مرقس دی اِنجیل 7:1-37
7 فیر یروشلم توں آئے ہوئے فریسی تے شریعت دے کجھ عالم یسوع دے آلے دَوالے کٹھے ہو گئے۔
2 اوہناں نے ویکھیا کہ یسوع دے کجھ شاگرد ناپاک ہتھاں نال یعنی ہتھ دھوتے بغیر* کھانا کھا رہے نیں۔
3 (اصل چ فریسی تے باقی سارے یہودی اپنے پیو دادے دِیاں رویتاں نُوں قائم رکھن لئی اوہدوں تک کھانا نئیں کھاندے جدوں تک اوہ کُہنیاں تک ہتھ نئیں دھو لیندے۔
4 تے جدوں اوہ بازاروں آندے نیں تے اوہدوں تک کھانا نئیں کھاندے جدوں تک نہا نئیں لیندے۔ نالے اوہ ہور وی کئی رویتاں تے قائم رہندے نیں جیویں کہ پیالیاں، صراحیاں تے تانبے دے بھانڈیاں نُوں پانی چ ڈبو کے دھونا۔)
5 ایس لئی فریسیاں تے شریعت دے عالماں نے یسوع نُوں کہیا: ”تیرے چیلے ناپاک ہتھاں نال کھانا کھاندے نیں۔ اوہ ساڈے پیو دادے دِیاں رویتاں نُوں کیوں نئیں من دے؟“
6 یسوع نے اوہناں نُوں کہیا: ”اَے پاکھنڈیو، یسعیاہ نبی نے تواڈے بارے پیشینگوئی کردیاں ہوئیاں بالکل ٹھیک کہیا سی، جیویں کہ لکھیا اے: ”ایہہ لوک مُونہوں تے میری عزت کردے نیں۔ پر ایہناں دے دل میرے توں بوہت دُور نیں۔
7 اوہ فضول میری عبادت کردے نیں کیونکہ اوہ میرے حکماں دی بجائے انساناں دِیاں رویتاں دی تلیم دیندے نیں۔“
8 تُسی خدا دے حکماں نُوں چھڈ کے انسانی رویتاں نُوں پھڑی رکھدے او۔“
9 یسوع نے اوہناں نُوں ایہہ وی کہیا: ”تُسی اپنیاں رویتاں نُوں قائم رکھن لئی بڑی چالاکی نال خدا دے حکماں نُوں ٹال دیندے او۔
10 مثال لئی، موسیٰ نے کہیا: ” تُوں اپنے ماں پیو دی عزت کرِیں“ تے ”جیہڑا اپنے ماں پیو دی بےعزتی* کردا اے، اوہنوں جانوں مار دِتا جائے۔“
11 پر تُسی کہندے او کہ اِک بندے لئی اپنے ماں پیو نُوں ایہہ کہنا جائز اے: ”جنہاں چیزاں توں توانوں فائدہ ہو سکدا سی، اوہ مَیں قربان (یعنی خدا دے ناں) کر دِتیاں نیں۔“
12 ایس طرحاں تُسی اوس بندے نُوں اپنے ماں پیو لئی کجھ وی نئیں کرن دیندے۔
13 تُسی اپنے پیو دادے وَلّوں ملیاں رویتاں نُوں قائم رکھن دی خاطر خدا دے کلام نُوں ردّ کر دیندے او۔ نالے تُسی ایہو جہے ہور وی بڑے کم کردے او۔“
14 فیر یسوع نے لوکاں نُوں اپنے کول بلا کے کہیا: ”تُسی سارے میری گل سُنو تے ایہدا مطلب سمجھو۔
15 انسان دے مُونہہ چ جو کجھ جاندا اے، اوہدے نال اوہ ناپاک نئیں ہوندا سگوں اوہدے مُونہوں جو کجھ نکلدا اے، اوہدے نال اوہ ناپاک ہوندا اے۔“
16 *—
17 جدوں یسوع بِھیڑ نُوں چھڈ کے اِک گھر چ گیا تے اوہدے شاگرد اوہنوں اوس مثال دا مطلب پچھن لگ پئے جیہڑی اوہنے دِتی سی۔
18 یسوع نے اوہناں نُوں کہیا: ”کیہہ تُسی وی اوہناں وانگوں حالے تک نئیں سمجھے ؟ کیہہ توانوں نئیں پتہ کہ انسان دے مُونہہ تھانی جو وی اوہدے اندر جاندا اے، اوہدے نال اوہ ناپاک نئیں ہوندا؟
19 کیونکہ اوہ اوہدے دل چ نئیں سگوں ٹیڈھ چ جاندا اے تے فیر بعد چوں باہر نکل جاندا اے۔“ اِنج یسوع نے کھان دِیاں ساریاں چیزاں نُوں پاک ٹھہرایا۔
20 فیر اوہنے کہیا: ”جیہڑیاں گلاں انسان دے مُونہہ تھانی باہر آندیاں نیں، اوہ اوہنوں ناپاک کردیاں نیں
