مرقس دی اِنجیل 9:1-50
-
یسوع دا رُوپ بدل جاندا اے (1-13)
-
اِک مُنڈے نُوں شفا جنہوں باغی فرشتہ چِمبڑیا ہویا سی (14-29)
-
ایمان رکھن والے بندے لئی سب کجھ ممکن اے (23)
-
-
یسوع دی موت بارے دُبارہ پیشینگوئی (30-32)
-
شاگرداں چ بحث کہ اوہناں چ وڈا کون اے (33-37)
-
جیہڑا ساڈے خلاف نئیں اوہ ساڈے نال اے (38-41)
-
گمراہ کرن والیاں چیزاں (42-48)
-
”اپنے آپ چ لُون ورگا سواد رکھو“ (49، 50)
9 فیر اوہنے اوہناں نُوں کہیا: ”مَیں توانوں سچ کہنا واں، ایتھے کجھ ایہو جہے لوک موجود نیں جیہڑے اوہدوں تک نئیں مرن گے جدوں تک اوہ خدا دی بادشاہی نُوں حکمرانی کردیاں نہ ویکھ لین۔“
2 چھ دِناں بعد یسوع اپنے نال پطرس، یعقوب تے یوحنا نُوں لے کے اِک اُچے پہاڑ تے گیا۔ اوتھے اوہناں چاراں دے سوا ہور کوئی نئیں سی۔ اوہناں دے سامنے اوہدا رُوپ بدل گیا۔
3 اوہدے کپڑے لِشکن لگ پئے تے اینے چِٹے ہو گئے کہ دُنیا دا کوئی وی دھوبی کپڑیاں نُوں ایناں چِٹا تے چمکیلا نئیں کر سکدا۔
4 نالے اوتھے ایلیاہ تے موسیٰ وی ظاہر ہوئے تے اوہ دونویں یسوع نال گل کر رہے سن۔
5 فیر پطرس نے یسوع نُوں کہیا: ”اُستاد،* چنگا اے کہ اَسی ایتھے آئے آں۔ اَسی ایتھے تِن تمبو لا دینے آں۔ اِک تیرے لئی، اِک موسیٰ لئی تے اِک ایلیاہ لئی۔“
6 اصل چ پطرس نُوں سمجھ نئیں آ رہیا سی کہ اوہ کیہہ کرے کیونکہ اوہ تِنے بوہت ڈر گئے سن۔
7 فیر اوہناں تے اِک بدّل چھا گیا تے بدّل چوں آواز آئی: ”ایہہ میرا پیارا پُتر اے، ایہدی سُنو۔“
8 فیر جدوں اوہناں نے آلے دَوالے ویکھیا تے اوتھے یسوع دے علاوہ ہور کوئی نئیں سی۔
9 فیر پہاڑ توں تھلے آندے ویلے یسوع نے اوہناں نُوں سختی نال حکم دِتا کہ جو کجھ اوہناں نے ویکھیا اے اوہدے بارے اوہدوں تک کسے نُوں وی نہ دَسن جدوں تک انسان دا بیٹا* مُردیاں چوں زندہ نئیں ہو جاندا۔
10 شاگرداں نے یسوع دی ایس ہدیت نُوں یاد رکھیا۔* پر اوہ آپس چ ایہہ گل کرن لگ پئے کہ ایہدا کیہہ مطلب اے کہ اوہ مُردیاں چوں زندہ ہوئے گا۔
11 تے شاگرد اوہنوں پچھن لگ پئے: ”شریعت دے عالم ایہہ کیوں کہندے نیں کہ پہلے ایلیاہ دا آنا ضروری اے؟“
12 اوہنے اوہناں نُوں کہیا: ”ایلیاہ پہلاں ضرور آئے گا تے سب کجھ ٹھیک کرے گا۔ پر فیر پاک کلام چ انسان دے بیٹے بارے ایہہ کیوں لکھیا اے کہ اوہدے تے بڑا ظلم کیتا جائے گا تے لوک اوہدے توں نفرت کرن گے؟
13 مَیں توانوں کہنا واں، اصل چ ایلیاہ تے آ گیا اے تے جیویں پاک کلام چ اوہدے بارے لکھیا اے، اوہناں نے اوہدے نال اپنی مرضی مطابق سلوک کیتا۔“
14 جدوں یسوع تے اوہ تِنے واپس آئے تے اوہناں نے ویکھیا کہ باقی شاگرداں دے آلے دَوالے اِک بِھیڑ جمع اے تے شریعت دے عالم اوہناں نال بحث کر رہے نیں۔
15 پر جدوں لوکاں نے یسوع نُوں آندے ویکھیا تے اوہ حیران رہ گئے تے اوہنوں مِلن لئی بھجے گئے۔
16 اوہنے اوہناں نُوں پچھیا: ”تُسی شاگرداں نال کیہہ بحث کر رہے او؟“
