گلتیوں دے ناں خط 2:1-21
2 فیر 14 سالاں بعد مَیں برنباس نال دُبارہ یروشلم گیا تے مَیں طِطُس نُوں وی اپنے نال لے گیا۔
2 اوتھے جان دی ہدیت مینوں یسوع وَلّوں ملی سی۔ مَیں صرف ذمےدار بھراواں نُوں اوس خوشخبری بارے دَسیا جیہڑی مَیں غیریہودیاں نُوں سُنا رہیا ساں کیونکہ مَیں نئیں چاہنا ساں کہ خدا دی خدمت چ جیہڑی محنت مَیں کیتی اے یاں کر رہیا واں، اوہ بےفائدہ ثابت ہوئے۔
3 اوس ویلے طِطُس وی میرے نال سی۔ بھانویں کہ اوہ اِک یونانی سی پر فیر وی اوہنوں ختنہ کران تے مجبور نئیں کیتا گیا۔
4 ختنے دا مسئلہ اوہناں جھوٹھے بھراواں نے کھڑا کیتا سی جیہڑے دبے پیری کلیسیا چ وڑھ آئے سن۔ اوہ چوری چھپے ساڈی جاسوسی کرن تے ساڈے کولوں اوس آزادی نُوں کھون آئے سن جیہڑی سانوں مسیح یسوع دے شاگرد بنن دی وجہ توں ملی اے تاکہ سانوں پوری طرحاں موسیٰ دی شریعت دا غلام بنا دین۔
5 پر اَسی اوہناں سامنے بالکل نئیں جُھکے، اِک پل* لئی وی نئیں تاکہ تواڈے دل خوشخبری دی سچائی تے قائم رہن۔
6 پر جیہڑے ذمےدار بھراواں نُوں اہم سمجھیا جاندا اے اوہناں نے مینوں کوئی نوِیں گل نئیں دَسی۔ (اوہناں نُوں بھانویں جیہڑے وی شرف ملے ہون، ایہدے توں مینوں کوئی فرق نئیں پیندا کیونکہ خدا کسے انسان دے رُتبے نُوں نئیں ویکھدا۔)
7 اصل چ اوہناں نے ویکھیا کہ مینوں اوہناں لوکاں نُوں خوشخبری سُنان دی ذمےداری ملی اے جنہاں دا ختنہ نئیں ہویا جیویں کہ پطرس نُوں اوہناں لوکاں نُوں خوشخبری سُنان دی ذمےداری ملی اے جنہاں دا ختنہ ہویا اے۔
8 (کیونکہ جنہے پطرس نُوں اوہناں لوکاں لئی رسول چُنیا جنہاں دا ختنہ ہویا اے اوہنے ای مینوں غیریہودیاں* لئی رسول چُنیا۔)
9 جدوں اوہ بھرا ایہہ سمجھ گئے کہ خدا نے میرے تے عظیم رحمت کیتی اے تے یعقوب، پطرس* تے یوحنا نے، جنہاں نُوں کلیسیا دے ستون سمجھیا جاندا اے، میرے نال تے برنباس نال سجا ہتھ ملا کے ظاہر کیتا کہ اَسی سارے بھرا آں۔ نالے اوہناں نے کہیا: ”تُسی غیریہودیاں کول جاؤ تے اَسی اوہناں لوکاں کول جانواں گے جنہاں دا ختنہ ہویا اے۔“
10 اوہناں نے سانوں ایہہ ہدیت دِتی کہ اَسی غریب لوکاں دا دھیان رکھیے تے مَیں اِنج کرن دی پوری کوشش کیتی وی اے۔
11 پر جدوں پطرس* انطاکیہ آیا تے مَیں اوہدے مُونہہ تے کہیا کہ اوہ بالکل غلط کم کر رہیا اے
