یعقوب دا خط 2:1-26
2 میرے بھراوو، تُسی ایہہ کیہہ کر رہے او؟ اِک پاسے تے تُسی ساڈے عظیم مالک یسوع مسیح تے ایمان رکھدے او تے دُوجے پاسے لوکاں دی طرفداری کردے او!
2 جے اِک بندہ سونے دِیاں انگوٹھیاں تے بڑے شاندار کپڑے پا کے تواڈی عبادت چ آندا اے تے اِک غریب آدمی گندےمندے کپڑے پا کے آندا اے،
3 تے کیہہ تُسی شاندار کپڑیاں والے بندے نُوں بڑی عزت نال ایہہ کہندے او: ”تُسی ایتھے ودھیا جگہ تے بہوو،“ تے غریب آدمی نُوں ایہہ کہندے او: ”تُوں کھڑا رہ“ یاں ”تُوں ایتھے میرے پیراں کول بہہ“؟
4 جے تُسی اِنج کر رہے او تے کیہہ تُسی لوکاں نال طرفداری نئیں کر رہے تے کیہہ تُسی اوس جج ورگے نئیں جیہڑا نااِنصافی نال فیصلے کردا اے؟
5 پیارے بھراوو، میری گل سُنو۔ کیہہ خدا نے اوہناں لوکاں نُوں نئیں چُنیا جیہڑے دُنیا دی نظر چ غریب نیں تاکہ اوہ ایمان چ امیر بنن تے اوس بادشاہی دے وارث بنن جدا وعدہ اوہنے اوہناں لوکاں نال کیتا اے جیہڑے اوہنوں پیار کردے نیں؟
6 پر تُسی غریباں دی بےعزتی کردے او۔ کیہہ امیر ای تواڈے تے ظلم نئیں کردے؟ تے توانوں عدالتاں چ نئیں گھسیٹ دے؟
7 کیہہ اوہ ای اوس ناں دے خلاف کُفر نئیں بک دے جیہڑا خدا نے توانوں دِتا اے؟
8 پاک کلام چ لکھیا اے: ”تُوں اپنے گوانڈھی نال اُنج ای پیار کر جیویں تُوں اپنے آپ نال کرنا ایں۔“ جے تُسی ایس شاہی حکم تے عمل کردے او تے بوہت چنگا کردے او۔
9 پر جے تُسی طرفداری کردے او تے تُسی گُناہ کر رہے او تے شریعت دے مطابق قصوروار او۔
10 جے کوئی شریعت دے سارے حکماں تے عمل کردا اے، پر اِک حکم نُوں توڑدا اے تے ایہدا مطلب اے کہ اوہ سارے حکماں نُوں توڑ رہیا اے۔
11 خدا نے ایہہ وی کہیا اے: ”تُوں زِنا نہ کرِیں،“ تے ایہہ وی کہیا اے: ”تُوں خون نہ کرِیں۔“ ایس لئی بھانویں تُوں زِنا نئیں کردا، پر خون کرنا ایں تے فیر وی شریعت دے مطابق تُوں قصوروار ایں۔
12 اپنے چالچلن تے بولچال نُوں اوہناں لوکاں ورگا رکھو جنہاں دا اِنصاف آزادی دین والی شریعت دے مطابق کیتا جائے گا
13 کیونکہ جیہڑا رحم نئیں کردا، اوہدی عدالت وی رحم نال نئیں کیتی جائے گی۔ رحم عدالت اُتے فتح پاندا اے۔*
14 میرے بھراوو، جے کوئی کہندا اے کہ اوہ ایمان رکھدا اے، پر ایہدے مطابق کم نئیں کردا تے ایہدا کیہہ فائدہ؟ بھلا کیہہ ایہو جیہا ایمان اوہنوں بچا سکدا اے؟
15 جے کسے بھین یاں بھرا کول کپڑے نہ ہون تے پیٹ بھرن لئی کھانا نہ ہووے،
16 تے تُسی اوہنوں کہوو: ”راضی رہ، نگھاِ تے رَجیا رہ،“ پر اوہنوں ضرورت دِیاں شیواں نہ دَوو تے کیہہ فائدہ؟
17 ایسے طرحاں ایمان وی کماں دے بغیر مُردہ اے۔
18 فیر وی شاید کوئی کہوے: ”تُوں صرف ایمان رکھنا ایں۔ پر مَیں اپنے ایمان دے مطابق کم وی کرنا واں۔ تُوں کماں دے بغیر اپنا ایمان ثابت کر تے مَیں اپنے کماں دے ذریعے اپنا ایمان ثابت کرنا واں۔“
19 جے تُوں مننا ایں کہ خدا اِک ای اے تے ایہہ چنگی گل اے۔ باغی فرشتے وی تے ایہی من دے نیں تے ڈر نال تھرتھر کمبدے نیں۔
20 اَے ناسمجھ، کیہہ تینوں نئیں پتہ کہ کماں دے بغیر ایمان بےکار اے؟
21 ساڈے پیو ابراہام نُوں وی اوہدے کماں دی وجہ توں نیک ٹھہرایا گیا سی کیونکہ اوہنے اپنے پُتر اِضحاق نُوں قربانگاہ تے لٹا دِتا سی۔
22 غور کرو کہ اوہنے اپنے ایمان دے مطابق کم وی کیتے تے اوہدے کماں دی وجہ توں اوہدا ایمان مکمل ہو گیا۔
23 اِنج پاک کلام چ لکھی ایہہ گل پوری ہوئی: ”ابراہام نے یہوواہ تے ایمان رکھیا جدی وجہ توں اوہنوں نیک ٹھہرایا گیا* تے یہوواہ نے اوہنوں اپنا دوست کہیا۔“
24 تُسی ویکھ سکدے او کہ کسے انسان نُوں صرف ایمان دی وجہ توں نئیں سگوں کماں دی وجہ توں نیک ٹھہرایا جاندا اے۔
25 راحب نُوں وی جیہڑی طوائف سی، اوہدے کماں دی وجہ توں نیک ٹھہرایا گیا کیونکہ اوہنے اپنے گھر آن والے جاسوساں* تے مہربانی کیتی تے اوہناں نُوں دُوجے رستے توں گھل دِتا۔
26 بےشک جیویں ساہ* دے بغیر جسم مُردہ ہوندا اے اوسے طرحاں کماں دے بغیر ایمان مُردہ ہوندا اے۔
فٹ نوٹ
^ یعنی رحم کرن والا انسان عدالت دے دن کامیاب ہوئے گا۔
^ یونانی چ: ”نیک لوکاں چ گنیا گیا۔“
^ یونانی چ: ”پیغام لیان والیاں۔“
^ یونانی چ: ”روح۔“
