متی دی اِنجیل 26:1-75
-
یسوع نُوں مارن دی سازش (1-5)
-
یسوع تے خوشبودار تیل پایا جاندا اے (6-13)
-
یسوع دی آخری عیدِفسح (14-25)
-
یسوع دی موت دی یاد منان دا حکم (26-30)
-
پطرس دے اِنکار بارے پیشینگوئی (31-35)
-
گتسمنی چ یسوع دی دُعا (36-46)
-
یسوع دی گِرفتاری (47-56)
-
وڈی عدالت سامنے مُقدمہ (57-68)
-
پطرس یسوع دا اِنکار کردا اے (69-75)
26 جدوں یسوع نے ایہہ گلاں ختم کر لئیاں تے اوہنے اپنے شاگرداں نُوں کہیا:
2 ”توانوں پتہ اے کہ اَج توں دو دن بعد فسح دی عید اے تے انسان دے بیٹے نُوں دُشمناں دے حوالے کیتا جائے گا تاکہ اوہنوں سُولی چڑھا دِتا جائے۔“
3 اوس ویلے وڈے کاہن تے بزرگ، اعلیٰ کاہن یعنی کائفا دے گھر دے ویڑھے چ جمع ہوئے
4 تے اوہ یسوع نُوں دھوکھے نال پھڑ کے* قتل کرن دی سازش کرن لگ پئے۔
5 پر اوہ نال نال ایہہ وی کہہ رہے سن: ”اَسی اوہنوں عید دے موقع تے نئیں پھڑاں گے۔ کِتے لوک ہنگامہ نہ کر دین۔“
6 جدوں یسوع بیتعنیاہ چ اوس شمعون دے گھر سی جیہڑا پہلاں کوڑھی ہوندا سی
7 تے اِک عورت پتھر دی شیشی چ بوہت مہنگا خوشبودار تیل لے کے آئی تے جدوں یسوع کھانا کھان لئی بیٹھا ہویا سی تے اوہ عورت تیل اوہدے سر چ پان لگ پئی۔
8 ایہہ ویکھ کے شاگرد بڑے ناراض ہوئے تے کہن لگ پئے: ”ایس تیل نُوں ضائع کیوں کیتا گیا اے؟
9 جے ایہنوں ویچیا جاندا تے بوہت سارے پیسے مِل سکدے سن تے اوہ غریباں نُوں دِتے جا سکدے سن۔“
10 یسوع نُوں پتہ سی کہ اوہ کیہہ گل کر رہے نیں ایس لئی اوہنے کہیا: ”تُسی ایس عورت نُوں پریشان کیوں کر رہے او؟ ایہنے تے میرے لئی بوہت ودھیا کم کیتا اے۔
11 غریب تے ہمیشاں تواڈے نال ہون گے پر مَیں تواڈے نال ہمیشاں نئیں ہونواں گا۔
12 ایہنے میرے اُتے خوشبودار تیل پا کے میرے جسم نُوں دفنان لئی پہلاں ای تیار کر دِتا اے۔
13 مَیں توانوں سچ کہنا واں کہ ساری دُنیا چ جِتھے کِتے وی خوشخبری دی مُنادی کیتی جائے گی اوتھے ایس عورت دی یاد چ ایہدے ایس کم دا ذکر وی کیتا جائے گا۔“
14 فیر اوہدے 12 رسولاں وچوں اِک یعنی یہوداہ اسکریوتی وڈے کاہناں کول گیا
15 تے اوہناں نُوں کہیا: ”جے مَیں اوہنوں تواڈے حوالے کر دَواں تے تُسی مینوں کیہہ دَوو گے؟“ اوہناں نے وعدہ کیتا کہ اوہ اوہنوں چاندی دے 30 سِکّے دین گے۔
16 اوہدوں توں ای اوہ یسوع نُوں پھڑوان دا صحی موقع لبھن لگ پیا۔
