مرقس دی اِنجیل 3:1-35
3 اِک وار فیر یسوع اِک عبادتگاہ چ گیا۔ اوتھے اِک آدمی سی جدا ہتھ سُکیا ہویا سی۔
2 فریسی یسوع تے اِلزام لانا چاہندے سن۔ ایس لئی ایہہ ویکھن لئی اوہناں دِیاں نظراں اوہدے اُتے ٹکیاں ہوئیاں سن کہ کیہہ اوہ سبت والے دن اوس بندے نُوں ٹھیک کرے گا یاں نئیں۔
3 اوہنے اوس سُکے ہتھ والے بندے نُوں کہیا: ”اُٹھ کے ایتھے وچکار آ جا۔“
4 فیر یسوع نے فریسیاں نُوں پچھیا: ”سبت دے دن کیہہ کرنا جائز اے؟ چنگا کم یاں بھیڑا کم؟ کسے دی جان بچانا یاں کسے دی جان لینا؟“ پر اوہ چپ ای رہے۔
5 فیر یسوع نے اوہناں وَل غصے نال ویکھیا تے اوہناں دے سخت دِلاں دی وجہ توں بڑا دُکھی ہویا تے اوس بندے نُوں کہیا: ”اپنا ہتھ اَگے کر۔“ اوہنے اپنا ہتھ اَگے کیتا تے اوہدا ہتھ بالکل ٹھیک ہو گیا۔
6 ایہہ ویکھ کے فریسی اوتھوں چلے گئے تے فوراً ہیرودیس دے حمایتیاں نال مِل کے یسوع نُوں قتل کرن بارے صلاح مشورہ کرن لگ پئے۔
7 پر یسوع اپنے شاگرداں نال جھیل وَل چلا گیا تے گلیل تے یہودیہ توں لوکاں دی اِک بوہت وڈی بِھیڑ وی اوہدے پچھے گئی۔
8 اوہدے وڈے وڈے کماں بارے سُن کے یروشلم، ادومیہ، دریائےیردن دے دُوجے پاسیوں تے صور تے صیدا دے آلے دَوالے دے علاقیاں توں وی بوہت سارے لوک اوہدے کول آئے۔
9 اوہنے اپنے شاگرداں نُوں اِک چھوٹی کشتی تیار رکھن لئی کہیا تاکہ بِھیڑ اوہدے تے چڑھ نہ آئے۔
10 یسوع نے بوہت سارے بیماراں نُوں ٹھیک کیتا سی۔ ایس لئی سنگین بیماریاں والے بوہت سارے لوک اوہنوں چُھون لئی اوہدے آلے دَوالے کٹھے ہو گئے سن۔
11 ایتھوں تک کہ جیہڑے لوکاں نُوں باغی فرشتے چِمبڑے ہوئے سن، اوہ وی یسوع نُوں ویکھدے ای اوہدے پیراں چ ڈِگ پیندے سن تے اُچی ساری کہندے سن: ”تُوں خدا دا پُتر ایں۔“
12 پر اوہنے کئی وار اوہناں نُوں سختی نال کہیا کہ ”کسے نُوں نہ دَسنا کہ مَیں کون آں۔“
13 فیر یسوع اِک پہاڑ تے چڑھ گیا تے اپنے کجھ شاگرداں نُوں بلایا۔ اوہ اوہدے کول آئے۔
14 اوہنے اوہناں وچوں 12 جنیاں نُوں چُنیا تے اوہناں نُوں رسول کہیا تاکہ اوہ اوہدے نال نال رہن۔ ایہہ اوہ بندے سن جنہاں نُوں یسوع نے مُنادی کرن لئی گھلیا
15 تے لوکاں چوں باغی فرشتے کڈھن دا اِختیار دِتا۔
16 جیہڑے 12 شاگرداں نُوں یسوع نے چُنیا سی اوہناں دے ناں ایہہ سن: شمعون جدا ناں یسوع نے پطرس وی رکھیا سی،
17 زبدی دے پُتر یعقوب تے یوحنا ( یسوع نے ایہناں دونواں بھراواں دا ناں ”بوانرگس“ وی رکھیا جدا مطلب اے: ”گرج دے پُتر“)،
