مرقس دی اِنجیل 15:1-47
15 سویر ہوندیاں ای وڈے کاہناں، بزرگاں تے شریعت دے عالماں سگوں یہودیاں دی ساری وڈی عدالت نے آپس چ مشورہ کیتا تے فیر اوہ یسوع نُوں بنھ کے لے گئے تے اوہنوں پیلاطُس دے حوالے کر دِتا۔
2 پیلاطُس نے یسوع نُوں پچھیا: ”کیہہ تُوں یہودیاں دا بادشاہ ایں؟“ یسوع نے جواب دِتا: ”تُوں آپ ای کہہ دِتا اے۔“
3 پر وڈے کاہناں نے اوہدے اُتے کئی اِلزام لائے۔
4 پیلاطُس فیر اوہدے کولوں سوال کرن لگ پیا تے اوہنوں کہیا: ”کیہہ تُوں اپنی صفائی چ کجھ نئیں کہویں گا؟ ویکھ، ایہہ تیرے تے کِنّے اِلزام لا رہے نیں۔“
5 پر فیر وی یسوع نے کوئی جواب نہ دِتا۔ ایس لئی پیلاطُس بڑا حیران ہویا۔
6 ہر فسح دی عید تے پیلاطُس اوس قیدی نُوں رِہا کردا ہوندا سی جنہوں لوک رِہا کروانا چاہندے سن۔
7 اوس ویلے جیل چ کجھ باغی وی قید سن جنہاں نے حکومت دے خلاف بغاوت کر کے قتل کیتے سن۔ اوہناں وچوں اِک دا ناں برابا سی۔
8 ایس لئی لوکاں نے آ کے پیلاطُس نُوں درخاست کیتی کہ اوہ اِک قیدی نُوں رِہا کرے جیویں اوہ ہر سال کردا اے۔
9 اوہنے اوہناں نُوں پچھیا: ”کیہہ مَیں تواڈے لئی یہودیاں دے بادشاہ نُوں رِہا کراں؟“
10 پیلاطُس نُوں پتہ سی کہ وڈے کاہن یسوع نال کھار کھاندے نیں۔ ایسے لئی اوہناں نے اوہنوں پھڑوایا اے۔
11 پر وڈے کاہناں نے لوکاں نُوں بھڑکایا کہ اوہ پیلاطُس کولوں منگ کرن کہ اوہ یسوع نُوں نئیں سگوں برابا نُوں رِہا کرے۔
12 پیلاطُس نے اوہناں نُوں دُبارہ پچھیا: ”فیر مَیں یسوع نال کیہہ کراں جنہوں تُسی یہودیاں دا بادشاہ کہندے او؟“
13 اوہناں نے اِک واری فیر اُچی ساری کہیا: ”اوہنوں سُولی* تے چڑھا دے!“
14 پیلاطُس نے کہیا: ”پر کیوں؟ اوہنے کیہہ جُرم کیتا اے؟“ پر اوہ ہور وی اُچی اُچی کہن لگ پئے: ”اوہنوں سُولی تے چڑھا دے!“
15 ایس لئی پیلاطُس نے لوکاں نُوں خوش کرن لئی برابا نُوں رِہا کر دِتا تے یسوع نُوں کوڑے لوا کے سُولی تے ٹنگن لئی سپاہیاں دے حوالے کر دِتا۔
16 ایہدے بعد سپاہی اوہنوں حاکم دے محل دے ویہڑے چ لے گئے تے اپنی ساری پلٹن نُوں اوہدے آلے دَوالے کٹھا کر لیا۔
17 اوہناں نے یسوع نُوں جامنی رنگ دا چوغہ پوایا تے کنڈیاں دا اِک تاج بنا کے اوہدے سِر تے رکھ دِتا۔
18 فیر اوہ یسوع دے سامنے آ کے کہن لگ پئے: ”یہودیاں دے بادشاہ، سلام!“
19 نالے اوہ اِک کانے نال اوہدے سِر تے مارن لگ پئے، اوہدے تے تُھکن لگ پئے تے اوہدے اَگے گوڈے ٹیک کے اوہنوں سجدہ کرن لگ پئے۔
20 اوہدا مخول اُڈان توں بعد اوہناں نے اوہدا جامنی چوغہ لوا کے اوہنوں اوہدے کپڑے پوا دِتے تے اوہنوں سُولی تے چڑھان لئی لے گئے۔
21 راہ چ فوجیاں نُوں اِک بندہ نظر آیا جیہڑا کسے پِنڈ توں آ رہیا سی۔ اوہ کُرینے دا رہن والا سی تے اوہدا ناں شمعون سی تے اوہ سکندر تے رُوفس دا پیو سی۔ فوجیاں نے اوہدے توں زبردستی یسوع دی سُولی چکوائی۔
22 فیر اوہ یسوع نُوں اوس جگہ تے لیائے جدا ناں گلگتا سی۔ ایہدا مطلب اے: ”کھوپڑی۔“
23 اوہناں نے یسوع نُوں اوہ مے پیان دی کوشش کیتی جدے چ مُر* ملی ہوئی سی۔ پر اوہنے نہ پیتی۔
24 اوہناں نے یسوع نُوں کِلّاں نال سُولی تے ٹنگ دِتا۔ تے اوہدے کپڑیاں تے قُرعہ* پا کے ایہہ فیصلہ کیتا کہ کِدے حصے چ کیہہ آئے گا۔
25 اوہناں نے سویرے کوئی 9 کُو وجے* اوہنوں سُولی تے چڑھایا۔
26 نالے اوہناں نے سُولی اُتے اِک تختی وی لا دِتی جدے تے ایہہ اِلزام لکھیا سی: ”یہودیاں دا بادشاہ۔“
