مرقس دی اِنجیل 13:1-37
13 جدوں یسوع ہیکل توں باہر جا رہیا سی تے اوہدے اِک شاگرد نے اوہنوں کہیا: ”واہ اُستاد، ذرا ایہہ سوہنے پتھر تے عمارتاں تے ویکھ۔“
2 پر یسوع نے اوہنوں کہیا: ”کیہہ تُوں ایہناں شاندار عمارتاں نُوں ویکھ کے حیران ہو رہیا ایں؟ ایہہ سب کجھ ڈھا دِتا جائے گا۔ ایتھے پتھر اُتے پتھر وی باقی نئیں رہوے گا۔“
3 فیر جدوں یسوع کلّا زیتون دے پہاڑ اُتے اوس جگہ بیٹھا ہویا سی جتھوں ہیکل نظر آ رہی سی تے پطرس، یعقوب، یوحنا تے اندریاس نے آ کے اوہنوں پچھیا:
4 ”سانوں دَس کہ ایہہ سب کجھ کدوں ہوئے گا؟ تے اوس ویلے دی کیہہ نشانی ہوئے گی جدوں ایہہ سب کجھ ختم ہون والا ہوئے گا؟“
5 ایس لئی یسوع نے اوہناں نُوں کہیا: ”خبردار رہوو کہ کوئی توانوں گمراہ نہ کرے۔
6 میرے ناں توں بتھیرے آن گے تے کہن گے: ”مَیں اوہی آں“ تے بوہت سارے لوکاں نُوں گمراہ کرن گے۔
7 نالے جدوں تُسی لڑائیاں دا رولا تے جنگاں دِیاں خبراں سُنو گے تے گھبرا نہ جانا کیونکہ ایہہ سب کجھ ہونا لازمی اے۔ پر اوس ویلے خاتمہ نئیں آئے گا۔
8 اِک قوم دُوجی قوم اُتے تے اِک حکومت دُوجی حکومت اُتے حملہ کرے گی۔ تھاں تھاں زلزلے آن گے تے کال پین گے۔ ایہناں ساریاں گلاں توں تکلیفاں* بس شروع ای ہون گیاں۔
9 تُسی خبردار رہوو کیونکہ لوک توانوں عدالتاں وچ گھسیٹن گے تے عبادتگاہواں وچ کُٹن گے۔ میری وجہ توں توانوں حاکماں تے بادشاہواں دے سامنے پیش کیتا جائے گا تاکہ اوہناں نُوں گواہی ملے۔
10 نالے دُنیا دے خاتمے توں پہلاں ساریاں قوماں چ خوشخبری دی مُنادی کیتی جائے گی۔
11 جدوں اوہ توانوں عدالت د ے حوالے کرن تے تُسی پہلاں توں ای فکر نہ کرنا کہ تُسی کیہہ کہوو گے سگوں توانوں اوسے ویلے ہدیت مِل جائے گی کہ تُسی کیہہ کہنا اے کیونکہ بولن والے تُسی نئیں ہووو گے سگوں پاک روح تواڈے ذریعے گل کرے گی۔
12 ایہدے علاوہ بھرا، بھرا نُوں تے پیو پُتر نُوں پھڑوائے گا تاکہ اوہ ماریا جائے۔ تے بچے اپنے ماں پیو دے خلاف ہو جان گے تے اوہناں نُوں مروان گے۔
13 میرے ناں دی وجہ توں سارے لوک تواڈے توں نفرت کرن گے۔ پر جیہڑا آخر تک اپنے ایمان تے ڈٹیا رہوے گا، اوہ نجات پائے گا۔
14 ایس لئی جدوں تُسی تباہی مچان والی گندی چیز نُوں اوس جگہ کھلوتے ویکھو جِتھے اوہنوں نئیں ہونا چاہی دا (ایس گل نُوں پڑھن والا اپنی سمجھ استمال کرے) تے فیر جیہڑے یہودیہ چ ہون، اوہ پہاڑاں وَل بھج جان۔
15 جیہڑا آدمی کوٹھے تے ہوئے، اوہ تھلے آ کے کوئی چیز لین لئی اندر نہ جائے۔
16 تے جیہڑا آدمی کھیت چ ہوئے، اوہ اپنیاں چیزاں تے چوغہ لین لئی واپس اپنے گھر نہ جائے۔
17 اوس زمانے دِیاں اوہناں عورتاں تے افسوس جیہڑیاں ماں بنن والیاں ہون گیاں تے جیہڑیاں دودھ پیاندیاں ہون گیاں۔
