متی دی اِنجیل 27:1-66
-
یسوع نُوں پیلاطُس دے حوالے کیتا جاندا اے (1، 2)
-
یہوداہ خودکُشی کردا اے (3-10)
-
پیلاطُس دے سامنے یسوع دی پیشی (11-26)
-
یسوع دا مخول اُڈایا جاندا اے (27-31)
-
یسوع نُوں گلگتا چ سُولی دِتی جاندی اے (32-44)
-
یسوع دی موت (45-56)
-
یسوع دا کفن دفن (57-61)
-
یسوع دی قبر تے پہرا (62-66)
27 جدوں سویر ہوئی تے سارے وڈے کاہن تے بزرگ کٹھے ہوئے تاکہ یسوع نُوں مارن لئی صلاح مشورہ کر سکن۔
2 فیر اوہ یسوع نُوں بنھ کے لے گئے تے اوہنوں یہودیہ دے حاکم پیلاطُس دے حوالے کر دِتا۔
3 جدوں یسوع نُوں دھوکھے نال پھڑوان والے یہوداہ نے ویکھیا کہ یسوع نُوں قصوروار ٹھہرایا گیا اے تے اوہ بڑا پچھتایا۔ ایس لئی اوہ چاندی دے 30 سِکّے واپس کرن لئی وڈے کاہناں تے بزرگاں کول آیا
4 تے کہیا: ”مَیں اِک بےقصور آدمی نُوں تواڈے حوالے کر کے* گُناہ کیتا اے۔“ اوہناں نے کہیا: ”سانوں کیہہ، تُوں جانیں تے تیرا کم جانے۔“
5 فیر اوہ چاندی دے سِکّے ہیکل وچ سُٹ کے چلا گیا تے جا کے پھانسی لے لئی۔
6 وڈے کاہناں نے اوہ سِکّے چُک لئے تے کہیا: ”ایہناں نُوں ہیکل دے مُقدس خزانے چ پانا صحی نئیں ہوئے گا کیونکہ ایہہ خون دی قیمت نیں۔“
7 فیر اوہناں نے آپس چ صلاح مشورہ کر کے اوہناں پیسیاں نال اِک کمیار دی زمین خرید لئی تے اوہنوں پردیسیاں لئی اِک قبرستان بنا دِتا۔
8 ایس لئی اَج وی اوس زمین نُوں خون دی زمین کہیا جاندا اے۔
9 ایس طرحاں یرمیاہ نبی دی کہی ایہہ گل پوری ہوئی: ”اوہناں نے چاندی دے 30 سِکّے لئے۔ ایہہ اصل چ اوہ قیمت سی جیہڑی اِسرائیل دے کجھ پُتراں نے اوہدے لئی ٹھہرائی سی
10 تے اوہناں سِکّیاں دے نال اوہناں نے کمیار دی زمین خرید لئی جیویں کہ یہوواہ* نے مینوں حکم دِتا سی۔“
11 جدوں یسوع حاکم پیلاطُس دے سامنے آیا تے اوہنے یسوع نُوں پچھیا: ”کیہہ تُوں یہودیاں دا بادشاہ ایں؟“ یسوع نے جواب دِتا: ”تُوں آپ ای کہہ دِتا اے۔“
12 پر جدوں وڈے کاہناں تے بزرگاں نے اوہدے اُتے اِلزام لائے تے اوہنے کوئی جواب نہ دِتا۔
13 فیر پیلاطُس نے اوہنوں کہیا: ”کیہہ تُوں سُن نئیں رہیا کہ اوہ تیرے تے کِنّے اِلزام لا رہے نیں؟“
14 پر یسوع نے اوہنوں کوئی جواب نہ دِتا جدی وجہ توں پیلاطُس بڑا حیران ہویا۔
15 ہر فسح دی عید تے حاکم اوس قیدی نُوں رِہا کردا ہوندا سی جنہوں لوک رِہا کروانا چاہندے سن۔
16 اوس ویلے جیل چ اِک بدنام قیدی سی جدا ناں برابا سی۔