27 اوہناں نے یسوع دے نال دو ڈاکوؤاں نُوں وی سُولی چڑھایا۔ اِک نُوں اوہدے سجے پاسے تے دُوجے نُوں کھبے پاسے۔
28 *—
29 اوتھوں لنگھن والے لوک اوہدی بےعزتی کر رہے سن تے سِر ہلا ہلا کے کہہ رہے سن: ”تُوں تے کہنا سیں کہ مَیں ہیکل نُوں ڈھا سکنا واں تے تِن دِناں چ اوہنوں بنا وی سکنا واں۔
30 ہُن ذرا اپنے آپ نُوں بچا تے سُولی* توں تھلے اُتر کے وکھا۔“
31 ایہدے علاوہ وڈے کاہن تے شریعت دے عالم وی آپس چ اوہدا مخول اُڈان لگ پئے تے اوہنوں کہن لگ پئے: ”ایہنے دُوجیاں نُوں تے بچایا، پر اپنے آپ نُوں نئیں بچا سکدا۔
32 ہُن جے اِسرائیل دا بادشاہ تے مسیح سُولی* توں اُتر کے وکھائے تے اَسی وی اوہدے تے ایمان لے آواں گے۔“ جیہڑے ڈاکوؤاں نُوں اوہدے نال سُولی چڑھایا گیا سی، اوہ وی اوہدی بےعزتی کر رہے سن۔
33 فیر دوپہر دے کوئی 12 وجے* توں لے کے 3 وجے* تک سارے ملک چ نھیرا چھا گیا۔
34 کوئی 3 کُو وجے یسوع نے اُچی آواز چ کہیا: ”ایلی، ایلی لماشبقتنی؟“ جدا مطلب اے: ”میرے خدا، میرے خدا، تُوں مینوں کیوں چھڈ دِتا؟“
35 ایہہ سُن کے اوتھے کھلوتے کجھ لوکاں نے کہیا: ”ویکھو! ایہہ ایلیاہ نُوں بلا رہیا اے۔“
36 فیر اِک بندہ بھج کے گیا تے اِک سپنج نُوں کھٹی مے وچ ڈبو کے لیایا تے اوہنوں اِک کانے اُتے لا کے یسوع نُوں پین لئی دِتا تے لوکاں نُوں کہیا: ”ایہنوں تنگ نہ کرو۔ ویکھنے آں کہ ایلیاہ آ کے ایہنوں سُولی توں تھلے لاندا اے کہ نئیں۔“
37 یسوع نے اُچی آواز چ خدا نُوں پکاریا تے دم توڑ دِتا۔
38 تے پاک مقام دا پردہ* اُتوں لے کے تھلے تک پاٹ گیا تے اوہدے دو حصے ہو گئے۔
39 جدوں یسوع دے کول کھلوتے فوجی افسر نے ویکھیا کہ اوہدی موت دے ویلے کیہہ کجھ ہویا اے تے اوہنے کہیا: ”ایہہ واقعی خدا دا پُتر سی۔“
40 کجھ عورتاں وی دُور کھلوتیاں ایہہ سب کجھ ویکھ رہیاں سن۔ ایہناں چ مریم مگدلینی، یعقوب* تے یوسیس دی ماں مریم تے سلومی وی شامل سی۔
41 ایہہ گلیل چ یسوع دے نال ہوندیاں سن تے اوہدی خدمت کردیاں سن۔ ایہناں دے علاوہ اوتھے ہور وی کئی عورتاں سن جیہڑیاں یسوع نال یروشلم آئیاں سن۔
42 شام ہون والی سی تے اوہ تیاری دا دن سی کیونکہ اگلے دن سبت سی۔
43 ایس لئی شہر ارمتیاہ دا یوسف جیہڑا عدالت دا اِک عزتدار ممبر سی تے آپ وی خدا دی بادشاہی دا اِنتظار کر رہیا سی، بڑی ہمت کر کے پیلاطُس کول گیا تے اوہدے کولوں یسوع دی لاش منگی۔
44 پر پیلاطُس پہلاں ایہہ جاننا چاہندا سی کہ کیہہ یسوع واقعی مر گیا اے۔ ایس لئی اوہنے فوجی افسر نُوں بلوا کے ایس بارے پچھیا۔
45 فوجی افسر کولوں پتہ کرن دے بعد اوہنے یوسف نُوں لاش لجان دی اجازت دے دِتی۔
46 یوسف نے ودھیا لیلن دا کپڑا خریدیا تے لاش نُوں تھلے لا کے اوہدے چ لویٹ دِتا تے اوہنوں اِک قبر چ رکھ دِتا جیہڑی چٹان چ بنوائی گئی سی۔ فیر اوہنے قبر دے مُونہہ تے وڈا سارا پتھر رکھ دِتا۔
47 پر مریم مگدلینی تے یوسیس دی ماں مریم یسوع دی قبر نُوں ویکھدیاں رہیاں۔
فٹ نوٹ
^ ”لفظاں دی وضاحت“ نُوں ویکھو۔
^ اِک نشے والی شے جدے نال درد گھٹ ہوندا اے تے نیندر آندی اے۔
^ ”لفظاں دی وضاحت“ نُوں ویکھو۔
^ یونانی چ: ”تیجا گھنٹہ۔“
^ متی 17:21 دے فٹنوٹ نُوں ویکھو۔
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ یونانی چ: ”چھیواں گھنٹہ۔“
^ یونانی چ: ”نوواں گھنٹہ۔“
^ ایہہ پردہ ہیکل چ پاک مقام تے پاک ترین مقام دے وچکار لگیا ہویا سی۔
^ یاں، ”چھوٹا یعقوب۔“ شاید ایہہ یعقوب رسول نالوں یاں تے عمر چ یاں فیر قد چ چھوٹا سی۔