21 کیونکہ انسان دے اندروں یعنی اوہدے دل چوں بھیڑی سوچ نکلدی اے جدا نتیجہ ہوندا اے: حرامکاری،* چوری، قتل،
22 زِناکاری، لالچ، بدکاری، دھوکھےبازی، بےحیائی نال غلط کم کرنا،* حسد،* کفرُ، گھمنڈ تے بےوقوفی۔
23 ایہہ ساریاں بھیڑیاں گلاں انسان دے اندروں نکلدیاں نیں تے اوہنوں ناپاک کردیاں نیں۔“
24 فیر یسوع اوتھوں صور تے صیدا دے علاقے چ چلا گیا۔ اوتھے اوہ اِک گھر چ گیا تے اوہ چاہندا سی کہ اوہدے آن دی خبر کسے نُوں نہ ہووے۔ پر فیر وی لوکاں نُوں خبر مِل گئی۔
25 جدوں اِک عورت نے یسوع بارے سُنیا تے اوہ فوراً اوہدے کول آئی تے اوہدے پیری پے گئی کیونکہ اوہدی بچی نُوں اِک باغی فرشتہ چِمبڑیا ہویا سی۔
26 اوہ یونانی عورت سُور فینیکے دی رہن والی سی۔* اوہ وار وار یسوع کولوں فریاد کردی رہی کہ اوہ باغی فرشتے کولوں اوہدی دھی دا کھیڑا چھڈائے۔
27 پر یسوع نے اوہنوں کہیا: ”پہلاں بچیاں نُوں رَج کے کھا لین دے کیونکہ بچیاں کولوں روٹی لے کے کتوریاں نُوں پانا صحی نئیں اے۔“
28 پر عورت نے اوہنوں کہیا: ”مالک، تُوں صحی کیہہ رہیا ایں۔ پر کتورے وی تے اوہی ٹکڑے کھاندے نیں نا جیہڑے بچیاں کولوں میز توں ڈِگ دے نیں۔“
29 یسوع نے اوہنوں کہیا: ”جا، تیری ایس گل دی وجہ توں باغی فرشتہ تیری دھی چوں نکل گیا اے۔“
30 اوہ اپنے گھر چلی گئی تے ویکھیا کہ اوہدی دھی منجی تے لیٹی ہوئی اے تے اوہدے وچوں باغی فرشتہ نکل گیا اے۔
31 یسوع صور دے علاقے چوں واپس آندے ہوئیاں صیدا تے دِکاپُلِس* دے علاقیاں چوں لنگھ کے گلیل دی جھیل کول آیا۔
32 فیر لوک اِک بولھے بندے نُوں یسوع کول لیائے جیہڑا صحی طرحاں بول وی نئیں سکدا سی۔ اوہناں نے یسوع اَگے مِنت کیتی کہ اوہ اوہدے اُتے ہتھ رکھے۔
33 یسوع اوہنوں بِھیڑ توں دُور لے گیا تے اوہدے کناں چ اُنگلیاں پائیاں۔ فیر تُھکن دے بعد اوہنے اوہدی زبان نُوں چُھویا۔
34 فیر یسوع نے اسمان وَل ویکھ کے اِک لما ہونکا بھریا تے اوہنوں کہیا: ”اِفتح“جدا مطلب اے: ”کُھل جا۔“
35 اوس بندے نُوں سُنائی دین لگ پیا۔ اوہدی زبان وی ٹھیک ہو گئی تے اوہ صاف صاف بولن لگ پیا۔
36 پر یسوع نے لوکاں نُوں حکم دِتا کہ اوہ کسے نُوں ایہدے بارے نہ دَسن۔ پر اوہ جِنّاں اوہناں نُوں منع کردا سی اوہ اوناں ای زیادہ چرچا کردے سن۔
37 اصل چ لوک یسوع دے کماں نُوں ویکھ کے بڑے حیران سن تے کہہ رہے سن: ”ایہدے سارے کم تے بڑے ای زبردست نیں۔ ایہہ بولھیاں نُوں سُنن دی تے گُونگیاں نُوں بولن دی طاقت دیندا اے۔“
فٹ نوٹ
^ یعنی یہودیاں دی رویت دے مطابق ہتھ دھوئے بغیر۔
^ یاں، ”گالاں کڈھدا اے۔“
^ ایہہ ایت کئی پرانے نسخیاں چ نئیں اے جدا مطلب اے کہ ایہہ الہامی کلام دا حصہ نئیں اے۔
^ یونانی چ: ”پورنیا۔“ ”لفظاں دی وضاحت“ نُوں ویکھو۔
^ یاں، ”بےشرم چال چلن۔“ یونانی چ: ”اسیلگیا۔“ ”لفظاں دی وضاحت“ نُوں ویکھو۔
^ یاں، ”لالچ نال بھریاں اَکھاں۔“
^ یاں، ”اوہ سُور فینیکے چ پیدا ہوئی سی۔“
^ یاں، ”دس شہراں دا علاقہ۔“