17 ایس لئی جدوں لوک پیلاطُس دے سامنے کٹھے ہوئے تے اوہنے اوہناں نُوں پچھیا: ”مَیں تواڈے لئی کِنہوں رِہا کراں برابا نُوں یاں یسوع نُوں جنہوں مسیح کہیا جاندا اے؟“
18 پیلاطُس نُوں پتہ سی کہ لوک یسوع نال کھار کھاندے نیں ایسے لئی اوہناں نے اوہنوں پھڑوایا اے۔
19 ایہدے علاوہ جدوں پیلاطُس معاملہ نبیڑن لئی اِنصاف دی کُرسی تے بیٹھا ہویا سی تے اوہدی بیوی نے اوہنوں ایہہ پیغام گھلیا سی: ”اوس نیک آدمی دے معاملے چ نہ پووِیں کیونکہ اَج مَیں اوہدے بارے اِک خواب ویکھیا اے جنہے مینوں بڑا پریشان کیتا ہویا اے۔“
20 پر وڈے کاہناں تے بزرگاں نے لوکاں نُوں ہلاشیری دِتی کہ اوہ پیلاطُس کولوں منگ کرن کہ اوہ برابا نُوں چھڈ دَوے تے یسوع نُوں مار دَوے۔
21 پیلاطُس نے اوہناں نُوں دُبارہ پچھیا: ”مَیں تواڈے لئی ایہناں دونواں وچوں کِنہوں رہا کراں؟“ اوہناں نے کہیا: ”برابا نُوں۔“
22 پیلاطُس نے اوہناں نُوں کہیا: ”فیر مَیں یسوع نال کیہہ کراں جنہوں مسیح کہیا جاندا اے؟“ اوہناں ساریاں نے کہیا: ”اوہنوں سُولی تے چڑھا دے۔“
23 پیلاطُس نے کہیا: ”پر کیوں؟ اوہنے کیہہ جُرم کیتا اے؟“ پر اوہ ہور وی اُچی اُچی کہن لگے پئے: ”اوہنوں سُولی تے چڑھا دے۔“
24 جدوں پیلاطُس نے ویکھیا کہ اوہدی گل دا کوئی فائدہ نئیں ہو رہیا سگوں لوک ہور رولا پان لگ پئے نیں تے اوہنے پانی منگوایا تے ساریاں دے سامنے اپنے ہتھ دھو کے کہیا: ”مَیں ایس آدمی دے خون توں بَری آں۔ تُسی آپ ای ایہدے ذمےدار او۔“
25 ایہہ سُن کے سارے لوکاں نے کہیا: ”ایہدا خون ساڈے تے ساڈی اولاد دے سِر تے پووے۔“
26 فیر اوہنے برابا نُوں رِہا کر دِتا تے یسوع نُوں کوڑے لوا کے سُولی تے ٹنگن لئی سپاہیاں دے حوالے کر دِتا۔
27 ایہدے بعد سپاہی اوہنوں حاکم دے محل چ لے گئے تے اپنی ساری پلٹن نُوں اوہدے آلے دوالے کٹھا کر لیا۔
28 اوہناں نے یسوع دے کپڑے لا کے اوہنوں گُوڑھے لال رنگ دا چوغہ پوایا
29 تے کنڈیاں دا اِک تاج بنا کے اوہدے سِر تے رکھ دِتا تے اوہدے سجے ہتھ چ اِک کانا پھڑا دِتا۔ فیر اوہ اوہدا مخول اُڈان لگ پئے تے اوہدے سامنے گوڈے ٹیک کے کہن لگ پئے: ”یہودیاں دے بادشاہ، سلام!“
30 اوہناں نے اوہدے تے تھکیا تے کانا لے کے اوہدے سِر تے مارن لگ پئے۔
31 اوہدا مخول اُڈان توں بعد اوہناں نے اوہدا چوغہ لوا کے اوہنوں اوہدے کپڑے پووا دِتے تے اوہنوں سُولی تے چڑھان لئی لے گئے۔