18 اندریاس، فِلپّس، برتُلمائی، متی، توما، حلفئی دا پُتر یعقوب، تدی، شمعون قنانی*
19 تے یہوداہ اِسکریوتی جنہے بعد چ یسوع نُوں دھوکھے نال دُشمناں دے حوالے کر دِتا۔
فیر یسوع اِک گھر چ گیا
20 تے اوتھے وی بوہت وڈی بِھیڑ کٹھی ہو گئی جدی وجہ توں اوہناں نُوں روٹی کھان دا وقت وی نہ ملیا۔
21 پر جدوں یسوع دے گھر والیاں نُوں اوہدے کماں بارے پتہ چلیا تے اوہ اوہنوں پھڑن لئی نکل پئے کیونکہ اوہ کہہ رہے سن: ”اوہ تے پاگل ہو گیا اے۔“
22 نالے یروشلم توں آئے شریعت دے عالم وی کہن لگ پئے: ”اوہ باغی فرشتیاں دے سردار بعلزبُول* دی مدد نال ای باغی فرشتیاں نُوں کڈھدا اے کیونکہ اوہ آپ بعلزبُول دے وَس وچ اے۔“
23 ایس لئی یسوع نے اوہناں نُوں اپنے کول بلایا تے اوہناں نُوں کجھ مثالاں دیندے ہوئیاں کہیا: ”بھلا شیطان آپ شیطان نُوں کیویں کڈھ سکدا اے؟
24 جیس بادشاہی چ پُھٹ پے جائے، اوہ قائم نئیں رہندی
25 تے جیہڑے گھر چ پُھٹ پے جائے، اوہ وی قائم نئیں رہندا۔
26 نالے جے شیطان اپنے ای خلاف کھڑا ہو جائے تے اوہدے ساتھیاں چ پُھٹ پے جائے تے اوہ وی قائم نئیں رہوے گا سگوں ختم ہو جائے گا۔
27 اصل چ کوئی وی اوہدوں تک کسے طاقتور بندے دے گھر وڑھ کے اوہدا مال لُٹ نئیں سکدا جدوں تک اوہ اوس بندے نُوں پہلاں بنھ نہ لوے۔ فیر ای اوہ اوہدا مال لُٹ سکے گا۔
28 مَیں توانوں سچ کہنا واں، انساناں دِیاں ساریاں غلطیاں معاف کیتیاں جان گیاں۔ فیر بھانویں اوہناں نے کوئی وی گُناہ کیتا ہووے یاں فیر کوئی کفرُ بکیا ہووے۔
29 پر جیہڑا بندہ پاک روح دے خلاف کفرُ بک دا اے، اوہنوں کدی معاف نئیں کیتا جائے گا سگوں ایہہ گُناہ ہمیشاں اوہدے سِر رہوے گا۔“
30 یسوع نے ایہہ گل ایس لئی کہی کیونکہ اوہ کہہ رہے سن: ”ایہنوں کوئی باغی فرشتہ چِمبڑیا ہویا اے۔“
31 فیر یسوع دی ماں تے اوہدے بھرا باہر آ کے کھلو گئے تے اوہناں نے اوہنوں بلان لئی کسے نُوں اندر گھلیا۔
32 یسوع دے آلے دَوالے بوہت سارے لوک بیٹھے ہوئے سن تے کسے نے اوہنوں کہیا: ”ویکھ، تیری ماں تے تیرے بھرا باہر کھلوتے ہوئے نیں تے تینوں بلا رہے نیں۔“
33 پر یسوع نے کہیا: ”کون اے میری ماں تے کون نیں میرے بھرا؟“
34 فیر اوہنے اپنے آلے دَوالے بیٹھے لوکاں وَل ویکھیا تے کہیا: ”میری ماں تے میرے بھرا ایہہ نیں۔
35 جیہڑا خدا دی مرضی تے چلدا اے، اوہی اے میرا بھرا، میری بھین تے میری ماں۔“