12 کیونکہ اوہ پہلاں غیریہودیاں نال کھاندا پیندا سی۔ پر جدوں یعقوب وَلّوں کجھ بھرا آئے جیہڑے ختنے دی رویت تے قائم سن، تے پطرس نے غیریہودیاں نال کھانا پینا چھڈ دِتا تے اوہناں توں دُور رہن لگ پیا کیونکہ اوہ ختنے دی حمایت کرن والیاں توں ڈر گیا سی۔
13 اوہنوں ویکھ کے باقی یہودی وی اِنج* کرن لگ پئے۔ ایتھوں تک کہ برنباس وی ایس پاکھنڈ چ اوہناں نال شامل ہو گیا۔
14 پر جدوں مَیں ویکھیا کہ اوہ خوشخبری دی سچائی دے مطابق نئیں چل رہے تے مَیں پطرس* نُوں ساریاں دے سامنے کہیا: ”تُوں یہودی ہو کے وی غیریہودیاں وانگوں جینا ایں تے فیر تُوں غیریہودیاں نُوں یہودیاں دِیاں رویتاں تے چلن لئی مجبور کیوں کر رہیا ایں؟“
15 اَسی جیہڑے پیدائشی یہودی آں تے غیریہودیاں وانگوں گُناہگار نئیں آں،
16 جاننے آں کہ کوئی وی شریعت تے عمل کرن نال نیک نئیں ٹھہردا سگوں صرف یسوع مسیح تے ایمان رکھن نال نیک ٹھہردا اے۔ ایس لئی اَسی مسیح یسوع تے ایمان لیائے آں تاکہ اَسی شریعت تے عمل کرن نال نئیں سگوں مسیح تے ایمان رکھن نال نیک ٹھہریئے کیونکہ کوئی وی انسان شریعت تے عمل کرن نال نیک نئیں ٹھہر سکدا۔
17 ہُن جے فیر وی سانوں گُناہگار سمجھیا جاندا اے بھانویں کہ اَسی مسیح دے ذریعے نیک ٹھہرن دی کوشش کرنے آں، تے کیہہ ایہدا مطلب ایہہ وے کہ مسیح سانوں گُناہ کرن لئی اُکساندا اے؟ بالکل نئیں!
18 پر جے مَیں اوہناں چیزاں نُوں دُبارہ بنانواں جنہاں نُوں مَیں ڈھا دِتا اے تے مَیں ظاہر کرنا واں کہ مَیں شریعت دے خلاف جا رہیا واں۔
19 بھانویں کہ مَیں شریعت نُوں قبول کیتا سی، پر مَیں ایہدے لحاظ نال مر گیا واں۔ ایس لئی ہُن مَیں خدا لئی جی سکنا واں۔
20 مینوں مسیح نال سُولی* تے چڑھا دِتا گیا اے۔ ایس لئی ہُن مَیں اپنے لئی نئیں سگوں مسیح لئی جینا واں جیہڑا میرے نال اِک مُٹھ اے۔ واقعی، جیہڑی زندگی مَیں جی رہیا واں، اوہ مَیں خدا دے پُتر تے ایمان رکھ کے جی رہیا واں جنہے میرے نال پیار کیتا تے میرے لئی اپنی جان قربان کر دِتی۔
21 مَیں خدا دی عظیم رحمت نُوں ردّ نئیں کردا کیونکہ جے انساناں نُوں شریعت تے عمل کرن دی وجہ توں نیک ٹھہرایا جاندا تے مسیح دے مرن دا کوئی فائدہ نہ ہوندا۔
فٹ نوٹ
^ یونانی چ: ”اِک گھنٹے۔“
^ یعنی جنہاں دا ختنہ نئیں ہویا۔
^ یونانی چ: ”کیفا۔“
^ یونانی چ: ”کیفا۔“
^ یاں، ”پاکھنڈ۔“
^ یونانی چ: ”کیفا۔“
^ ”لفظاں دی وضاحت“ نُوں ویکھو۔
