مرقس دی اِنجیل 10:1-52
-
ویاہ تے طلاق (1-12)
-
یسوع بچیاں نُوں برکت دیندا اے (13-16)
-
اِک امیر بندے دا سوال (17-25)
-
بادشاہی لئی قربانیاں (26-31)
-
یسوع دی موت بارے دُبارہ پیشینگوئی (32-34)
-
یعقوب تے یوحنا دی درخاست (35-45)
-
یسوع نے بوہت سارے لوکاں لئی قربانی دِتی (45)
-
-
اَنھے برتمائی نُوں شفا (46-52)
10 یسوع اوتھوں چلا گیا تے دریائےیردن دے پار یہودیہ دے سرحدی علاقے چ آ گیا۔ تے لوکاں دی اِک وڈی بِھیڑ اوہدے کول جمع ہو گئی۔ ہمیشاں وانگوں اوہ اوہناں نُوں تلیم دین لگ پیا۔
2 فیر فریسی اوہدے کول آئے تے اوہنوں اَزمان لئی پچھیا: ”کیہہ اِک بندے لئی اپنی بیوی نُوں طلاق دینا جائز اے؟“
3 یسوع نے جواب دِتا: ”ایس بارے موسیٰ نے کیہہ حکم دِتا سی؟“
4 اوہناں نے جواب دِتا: ”موسیٰ نے کہیا سی کہ اِک آدمی اپنی بیوی نُوں طلاقنامہ دے کے چھڈ سکدا اے۔“
5 پر یسوع نے اوہناں نُوں کہیا: ”موسیٰ نے ایہہ حکم تواڈی سختدلی دی وجہ توں دِتا سی۔
6 پر شروع چ اِنج نئیں سی سگوں خدا نے انساناں نُوں مرد تے عورت بنایا۔
7 ایس لئی مرد اپنے ماں پیو نُوں چھڈ دَوے گا
8 تے اوہ تے اوہدی بیوی اِک جسم ہون گے۔ ایس وجہ توں اوہ دو نئیں رہندے سگوں اِک جسم بن جاندے نیں۔
9 ایس لئی جنہوں خدا نے ایس بندھن چ بنھیا اے،* اوہنوں کوئی وی انسان وَکھ نہ کرے۔“
10 فیر گھر آ کے شاگرد اوہنوں ایہدے بارے پچھن لگ پئے۔
11 یسوع نے اوہناں نُوں کہیا: ”جیہڑا بندہ اپنی بیوی نُوں طلاق دے کے کسے ہور نال ویاہ کردا اے، اوہ زِنا کردا اے کیونکہ اوہ اپنی بیوی دے خلاف گُناہ کردا اے۔
12 تے جے اِک عورت اپنے شوہر توں طلاق لے کے کسے ہور نال ویاہ کردی اے، اوہ زِنا کردی اے۔“
13 فیر لوک چھوٹے بچیاں نُوں یسوع کول لیائے تاکہ اوہ اوہناں تے ہتھ رکھ کے اوہناں نُوں برکت دَوے۔ پر شاگرد لوکاں نُوں جِھڑکن لگ پئے۔
14 ایہہ ویکھ کے یسوع نُوں بُرا لگیا تے اوہنے اوہناں نُوں کہیا: ”بچیاں نُوں نہ روکو۔ ایہناں نُوں میرے کول آن دَوو کیونکہ خدا دی بادشاہی دے وارث اوہی لوک ہون گے جیہڑے ایہناں ورگے نیں۔
15 مَیں توانوں سچ کہنا واں، جیہڑا انسان خدا دی بادشاہی نُوں اونویں قبول نئیں کردا جیویں کوئی بچہ* قبول کردا اے، اوہ ایہدے چ بالکل نئیں جائے گا۔“
16 فیر اوہنے بچیاں نُوں اپنیاں بانہواں چ لیا تے اوہناں دے سِر تے ہتھ رکھ کے اوہناں نُوں برکت دین لگ پیا۔
17 جدوں یسوع اوتھوں دی اَگے جا رہیا سی تے اِک بندہ اوہدے کول بھج کے آیا تے گوڈیاں بھار بہہ کے اوہنوں پچھیا: ”اُستاد، تُوں بوہت چنگا ایں۔ مینوں دَس کہ ہمیشاں دی زندگی پان لئی مینوں کیہہ کرنا چاہی دا اے؟“
18 یسوع نے اوہنوں کہیا: ”تُوں مینوں چنگا کیوں کہہ رہیا ایں؟ چنگا تے بس خدا ای اے۔
