متی دی اِنجیل 21:1-46
21 جدوں اوہ یروشلیم دے نیڑے بیتفگے پونچے جیہڑا زیتون دے پہاڑ تے وے تے یسوع نے اپنے دو شاگرداں نُوں بھیجیا
2 تے کہیا: ”اوہ پِنڈ جیہڑا تُسی سامنے ویکھ رہے او، اوتھے جاؤ۔ وڑھدیاں سار ای توانوں اوتھے اِک کھوتی تے اوہدا بچہ بنھیا ہویا نظر آئے گا۔ اوہناں نُوں کھول کے میرے کول لے آؤ۔
3 جے کوئی توانوں کجھ کہوے تے اوہنوں کہنا کہ ”مالک نُوں ایہناں دی ضرورت اے۔“ فیر اوہ توانوں فوراً اوہناں نُوں کھڑن دَوے گا۔“
4 ایس طرحاں اوہ گل پوری ہوئی جیہڑی نبی دے ذریعے کہی گئی سی کہ
5 ”صیون دی دھی نُوں دَس: ”ویکھ، تیرا بادشاہ تیرے کول آ رہیا اے۔ اوہ بڑا نرم مزاج اے تے اوہ جوان کھوتے یعنی بھار ڈھون والے جانور دے بچے اُتے بہہ کے آ رہیا اے۔““
6 ایس لئی شاگرداں نے جاکے اونویں ای کیتا جیویں یسوع نے کہیا سی۔
7 اوہ کھوتی تے اوہدے بچے نُوں اپنے نال لے آئے تے اپنیاں چادراں اوہناں اُتے پا دِتیاں۔ فیر یسوع کھوتے اُتے بہہ گیا۔
8 بِھیڑ وچوں بوہت سارے لوکاں نے اپنیاں چادراں راہ چ وچھا دِتیاں تے کئیاں نے درختاں دِیاں ٹاہنیاں توڑ کے راہ چ وچھائیاں۔
9 اوہدے اَگے پچھے چلن والے لوک اُچی اُچی کہہ رہے سن: ”ساڈی دُعا اے کہ داؤد دے پُتر نُوں نجات دے! مبارک اے اوہ جیہڑا یہوواہ* دے ناں تے آندا اے! اَے اسمان تے رہن والے خدا، ساڈی دُعا اے کہ اوہنوں نجات دے!“
10 جدوں یسوع یروشلیم چ آیا تے پورے شہر چ رولا پے گیا تے لوک پچھ رہے سن: ”بھئی، ایہہ کون اے؟“
11 جیہڑے لوک یسوع نال سن اوہناں نے کہیا: ”ایہہ یسوع اے، اوہ نبی جیہڑا گلیل دے شہر ناصرت توں اے۔“
12 یسوع ہیکل چ گیا تے اوہنے اوتھوں چیزاں ویچن تے خریدن والے سارے لوکاں نُوں باہر کڈھ دِتا تے پیسے بدلن والیاں دے میز تے کبوتر ویچن والیاں دِیاں چونکیاں اُلٹ دِتیاں۔
13 نالے اوہنے اوہناں نُوں کہیا: ”پاک کلام چ لکھیا اے کہ ”میرے گھر نُوں دُعا دا گھر کہیا جائے گا“ پر تُسی ایہنوں ڈاکوواں دا اڈا بنا دِتا اے۔“
14 فیر کئی اَنھے تے لنگڑے لوک اوہدے کول ہیکل چ آئے تے اوہنے اوہناں نُوں ٹھیک کر دِتا۔
15 جدوں وڈے کاہناں تے شریعت دے عالماں نے اوہدے شاندار کماں نُوں ویکھیا تے مُنڈیاں نُوں ہیکل چ اُچی اُچی ایہہ کہندے سُنیا: ”ساڈی دُعا اے کہ داؤد دے پُتر نُوں نجات دے!“ تے اوہناں نُوں بڑا غصہ آیا
16 تے اوہناں نے یسوع نُوں کہیا: ”تُوں سُن رہیا ایں کہ ایہہ کیہہ کہہ رہے نیں؟“ یسوع نے اوہناں نُوں کہیا: ”ہاں، سُن رہیا واں۔ پر کیہہ تُسی ایہہ نئیں پڑھیا کہ ”تُوں بچیاں تے دودھ پیندے نیانیاں دے موُنہوں اپنی وڈیائی کرائی“؟“
