مرقس دی اِنجیل 2:1-28
2 فیر کجھ دِناں بعد اوہ دُبارہ کفرنحوم آیا تے ایہہ خبر پھیل گئی کہ اوہ گھر چ ای اے۔
2 ایس لئی اوس گھر چ اینے سارے لوک کٹھے ہو گئے کہ دروازے تھانی اندر آنا ای مشکل ہو گیا تے اوہ لوکاں نُوں خدا دا کلام سُنان لگ پیا۔
3 فیر کجھ لوک فالج دے مارے اِک بندے نُوں اوہدے کول لیائے جنہوں چار بندیاں نے منجی تے چُکیا ہویا سی۔
4 پر بِھیڑ اینی زیادہ سی کہ اوہ اوہنوں یسوع کول نہ لجا سکے۔ ایس لئی جِتھے یسوع بیٹھا ہویا سی اوہناں نے اوتھے چھت وچ وڈا سارا مورا کر کے اوس بندے نُوں منجی سمیت تھلے اُتار دِتا۔
5 اوہناں دے ایمان نُوں ویکھ کے یسوع نے اوس بندے نُوں کہیا: ”پُتر، تیرے گُناہ معاف ہو گئے نیں۔“
6 اوتھے کجھ شریعت دے عالم وی بیٹھے ہوئے سن جیہڑے اپنے دل چ ایہہ سوچن لگ پئے:
7 ”ایہہ بندہ کیہو جہیاں گلاں کر رہیا اے؟ ایہہ تے کفرُ بک رہیا اے۔ بھلا خدا دے علاوہ وی کوئی گُناہ معاف کر سکدا اے؟“
8 پر یسوع فوراً جان گیا کہ اوہ کیہہ سوچ رہے نیں۔ ایس لئی اوہنے اوہناں نُوں کہیا: ”تُسی اپنے دل چ ایہو جہیاں گلاں کیوں سوچ رہے او؟
9 تواڈے خیال چ فالج دے مارے ایس بندے نُوں کیہہ کہنا سوکھا اے، ایہہ کہ ”تیرے گُناہ معاف ہو گئے نیں“ یاں ایہہ کہ ”اُٹھ، اپنی منجی چُک تے ٹُر پھر؟“
10 پر مَیں توانوں وکھانا چاہنا واں کہ انسان دے بیٹے* نُوں زمین تے گُناہ معاف کرن دا اِختیار دِتا گیا اے۔“ ایس لئی اوہنے فالج دے مارے بندے نُوں کہیا:
11 ”مَیں تینوں کہنا واں اُٹھ، اپنی منجی چُک تے اپنے گھر چلا جا۔“
12 اوہ بندہ اوسے ویلے اُٹھ پیا تے ساریاں دے سامنے اپنی منجی چُک کے اوتھوں چلا گیا۔ ایہہ ویکھ کے لوک بڑے حیران ہوئے تے خدا دی وڈیائی کردے ہوئیاں کہن لگ پئے: ”اَسی ایہو جیہا انوکھا کم پہلاں کدی نئیں ویکھیا۔“
13 یسوع دُبارہ جھیل دے کنارے گیا تے بوہت سارے لوک اوہدے آلے دَوالے کٹھے ہو گئے تے اوہ اوہناں نُوں تلیم دین لگ پیا۔
14 فیر اَگے ٹُردے ٹُردے یسوع نے حلفئی دے پُتر لاوی نُوں ویکھیا جیہڑا ٹیکس دی چونکی تے بیٹھا ہویا سی۔ یسوع نے اوہنوں کہیا: ”میرا شاگرد بن جا۔“ ایہہ سُن کے اوہ اُٹھیا تے اوہدے پچھے ٹُرپیا۔*
15 بعد چ یسوع تے اوہدے شاگرد لاوی دے گھر گئے۔ اوتھے بوہت سارے ٹیکس لین والے تے گُناہگار لوک اوہناں نال بہہ کے کھانا کھا رہے سن جنہاں وچوں کئی یسوع دے شاگرد بن گئے سن۔