19 تینوں ایہہ حکم تے پتہ ای نیں: ”خون نہ کرِیں، زِنا نہ کرِیں، چوری نہ کرِیں، جھوٹھی گواہی نہ دوِیں، کسے نال دھو کھا نہ کرِیں، اپنے ماں پیو دی عزت کرِیں۔““
20 اوس بندے نے اوہنوں کہیا: ”اُستاد، ایہناں حکماں تے مَیں بچپن توں ای چل رہیا واں۔“
21 یسوع نے اوہدے وَل ویکھیا تے اوہنوں اوہدے تے پیار آیا تے اوہنوں کہیا: ”تیرے چ بس اِک چیز دی کمی اے۔ جا، اپنا مال ویچ کے غریباں چ وَنڈ دے تاکہ تیرے لئی اسمان چ خزانہ جمع ہو جائے تے آ کے میرا شاگرد بن جا۔“
22 پر ایہہ سُن کے اوہنوں افسوس ہویا تے اوہ دُکھی ہو کے اوتھوں چلا گیا کیونکہ اوہ بڑا امیر سی۔
23 یسوع نے اوتھے موجود لوکاں وَل ویکھیا تے اپنے شاگرداں نُوں کہیا: ”امیر لوکاں لئی اسمان دی بادشاہی چ جانا بوہت اوکھا ہوئے گا!“
24 پر شاگرد اوہدی گل سُن کے حیران ہوئے۔ایس لئی یسوع نے کہیا: ”بچیو، خدا دی بادشاہی چ جانا بوہت اوکھا اے!
25 اِک اُونٹھ دا سوئی دے نکے چوں لنگھنا تے اسان اے۔ پر اِک امیر آدمی لئی خدا دی بادشاہی چ جانا اوکھا اے۔“
26 ایہہ سُن کے شاگرد ہور وی حیران ہو گئے تے اوہنوں* کہیا: ”تے فیر بچے گا کون؟“
27 یسوع نے سِدھا اوہناں وَل ویکھیا تے کہیا: ”انساناں لئی تے ایہہ ناممکن اے۔ پر خدا لئی سب کجھ ممکن اے۔“
28 فیر پطرس نے اوہنوں کہیا: ”ویکھ، اَسی تے سارا کجھ چھڈ چھڈا کے تیرے پچھے ٹُر پئے آں۔“
29 یسوع نے کہیا: ”مَیں توانوں سچ کہنا واں کہ جنہے وی میری خاطر تے خوشخبری دی خاطر گھر یاں زمیناں یاں بھراواں یاں بھیناں یاں ماں یاں پیو یاں بچیاں نُوں چھڈیا اے
30 اوہنوں ایس زمانے چ سو گُنا زیادہ ملے گا۔ اوہنوں گھر، بھرا، بھیناں، مانواں، بچے تے زمیناں مِلن گیاں۔ پر ایہدے نال نال اوہدے تے ظلم وی ہوئے گا۔ نالے آن والے زمانے چ اوہنوں ہمیشاں دی زندگی ملے گی۔
31 پر کئی لوک جیہڑے پہلے نیں، اوہ آخر ہو جان گے تے جیہڑے آخر نیں، اوہ پہلے ہو جان گے۔“
32 یسوع تے اوہدے شاگرد اوس سڑک تے جا رہے سن جیہڑی یروشلم نُوں جاندی اے تے یسوع اوہناں دے اَگے اَگے چل رہیا سی۔ پر شاگرد بڑے حیران سن تے جیہڑے لوک اوہناں دے پچھے پچھے آ رہے سن، اوہ ڈرن لگ پئے۔ یسوع فیر 12 رسولاں نُوں اِک پاسے لجا کے دَسن لگ پیا کہ اوہدے نال کیہہ کیہہ ہوئے گا۔
33 اوہنے کہیا: ”ویکھو، اَسی یروشلم جا رہے آں تے انسان دے بیٹے* نُوں وڈے کاہناں تے شریعت دے عالماں دے حوالے کیتا جائے گا۔ اوہ اوہنوں موت دی سزا سُنان گے تے غیریہودیاں دے حوالے کرن گے۔
34 اوہ اوہدا مخول اُڈان گے، اوہدے تے تُھکن گے، اوہنوں کوڑے مارن گے تے جانوں مار دین گے۔ پر تِن دِناں بعد اوہ زندہ ہو جائے گا۔“
35 زبدی دے پُتراں یعقوب تے یوحنا نے یسوع کول آ کے کہیا: ”اُستاد، ساڈی اِک فرمائش اے۔ وعدہ کر کہ تُوں اوہنوں پورا کریں گا۔“