17 بِھیڑ چوں اِک بندے نے جواب دِتا: ”اُستاد، مَیں اپنے پُتر نُوں تیرے کول لے کے آیا ساں کیونکہ اوہنوں اِک باغی فرشتہ چِمبڑیا ہویا اے جنہے اوہنوں گُونگا کر دِتا اے۔
18 جدوں وی اوہ اوہدے تے حملہ کردا اے، اوہنوں زمین تے سُٹ دیندا اے تے اوہدے مُونہہ چوں جھگ نِکلن لگ پیندی اے۔ اوہ اپنے دَند کِرچن لگ پیندا اے تے بوہت کمزور ہو جاندا اے۔ مَیں تیرے شاگرداں نُوں اوہدے چوں باغی فرشتے نُوں کڈھن لئی کہیا۔ پر اوہ نئیں کڈھ سکے۔“
19 یسوع نے لوکاں نُوں جواب دِتا: ”اَے ایمان توں خالی پُشت، مینوں کِنّاں چِر تواڈے نال رہنا پووے گا؟ تے توانوں سہنا پووے گا؟ مُنڈے نُوں میرے کول لے کے آؤ۔“
20 اوہ مُنڈے نُوں یسوع کول لیائے تے یسوع نُوں ویکھدیاں سار ای باغی فرشتے نے مُنڈے نُوں مروڑیا تے اوہ زمین تے ڈِگ پیا۔ اوہنوں دورے پین لگ پئے تے اوہدے مُونہہ چوں جھگ نِکلن لگ پئی۔
21 فیر یسوع نے مُنڈے دے پیو نُوں پچھیا: ”مُنڈے نُوں ایہہ مسئلہ کدوں توں اے؟“ اوہنے کہیا: ”بچپن توں ای اے۔
22 باغی فرشتہ ایہنوں اکثر کدی اَگ چ تے کدی پانی چ سُٹ کے مارن دی کوشش کردا اے۔ پر جے تُوں کجھ کر سکنا ایں تے ساڈے تے رحم کر تے ساڈی مدد کر۔“
23 یسوع نے اوہنوں کہیا: ”تُوں ایہہ کیوں کہہ رہیا ایں کہ ”جے تُوں کجھ کر سکنا ایں“؟ جیہڑا ایمان رکھدا اے، اوہدے لئی سب کجھ ہو سکدا اے۔“
24 اوسے ویلے مُنڈے دے پیو نے اُچی ساری کہیا: ”مَیں ایمان رکھنا واں۔ پر ایہنوں ہور پکا کرن چ میری مدد کر۔“
25 جدوں یسوع نے ویکھیا کہ ہور وی لوک اوہناں وَل بھجے آ رہے نیں تے اوہنے باغی فرشتے نُوں جِھڑکدے ہوئیاں کہیا: ”مُنڈے نُوں گُونگا تے بولھا کرن والے باغی فرشتیا! مَیں تینوں حکم دینا واں، ایہدے چوں نکل جا تے دُبارہ ایہنوں چِمبڑن دی جرأت نہ کرِیں۔“
26 باغی فرشتہ اُچی اُچی چیکاں مار کے تے مُنڈے نُوں زور دی مروڑ کے اوہدے وچوں نکل گیا تے مُنڈے دی حالت مریاں ورگی ہو گئی۔ ایس لئی بوہت سارے لوک کہہ رہے سن: ”ایہہ تے مر گیا اے۔“
27 پر یسوع نے اوہدا ہتھ پھڑ کے اوہنوں چُکیا تے اوہ کھلو گیا۔
28 فیر جدوں یسوع اِک گھر چ گیا تے اوہدے شاگرداں نے اوہنوں پچھیا: ”اَسی اوس باغی فرشتے نُوں کیوں نئیں کڈھ سکے؟“
29 یسوع نے اوہناں نُوں کہیا: ”ایہو جہے باغی فرشتے نُوں صرف دُعا کر کے ای کڈھیا جا سکدا اے۔“
30 فیر اوہ اوتھوں چلے گئے تے گلیل چوں لنگھے۔ پر یسوع نئیں سی چاہندا کہ ایہدے بارے کسے نُوں وی پتہ چلے
31 کیونکہ اوہ اپنے شاگرداں نُوں تلیم دے رہیا سی تے دَس رہیا سی: ”انسان دے بیٹے نُوں دھوکھے نال دُشمناں دے حوالے کیتا جائے گا تے اوہ اوہنوں جانوں مار دین گے۔ پر ایہدے باوجود اوہ تِن دِناں بعد زندہ ہو جائے گا۔“
32 شاگرداں نُوں اوہدی گل سمجھ نہ آئی۔ پر اوہ اوہدے کولوں کوئی سوال کرن توں جھجک رہے سن۔
33 فیر اوہ کفرنحوم پونچے۔ جدوں اوہ اِک گھر چ سن تے یسوع نے شاگرداں نُوں پچھیا: ”تُسی راہ چ کیہہ بحث کر رہے سو؟“