17 بےخمیری روٹی دی عید دے پہلے دن شاگرداں نے آ کے یسوع کولوں پچھیا: ”اَسی تیرے لئی فسح دی عید دا کھانا کتھے تیار کرئیے؟“
18 اوہنے کہیا: ”شہر چ فلانے بندے نُوں جا کے کہنا کہ اُستاد نے کہیا اے: ”میرے مرن دا ویلا* آگیا اے۔ مَیں تیرے گھر چ اپنے شاگرداں نال فسح دی عید منانا چاہنا واں۔““
19 شاگرداں نے یسوع دِیاں ہدیتاں تے عمل کیتا تے فسح دی تیاری کیتی۔
20 جدوں شام ہو گئی تے اوہ تے اوہدے 12 شاگرد میز دے آلے دوالے بہہ گئے
21 تے جدوں اوہ کھانا کھا رہے سن تے اوہنے کہیا: ”مَیں توانوں سچ کہنا واں کہ تواڈے وچوں اِک جناں میرے نال دھوکھا کرے گا۔“
22 ایہہ سُن کے شاگرد بڑے دُکھی ہوئے تے واری واری اوہنوں پچھن لگ پئے: ”مالک، کِتے اوہ مَیں تے نئیں؟“
23 یسوع نے جواب چ کہیا: ”جیہڑا میرے نال اِکو پیالے چ بُرکی ڈبو رہیا اے، اوہی مینوں دھوکھا دَوے گا۔
24 ایہہ گل سچ اے کہ انسان دے بیٹے نے تے جانا ای جانا اے جیویں کہ اوہدے بارے لکھیا گیا اے۔ پر افسوس اوس آدمی تے جیہڑا انسان دے بیٹے نُوں دھوکھا دیندا اے۔ اوس آدمی لئی چنگا ہوندا کہ اوہ پیدا ای نہ ہوندا۔“
25 یہوداہ نے جیہڑا اوہنوں دھوکھا دین والا سی پچھیا: ”اُستاد،* کِتے اوہ بندہ مَیں تے نئیں؟“ یسوع نے اوہنوں کہیا: ”تُوں آپ ای کہہ دِتا اے۔“
26 جدوں اوہ کھانا کھا رہے سن تے یسوع نے اِک روٹی لئی تے دُعا کر کے توڑی تے اپنے شاگرداں نُوں دِتی تے کہیا: ”لو کھاؤ، ایہہ روٹی میرے جسم وَل اشارہ کردی اے۔“
27 فیر اوہنے اِک پیالہ لے کے دُعا کیتی تے اپنے شاگرداں نُوں دے کے کہیا: ”تُسی سارے ایس پیالے وچوں پیو
28 کیونکہ ایہہ میرے خون وَل یعنی عہد دے خون وَل اشارہ کردا اے جیہڑا بوہت سارے لوکاں دے گُناہواں دی معافی لئی دِتا جائے گا۔
29 پر مَیں توانوں کہنا واں کہ ہُن توں مَیں انگوراں دی مے اوس ویلے تک نئیں پیاں گا جدوں تک مَیں اپنے باپ دی بادشاہی چ تواڈے نال نوِیں مے نہ پیاں۔“
30 آخر چ اوہ خدا دی حمد دے گیت* گا کے زیتون دے پہاڑ تے چلے گئے۔
31 فیر یسوع نے اوہناں نُوں کہیا: ”اَج رات میرے نال جو وی ہوئے گا اوہنوں ویکھ کے تُسی میرا ساتھ چھڈ دَوو گے کیونکہ لکھیا ہویا اے: ”مَیں چرواہے نُوں ماراں گا تے اوہدے گلّے دِیاں بھیڈاں ایدھر اودھر وِکھر جان گیاں۔“
32 پر جدوں مینوں زندہ کیتا جائے گا تے مَیں تواڈے توں پہلاں گلیل جانواں گا۔“
