یعقوب دا خط 5:1-20
5 اَے امیر لوکو، میری گل سُنو۔ تُسی اوہناں مصیبتاں دی وجہ توں رووو پٹو جیہڑیاں تواڈے تے آن والیاں نیں۔
2 تواڈی دولت سڑ گئی اے تے تواڈے کپڑیاں نُوں کیڑے کھا گئے نیں۔
3 تواڈے سونے تے چاندی نُوں زنگ کھا گیا اے تے ایہہ زنگ تواڈے خلاف گواہی دے گا تے توانوں کھا جائے گا۔ تواڈا جمع کیتا ہویا مال آخری زمانے چ اَگ وانگوں ہوئے گا۔
4 جیہڑے مزدوراں نے تواڈے کھیتاں چ واڈھی کیتی سی، تُسی اوہناں دی مزدوری کھا گئے او۔ ویکھو، اوہ مزدور تواڈے خلاف دُہائی دے رہے نیں تے اوہناں دی دُہائی فوجاں دے رب یہوواہ دے کناں تک پونچ گئی اے۔
5 تُسی دُنیا چ بڑی عیش کیتی اے تے اپنے جسم دِیاں خواہشاں نُوں پورا کیتا اے۔ تواڈے دل اوہناں جانوراں ورگے نیں جیہڑے ذِبح ہون دے دن تک کھا کھا کے موٹے ہو جاندے نیں۔
6 تُسی نیک لوکاں نُوں قصوروار ٹھہراندے او تے اوہناں نُوں قتل کردے او۔ ایس لئی اوہ* تواڈی مخالفت کردا اے۔
7 ایس لئی بھراوو، ساڈے مالک دی موجودگی تک صبر رکھو۔ ویکھو، اِک کسان ودھیا فصل حاصل کرن لئی پہلے تے آخری مِینہہ دا صبر نال اِنتظار کردا اے۔
8 تُسی وی صبر توں کم لوو۔ اپنے دِلاں نُوں تگڑا کرو کیونکہ مالک دی موجودگی دا ویلا نیڑے آ گیا اے۔
9 بھراوو، تُسی اِک دُوجے دے خلاف بُڑبُڑ* نہ کرو تاکہ توانوں قصوروار نہ ٹھہرایا جائے۔ ویکھو، عدالت کرن والا دروازے تے آ پونچیا اے۔
10 بھراوو، تُسی مشکلاں نُوں برداشت کرن تے صبر توں کم لین دے معاملے چ نبیاں دی مثال تے چلو جنہاں نے یہوواہ دے ناں تے پیغام سُنایا سی۔
11 ویکھو، اوہ لوک خوش نیں جنہاں نے مشکلاں نُوں صبر نال برداشت کیتا اے۔ تُسی ایہہ تے سُنیا ای اے کہ ایوب نے کِنّے صبر نال دُکھ سہے سن تے توانوں پتہ اے کہ ایہدی وجہ توں یہوواہ نے اوہنوں کِنّیاں برکتاں دِتیاں سن۔ ایہدے توں ظاہر ہوندا اے کہ یہوواہ کِنّاں پیار کرن والا* تے رحمدل اے۔
12 پر میرے بھراوو، سب توں ضروری ایہہ وے کہ تُسی قسم کھانا چھڈ دَوو۔ تُسی نہ تے اسمان دی قسم کھاؤ، نہ زمین دی تے نہ ای کسے ہور شے دی سگوں تواڈی ”ہاں“ ہاں ہووے تے تواڈی ”نہ“ نہ ہووے تاکہ توانوں قصوروار نہ ٹھہرایا جائے۔
13 کیہہ تواڈے وچوں کوئی مشکلاں سہہ رہیا اے؟ اوہ دُعا کردا رہوے۔ کیہہ تواڈے وچوں کوئی بوہت زیادہ خوش اے؟ اوہ خدا دی وڈیائی کرن لئی زبور گائے۔
14 کیہہ تواڈے وچوں کوئی بیمار* اے؟ اوہ کلیسیا دے بزرگاں نُوں بلائے تے بزرگ اوہدے لئی دُعا کرن تے یہوواہ دے ناں توں اوہنوں تیل ملن۔*
15 ایمان نال کیتی گئی دُعا دی وجہ توں بیمار* ٹھیک ہو جائے گا تے یہوواہ اوہنوں تگڑا کرے گا۔ نالے جے اوہنے گُناہ کیتے ہون گے تے اوہ وی معاف ہو جان گے۔
16 ایس لئی اِک دُوجے دے سامنے اپنے گُناہواں دا اِقرار کرو تے اِک دُوجے لئی دُعا کرو تاکہ توانوں شفا ملے۔ نیک بندے دی اِلتجا چ بڑا اثر ہوندا* اے۔
17 ایلیاہ نبی وی ساڈے ورگا انسان سی تے ساڈے ورگے جذبات رکھدا سی۔ پر جدوں اوہنے پورے دل نال دُعا کیتی کہ مِینہہ نہ پووے تے ملک چ ساڈھے تِن سال تک مِینہہ نہ پیا۔
18 فیر جدوں اوہنے دُبارہ دُعا کیتی تے اسمانوں مِینہہ پیا تے زمین تے فصلاں اُگن لگ پئیاں۔
19 میرے بھراوو، جے تواڈے وچوں کوئی سچائی دی راہ توں بھٹک جائے تے کوئی ہور اوہنوں واپس لے آئے
20 تے یاد رکھو کہ جیہڑا اوس گُناہگار نُوں غلط راہ توں واپس لیایا اے، اوہنے اصل چ اوہنوں موت توں بچایا اے تے گُناہواں دی معافی حاصل کرن چ اوہدی مدد کیتی اے۔
فٹ نوٹ
^ یاں شاید، ”خدا۔“
^ یاں، ”شکایت نہ کرو۔“ یونانی چ:”ہوکے نہ بھرو۔“
^ یاں، ”بڑا ہمدرد۔“
^ یعنی اوہ بندہ جدی خدا نال دوستی کمزور پے گئی اے۔
^ یعنی خدا دے کلام وچوں صلاح دین۔
^ یاں شاید، ”تھکیا ہویا۔“
^ یونانی چ: ”طاقت ہوندی۔“
