یہوداہ دا خط 1:1-25
1 مَیں یہوداہ، یسوع مسیح دا غلام تے یعقوب دا بھرا ایہہ خط اوہناں چُنے ہوئے لوکاں نُوں لکھ رہیا واں جنہاں نُوں خدا باپ پیار کردا اے تے جنہاں نُوں یسوع مسیح لئی محفوظ رکھیا گیا اے۔
2 دُعا اے کہ توانوں خدا وَلّوں ہور زیادہ رحم، اِطمینان تے پیار ملے۔
3 پیاریو، اصل چ مَیں توانوں اوس نجات بارے لکھنا چاہنا ساں جیہڑی سانوں ساریاں نُوں ملی اے۔ پر مَیں توانوں ایہہ تاکید کرنا زیادہ ضروری سمجھیا کہ تُسی اوس ایمان* لئی پوری وا لا کے لڑو جیہڑا مُقدس لوکاں نُوں اِک ای وار ہمیشاں لئی دے دِتا گیا اے۔
4 مَیں توانوں ایس لئی لکھ رہیا واں کیونکہ کجھ آدمی چوری چھپے تواڈے چ آ وڑے نیں۔ ایہناں آدمیاں بارے بوہت چِر پہلاں ای پاک کلام چ دَس دِتا گیا اے کہ اوہ سزا دے لائق نیں۔ ایہہ بھیڑے آدمی خدا دا خوف نئیں من دے تے ساڈے خدا دی عظیم رحمت نُوں بہانہ بنا کے بےحیائی* نال غلط کم کردے نیں تے اپنے اِکو سردار تے مالک یعنی یسوع مسیح نال بےوفائی کردے نیں۔
5 بھانویں کہ تُسی ایہناں گلاں نُوں پہلاں ای چنگی طرحاں جان دے او پر فیر وی مَیں توانوں یاد دَوانا چاہنا واں کہ یہوواہ نے اپنے بندیاں نُوں مصر توں نجات دَوائی پر فیر بعد چوں اوہناں لوکاں نُوں ختم کر دِتا جنہاں نے ایمان ظاہر نئیں کیتا سی۔
6 نالے اوہناں فرشتیاں نُوں وی یاد کرو جنہاں نے اوس مقام، تے اپنے رہن دی اوس جگہ* نُوں چھڈ دِتا جیہڑی خدا نے اوہناں نُوں دِتی سی۔ اوہنے اوہناں نُوں ہمیشاں لئی بیڑیاں چ بنھ کے گُھپ نھیرے چ رکھیا ہویا اے تاکہ اوہناں نُوں عدالت دے وڈے دن تے سزا دِتی جائے۔
7 ایسے طرحاں سدوم تے عمورہ تے اوہناں دے آلے دوالے دے شہراں دے لوک وی حرامکاری* کرن چ مست سن تے اپنیاں ناجائز* جنسی خواہشاں نُوں پورا کرن چ لگے ہوئے سن۔ اوہناں دی بھیڑی مثال ساڈے لئی اِک سبق اے کیونکہ اوہناں نُوں ابدی اَگ وچ ساڑ کے سزا دِتی گئی۔
8 ایہدے باوجود ایہہ بھیڑے آدمی غلط خیالاں چ پئے ہوئے نیں،* جسم نُوں ناپاک کردے نیں، اِختیار رکھن والیاں نُوں حقیر سمجھدے نیں تے اوہناں لوکاں دی بےعزتی کردے نیں جنہاں نُوں خدا نے عزت بخشی اے۔
9 پر جدوں فرشتیاں دے سردار میکائیل تے اِبلیس دی آپس چ موسیٰ دی لاش بارے سخت بحث ہوئی تے میکائیل نے اوہدی بےعزتی کر کے اوہنوں قصوروار ٹھہران دی جرأت نہ کیتی سگوں بس ایہہ کہیا: ”یہوواہ ای تیری عدالت* کرے۔“
10 پر ایہہ آدمی اوہناں ساریاں گلاں نُوں بھیڑا کہندے نیں جنہاں نُوں اوہ سمجھدے نئیں۔ اوہ بےعقل جانوراں ورگی فطرت رکھدے نیں تے ایہدے مطابق کم کر کے اپنے آپ نُوں وگاڑدے نیں۔
11 اوہناں دا انجام بھیڑا ہوئے گا کیونکہ اوہ قائن دی راہ تے ٹُر پئے نیں تے اوہناں نے انعام پان دے لالچ چ چھیتی نال اوہ غلط راہ پھڑ لئی اے جدے تے بلعام چلیا سی۔ اوہ قورح وانگوں بغاوتی گلاں کر کے تباہ ہو گئے نیں۔