33 پر پطرس نے اوہنوں کہیا: ”تیرے نال جو وی ہوئے گا اوہدی وجہ توں بھانویں دُوجے تیرا ساتھ چھڈ دین پر مَیں تیرا ساتھ کدی نئیں چھڈاں گا۔“
34 پر یسوع نے اوہنوں کہیا: ”مَیں تینوں سچ کہنا واں کہ اَج رات کُکڑ دے بانگ دین توں پہلاں تُوں تِن واری مینوں جانن توں اِنکار کریں گا۔“
35 پطرس نے اوہنوں کہیا: ”مَیں تینوں جانن توں اِنکار کدی وی نئیں کراں گا۔ مَیں تیرے نال مرن لئی وی تیار آں۔“ باقی شاگرداں نے وی ایہی کہیا۔
36 فیر یسوع اوہناں نال اوس جگہ تے آیا جدا ناں گتسمنی سی۔ اوہنے اپنے شاگرداں نُوں کہیا: ”تُسی ایتھے بہوو، مَیں ذرا اوتھے جا کے دُعا کر لواں۔“
37 فیر اوہ پطرس تے زبدی دے دونواں پُتراں نُوں اپنے نال لے کے گیا۔ جو کجھ اوہدے نال ہون والا سی اوہدے بارے سوچ کے اوہ بڑا اُداس تے پریشان ہون لگ پیا۔
38 فیر یسوع نے اوہناں نُوں کہیا: ”مَیں ایناں پریشان آں کہ میری حالت مرن والی ہو گئی اے۔ ایتھے ٹھہرو تے میرے نال جاگ دے رہوو۔“
39 فیر اوہ تھوڑا ہور اَگے جاکے گوڈیاں بھار بہہ گیا تے دُعا کرن لگ پیا: ”اَے میرے باپ، جے ہو سکے تے ایہہ پیالہ میرے توں ہٹا دے۔ پر فیر وی میری نئیں سگوں تیری مرضی پوری ہوئے۔“
40 اوہنے واپس آ کے ویکھیا کہ اوہ تِنے سوں رہے نیں تے اوہنے پطرس نُوں کہیا: ”کیہہ تُسی میرے نال اِک گھنٹہ وی نئیں جاگ سکے؟
41 جاگدے رہوو تے دُعا کردے رہوو تاکہ تُسی کسے اَزمیش چ نہ پووو۔ بےشک دل* تے تیار اے، پر جسم کمزور اے۔“
42 فیر یسوع نے دُوجی وار جا کے دُعا کیتی: ”اَے باپ، جے ایہہ پیالہ میرے توں نئیں ہٹ سکدا تے جے مینوں ایہہ پینا ای پووے گا تے فیر تیری مرضی پوری ہووے۔“
43 اوہنے فیر واپس آ کے ویکھیا تے اوہ سُتے ہوئے سن کیونکہ اوہناں دِیاں اَکھاں نیندر نال بھریاں ہوئیاں سن۔
44 ایس لئی یسوع اوہناں نُوں چھڈ کے چلا گیا تے تیجی وار وی اوہنے اوہی دُعا کیتی جیہڑی پہلاں کیتی سی۔
45 فیر اوہ شاگرداں کول واپس آیا تے اوہناں نُوں کہیا: ”تُسی اینے اہم ویلے تے سوں رہے او تے آرام کر رہے او! ویکھو! انسان دے بیٹے نُوں دھوکھے نال گُناہگاراں دے حوالے کرن دی گھڑی آ گئی اے۔
46 اُٹھو چلئے۔ ویکھو! مینوں دھوکھے نال پھڑوان والا آگیا اے۔“
47 یسوع حالے ایہہ گل کہہ ای رہیا سی، تے ویکھو! یہوداہ آگیا جیہڑا 12 رسولاں وچوں اِک سی تے اوہدے نال بوہت سارے لوک وی سن جنہاں نے ہتھاں چ تلواراں تے ڈانگاں پھڑیاں ہوئیاں سن۔ اوہناں نُوں وڈے کاہناں تے بزرگاں نے گھلیا سی۔