17 فیر اوہ یروشلیم توں بیت عنیاہ چلا گیا تے اوتھے رات رہیا۔
18 سویرے سویرے یروشلیم واپس جاندے ویلے اوہنوں بُھکھ لگی۔
19 راہ چ اوہنوں اِنجیر دا اِک درخت نظر آیا۔ اوہنے اوہدے کول جاکے ویکھیا کہ اوہدے تے بس پتے ای نیں تے پھل کوئی وی نئیں۔ ایس لئی اوہنے درخت نُوں کہیا: ”ہُن توں تیرے تے کوئی پھل نئیں لگے گا۔“ تے اِنجیر دا درخت اوسے ویلے سُک گیا۔
20 ایہہ ویکھ کے شاگرد بڑے حیران ہوئے تے کہن لگ پئے: ”اِنجیر دا درخت اینی چھیتی کیویں سُک گیا؟“
21 یسوع نے اوہناں نُوں کہیا: ”مَیں توانوں سچ کہنا واں کہ جے تُسی ایمان رکھو گے تے شک نئیں کرو گے تے تُسی نہ صرف اوہ کر سکو گے جو مَیں اِنجیر دے درخت نال کیتا سگوں جے ایس پہاڑ نُوں وی کہوو گے کہ ”ایتھوں اُکھڑ کے سمندر چ چلا جا“ تے ایہہ چلا جائے گا۔
22 تے ایمان نال تُسی دُعا چ جو کجھ وی منگو گے اوہ توانوں مِل جائے گا۔“
23 جدوں اوہ ہیکل چ آ کے لوکاں نُوں تلیم دے رہیا سی تے وڈے کاہناں تے بزرگاں نے اوہنوں پچھیا: ”تینوں ایہہ سارے کم کرن دا اِختیار کتھوں ملیا اے؟ کنہے دِتا اے تینوں ایہہ اِختیار؟“
24 یسوع نے اوہناں نُوں کہیا: ”مَیں وی توانوں اِک سوال پچھنا واں جے تُسی جواب دَوو گے تے فیر مَیں وی توانوں دَساں گا کہ مینوں ایہہ سارے کم کرن دا اِختیار کنہے دِتا اے۔
25 مینوں دَسو کہ یوحنا نُوں بپتسمہ دین دا اِختیار کنہے دِتا سی؟ خدا* نے یاں انساناں نے؟“ اوہ سوچن لگ پئے تے اِک دُوجے نُوں کہن لگ پئے: ”جے اَسی کہیا: ”خدا نے“ تے اوہ سانوں کہوے گا: ”تے فیر تُسی اوہدا یقین کیوں نئیں کیتا؟“
26 پر جے اَسی کہیا: ”انساناں نے“ تے لوک سانوں نئیں چھڈن گے کیونکہ اوہ یوحنا نُوں نبی من دے نیں۔“
27 ایس لئی اوہناں نے یسوع نُوں کہیا: ”سانوں نئیں پتہ۔“ یسوع نے اوہناں نُوں کہیا: ”فیر مَیں وی توانوں نئیں دَسدا کہ مینوں ایہہ سارے کم کرن دا اِختیار کنہے دِتا اے۔
28 چلو دَسو تواڈا ایہدے بارے کیہہ خیال اے، اِک آدمی دے دو پُتر سن۔ اوہنے وڈے نُوں کہیا: ”پُتر، اَج تُوں انگوراں دے باغ چ جا کے کم کر۔“
29 اوس پُتر نے کہیا: ”مَیں نئیں جانا۔“ پر فیر بعد چ اوہ پچھتایا تے چلا گیا۔
30 فیر اوہنے اپنے چھوٹے پُتر نُوں اوہی گل کہی۔ اوہنے کہیا: ”جی ابو، مَیں جانا واں۔“ پر اوہ گیا نئیں۔
31 ایہناں دونواں وچوں کنہے اپنے پیو دا کہنا منیا؟“ وڈے کاہناں تے بزرگاں نے کہیا: ”وڈے پُتر نے۔“ فیر یسوع نے اوہناں نُوں کہیا: ”مَیں توانوں سچ کہنا واں کہ ٹیکس لین والے تے طوائفاں خدا دی بادشاہی چ جان لئی تواڈے توں اَگے نکل گئے نیں
