یعقوب دا خط 3:1-18
3 میرے بھراوو، چنگا ہوئے گا کہ تواڈے وچوں زیادہ جنے اُستاد نہ بنن کیونکہ سانوں پتہ اے کہ اُستاد ہون دی وجہ توں ساڈی عدالت زیادہ سختی نال ہوئے گی
2 کیونکہ اَسی سارے کئی وار غلطیاں کرنے آں۔ جیہڑا انسان بولن چ غلطی نئیں کردا، اوہ بےعیب اے تے اپنے پورے جسم نُوں وی قابو چ رکھ سکدا اے۔
3 اِک گھوڑے نُوں قابو چ رکھن لئی اَسی اوہدے مُونہہ چ لگام پانے آں تے اوہنوں جدھر چاہنے آں، لے جانے آں۔
4 نالے سمندری جہاز بارے سوچو، بھانویں کہ اوہ بوہت وڈا ہوندا اے تے تیز ہواواں دے زور نال چلدا اے، پر فیر وی ملاح اوہنوں اِک چھوٹی جہی پتوار نال اپنی مرضی دے مطابق جدھر چاہوے لے جاندا اے۔
5 ایسے طرحاں زبان وی جسم دا اِک چھوٹا جیہا حصہ اے۔ پر ایہہ وڈیاں وڈیاں پھڑاں مار دی اے۔ یاد رکھو، چھوٹی جہی چنگیاڑی نال پورے جنگل چ اَگ لگ جاندی اے۔
6 زبان وی اِک اَگ اے۔ ایہہ جسم دا اوہ حصہ اے جیہڑا بُرائی دی جڑ اے کیونکہ ایہہ پورے جسم نُوں ناپاک کر دیندی اے تے پوری زندگی چ اَگ لا دیندی اے۔ ایہہ ہنوم دی وادی* دی اَگ وانگوں تباہی مچاندی اے۔
7 انسان ہر قسم دے جنگلی جانوراں، پرندیاں، زمین تے پھرن تے سمندر چ رہن والے جانوراں نُوں قابو چ کر سکدا اے تے اوہنے اوہناں نُوں قابو چ کیتا وی اے۔
8 پر زبان نُوں کوئی وی انسان قابو چ نئیں کر سکدا۔ زبان بےلگام، خطرناک تے جانلیوا زہر نال بھری ہوندی اے۔
9 ایہدے نال اَسی اپنے اسمانی باپ یہوواہ دی وڈیائی کرنے آں تے ایہدے نال ای اَسی لوکاں نُوں بددُعا وی دینے آں جنہاں نُوں خدا نے ”اپنے ورگا بنایا اے۔“
10 اِکو ای مُونہہ چوں دُعا وی نکلدی اے تے بددُعا وی۔
میرے بھراوو، اِنج کرنا صحی نئیں اے۔
11 کیہہ اِکو ای چشمے چوں مٹھا تے کھارا پانی نکل سکدا اے؟
12 میرے بھراوو،کیہہ اِنجیر دے درخت تے زیتون لگ سکدے نیں یاں کیہہ انگور دی ویل تے اِنجیر لگ سکدے نیں؟ ایسے طرحاں کھارے پانی دے چشمے چوں وی مٹھا پانی نئیں نکل سکدا۔
13 تواڈے وچوں حکمت والا تے سیانا کون اے؟ اوہ اپنے چنگے چالچلن توں ظاہر کرے کہ اوہ سارے کم نرم مزاجی نال کردا اے جیہڑی حکمت توں پیدا ہوندی اے۔
14 جے تُسی اپنے دل چ دُوجیاں توں سڑدے او تے دُشمنی پالدے* او تے اپنی حکمت بارے شیخی نہ مارو کیونکہ اِنج تُسی جھوٹھ بول رہے ہووو گے۔
15 اصل چ ایہہ اسمانوں مِلن والی حکمت نئیں اے سگوں ایہہ زمینی، جسمانی* تے شیطانی اے
16 کیونکہ جدوں لوک دُوجیاں توں سڑدے تے دُشمنی پالدے* نیں تے ایہدا نتیجہ افراتفری تے ہر طرحاں دی بُرائی ہوندا اے۔
17 پر جیہڑی حکمت اسمانوں مِلدی اے، اوہ سب توں پہلاں تے پاک ہوندی اے،فیر صلحپسند ، سمجھدار،* فرمانبردار نالے رحم تے بھلائی* نال بھری ہوندی اے۔ اوہ کسے دی طرفداری تے پاکھنڈ نئیں کردی۔
18 نیکی دا بیہہ صلح دے ماحول چ بویا جاندا اے تے ایہدا پھل صلحپسند لوکاں نُوں مِلدا اے۔
فٹ نوٹ
^ ”لفظاں دی وضاحت“ نُوں ویکھو۔
^ یاں شاید، ”خودغرض۔“
^ یونانی چ: ”جانوراں ورگی۔“
^ یاں شاید، ”خودغرض ہوندے۔“
^ یاں، ”لچکدار، ملنسار، اپنی گل تے اَڑے نہ رہن والے۔“
^ یونانی چ: ”چنگے پھلاں۔“