48 اوس دھوکھےباز نے اوہناں نُوں ایہہ نشانی دِتی ہوئی سی: ”جنہوں مَیں چُماں گا اوہی یسوع ہوئے گا۔ اوہنوں گِرفتار کر لینا۔“
49 اوہ سِدھا یسوع کول گیا تے اوہنوں کہیا: ”سلام، اُستاد!“ تے فیر اوہنوں چُمیا۔
50 پر یسوع نے اوہنوں پچھیا: ”تُوں ایتھے کیہہ کرن آیا ایں؟“ فیر لوک اَگے آئے تے یسوع نُوں پھڑ کے گِرفتار کر لیا۔
51 پر ویکھو! یسوع دے ساتھیاں وچوں اِک نے اپنی تلوار کڈھی تے اعلیٰ کاہن دے غلام دا کن لا دِتا۔
52 پر یسوع نے اوہنوں کہیا: ”اپنی تلوار واپس رکھ لے کیونکہ جیہڑے تلوار چلاندے نیں، اوہناں نُوں تلوار نال ای ماریا جائے گا۔
53 کیہہ تیرے خیال چ مَیں اپنے باپ نُوں ایہہ درخاست نئیں کر سکدا کہ اوہ ہُنے ای میرے لئی فرشتیاں دِیاں 12 توں وی زیادہ پلٹناں* بھیج دَوے؟
54 جے مَیں اِنج کراں تے فیر کلام دِیاں اوہ پیشینگوئیاں کیویں پوریاں ہون گیاں جنہاں دے مطابق اِنج ہونا ضروری اے؟“
55 ایہدے بعد یسوع نے اوہناں لوکاں نُوں کہیا: ”کیہہ مَیں کوئی ڈاکو آں جیہڑا تُسی مینوں تلواراں تے ڈانگاں نال پھڑن آئے او؟ مَیں ہر روز ہیکل چ بہہ کے تلیم دینا ہُنا ساں اوہدوں تے تُسی مینوں نئیں پھڑیا۔
56 پر ایہہ سب کجھ ایس لئی ہویا تاکہ نبیاں دِیاں لکھیاں ہوئیاں گلاں پوریاں ہون۔“ فیر سارے شاگرد یسوع نُوں چھڈ کے بھج گئے۔
57 یسوع نُوں گِرفتار کرن والے لوک اوہنوں اعلیٰ کاہن کائفا دے گھر لے گئے جِتھے شریعت دے عالم تے بزرگ جمع سن۔
58 پر پطرس تھوڑا دُور رہ کے یسوع دے پچھے پچھے اعلیٰ کاہن دے گھر تک پونچ گیا تے فیر اندر جاکے ویڑھے چ نوکراں نال بہہ گیا تاکہ ویکھے کہ یسوع نال کیہہ ہوندا اے۔
59 اوس ویلے وڈے کاہناں تے وڈی عدالت نے یسوع نُوں جانوں مارن لئی اوہدے خلاف جھوٹھیاں گواہیاں لبھنیاں شروع کر دِتیاں۔
60 بھانویں کہ بوہت سارے جھوٹھے گواہ آئے پر یسوع دے خلاف کوئی گواہی نہ ملی۔ فیر بعد چوں دو گواہ سامنے آئے
61 تے اوہناں نے کہیا: ”ایس آدمی نے کہیا سی کہ ”مَیں خدا دی ہیکل ڈھا کے تِن دِناں چ دُبارہ بنا سکنا واں۔““
62 ایہہ سُن کے اعلیٰ کاہن کھلو گیا تے یسوع نُوں پچھیا: ”کیہہ تُوں اپنی صفائی چ کجھ نئیں کہنا چاہندا؟ کیہہ تُوں سُن نئیں رہیا کہ ایہہ تیرے اُتے کیہہ کیہہ اِلزام لا رہے نیں؟“
