مرقس دی اِنجیل 5:1-43
5 فیر اوہ جھیل دے دُوجے پاسے گِراسینیاں دے علاقے چ پونچے۔
2 جیویں ای یسوع کشتی چوں اُتریا تے اِک بندہ جنہوں اِک باغی فرشتہ چِمبڑیا ہویا سی، قبرستان چوں نکل کے اوہدے وَل آیا۔
3 اوہ بندہ قبرستان چ رہندا سی تے کوئی وی اوہنوں قابو چ نئیں رکھ سکدا سی ایتھوں تک کہ سنگلاں نال وی نئیں۔
4 اوہنوں کئی وار بیڑیاں تے سنگلاں نال بنھیا گیا سی۔ پر اوہ سنگلاں نُوں توڑ دیندا سی تے بیڑیاں دے ٹوٹے ٹوٹے کر دیندا سی۔ تے کسے چ وی اوہنوں قابو کرن دی طاقت نئیں سی۔
5 اوہ دن رات قبرستان تے پہاڑاں چ اُچی اُچی چیکاں ماردا رہندا سی تے اپنے آپ نُوں پتھراں نال زخمی کردا رہندا سی۔
6 پر جدوں اوہنے دُوروں یسوع نُوں ویکھیا تے اوہ بھجا بھجا اوہدے کول آیا تے اوہدے اَگے گوڈے ٹیکے۔
7 فیر اوہنے اُچی ساری کہیا: ”اَے یسوع، خدا تعالیٰ دے پُتر! تیرا میرے نال کیہہ واسطہ؟ تینوں خدا دی قسم، مینوں سزا نہ دَویں۔“
8 اوس بندے نے ایہہ گل ایس لئی کہی سی کیونکہ یسوع نے اوہنوں کہیا سی: ”اَے باغی فرشتے، ایہدے وچوں نکل جا۔“
9 فیر یسوع نے اوہنوں پچھیا: ”تیرا ناں کیہہ اے؟“ اوہنے کہیا: ”میرا ناں پلٹن اے کیونکہ اَسی بوہت سارے آں۔“
10 پر اوہنے وار وار یسوع اَگے ترلے پا کے کہیا کہ سانوں ایس علاقے چوں نہ کڈھیں۔
11 اوتھے پہاڑ اُتے سُوراں دا اِک بوہت وڈا غول چر رہیا سی۔
12 ایس لئی باغی فرشتیاں نے یسوع اَگے ترلے پا کے کہیا: ”سانوں اوہناں سُوراں چ گھلدے۔“
13 یسوع نے اوہناں نُوں گھل دِتا۔ باغی فرشتے اوس بندے چوں نکل کے سُوراں نُوں جا چِمبڑے۔ تے تقریباً 2000 سُوراں نے تیز تیز دوڑدے ہوئیاں پہاڑ توں چھالاں مار دِتیاں تے جھیل چ ڈُب کے مر گئے۔
14 پر اوہناں دے چرواہے اوتھوں بھج گئے تے جا کے شہر تے پِنڈاں چ لوکاں نُوں سارا کجھ دَسیا۔ تے لوک ایہہ ویکھن لئی آئے کہ کیہہ ہویا اے۔
15 جدوں اوہ یسوع کول آئے تے اوہناں نے ویکھیا کہ جیہڑا بندہ باغی فرشتیاں دی پلٹن دے وَس وچ سی، اوہنے کپڑے پائے ہوئے نیں تے اوہ اپنے پورے ہوش چ بیٹھا ہویا اے۔ لوک ایہہ ویکھ کے ڈر گئے۔
16 جیہڑے لوکاں نے ایہہ سب اپنی اَکھیں ویکھیا سی، اوہناں نے دُوجے لوکاں نُوں دَسیا کہ اوس بندے تے سُوراں نال کیہہ کیہہ ہویا۔
17 ایس لئی لوک یسوع اَگے ترلے پا کے کہن لگ پئے کہ اوہ اوہناں دے علاقے چوں چلا جائے۔
18 جدوں یسوع کشتی چ بیہن لگا تے اوس بندے نے جنہوں پہلاں باغی فرشتے چِمبڑے ہوئے سن، یسوع اَگے مِنت کیتی: ”مینوں وی اپنے نال لے چلو۔“
19 پر یسوع نے اوہنوں اپنے نال نہ آن دِتا سگوں اوہنوں کہیا: ”گھر جا کے اپنے رشتےداراں نُوں دَس کہ یہوواہ* نے تیرے لئی کیہہ کجھ کیتا اے تے تیرے لئی کِنّاں رحم وکھایا اے۔“
20 اوہ بندہ چلا گیا تے دِکاپُلِس* چ لوکاں نُوں دَسن لگ پیا کہ یسوع نے اوہدے لئی کیہہ کیتا اے تے سارے لوک بڑے حیران ہوئے۔
21 یسوع کشتی چ جھیل دے دُوجے پاسے چلا گیا۔ اوہ حالے جھیل دے کنارے تے ای سی کہ اِک بوہت وڈی بِھیڑ اوہدے آلے دَوالے کٹھی ہو گئی۔
22 فیر عبادتگاہ دا اِک نگران جدا ناں یائیر سی اوتھے آیا تے یسوع نُوں ویکھ کے اوہدے پیری پے گیا۔