32 کیونکہ یوحنا نے آ کے توانوں نیکی دی راہ وکھائی پر تُسی اوہدا یقین نئیں کیتا۔ پر ٹیکس لین والیاں تے طوائفاں نے اوہدا یقین کیتا۔ ایہہ ویکھ کے وی توانوں کوئی پچھتاوا نئیں ہویا تے تُسی یوحنا تے ایمان نئیں لیائے۔
33 ہُن اِک ہور مثال سُنو، اِک زمیندار نے انگوراں دا باغ لا کے اوہدے آلے دوالے واڑھ لائی۔ فیر اوہنے باغ چ اِک بُرج کھڑا کیتا تے انگور پھین لئی اِک جگہ کھودی۔ فیر اوہ باغ ٹھیکےداراں نُوں دے کے آپ کسے ہور ملک چلا گیا۔
34 جدوں انگوراں دا موسم آیاتے اوہنے اپنا حصہ لین لئی اپنے نوکراں نُوں ٹھیکےداراں کول بھیجیا۔
35 ٹھیکےداراں نے اوہدے نوکراں نُوں پھڑ کے اِک نُوں کُٹیا، دُوجے نُوں قتل کر دِتا تے تیجے نُوں پتھر مار مار کے جانوں مار سُٹیا۔
36 فیر مالک نے پہلاں نالوں بوہتے نوکر گھلے۔ پر اوہناں نے اوہناں دا وی اوہی حشر کیتا۔
37 اخیر اوہنے ایہہ سوچ کے اپنے پُتر نُوں گھلیا کہ ”اوہ میرے پُتر دا تے لحاظ کرن گے۔“
38 پر پُتر نُوں ویکھ کے ٹھیکےداراں نے اِک دُوجے نُوں کہیا: ”ایہی جے وارث، آؤ اَسی ایہنوں قتل کر کے باغ تے قبضہ کر لئیے!“
39 ایس لئی اوہ اوہنوں گھسیٹ کے باغ توں باہر لے گئے تے اوہنوں مار دِتا۔
40 ہُن جدوں باغ دا مالک آئے گا تے اوہ ٹھیکےداراں نال کیہہ کرے گا؟“
41 اوہناں نے جواب دِتا: ”اوہ اوہناں بھیڑے ٹھیکےداراں دا بُرا حشر کرے گا تے اوہناں نُوں مار دَوے گا۔ تے باغ دُوجے ٹھیکےداراں نُوں دے دَوے گا جیہڑے انگوراں دا موسم آن تے اوہنوں اوہدا حصہ دین گے۔“
42 یسوع نے اوہناں نُوں کہیا: ”کیہہ تُسی پاک کلام چ نئیں پڑھیا کہ ”جیہڑے پتھر نُوں مستریاں نے ردّ کیتا اوہی کونے دا سب توں خاص پتھر* بن گیا۔ ایہہ یہوواہ* وَلّوں آیا اے تے ساڈیاں نظراں وچ بڑا ای عالیشان اے“؟
43 ایس لئی مَیں توانوں کہنا واں کہ خدا دی بادشاہی تواڈے کولوں لے لئی جائے گی تے اوس قوم نُوں دے دِتی جائے گی جیہڑی خدا دی مرضی دے مطابق کم* کردی اے۔
44 نالے جیہڑا ایس پتھر تے ڈِگے گا، اوہ ٹوٹے ٹوٹے ہو جائے گا تے جدے تے ایہہ پتھر ڈِگے گا، اوہ کُچلیا جائے گا۔“
45 جدوں وڈے کاہناں تے فریسیاں نے اوہدیاں مثالاں سُنیاں تے اوہ سمجھ گئے کہ اوہ اوہناں بارے ای گل کر رہیا اے۔
46 اوہ اوہنوں پھڑنا* چاہندے سن پر لوکاں توں ڈردے سن کیونکہ لوک اوہنوں نبی من دے سن۔
فٹ نوٹ
^ ”لفظاں دی وضاحت“ نُوں ویکھو۔
^ یونانی چ: ”اسمان توں۔“
^ یونانی چ: ”کونے دا سِرا۔“
^ ”لفظاں دی وضاحت“ نُوں ویکھو۔
^ یونانی چ: ”پھل پیدا۔“
^ یاں، ”گِرفتار کرنا۔“