63 پر یسوع چپ رہیا۔ ایس لئی اعلیٰ کاہن نے اوہنوں کہیا: ”تینوں زندہ خدا دی قسم، جے تُوں خدا دا پُتر یعنی مسیح ایں تے سانوں دَس۔“
64 یسوع نے اوہنوں کہیا: ”تُوں آپ ای کہہ دِتا اے۔ پر مَیں توانوں کہنا واں کہ اَج توں بعد تُسی انسان دے بیٹے نُوں طاقتور خدا دے سجے ہتھ بیٹھیاں تے اسمان دے بدّلاں اُتے آندیاں ویکھو گے۔“
65 ایہہ سُن کے اعلیٰ کاہن نے اپنے کپڑے پاڑے تے کہیا: ”ایس آدمی نے کفرُ بکیا اے۔ ہُن سانوں گواہواں دی کیہہ لوڑ اے؟ تُسی آپ سُن لیا اے کہ ایہنے کفرُ بکیا اے۔
66 ہُن تواڈا کیہہ خیال اے؟“ اوہناں نے جواب دِتا: ”ایہہ موت دی سزا دے لائق اے۔“
67 فیر اوہناں نے اوہدے مُونہہ تے تھکیا تے اوہنوں مکے مارے تے کئیاں نے اوہدے مُونہہ تے چنڈاں ماریاں
68 تے کہیا: ”اوئے وڈے مسیحیا، جے تُوں واقعی نبی ایں تے دَس کہ تینوں کنہے ماریا اے؟“
69 پطرس حالے وی باہر ویڑھے چ بیٹھا ہویا سی۔ اِک نوکرانی اوہدے کول آئی تے اوہنوں کہیا: ”تُوں وی اوس یسوع نال سیں جیہڑا گلیل توں اے۔“
70 پر اوہنے ساریاں دے سامنے ایس گل توں اِنکار کردے ہوئیاں کہیا: ”مینوں نئیں پتہ تُوں کیہہ کہہ رہی ایں۔“
71 جدوں اوہ باہر ڈیوڑھی وچ چلا گیا تے اِک ہور کُڑی نے اوہنوں ویکھ کے اوتھے کھلوتے ہوئے لوکاں نُوں کہیا: ”ایہہ وی اوس یسوع ناصری نال سی۔“
72 پطرس نے قسم کھا کے دُبارہ اِنکار کیتا تے کہیا: ”مَیں اوس بندے نُوں نئیں جان دا۔“
73 تھوڑی دیر بعد اوتھے کھلوتے لوکاں نے پطرس کول آ کے کہیا: ”تُوں پکا اوہناں دا ساتھی ایں۔ تُوں تے بولنا وی گلیلیاں وانگوں ایں۔“*
74 فیر پطرس اپنے تے لعنتاں پان لگ پیا تے قسم کھا کے کہن لگ پیا: ”مَیں واقعی اوس آدمی نُوں نئیں جان دا۔“ اوسے ویلے کُکڑ نے بانگ دے دِتی۔
75 اوہدوں پطرس نُوں یاد آیا کہ یسوع نے اوہنوں کہیا سی کہ ”کُکڑ دے بانگ دین توں پہلاں تُوں تِن وار مینوں جانن توں اِنکار کریں گا۔“ فیر اوہ باہر جا کے پُھٹ پُھٹ کے رون لگ پیا۔
فٹ نوٹ
^ یاں، ”گِرفتار کر کے۔“
^ یاں، ”طے کیتا ہویا ویلا۔“
^ یعنی ربّی۔ (ایہہ اِک عبرانی لقب اے جیہڑا یہودی اُستاد لئی استمال ہوندا اے۔)
^ یاں، ”زبور۔“
^ یونانی چ: ”روح۔“
^ یونانی چ: ”لگیون۔ “(رومی فوج دے اِک لگیون چ تقریباً 4 توں 6 ہزار فوجی ہوندے سن۔)
^ یاں، ”تیرا تے لہجہ وی گلیلیاں ورگا اے۔“