32 جدوں اوہ یسوع نُوں لجا رہے سن تے اوہناں نُوں راہ چ کُرینے دا اِک بندہ ملیا جدا ناں شمعون سی۔ اوہناں نے اوہدے توں زبردستی یسوع دی سوُلی چکوائی۔
33 فیر اوہ اوس جگہ تے پونچے جدا ناں گلگتا یعنی کھوپڑی سی۔
34 اوتھے اوہناں نے یسوع نُوں مے دِتی جدے چ کوئی کوڑی شے ملی ہوئی سی۔ پر اوہنے چکھن توں بعد اوہنوں پین توں انکار کر دِتا۔
35 جدوں سپاہیاں نے اوہنوں کِلّاں نال سُولی تے ٹنگ دِتا تے اوہناں نے قُرعہ* پا کے اوہدے کپڑے آپس چ وَنڈ لئے
36 تے فیر اوہدے کول بہہ کے پہرا دین لگ پئے۔
37 اوہناں نے سُولی اُتے اِک تختی وی لا دِتی جدے تے ایہہ اِلزام لکھیا سی: ”ایہہ یہودیاں دا بادشاہ یسوع اے۔“
38 فیر یسوع دے نال دو ڈاکوؤاں نُوں وی سُولی چڑھایا گیا۔ اِک نُوں اوہدے سجے پاسے تے دُوجے نُوں کھبے پاسے۔
39 اوتھوں لنگھن والے لوک اوہدی بےعزتی کر رہے سن تے سِر ہلا ہلا کے
40 کہہ رہے سن: ”تُوں تے کہنا سیں کہ مَیں ہیکل نُوں ڈھا سکنا واں تے تِن دِناں چ اوہنوں بنا وی سکنا واں۔ ہُن اپنے آپ نُوں بچا۔ جے تُوں واقعی خدا دا پُتر ایں تے سُولی توں تھلے اُتر کے وکھا۔“
41 ایہدے علاوہ وڈے کاہن، شریعت دے عالم تے بزرگ وی یسوع دا مخول اُڈان لگ پئے تے اوہنوں کہن لگ پئے:
42 ”ایہنے دُوجیاں نُوں تے بچایا پر اپنے آپ نُوں نئیں بچا سکدا۔ ایہہ تے اِسرائیل دا بادشاہ اے۔ جے ایہہ سُولی توں اُتر کے وکھائے تے اَسی ایہدے تے ایمان لے آواں گے۔
43 ایہدا بھروسا تے خدا تے وے جے خدا واقعی ایہدے توں خوش اے تے اوہی ایہنوں بچائے گا کیونکہ ایہنے آپ کہیا سی کہ ”مَیں خدا دا پُتر آں۔““
44 جیہڑے ڈاکوؤاں نُوں اوہدے نال سُولی چڑھایا گیا سی اوہ وی اوہدی بےعزتی کر رہے سن۔
45 فیر دوپہر 12 وجے* توں لے کے 3 وجے* تک سارے ملک چ نھیرا چھا گیا۔
46 تقریباً 3 وجے یسوع نے اُچی آواز چ کہیا: ”ایلی، ایلی، لما شبقتنی؟“ جدا مطلب اے: ”میرے خدا، میرے خدا، تُوں مینوں کیوں چھڈ دِتا؟“
47 ایہہ سُن کے اوتھے کھلوتے کجھ لوکاں نے کہیا: ”ایہہ ایلیاہ نُوں بلا رہیا اے۔“
48 اوسے ویلے اوہناں وچوں اِک بندہ بھج کے گیا تے اِک سپنج نُوں کھٹی مے وچ ڈبو کے لیایا تے اوہنوں اِک کانے اُتے لا کے یسوع نُوں پین لئی دِتا۔
49 پر باقیاں نے اوہنوں کہیا: ”رہن دے، ویکھنے آں کہ ایلیاہ ایہنوں بچان لئی آندا اے کہ نئیں۔“
50 یسوع نے اِک وار فیر اُچی آواز چ خدا نُوں پکاریا تے دم توڑ دِتا۔