12 ایہہ آدمی اوہناں دعوتاں تے آ کے تواڈے نال کھاندے پیندے نیں جیہڑیاں تُسی اِک دُوجے دی مہماننوازی لئی کردے او۔ پر اصل چ ایہہ آدمی ایہو جہیاں چٹاناں نیں جیہڑیاں پانی دے تھلے لُکیاں ہوندیاں نیں۔ اوہ ایہو جہے چرواہے نیں جیہڑے بغیر کسے ڈر خوف دے اپنا پیٹ بھردے نیں۔ اوہ ایہو جہے بدّل نیں جنہاں چ پانی نئیں ہوندا تے جنہاں نُوں ہوا اُڈا کے لے جاندی اے۔ اوہ ایہو جہے درخت نیں جنہاں نُوں پھل دے موسم چ وی پھل نئیں لگدا۔ اوہ پوری طرحاں سُک گئے نیں تے اوہناں نُوں جڑوں پُٹ دِتا گیا اے۔
13 اوہ سمندر دِیاں طوفانی لہراں نیں جیہڑیاں بےشرمی دی جھگ اُچھال دِیاں نیں۔ اوہ آوارہ تارے نیں جیہڑے ہمیشاں لئی گُھپ نھیرے چ رہن گے۔
14 حنوک نے وی جیہڑا آدم دی ستویں پُشت چ سی، ایہناں بندیاں بارے پیشینگوئی کردے ہوئیاں کہیا: ”ویکھو، یہوواہ اپنے ہزاراں پاک فرشتیاں نال آیا
15 تاکہ سارے لوکاں دی عدالت کرے تے اوہناں نُوں سزا دَوے جیہڑے اوہدا خوف نئیں من دے کیونکہ اوہناں گُناہگاراں نے بھیڑے کم کیتے تے اوہدے خلاف بےہودہ گلاں کیتیاں۔“
16 ایہہ آدمی بُڑ بُڑ کردے نیں تے اپنی حالت تے کُڑھدے نیں۔ اوہ اپنیاں خواہشاں دے مطابق چلدے نیں، وڈیاں وڈیاں پھڑاں ماردے نیں تے اپنے فائدے لئی دُوجیاں دی چاپلوسی کردے نیں۔
17 پر پیاریو، تُسی اوہ گلاں یاد کرو جیہڑیاں ساڈے مالک یسوع مسیح دے رسولاں نے پہلاں ای دَسیاں نیں۔
18 اوہ توانوں دَسدے ہوندے سن کہ ”آخری زمانے چ ایہو جہے لوک ہون گے جیہڑے چنگیاں گلاں دا مخول اُڈان گے تے اپنیاں بھیڑیاں خواہشاں مطابق چلن گے۔“
19 ایہہ آدمی کلیسیا چ پُھٹ پاندے نیں، ایہہ جسمانی سوچ رکھدے نیں* تے خدا دی روح دی رہنمائی چ نئیں چلدے۔
20 پر پیاریو، تُسی اپنے پاک ایمان دی بنیاد تے اپنے آپ نُوں مضبوط کردے رہوو تے پاک روح دی رہنمائی چ دُعا کردے رہوو
21 تاکہ تُسی خدا نال پیار دے بندھن چ بھجے رہوو نالے اوس ویلے دا اِنتظار کرو جدوں ساڈا مالک یسوع مسیح تواڈے تے رحم کر کے توانوں ہمیشاں دی زندگی دَوے گا۔
22 نالے شک کرن والے لوکاں تے وی رحم کردے رہوو
23 تے اوہناں نُوں اَگ وچوں کھچ کے بچا لوَو۔ دُوجیاں تے وی رحم کردے رہوو پر آپ وی خبردار رہوو تے اوس کپڑے* توں وی نفرت کرو جیہڑا جسم دے کماں نال گندا ہو گیا اے۔
24 خدا توانوں گمراہ ہون توں بچا سکدا اے تے توانوں پوری طرحاں پاک کر کے اپنی شاندار حضوری وچ کھلار سکدا اے جدے توں توانوں بڑی خوشی ملے گی۔
25 اوس اِکو اِک خدا نے ساڈے مالک یسوع مسیح دے ذریعے سانوں نجات دِتی اے۔ جلال، شان، طاقت تے اِختیار ہمیشاں توں خدا دا ای اے، ہُن وی اے تے ہمیشاں تک رہوے گا۔ آمین۔
فٹ نوٹ
^ یعنی ساری مسیحی تلیم۔
^ یاں، ”ڈیٹھ ہو کے۔“ ”لفظاں دی وضاحت“ نُوں ویکھو۔
^ یعنی اسمان۔
^ ”لفظاں دی وضاحت“ نُوں ویکھو۔
^ یونانی چ: ”فطرت دے خلاف۔“
^ یاں، ”خواب ویکھدے رہندے نیں۔“
^ یونانی چ: ”تینوں جھڑکے۔“
^ یونانی چ: ”جانوراں ورگے نیں۔“
^ یعنی بھیڑے کماں توں نفرت کرو۔
