پطرس دا پہلا خط 3:1-22
3 ایسے طرحاں بیویو، تُسی اپنے اپنے شوہر دے تابع رہوو تاکہ جے تواڈا شوہر خدا دے کلام نُوں نہ وی من دا ہووے تے فیر وی تواڈے کجھ کہے بغیر ای اوہ تواڈے چالچلن نُوں ویکھ کے شاید ایمان لے آئے
2 کیونکہ اوہ اپنی اَکھیں ویکھے گا کہ تواڈا چالچلن پاک اے تے تُسی اوہدی بڑی عزت کردیاں او۔
3 تواڈی خوبصورتی صرف ظاہری نہ ہووے یعنی فرق فرق طریقیاں نال وال بنانا،* سونے دے زیور تے شاندار کپڑے پانا
4 سگوں تواڈی خوبصورتی اندرونی ہووے یعنی تُسی دل چ چھپے انسان نُوں نرمی تے حلیمی نال سجاؤ کیونکہ ایہو جہی سجاوٹ کدی پرانی نئیں ہوندی تے ایہہ خدا دِیاں نظراں چ بڑی انمول اے۔
5 پرانے زمانے چ خدا تے بھروسا رکھن والیاں نیک عورتاں وی اپنے آپ نُوں ایسے طرحاں سجاندیاں سن یعنی اوہ اپنے اپنے شوہر دے تابع رہندیاں سن
6 بالکل اونویں ای جیویں سارہ ابراہام دی فرمانبردار سی تے اوہنوں مالک کہندی سی۔ جے تُسی وی چنگے کماں چ لگیاں رہوو تے ڈر کے حوصلہ نہ ہارو تے تُسی سارہ دِیاں دِھیاں ہووو گیاں۔
7 شوہرو، تُسی وی اپنی اپنی بیوی نال سمجھداری* نال زندگی گزارو۔ اوہ تواڈے نالوں بوہتی نازک اے۔ ایس لئی اِک نازک برتن وانگوں اوہدا خیال رکھو تے اوہدی عزت کرو کیونکہ اوہ وی تواڈے وانگوں زندگی دی نعمت دی وارث اے جیہڑی توانوں خدا دی عظیم رحمت دی وجہ توں ملے گی۔ جے تُسی اِنج نئیں کرو گے تے خدا تواڈیاں دُعاواں نئیں سُنے گا۔
8 آخر چ مَیں کہنا واں کہ تُسی سارے اِکو جہی سوچ رکھو، اِک دُوجے دے دُکھسُکھ چ شریک ہووو، بھین بھراواں وانگوں آپس چ پیار کرو، اِک دُوجے لئی ہمدردی وکھاؤ تے خاکسار بنو۔
9 جے کوئی تواڈا نقصان کردا اے تے بدلے چ اوہدا نقصان نہ کرو۔ یاں جے کوئی تواڈی بےعزتی کردا اے تے بدلے چ اوہدی بےعزتی نہ کرو۔ ایہدی بجائے اوہدا بھلا کرو کیونکہ خدا نے توانوں ایسے لئی بلایا اے تاکہ ورثے چ توانوں برکت ملے۔
10 کیونکہ ”جیہڑا انسان زندگی نال پیار کردا اے تے چنگے دن ویکھنا چاہندا اے، اوہ اپنی زبان نُوں بھیڑیاں گلاں کرن تے اپنے بُلھاں نُوں جھوٹھ بولن توں باز رکھے۔
11 اوہ بھیڑے کم کرنا چھڈ دَوے تے نیکی کرے۔ اوہ صلح کرن تے ایہنوں قائم رکھن دی پوری کوشش کردا رہوے
12 کیونکہ یہوواہ دِیاں اَکھاں نیک لوکاں تے نیں تے اوہدے کن اوہناں دِیاں اِلتجاواں سُن دے نیں۔ پر یہوواہ بھیڑے کم کرن والیاں دے خلاف اے۔“
13 جے تُسی جوش نال چنگے کم کردے او تے بھلا کون توانوں نقصان پونچائے گا؟
14 پر جے توانوں نیک کم کرن دی وجہ توں دُکھ سہنے وی پیندے نیں تے خوش ہووو۔ تُسی اوہناں گلاں توں نہ ڈرو* جنہاں توں لوک ڈردے نیں تے نہ ای پریشان ہووو۔
15 ایہدی بجائے اپنے دل چ مسیح نُوں مالک تے مُقدس سمجھو تے اوہناں لوکاں نُوں جواب دین لئی ہر ویلے تیار رہوو جیہڑے تواڈی امید بارے سوال پچھدے نیں۔ پر جواب نرممزاجی تے بڑی عزت نال دَوو۔
16 اپنا ضمیر صاف رکھو تاکہ جیہڑے لوک تواڈے خلاف بولدے نیں، اوہ ایہہ ویکھ کے شرمندہ ہون کہ مسیح دے شاگرد ہون دی وجہ توں تواڈا چالچلن چنگا اے۔
17 جے خدا توانوں چنگے کم کرن دی وجہ توں دُکھ سہن دیندا اے تے ایہہ بھیڑے کم کر کے دُکھ سہن نالوں بہتر اے۔
18 مسیح نے وی اِک ای وار ہمیشاں لئی گُناہ مٹان لئی اپنی جان قربان کر دِتی۔ اوہ نیک سی، پر گُناہگاراں دی خاطر مر گیا تاکہ توانوں خدا مِل جائے۔ اوہ انسان دے طور تے مریا، پر اوہنوں روح دے طور تے زندہ کیتا گیا
19 تے اوہنے ایسے حالت چ اوہناں باغی فرشتیاں چ جا کے مُنادی کیتی جیہڑے قید چ نیں
20 تے جنہاں نے نوح دے زمانے چ خدا دی نافرمانی کیتی سی۔ اوس زمانے چ خدا صبر نال کشتی بنن دا اِنتظار کر رہیا سی جدے چ بہہ کے کجھ لوک یعنی اَٹھ جاناں پانی توں بچ گئیاں۔
21 ایہہ واقعہ بپتسمے وَل اشارہ کردا اے جدے توں جسم دی گندگی دُور نئیں ہوندی سگوں ایہدے ذریعے اَسی خدا کولوں صاف ضمیر دی درخاست کرنے آں۔ بپتسمہ توانوں بچا رہیا اے کیونکہ تُسی ایس گل تے ایمان لیائے او کہ یسوع مسیح نُوں مُردیاں چوں زندہ کیتا گیا اے۔
22 ہُن یسوع اسمان تے جا کے خدا دے سجے ہتھ بیٹھا ہویا اے تے فرشتیاں، حکمراناں تے طاقتاں نُوں اوہدے تابع کر دِتا گیا اے۔
فٹ نوٹ
^ یونانی چ: ”مڈیاں بنانا۔“
^ یاں، ”اوہناں دا لحاظ رکھو۔“
^ یاں شاید، ”لوکاں دِیاں دھمکیاں توں نہ ڈرو۔“