36 یسوع نے اوہناں نُوں کہیا: ”دَسو، تُسی کیہہ چاہندے او، مَیں تواڈے لئی کیہہ کراں؟“
37 اوہناں نے اوہنوں کہیا: ”اپنی عالیشان بادشاہی چ ساڈے وچوں اِک نُوں اپنے سجے پاسے تے دُوجے نُوں اپنے کھبے پاسے بیٹھائیں۔“
38 پر یسوع نے اوہناں نُوں کہیا: ”توانوں نئیں پتہ کہ تُسی کیہہ منگ رہے او۔ کیہہ تُسی اوہ پیالہ پی سکدے او جیہڑا مَیں پی رہیا واں یاں اوہ بپتسمہ لے سکدے او جیہڑا مَیں لے رہیا واں؟“
39 اوہناں نے کہیا: ”ہاں، اَسی پی سکنے آں۔“ یسوع نے اوہناں نُوں کہیا: ”تُسی ایہہ پیالہ ضرور پیو گے جیہڑا مَیں پی رہیا واں تے اوہ بپتسمہ ضرور لوو گے جیہڑا مَیں لے رہیا واں۔
40 پر ایہہ فیصلہ کرن دا اِختیار میرے کول نئیں کہ کون میرے سجے پاسے بہووے گا تے کون کھبے پاسے بہووے گا سگوں ایہہ فیصلہ خدا کرے گا۔“
41 جدوں باقی دس شاگرداں نُوں ایس گل دا پتہ چلیا تے اوہناں نُوں یعقوب تے یوحنا تے بڑا غصہ آیا۔
42 پر یسوع نے اوہناں نُوں اپنے کول بلا کے کہیا: ”توانوں پتہ اے کہ جنہاں نُوں دُنیا دے حاکم منیا جاندا اے، اوہ لوکاں تے رُعب پاندے نیں تے اِختیار رکھن والے اوہناں نُوں دَبا کے رکھدے نیں۔
43 پر تُسی اِک دُوجے نال اِنج نہ کرنا سگوں جیہڑا تواڈے وچوں وڈا بننا چاہندا اے، اوہ تواڈا خادم بنے
44 تے جیہڑا تواڈے وچوں اُچا عہدہ چاہندا اے، اوہ ساریاں دا غلام بنے
45 کیونکہ انسان دا بیٹا وی اپنی خدمت کران نئیں سگوں ایس لئی آیا کہ خدمت کرے تے بوہت سارے لوکاں لئی اپنی جان فدیے دے طور تے دَوے۔“
46 فیر اوہ یریحو چ آئے۔ پر جدوں یسوع، اوہدے شاگرد تے بوہت سارے لوک یریحو توں باہر جا رہے سن تے اِک اَنھا فقیر سڑک دے کنارے بیٹھا ہویا سی۔ (اوہ تمائی دا پُتر برتمائی سی۔)
47 جدوں اوہنے سُنیا کہ یسوع ناصری اوتھوں لنگھ رہیا اے تے اوہ اُچی اُچی کہن لگ پیا: ”داؤد دے پُتر، یسوع، میرے تے رحم کر!“
48 لوکاں نے اوہنوں جِھڑکیا تے چپ رہن لئی کہیا۔ پر اوہ ہور وی اُچی اُچی کہن لگ پیا: ”داؤد دے پُتر، میرے تے رحم کر!“
49 ایہہ سُن کے یسوع رُک گیا تے کہیا: ”اوہنوں میرے کول بلاؤ۔“ ایس لئی لوکاں نے اَنھے آدمی نُوں آواز دے کے کہیا: ”حوصلہ رکھ! اُٹھ، اوہ تینوں بلا رہیا اے۔“
50 اوہنے اپنی چادر لا دِتی تے چھیتی نال اُٹھ کے یسوع کول گیا۔
51 فیر یسوع نے اوہنوں کہیا: ”دَس، مَیں تیرے لئی کیہہ کراں؟“ اوس اَنھے آدمی نے جواب دِتا: ”اُستاد،* میریاں اَکھاں ٹھیک کر دے۔“
52 یسوع نے اوہنوں کہیا: ”جا، تُوں اپنے ایمان دی وجہ توں ٹھیک ہو گیا ایں۔“ تے فوراً اوہدیاں اَکھاں دی روشنی واپس آ گئی تے اوہ یسوع دے پچھے ٹُرن لگ پیا۔
فٹ نوٹ
^ یونانی چ: ”اِک جُوئے چ بنھیا اے۔“
^ یعنی جیویں کوئی بچہ کسے چیز نُوں قبول کردا اے۔
^ یاں شاید، ”اِک دُوجے نُوں کہیا۔“
^ ”لفظاں دی وضاحت“ نُوں ویکھو۔
^ یونانی چ: ”ربونی۔“
