گلتیوں دے ناں خط 1:1-24
1 مَیں پولُس انساناں وَلّوں یاں کسے انسان دے ذریعے نئیں سگوں یسوع مسیح تے ساڈے باپ خدا وَلّوں رسول چُنیا گیا واں جنہے یسوع نُوں مُردیاں چوں زندہ کیتا۔
2 مَیں ایہہ خط اپنے نال دے بھراواں نال مِل کے اوہناں ساریاں کلیسیاواں دے ناں لکھ رہیا واں جیہڑیاں گلتیہ* دے علاقے چ نیں۔
3 میری دُعا اے کہ ساڈا باپ خدا تے مالک یسوع مسیح توانوں عظیم رحمت تے سلامتی بخشن۔
4 یسوع نے ساڈے باپ تے خدا دی مرضی دے مطابق ساڈے گُناہواں لئی اپنی جان دے دِتی تاکہ سانوں ایس بھیڑی دُنیا* توں بچا سکے۔
5 خدا دی وڈیائی ہمیشاں ہمیشاں تک ہوندی رہوے۔ آمین۔
6 مَیں بڑا حیران آں کہ تُسی اینی چھیتی خدا توں مُونہہ موڑ لیا اے جنہے مسیح دی عظیم رحمت دی وجہ توں توانوں بلایا سی تے ہُن تُسی کوئی ہور خوشخبری سُنن لگ پئے او۔
7 پر اصل چ کوئی ہور خوشخبری ہے ای نئیں سگوں کجھ لوک توانوں پریشان کر رہے نیں تے اوہ مسیح بارے خوشخبری نُوں توڑ مروڑ کے پیش کرنا چاہندے نیں۔
8 پر جے اَسی یاں اسمانوں کوئی فرشتہ وی آ کے توانوں اوس خوشخبری دے علاوہ جیہڑی اَسی توانوں سُنائی اے، کوئی ہور خوشخبری سُنائے تے اوہدے تے لعنت ہووے۔
9 جیویں کہ اَسی پہلے وی کہیا اے، مَیں دُبارہ کہہ رہیا واں کہ جیہڑا بندہ توانوں اوس خوشخبری دے علاوہ جدے تے تُسی ایمان لیائے او، کوئی ہور خوشخبری سُنائے تے اوہدے تے لعنت ہووے۔
10 اصل چ مَیں کنہوں راضی کرن دی کوشش کر رہیا واں؟ انساناں نُوں یاں خدا نُوں؟ کیہہ مَیں انساناں نُوں خوش کرن دی کوشش کر رہیا واں؟ جے مَیں حالے وی انساناں نُوں خوش کر رہیا ہوندا تے مَیں مسیح دا غلام نہ ہوندا۔
11 بھراوو، مَیں توانوں دَسنا چاہنا واں کہ جیہڑی خوشخبری مَیں توانوں سُنائی اے، اوہ انساناں وَلّوں نئیں
12 کیونکہ مینوں ایہہ نہ تے کسے انسان وَلّوں ملی تے نہ ای مینوں کسے نے سکھائی سگوں یسوع مسیح نے میرے تے ظاہر کیتی۔
13 تُسی سُنیا ای ہوئے گا کہ جدوں مَیں یہودی مذہب چ ساں تے مَیں کیہو جیہا انسان ساں۔ اوس ویلے مَیں خدا دی کلیسیا تے بڑا ظلم کرنا ساں تے مَیں اوہنوں تباہ کرن چ کوئی کسر نئیں چھڈی۔
14 نالے مَیں یہودی مذہب چ اپنی عمر دے بوہت سارے لوکاں نالوں بوہتی ترقی کر رہیا ساں کیونکہ مَیں اپنے پیو دادے دِیاں رویتاں تے اوہناں نالوں بوہتا جوش نال چلنا ساں۔
15 پر جیہڑے خدا نے مینوں زندگی دِتی اوہنے ای اپنی عظیم رحمت دی وجہ توں مینوں بلایا۔ اوہدی مرضی سی
16 کہ اوہ میرے ذریعے اپنے پُتر نُوں دُوجیاں تے ظاہر کرے، تے مَیں غیریہودیاں نُوں اوہدے بارے خوشخبری سُناواں۔ جدوں اوہنے مینوں بلایا تے مَیں اوہدوں کسے انسان کولوں صلاح نئیں لئی
17 تے نہ ای مَیں اوہناں کول یروشلم گیا جیہڑے میرے توں پہلاں رسول بنے سن سگوں مَیں عرب چلا گیا تے فیر واپس دمشق آ گیا۔
18 فیر تِن سال بعد مَیں پطرس* نُوں مِلن لئی یروشلم گیا تے اوہدے نال 15 دن رہیا۔
19 پر اوتھے میری ملاقات کسے ہور رسول نال نئیں ہوئی سوائے یعقوب دے جیہڑا ساڈے مالک دا بھرا اے۔
20 خدا گواہ اے کہ جیہڑیاں گلاں مَیں توانوں لکھ رہیا واں اوہ ساریاں سچیاں نیں۔
21 ایہدے بعد مَیں سُوریہ تے کِلکیہ دے علاقیاں چ چلا گیا۔
22 پر مسیح دے جیہڑے شاگرد یہودیہ دِیاں کلیسیاواں* چ سن، اوہ مینوں نئیں جان دے سن۔
23 اوہناں نے بس ایہہ سُنیا سی کہ جیہڑا بندہ پہلاں ساڈے اُتے ظلم کردا ہوندا سی، اوہ ہُن اوسے مذہب بارے خوشخبری سُنا رہیا اے جنہوں اوہ تباہ کرن تے تلیا ہویا سی۔
24 ایس لئی اوہ میری وجہ توں خدا دی وڈیائی کرن لگ پئے۔
فٹ نوٹ
^ گلتیہ اَج دے ترکیہ دے شہر انقرہ دے آلے دَوالے دا علاقہ سی۔
^ یاں، ”بُرے زمانے۔“
^ یونانی چ: ”کیفا۔“
^ یونانی چ: ”کلیسیاواں جیہڑیاں مسیح نال اِک مُٹھ سن۔“