23 اوہ وار وار اوہدے اَگے ترلے پا کے کہن لگ پیا: ”میری بچی بوہت ای بیمار اے۔* آ کے اوہدے سِر تے ہتھ رکھ تاکہ اوہ ٹھیک ہو جائے تے زندہ رہوے۔“
24 یسوع اوسے ویلے اوہدے نال ٹُر پیا تے بوہت سارے لوک وی اوہدے پچھے پچھے ٹُر پئے۔ بِھیڑ اینی زیادہ سی کہ لوک یسوع تے ڈِگ رہے سن۔
25 اوہناں چ اِک عورت وی سی جنہوں 12 سالاں توں خون آ رہیا سی۔
26 اوہنے کئی حکیماں کولوں علاج کرا کرا کے بڑی تکلیف سہی تے اپنا سارا پیسہ وی اپنے علاج تے لا دِتا سی۔ پر فیر وی اوہنوں کوئی آرام نئیں آیا سی سگوں اوہدی حالت ہور وی وِگڑ گئی سی۔
27 اوہنے یسوع بارے بوہت کجھ سُنیا ہویا سی۔ ایس لئی اوہنے بِھیڑ چ پچھوں دی آ کے یسوع دے کپڑیاں نُوں چُھویا
28 کیونکہ اوہ اپنے دل چ سوچ رہی سی: ”جے مَیں اوہدے کپڑیاں نُوں ای چُھو لواں گی تے مَیں ٹھیک ہو جاواں گی۔“
29 تے اوسے ویلے اوہدا خون آنا بند ہو گیا تے اوہنوں محسوس ہویا کہ اوہدی بھیڑی بیماری ٹھیک ہو گئی اے۔
30 یسوع نُوں اوسے ویلے محسوس ہویا کہ اوہدے چوں طاقت نکلی اے۔ ایس لئی اوہنے مُڑ کے لوکاں نُوں پچھیا: ”میرے کپڑیاں نُوں کنہے چُھویا اے؟“
31 اوہدے شاگرداں نے اوہنوں کہیا: ”تُوں ویکھ سکنا ایں کہ لوک تیرے تے ڈِگ دے پھردے نیں تے تُوں پچھ رہیا ایں کہ ”مینوں کنہے چُھویا اے؟““
32 پر اوہ آسےپاسے ویکھن لگ پیا تاکہ جان سکے کہ کنہے اوہنوں چُھویا اے۔
33 اوہ عورت ڈردی تے کمبدی یسوع دے سامنے آئی تے اوہدے پیراں چ ڈِگ کے اوہنوں ساری گل سچ سچ دَس دِتی کیونکہ اوہنوں محسوس ہویا سی کہ اوہ ٹھیک ہو گئی اے۔
34 یسوع نے اوہنوں کہیا:”دِھیئے، تُوں اپنے ایمان دی وجہ توں ٹھیک ہوئی ایں۔ جیوندی رہ تے اپنی بھیڑی بیماری توں بچی رہ۔“
35 حالے یسوع گل کر ای رہیا سی کہ عبادتگاہ دے نگران یائیر دے گھروں کجھ بندے آئے تے اوہناں نے اوہنوں کہیا: ”تیری دھی مر گئی اے۔ ہُن اُستاد نُوں کھیچل نہ دے۔“
36 پر یسوع نے اوہناں دی ایہہ گل سُن لئی تے یائیر نُوں کہیا: ”پریشان نہ ہو* سگوں ایمان رکھ۔“
37 فیر اوہنے پطرس، یعقوب تے یعقوب دے بھرا یوحنا دے علاوہ کسے نُوں وی اپنے نال نہ آن دِتا۔
38 جدوں اوہ یائیر دے گھر پونچے تے یسوع نے ویکھیا کہ لوک رو رہے نیں، ماتم کر رہے نیں تے اُچی اُچی وین پا رہے نیں۔
39 یسوع نے اندر جا کے لوکاں نُوں کہیا: ”تُسی کیوں رو رہے تے ماتم کر رہے او؟ بچی مری نئیں سگوں سوں رہی اے۔“
40 ایہہ سُن کے اوہ اوہدا مخول اُڈان لگ پئے۔ پر یسوع نے ساریاں نُوں باہر گھل دِتا تے فیر بچی دے ماں پیو تے اپنے شاگرداں نال اوس کمرے چ گیا جِتھے بچی نُوں رکھیا ہویا سی۔
41 فیر اوہنے بچی دا ہتھ پھڑیا تے کہیا: ”تلیتا قومی۔“ جدا مطلب اے: ”کُڑیئے، مَیں تینوں کہنا واں، اُٹھ جا۔“
42 تے اوہ بچی فوراً اُٹھ پئی تے ٹُرن پھرن لگ پئی۔ (اوہدی عمر 12 سال سی۔) ایہہ ویکھ کے اوہناں دی خوشی دی کوئی حد نہ رہی۔
43 پر یسوع نے اوہناں نُوں وار وار سختی نال منع کیتا کہ اوہ کسے نُوں ایہدے بارے نہ دَسن تے اوہنے ایہہ وی کہیا کہ بچی نُوں کجھ کھان لئی دَوو۔
فٹ نوٹ
^ ”لفظاں دی وضاحت“ نُوں ویکھو۔
^ یاں: ”دس شہراں دا علاقہ۔“
^ یاں شاید، ”مرن والی اے۔“
^ یاں، ”ڈر نہ۔“
