مرقس دی اِنجیل 8:1-38
-
یسوع 4000 نُوں کھانا کھواندا اے (1-9)
-
لوک یسوع کولوں اسمانوں اِک نشانی منگدے نیں (10-13)
-
فریسیاں تے ہیرودیس دا خمیر (14-21)
-
بیتصیدا چ اِک اَنھے بندے نُوں شفا (22-26)
-
پطرس یسوع نُوں مسیح کہندا اے (27-30)
-
یسوع دی موت بارے پیشینگوئی (31-33)
-
یسوع دے سچے شاگرداں لئی کیہہ کرنا ضروری اے؟ (34-38)
8 اوہناں دِناں چ فیر یسوع کول اِک وڈی بِھیڑ کٹھی ہوئی۔ لوکاں کول کھان لئی کجھ وی نئیں سی۔ ایس لئی یسوع نے شاگرداں نُوں بلا کے کہیا:
2 ”مینوں لوکاں تے بڑا ترس آ رہیا اے کیونکہ اوہ تِن دِناں توں میرے نال نیں تے اوہناں کول کھان لئی کجھ وی نئیں۔
3 جے مَیں اوہناں نُوں بُھکھا ای گھر گھل دِتا تے اوہ راہ چ ای بےہوش ہو جان گے۔ نالے اوہناں وچوں کئی تے بڑی دُوروں آئے نیں۔“
4 پر شاگرداں نے اوہنوں کہیا: ”ایس ویران جگہ چ اَسی اینے سارے لوکاں دا پیٹ بھرن لئی روٹی کتھوں لیائیے؟“
5 یسوع نے اوہناں نُوں پچھیا: ”تواڈے کول کِنّیاں روٹیاں نیں؟“ اوہناں نے کہیا: ”سَت۔“
6 یسوع نے لوکاں نُوں زمین تے بیہن لئی کہیا۔ فیر اوہنے سَت روٹیاں لئیاں تے خدا دا شکر کیتا تے اوہناں نُوں توڑ کے شاگرداں نُوں دِتا تے شاگرداں نے اوہناں نُوں لوکاں چ وَنڈیا۔
7 اوہناں کول کجھ چھوٹیاں مچھیاں وی سن۔ یسوع نے خدا دا شکر کر کے اوہ مچھیاں وی شاگرداں نُوں دِتیاں تے کہیا: ”ایہناں نُوں وی لوکاں چ وَنڈ دیو۔“
8 سارے لوکاں نے رَج کے کھادا۔ فیر شاگرداں نے بچے ہوئے ٹکڑیاں نُوں جمع کیتا جنہاں نال سَت وڈے ٹوکرے بھر گئے۔
9 اوتھے تقریباً 4000 آدمی سن۔ ایہدے بعد یسوع نے لوکاں نُوں گھل دِتا۔
10 فیر یسوع اپنے شاگرداں نال کشتی چ بہہ کے دلمنوتہ دے علاقے چ چلا گیا۔
11 اوتھے فریسی اوہدے کول آئے تے اوہدے نال بحث کرن لگ پئے۔ اوہناں نے اوہنوں اَزمان لئی کہیا: ”سانوں اسمان توں کوئی نشانی وکھا۔“
12 ایہہ سُن کے یسوع بڑا دُکھی ہویا تے اوہنے کہیا: ”ایہہ پُشت نشانی کیوں منگدی اے؟ مَیں سچ کہنا واں، ایس پُشت نُوں کوئی نشانی نئیں وکھائی جائے گی۔“
13 ایہہ کہہ کے یسوع اوتھوں چلا گیا تے دُبارہ کشتی چ بہہ کے جھیل دے دُوجے پاسے جان لئی نکل پیا۔
14 پر شاگرد اپنے نال روٹیاں لیانا بُھل گئے تے اوہناں کول کشتی چ اِک روٹی دے علاوہ ہور کجھ وی نئیں سی۔
15 یسوع نے اوہناں نُوں صاف صاف کہیا: ”خبردار رہوو تے فریسیاں تے ہیرودیس دے خمیر توں بچ کے رہوو۔“
16 اوہ آپس چ اِک دُوجے نال بحث کرن لگ پئے کہ اوہناں وچوں کوئی روٹی کیوں نئیں لیایا۔
17 ایہہ ویکھ کے یسوع نے اوہناں نُوں کہیا: ”تُسی ایس گل تے بحث کیوں کر رہے او کہ تواڈے کول روٹیاں نئیں نیں؟ کیہہ توانوں حالے وی میری گل دا مطلب سمجھ نئیں آیا؟ تے تواڈی سمجھ تے حالے وی پردہ پیا ہویا اے؟
18 اَکھاں ہوندے ہوئیاں وی کیہہ توانوں نظر نئیں آندا؟ تے کن ہوندے ہوئیاں وی کیہہ توانوں سُنائی نئیں دیندا؟ کیہہ توانوں یاد نئیں
19 جدوں مَیں پنج روٹیاں نال 5000 آدمیاں نُوں کھانا کھوایا سی تے بچے ہوئے ٹکڑیاں نال تُسی کِنّے ٹوکرے بھرے سن؟“ اوہناں نے کہیا: ”باراں۔“
