یعقوب دا خط 4:1-17
4 تُسی آپس چ لڑائی جھگڑے کیوں کردے رہندے او؟ کیہہ ایہدی وجہ تواڈے جسم دِیاں اوہ غلط خواہشاں نئیں جیہڑیاں توانوں اپنے وَس چ کرن لئی تواڈے اندر لڑدیاں رہندیاں نیں؟
2 تُسی جیہڑی چیز دی خواہش کردے او، اوہ توانوں مِلدی نئیں۔ تُسی نفرت* تے لالچ کردے او، پر تواڈے ہتھ کجھ نئیں آندا۔ تُسی لڑدے جھگڑدے رہندے او، پر توانوں کجھ نئیں مِلدا کیونکہ تُسی خدا کولوں منگدے ای نئیں۔
3 پر جے تُسی منگدے وی او تے توانوں مِلدا نئیں کیونکہ تُسی بھیڑی نیت نال منگدے او تاکہ اپنے جسم دِیاں خواہشاں نُوں پورا کر سکو۔
4 اَے بےوفا لوکو،* کیہہ توانوں نئیں پتہ کہ دُنیا نال دوستی کرن دا مطلب خدا نال دُشمنی کرنا اے؟ ایس لئی جیہڑا وی دُنیا دا دوست بننا چاہندا اے، اوہ اپنے آپ نُوں خدا دا دُشمن بنا لیندا اے۔
5 کیہہ توانوں لگدا اے کہ پاک کلام چ ایہہ گل بِلاوجہ لکھی گئی اے: ”ساڈے اندر حسد کرن دی جیہڑی فطرت پائی جاندی اے، اوہ سانوں لالچ کرن تے اُکساندی اے“؟
6 پر خدا دی عظیم رحمت دی مدد نال اَسی اپنی ایس فطرت تے قابو پا سکنے آں۔ ایس لئی پاک کلام چ لکھیا اے: ”خدا گھمنڈی لوکاں دی مخالفت کردا اے، پر خاکسار لوکاں نُوں اپنی عظیم رحمت بخشدا اے۔“
7 ایس لئی اپنے آپ نُوں خدا دے تابع کرو۔ پر اِبلیس دا مقابلہ کرو تے اوہ تواڈے توں بھج جائے گا۔
8 خدا دے نیڑے جاؤ تے اوہ تواڈے نیڑے آئے گا۔ اَے گُناہگارو، اپنے ہتھاں نُوں صاف کرو تے ڈانوانڈول رہن والیو، اپنے دِلاں نُوں پاک کرو۔
9 دُکھی ہووو، سوگ مناؤ تے رووو۔ اپنے ہاسے نُوں سوگ چ تے اپنی خوشی نُوں اُداسی چ بدل لوو۔
10 یہوواہ دے حضور خاکسار بنو تے اوہ توانوں اُچا کرے گا۔
11 بھراوو، اِک دُوجے دے خلاف بولنا بند کر دَوو۔ جیہڑا اپنے بھرا دے خلاف بولدا اے یاں اپنے بھرا چوں نُقص کڈھدا اے، اوہ شریعت دے خلاف بولدا اے تے اوہدے چ نُقص کڈھدا اے۔ جے تُسی شریعت چ نُقص کڈھدے او تے فیر تُسی ایہدے تے عمل کرن والے نئیں سگوں عدالت کرن والے* بن گئے او۔
12 پر شریعت دین والا تے عدالت کرن والا تے اِک ای اے۔ اوہی لوکاں نُوں بچا وی سکدا اے تے مار وی سکدا اے۔ فیر اپنے گوانڈھی نُوں قصوروار ٹھہران والا تُوں کون ہُنا ایں؟
13 ہُن تُسی وی میری گل سُنو جیہڑے کہندے او: ”اَج یاں کل اَسی فلاں شہر جاواں گے تے اوتھے اِک سال رہواں گے تے کاروبار کر کے پیسہ کمانواں گے،“
14 جد کہ توانوں پتہ ای نئیں کہ کل تواڈے نال کیہہ ہوئے گا۔ تواڈی زندگی تے دُھند ورگی اے جیہڑی تھوڑے چِر لئی پیندی اے تے فیر ختم ہو جاندی اے۔
15 ایہدی بجائے توانوں ایہہ کہنا چاہی دا اے: ”جے یہوواہ نے چاہیا تے اَسی زندہ رہواں گے تے ایہہ یاں اوہ کم کراں گے۔“
16 پر تُسی تے گھمنڈی او تے اپنے بارے شیخیاں ماردے او۔ اِنج شیخیاں مارنا بڑی بھیڑی گل اے۔
17 ایس لئی جے کوئی صحی کم کرنا جان دا اے، پر نئیں کردا تے اوہ گُناہ کردا اے۔