34 پر اوہ چپ رہے کیونکہ اوہ راہ چ ایہہ بحث کر رہے سن کہ اوہناں چوں سب توں وڈا کون اے۔
35 یسوع بہہ گیا تے اوہنے 12 شاگرداں نُوں کول بلا کے کہیا: ”جے کوئی وڈا بننا چاہندا اے، اوہ سب توں چھوٹا بنے تے ساریاں دی خدمت کرے۔“
36 فیر اوہنے اِک چھوٹے بچے نُوں بلا کے اوہناں دے وچکار کھڑا کیتا تے اوہنوں اپنیاں بانہواں چ لے کے شاگرداں نُوں کہیا:
37 ”جیہڑا وی ایہو جہے چھوٹے بچے نُوں میری خاطر قبول کردا اے، اوہ مینوں وی قبول کردا اے۔ تے جیہڑا مینوں قبول کردا اے، اوہ صرف مینوں ای نئیں سگوں اوہنوں وی قبول کردا اے جنہے مینوں گھلیا اے۔“
38 یوحنا نے اوہنوں کہیا: ”اُستاد، اَسی اِک بندے نُوں تیرے ناں توں باغی فرشتیاں نُوں کڈھدیاں ویکھیا اے۔ تے اَسی اوہنوں روکن دی کوشش کیتی کیونکہ اوہ ساڈے وچوں نئیں اے۔“
39 پر یسوع نے کہیا: ”اوہنوں روکن دی کوشش نہ کرو کیونکہ ایہو جیہا کوئی انسان نئیں جیہڑا میرے ناں توں معجزے کرے تے بعد چ فوراً ای میری بُرائی کرن لگ پووے
40 کیونکہ جیہڑا ساڈے خلاف نئیں، اوہ ساڈے نال اے۔
41 جے کوئی توانوں مسیح دے شاگرد ہون دی وجہ توں پانی دا اِک پیالہ وی پیاندا اے تے مَیں توانوں سچ کہنا واں، اوہ اپنا انعام ضرور پائے گا۔
42 پر جے کوئی میرے تے ایمان رکھن والے ایہناں نُمانیاں وچوں کسے نُوں گمراہ کردا اے تے بہتر ہوئے گا کہ اوہدے گلے چ چکی دا پُڑ* پا کے اوہنوں سمندر چ سُٹ دِتا جائے۔
43 جے تیرا ہتھ تینوں گمراہ کر رہیا اے تے ایہنوں وڈھ دے کیونکہ تیرے لئی ایہی بہتر اے کہ تُوں ٹُنڈا ہو کے زندگی پائیں بجائے ایہدے کہ تُوں دونواں ہتھاں سمیت ہنوم دی وادی* چ سُٹیا جائیں جِتھے اَگ کدی نئیں بُجھدی۔
44 *—
45 تے جے تیرا پیر تینوں گمراہ کر رہیا اے تے اوہنوں وڈھ دے کیونکہ تیرے لئی ایہی بہتر اے کہ تُوں لنگڑا ہو کے زندگی پائیں بجائے ایہدے کہ تُوں دونواں پیراں سمیت ہنوم دی وادی* چ سُٹیا جائیں۔
46 *—
47 تے جے تیری اَکھ تینوں گمراہ کر رہی اے تے اوہنوں کڈھ کے سُٹ دے کیونکہ تیرے لئی ایہی بہتر اے کہ تُوں کانا ہو کے خدا دی بادشاہی چ جائیں بجائے ایہدے کہ تُوں دونواں اَکھاں سمیت ہنوم دی وادی* چ سُٹیا جائیں
48 جِتھے نہ تے کدی کیڑے مردے نیں تے نہ ای اَگ بُجھدی اے۔
49 ہر کسے تے اَگ پائی جائے گی جیویں کھانے تے لُون پایا جاندا اے۔
50 لُون چنگا ہوندا اے۔ پر جے لُون دا سواد ای ختم ہو جائے تے فیر ایہنوں دُبارہ سوادی کیویں بنایا جا سکدا اے؟ اپنے آپ چ لُون ورگا سواد رکھو تے اِک دُوجے نال صلح صفائی نال رہوو۔“
فٹ نوٹ
^ یونانی چ: ”ربّی۔“
^ ”لفظاں دی وضاحت“ نُوں ویکھو۔
^ یاں شاید، ”شاگرداں نے ایہہ گل کسے نُوں نہ دَسی۔“
^ متی 18:6 دے فٹنوٹ نُوں ویکھو۔
^ ”لفظاں دی وضاحت“ نُوں ویکھو۔
^ متی 17:21 دے فٹنوٹ نُوں ویکھو۔
^ ”لفظاں دی وضاحت“ نُوں ویکھو۔
^ متی 17:21 دے فٹنوٹ نُوں ویکھو۔
^ ”لفظاں دی وضاحت“ نُوں ویکھو۔