18 دُعا کردے رہوو کہ ایہہ سب کجھ سردیاں چ نہ ہووے
19 کیونکہ اوہ دن ایہو جہی مصیبت دے ہون گے جیہڑی خدا دی بنائی ہوئی دُنیا دے شروع توں لے کے ہُن تک نہ کدی آئی اے تے نہ ای دُبارہ کدی آئے گی۔
20 اصل چ جے یہوواہ* مصیبت دے دن نہ گھٹائے تے کوئی وی نئیں بچے گا۔ پر اوہ اوہناں لوکاں دی خاطر اوہ دن گھٹائے گا جنہاں نُوں اوہنے چُنیا اے۔
21 اوہدوں جے کوئی بندہ توانوں کہوے: ”ویکھو، مسیح ایتھے وے“ یاں ”ویکھو، اوہ اوتھے وے“ تے اوہدا یقین نہ کرنا
22 کیونکہ جھوٹھے مسیح تے جھوٹھے نبی اُٹھ کھلون گے تے معجزے تے نشانیاں وکھا کے چُنے ہوئے لوکاں نُوں وی گمراہ کرن دی کوشش کرن گے۔
23 ایس لئی خبردار رہوو، مَیں توانوں سب کجھ پہلاں ای دَس دِتا اے۔
24 اوس زمانے دی مصیبت دے بعد سورج بجھ جائے گا، چن دی روشنی ختم ہو جائے گی،
25 تارے اسمان توں ڈِگ رہے ہون گے تے اسمان دِیاں طاقتاں ہلائیاں جان گیاں۔
26 فیر اوہ انسان دے بیٹے* نُوں بدّلاں چ بڑی شان تے اِختیار نال آندے ویکھن گے۔
27 اوہدوں اوہ اپنے فرشتیاں نُوں بھیجے گا تے فرشتے زمین توں لے کے اسمان تک یعنی چارے پاسیوں اوہدے چُنے ہوئے لوکاں نُوں جمع کرن گے۔
28 اِنجیر دے درخت دی مثال توں سکھو، جدوں اوہدیاں ٹاہنیاں نرم ہو جاندیاں نیں تے اوہناں تے پتے نِکلن لگ پیندے نیں تے توانوں پتہ چل جاندا اے کہ گرمی دا موسم نیڑے وے۔
29 ایسے طرحاں جدوں تُسی ایہہ گلاں ہوندیاں ویکھو تے سمجھ جانا کہ انسان دا بیٹا نیڑے آ گیا اے سگوں دروازے تے پونچ گیا اے۔
30 مَیں توانوں سچ کہنا واں کہ ایہہ پُشت اوہدوں تک ختم نئیں ہوئے گی جدوں تک ایہہ ساریاں گلاں پوریاں نہ ہو جان۔
31 اسمان تے زمین مِٹ جان گے، پر میریاں گلاں کدی نئیں مِٹن گیاں۔
32 اوس دن یاں گھڑی بارے کوئی نئیں جان دا، نہ اسمان دے فرشتے، نہ پُتر سگوں صرف باپ جان دا اے۔
33 ایس لئی خبردار رہوو تے جاگدے رہوو کیونکہ تُسی خدا دے طے کیتے ہوئے ویلے نُوں نئیں جان دے۔
34 ایہہ اوس آدمی وانگوں اے جنہے پردیس جان توں پہلاں اپنے گھر دی دیکھبھال کرن دا اِختیار اپنے غلاماں نُوں دِتا۔ اوہنے ہر اِک نُوں اوہدا کم دِتا تے چوکیدار نُوں حکم دِتا کہ چوکس رہوے۔
35 ایس لئی چوکس رہوو کیونکہ توانوں نئیں پتہ کہ گھر دا مالک کدوں آئے گا۔ شام نُوں، اَدھی رات نُوں، سرگی ویلے یاں فیر سویرے سویرے۔
36 کِتے ایہہ نہ ہوئے کہ جدوں اوہ اچانک آئے تے تُسی سُتے ہووو۔
37 پر مَیں جو توانوں کہنا واں، اوہی ساریاں نُوں کہنا واں کہ چوکس رہوو۔“
فٹ نوٹ
^ یونانی چ: ”جیویں بچے دی پیدائش ویلے ماں نُوں پِیڑاں لگدیاں نیں۔“
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