51 تے ویکھو! ہیکل دا پردا اُتوں لے کے تھلے تک پاٹ گیا تے اوہدے دو حصے ہو گئے۔ نالے زلزلہ وی آیا تے چٹاناں پاٹ گئیاں۔
52 قبراں وی کُھل گئیاں تے بوہت سارے نیک لوکاں دِیاں لاشاں باہر نکل آئیاں
53 تے کئی لوکاں نے اوہناں لاشاں نُوں ویکھیا۔ (یسوع دے زندہ ہون دے بعد بوہت سارے لوک قبرستان توں مُقدس شہر چ آئے۔)
54 جدوں یسوع اُتے پہرا دین والے سپاہیاں تے اوہناں دے افسر نے زلزلے تے باقی ساریاں گلاں نُوں ویکھیا تے اوہ بوہت ڈر گئے تے کہن لگ پئے: ”ایہہ واقعی خدا دا پُتر سی۔“
55 بوہت ساریاں عورتاں وی دُور کھلوتیاں ایہہ سب کجھ ویکھ رہیاں سن۔ اوہ گلیل توں یسوع نال اوہدی خدمت کرن آئیاں سن۔
56 ایہناں عورتاں چ مریم مگدلینی تے یعقوب تے یوسیس دی ماں مریم تے زبدی دے پُتراں دی ماں وی شامل سی۔
57 جدوں شام ہوئی تے ارمتیاہ دا رہن والا اِک امیر آدمی آیا جدا ناں یوسف سی۔ اوہ وی یسوع دا شاگرد سی۔
58 اوہنے پیلا طُس کول جاکے یسوع دی لاش منگی۔ پیلاطُس نے حکم دِتا کہ لاش اوہنوں دے دِتی جائے۔
59 یوسف نے یسوع دی لاش نُوں صاف ستھرے تے ودھیا لیلن دے کپڑے چ لپیٹیا
60 تے اوہنوں اِک نوِیں قبر وچ رکھیا جیہڑی اوہنے چٹان نُوں تراش کے اپنے لئی بنوائی سی۔ فیر اِک وڈا جیہا پتھر قبر دے مُونہہ اَگے رکھ کے اوہ اوتھوں چلا گیا۔
61 پر مریم مگدلینی تے دُوجی مریم قبر دے سامنے بیٹھیاں رہیاں۔
62 ایہہ ساریاں گلاں سبت دی تیاری والے دن ہوئیاں۔ ایہدے اگلے دن وڈے کاہن تے فریسی پیلاطُس کول آئے
63 تے اوہنوں کہیا: ”حضور، سانوں یاد اے کہ اوس دھوکھےباز نے اپنے جیوندے جی کہیا سی کہ ”مینوں تِن دِناں بعد زندہ کر دِتا جائے گا۔“
64 ایس لئی تِن دِناں تک قبر اُتے کڑی نگرانی رکھن دا حکم دَوو۔ کِتے ایہہ نہ ہوئے کہ اوہدے شاگرد اوہدی لاش چوری کر کے لے جان تے لوکاں نُوں کہن کہ ”اوہ مُردیاں چوں زندہ ہو گیا اے۔“ اِنج ایس دُوجے جھوٹھ دا سانوں پہلے جھوٹھ نالوں زیادہ نقصان ہوئے گا۔“
65 پیلاطُس نے اوہناں نُوں کہیا: ”جاؤ، اپنے نال پہرےدار لے جاؤ۔ تے جیویں تواڈا جی کرے قبر تے پہرا لا دیو۔“
66 فیر اوہ قبر تے گئے تے پتھر رکھ کے اوہنوں بند کر دِتا تے اوہدے اَگے پہرےداراں نُوں کھڑا کر دِتا۔
فٹ نوٹ
^ یاں، ”بےقصور آدمی دے خون دا سودا کرکے۔“
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ یونانی چ: ”چھیواں گھنٹہ۔“
^ یونانی چ: ”نوواں گھنٹہ۔“