20 ”تے جدوں مَیں سَت روٹیاں نال 4000 آدمیاں نُوں کھانا کھوایا سی تے اوہدوں بچے ہوئے ٹکڑیاں نال تُسی کِنّے ٹوکرے بھرے سن؟“ اوہناں نے کہیا: ”سَت۔“
21 فیر یسوع نے اوہناں نُوں کہیا: ”کیہہ تُسی حالے وی نئیں سمجھے؟“
22 فیر اوہ بیت صیدا پہنچے۔ اوتھے لوک اِک انھے آدمی نُوں یسوع کول لیائے تے یسوع اَگے مِنت کیتی کہ اوہ اوہدے تے ہتھ رکھے۔
23 یسوع اوس بندے دا ہتھ پھڑ کے اوہنوں پِنڈوں باہر لے گیا۔ فیر اوہنے اوہدیاں اَکھاں تے تُھک لایا تے اوہناں تے ہتھ رکھے۔ فیر اوہنوں پچھیا: ”کیہہ تینوں کجھ نظر آ رہیا؟“
24 اوس بندے نے اَکھاں چُک کے ویکھیا تے کہیا: ”مینوں لوک تے نظر آ رہے نیں۔ پر اوہ اِنج لگ رہے نیں جیویں درخت ٹُر پھر رہے نیں۔“
25 اوہنے فیر اوس بندے دِیاں اَکھاں تے ہتھ رکھے تے اوہدیاں اَکھاں بالکل ٹھیک ہو گئیاں تے اوہنوں سب کجھ صاف صاف نظر آن لگ پیا۔
26 یسوع نے اوس بندے نُوں گھر بھیج دِتا پر اوہنوں کہیا: ”ایس پِنڈ چ واپس نہ جائیں۔“
27 فیر یسوع تے اوہدے شاگرد قیصریہ فِلپّی دے پِنڈاں وَل ٹُر پئے تے رستے چ یسوع نے اوہناں نُوں پچھیا: ”لوکاں دے خیال چ مَیں کون آں؟“
28 اوہناں نے کہیا: ”کجھ لوک کہندے نیں یوحنا بپتسمہ دین والا، پر کجھ کہندے نیں ایلیاہ۔ کئی لوک کہندے نیں کوئی ہور نبی۔“
29 اوہنے اوہناں نُوں پچھیا: ”پر تواڈے خیال چ مَیں کون آں؟“ پطرس نے جواب دِتا: ”تُوں مسیح ایں۔“
30 ایہہ سُن کے یسوع نے اوہناں نُوں سختی نال حکم دِتا کہ اوہ کسے نُوں اوہدے بارے نہ دَسن۔
31 نالے اوس وقت توں یسوع اوہناں نُوں ایہہ وی دَسن لگ پیا کہ انسان دے بیٹے* تے بڑا ظلم کیتا جائے گا تے بزرگ، وڈے کاہن تے شریعت دے عالم اوہنوں ردّ کر دین گے تے اوہنوں مار دِتا جائے گا۔ پر اوہ تِن دِناں بعد زندہ ہو جائے گا۔
32 یسوع نے ایہہ گلاں صاف صاف دَسیاں۔ پر پطرس اوہنوں اِک پاسے لجا کے جِھڑکن لگ پیا۔
33 یسوع نے مُڑ کے اپنے شاگرداں وَل ویکھیا تے پطرس نُوں جِھڑکدے ہوئیاں کہیا: ”پراں ہٹ، شیطان! کیونکہ تُوں خدا وانگوں نئیں سگوں انساناں وانگوں سوچنا ایں۔“
34 فیر اوہنے اپنے شاگرداں نال دُوجے لوکاں نُوں وی بلایا تے کہیا: ”جے کوئی میرا شاگرد بننا چاہندا اے تے اوہ اپنے لئی جینا چھڈ دَوے تے اپنی سُولی* چُک کے میرے پچھے پچھے چلدا رہوے
35 کیونکہ جیہڑا اپنی جان بچانا چاہندا اے، اوہ ایہنوں گنوا بیٹھے گا۔ پر جیہڑا میری تے خوشخبری دی خاطر اپنی جان گنواندا اے، اوہ ایہنوں بچا لوے گا۔
36 جے اِک انسان ساری دُنیا حاصل کر لوے پر اپنی زندگی گنوا بیٹھے تے اوہنوں کیہہ فائدہ؟
37 یاں اِک انسان زندگی پان لئی کیہہ دے سکدا اے؟
38 ایس بےوفا* تے گُناہگار پُشت وچوں جیہڑا وی میری وجہ توں تے میری تلیم تے چلن دی وجہ توں شرمندگی محسوس کرے گا، انسان دا بیٹا وی اوہدے توں اوس ویلے شرمندگی محسوس کرے گا جدوں اوہ پاک فرشتیاں سمیت اپنے باپ دی شان نال آئے گا۔“
فٹ نوٹ
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ یونانی چ: ”زِناکار۔“
