں ایہہ کہ”اُٹھ تے ٹُر پھر“؟
24 پر مَیں توانوں وکھانا چاہنا واں کہ انسان دے بیٹے نُوں زمین تے گُناہ معاف کرن دا اِختیار دِتا گیا اے۔“ ایس لئی اوہنے فالج دے مارے بندے نُوں کہیا: ”مَیں تینوں کہنا واں اُٹھ، اپنی منجی چُک تے اپنے گھر چلا جا۔“
25 اوہ بندہ فوراً اُٹھ پیا تے اپنی منجی چُک کے خدا دی وڈیائی کردا ہویا اپنے گھر چلا گیا۔
26 ایہہ ویکھ کے سارے لوک بوہت حیران ہوئے تے خوشی نال بھر گئے تے خدا دی وڈیائی کرن لگ پئے۔ اوہ دنگ رہ گئے تے آپس چ کہن لگ پئے: ”اَج اَسی بڑے شاندار کم ویکھے نیں!“
27 ایہدے بعد یسوع باہر گیا تے اوہنے ٹیکس لین والے اِک بندے نُوں ویکھیا جدا ناں لاوی* سی۔ اوہ ٹیکس دی چونکی تے بیٹھا ہویا سی۔ یسوع نے اوہنوں کہیا: ”میرا شاگرد بن جا۔“
28 اوہ اُٹھیا تے سب کجھ چھڈ چھڈا کے اوہدے پچھے ٹُر* پیا۔
29 بعد چ لاوی* نے اپنے گھر چ یسوع لئی اِک بوہت وڈی دعوت رکھی۔ اوتھے بوہت سارے ٹیکس لین والے تے ہور لوک وی سن جیہڑے اوہناں نال کھانا کھا رہے سن۔
30 ایہہ ویکھ کے فریسی تے اوہناں دے ساتھی جیہڑے شریعت دے عالم سن، بُڑبُڑ کرن لگ پئے تے اوہدے شاگرداں نُوں کہیا: ”تُسی ٹیکس لین والیاں تے گُناہگاراں نال کیوں کھاندے پیندے او؟“
31 یسوع نے اوہناں نُوں کہیا: ”تندرست لوکاں نُوں حکیم دی ضرورت نئیں ہوندی سگوں بیماراں نُوں ہوندی اے۔
32 مَیں نیک لوکاں نُوں نئیں سگوں گُناہگاراں نُوں بلان آیا واں تاکہ اوہ توبہ کرن۔“
33 فیر اوہناں نے یسوع نُوں کہیا: ”یوحنا دے شاگرد تے فریسیاں دے شاگرد اکثر روزے رکھدے تے اِلتجاواں کردے نیں جد کہ تیرے شاگرد کھاندے پیندے نیں۔“
34 یسوع نے کہیا: ”جدوں تک لاڑا اپنے دوستاں نال ہوندا اے، کیہہ اوہناں نُوں روزہ رکھن دی لوڑ ہوندی اے؟
35 پر اوہ ویلا آئے گا جدوں لاڑے نُوں اوہناں توں جدا کر دِتا جائے گا۔ فیر اوہ روزہ رکھن گے۔“
36 اوہنے اوہناں نُوں ایہہ مثال وی دِتی: ”کوئی وی نویں کپڑے دی ٹاکی کٹ کے پرانے کپڑے تے نئیں لاندا۔ جے اوہ اِنج کردا اے تے نویں کپڑے دے زور نال پرانا کپڑا پاٹ جاندا اے، نالے نویں کپڑے دی ٹاکی پرانے کپڑے نالوں فرق نظر آندی اے۔
37 نہ ای کوئی نوِیں مے نُوں پرانیاں مشکاں چ رکھدا اے۔ جے اوہ رکھدا اے تے نوِیں مے نال مشکاں پاٹ جاندیاں نیں تے مے ڈُلھ جاندی اے تے مشکاں وی خراب ہو جاندیاں نیں۔
38 ایس لئی نوِیں مے نُوں نوِیاں مشکاں چ رکھنا چاہی دا اے۔
39 جنہے پرانی مے چکھی ہووے اوہ نوِیں مے نئیں پینا چاہندا سگوں کہندا اے: ”پرانی مے دا تے سواد ای کجھ ہور اے۔““
فٹ نوٹ
^ یعنی گلیل دی جھیل۔
^ یاں، ”پاک، صاف۔“
^ یعنی متی۔
^ متی 4:20 دے فٹنوٹ نُوں ویکھو۔
^ یعنی متی۔
