یوحنا دی اِنجیل 2:1-25
2 فیر ایہدے دو دن بعد گلیل دے اِک پِنڈ قانا چ اِک ویاہ ہویا تے یسوع دی ماں وی اوتھے گئی۔
2 یسوع تے اوہدے شاگرداں نُوں وی اوس ویاہ تے سّدیا گیا سی۔
3 جدوں دعوت چ مے ختم ہو گئی تے یسوع دی ماں نے اوہنوں کہیا: ”اوہناں کول مے مُک گئی اے۔“
4 پر یسوع نے اوہنوں کہیا: ”بی بی،* ساڈا ایہدے نال کیہہ واسطہ؟ میرا ویلا حالے نئیں آیا۔“
5 اوہدی ماں نے نوکراں نُوں کہیا: ”اوہ توانوں جو وی کہوے، تُسی اوہی کرنا۔“
6 یہودیاں دی پاک کرن دی رویت دے مطابق اوتھے پانی لئی پتھر دے 6 گھڑے رکھے ہوئے سن تے ہر گھڑے چ تقریباً 44 توں 66 لیٹر* پانی دی گنجائش سی۔
7 یسوع نے نوکراں نُوں کہیا: ”گھڑیاں نُوں پانی نال بھر دَوو۔“ ایس لئی اوہناں نے گھڑیاں نُوں نکونک بھر دِتا۔
8 فیر یسوع نے اوہناں نُوں کہیا: ”ہُن تھوڑا جیہا کڈھ کے اوس بندے کول لے جاؤ جیہڑا دعوت دا اِنتظام ویکھ رہیا اے۔“ تے اوہناں نے اِنج ای کیتا۔
9 جدوں اوس بندے نے پانی نُوں چکھیا جیہڑا مے بن گیا سی تے اوہنے لاڑے نُوں بلایا کیونکہ اوہنوں پتہ نئیں سی کہ ایہہ مے کتھوں آئی اے (پر اوہناں نوکراں نُوں پتہ سی جنہاں نے گھڑیاں چوں پانی کڈھیا سی)۔
10 اوس بندے نے لاڑے نُوں کہیا: ”ہر دعوت چ مہماناں اَگے پہلاں ودھیا مے رکھی جاندی اے تے جدوں اوہناں نُوں نشہ چڑھ جاندا اے تے فیر اوہ مے رکھی جاندی اے جیہڑی اینی ودھیا نئیں ہوندی۔ پر تُوں تے سب توں ودھیا مے آخر چ دے رہیا ایں۔“
11 یسوع نے اپنا ایہہ پہلا معجزہ گلیل دے پِنڈ قانا چ کیتا۔ ایس معجزے دے ذریعے اوہنے اپنی طاقت ظاہر کیتی تے اوہدے شاگرد اوہدے تے ایمان لیائے۔
12 ایہدے بعد یسوع، اوہدی ماں، اوہدے بھرا تے اوہدے شاگرد کفرنحوم گئے۔ پر اوہ اوتھے زیادہ دن نہ ٹھہرے۔
13 یہودیاں دی فسح دی عید نیڑے سی۔ ایس لئی یسوع یروشلیم گیا۔
14 پر جدوں اوہ ہیکل* چ گیا تے اوہنے ویکھیا کہ بیوپاری اوتھے ڈنگر، بھیڈاں تے کبوتر ویچ رہے نیں تے پیسے بدلن والے اپنے میز لا کے بیٹھے ہوئے نیں۔
15 ایس لئی اوہنے رسّیاں دا اِک کوڑا بنایا تے ڈنگراں تے بھیڈاں سمیت بیوپاریاں نُوں اوتھوں کڈھ دِتا۔ اوہنے پیسے بدلن والیاں دے سِکّے کھلار دِتے تے اوہناں دِیاں میزاں نُوں اُلٹ دِتا۔
16 فیر اوہنے کبوتر ویچن والیاں نُوں کہیا: ”لے جاؤ ایتھوں، ایہناں چیزاں نُوں! میرے باپ دے گھر نُوں منڈی نہ بناؤ!“
17 ایہہ ویکھ کے یسوع دے شاگرداں نُوں یاد آیا کہ کلام چ لکھیا اے کہ ”میرے دل چ تیرے گھر لئی جوش دی اَگ بل رہی اے۔“
18 پر یہودیاں نے اوہنوں کہیا: ”سانوں کوئی ایہو جہی نشانی وکھا جدے توں ثابت ہوئے کہ تیرے کول ایہہ سب کجھ کرن دا اِختیار اے۔“
19 یسوع نے اوہناں نُوں کہیا: ”ایس ہیکل نُوں ڈھا دیو تے مَیں ایہنوں تِن دِناں چ دُبارہ کھڑا کر دَواں گا۔“
20 یہودیاں نے اوہنوں کہیا: ”ایس ہیکل نُوں بنان چ 46 سال لگے سن تے تُوں ایہنوں تِن دِناں چ کھڑا کریں گا؟“
21 پر اصل چ یسوع ہیکل دی نئیں سگوں اپنے جسم دی گل کر رہیا سی۔
22 جدوں یسوع نُوں مُردیاں چوں زندہ کیتا گیا تے اوہدے شاگرداں نُوں اوہدی ایہہ گل یاد آئی جیہڑی اوہ کہندا ہوندا سی تے اوہ خدا دے کلام تے یسوع دِیاں گلاں تے ایمان لیائے۔
23 فیر جدوں یسوع فسح دی عید تے یروشلیم چ سی تے اوہدے معجزیاں نُوں ویکھ کے بوہت سارے لوک اوہدے ناں تے ایمان لیائے۔
24 پر یسوع نُوں اوہناں تے بھروسا نئیں سی کیونکہ اوہ اوہناں ساریاں نُوں چنگی طرحاں جان دا سی۔
25 اوہنوں کسے انسان بارے دُوجیاں کولوں پچھن دی لوڑ نئیں سی کیونکہ اوہ انسان دے دل دی گل جان لیندا سی۔
فٹ نوٹ
^ یونانی چ: ”بی بی، ایہدے نال تینوں کیہہ تے مینوں کیہہ؟“ ایہہ اِک محاورہ سی جدے توں ظاہر ہوندا سی کہ اِک بندہ کسے گل نال متفق نئیں اے۔ جدوں یسوع نے اپنی ماں نُوں ”بی بی“ کہیا تے اوہ اوہدی بےعزتی نئیں کر رہیا سی۔
^ یونانی چ: ”دو یاں تِن بتھ۔“ ایتھے پانی نُوں ناپن دے شاید اوس پیمانے وَل اشارہ کیتا گیا اے جنہوں ”بتھ“ کہیا جاندا سی۔ اِک بتھ 22 لیٹر دے برابر ہوندا سی۔
^ یعنی خدا دا گھر۔