16 پر جدوں شریعت دے اوہناں عالماں نے جیہڑے فریسی سن ایہہ ویکھیا کہ یسوع گُناہگاراں تے ٹیکس لین والیاں نال کھانا کھا رہیا اے تے اوہناں نے اوہدے شاگرداں نُوں کہیا: ”ایہہ کیہہ! اوہ ٹیکس لین والیاں تے گُناہگاراں نال کھاندا پیندا اے؟“
17 ایہہ سُن کے یسوع نے اوہناں نُوں کہیا: ”تندرست لوکاں نُوں حکیم دی ضرورت نئیں ہوندی سگوں بیماراں نُوں ہوندی اے۔ مَیں نیک لوکاں نُوں نئیں سگوں گُناہگاراں نُوں بلان آیا واں۔“
18 یوحنا دے شاگرد تے فریسی روزہ رکھدے سن۔ ایس لئی اوہناں نے یسوع کول آ کے پچھیا: ”یوحنا دے شاگرد تے فریسیاں دے شاگرد روزہ رکھدے نیں۔ پر تیرے شاگرد روزہ کیوں نئیں رکھدے؟“
19 یسوع نے اوہناں نُوں کہیا: ”جدوں تک لاڑا اپنے دوستاں نال ہوندا اے اوہناں نُوں روزہ رکھن دی کوئی لوڑ نئیں ہوندی۔ ہاں، جدوں تک لاڑا اوہناں دے نال اے اوہ روزہ نئیں رکھ سکدے۔
20 پر اوہ دن وی آن گے جدوں لاڑے نُوں اوہناں توں جُدا کر دِتا جائے گا۔ فیر اوہ روزہ رکھن گے۔
21 کوئی وی پرانے کپڑے تے نویں کپڑے* دی ٹاکی نئیں لاندا۔ جے اوہ اِنج کردا اے تے نویں کپڑے دے زور نال پرانا کپڑا ہور وی پاٹ جاندا اے۔
22 تے نہ ای کوئی نوِیں مے نُوں پرانیاں مشکاں چ رکھدا اے۔ جے اوہ رکھدا اے تے مشکاں پاٹ جاندیاں نیں تے مے ڈُلھ جاندی اے تے مشکاں وی خراب ہو جاندیاں نیں۔ ایس لئی نوِیں مے نُوں نوِیاں مشکاں چ رکھیا جاندا اے۔“
23 فیر جدوں اوہ سبت دے دن کنک دے کھیتاں وچوں لنگھ رہیا سی تے اوہدے شاگرد ٹُردے ٹُردے کنک دے دانے پُٹن لگ پئے۔
24 ایس لئی فریسیاں نے اوہنوں کہیا: ”اپنے شاگرداں نُوں ویکھ، اوہ سبت دے دن ناجائز کم کیوں کر رہے نیں؟“
25 پر یسوع نے اوہناں نُوں کہیا: ”کیہہ تُسی نئیں پڑھیا کہ اوس ویلے داؤد نے کیہہ کیتا جدوں اوہدے کول کھان لئی کجھ نئیں سی تے اوہنوں تے اوہدے ساتھیاں نُوں بُھکھ لگی ہوئی سی؟
26 وڈے کاہن ابیاتر والے واقعے چ دَسیا گیا اے کہ داؤد نے خدا دے گھر جاکے نذرانے دِیاں روٹیاں کھادیاں تے اپنے ساتھیاں نُوں وی دِتیاں بھانویں کہ کاہناں دے علاوہ کسے لئی وی اوہ روٹیاں کھانا جائز نئیں سی۔“
27 فیر اوہنے اوہناں نُوں کہیا: ”سبت دا دن انسان لئی بنایا گیا اے نہ کہ انسان سبت دے دن لئی۔
28 انسان دا بیٹا تے سبت دا وی مالک اے۔“
فٹ نوٹ
^ ”لفظاں دی وضاحت“ نُوں ویکھو۔
^ متی 4:20 دے فٹنوٹ نُوں ویکھو۔
^ ایہو جیہا کپڑا جنہوں دھوتا یاں شلنگ نہ کیتا گیا ہووے۔
