پطرس دا پہلا خط 4:1-19
4 جدوں مسیح انسان سی تے اوہنے دُکھ سہے تے تُسی وی اوہدے ورگی سوچ* رکھو۔ جیس انسان نے دُکھ سہے نیں، اوہ گُناہ کرن توں باز آ گیا اے
2 تاکہ اوہ اپنی باقی دی زندگی اپنیاں خواہشاں نُوں پورا کرن لئی نئیں سگوں خدا دی مرضی نُوں پورا کرن لئی گزارے۔
3 تُسی دُنیا دے لوکاں دِیاں خواہشاں نُوں پورا کرن چ جِنّاں وقت گزاریا اے، اوناں ای کافی اے۔ اوس ویلے تُسی بےحیائی نال غلط کم* کردے سو، بےلگام خواہشاں مطابق چلدے سو، حدوں ودھ شراب پیندے سو، محفلاں چ رنگرَلیاں مناندے سو، شراب پین دے مقابلے کردے سو تے گھٹیا بُتپرستی چ پئے ہوئے سو۔
4 پر ہُن تُسی دُنیا دے لوکاں وانگوں عیاشی دی زندگی نئیں گزاردے۔ ایس لئی اوہ بوہت حیران نیں تے توانوں بُرا بھلا کہندے نیں۔
5 پر ایہناں لوکاں نُوں اوہدے سامنے جواب دینا پئے گا جیہڑا زندہ لوکاں تے مُردیاں دی عدالت کرن لئی تیار اے۔
6 ایسے وجہ توں مُردیاں* نُوں وی خوشخبری سُنائی گئی سی۔ بھانویں کہ اوہناں دی عدالت انسانی سوچ دے مطابق کیتی جاندی اے،* پر اوہ خدا دی نظر چ زندہ نیں تے پاک روح دی رہنمائی چ زندگی گزار رہے نیں۔
7 پر ساریاں چیزاں دا خاتمہ نیڑے آ گیا اے۔ ایس لئی سمجھدار بنو تے دُعا کرن لئی ہر ویلے تیار* رہوو۔
8 سب توں ودھ کے اِک دُوجے نال دل دِیاں گہرائیاں توں محبت کرو کیونکہ محبت کرن والا انسان معاف کرن لئی ہمیشاں تیار رہندا اے۔*
9 اِک دُوجے دی مہماننوازی کرو تے ایہنوں بوجھ نہ سمجھو۔*
10 خدا نے تواڈے تے فرق فرق طریقیاں نال اپنی عظیم رحمت ظاہر کیتی ا ے۔ ایس لئی ہر اِک نُوں جیہڑی وی نعمت* ملی اے، اوہنوں چنگے مختار وانگوں اِک دُوجے دی خدمت کرن لئی استمال کرو۔
11 جے کوئی گل کرے تے خدا دے کلام چوں گل کرے۔ جے کوئی خدمت کرے تے خدا وَلّوں مِلن والی طاقت دے سہارے کرے تاکہ ہر گل چ یسوع مسیح دے ذریعے خدا دی وڈیائی ہوئے۔ طاقت تے جلال ہمیشاں ہمیشاں تک اوہدا رہوے۔ آمین۔
12 پیارے بھراوو، جدوں تُسی سخت* مشکلاں چوں لنگھدے او تے حیران نہ ہووو تے ایہہ نہ سوچو کہ تواڈے نال کوئی انوکھی گل ہو رہی اے۔
13 ایہدی بجائے خوش ہووو کیونکہ تُسی مسیح وانگوں دُکھ سہہ رہے او تاکہ جدوں اوہ اپنی پوری شان نال ظاہر ہوئے تے تُسی اوہدوں وی خوش ہووو سگوں خوشی نال نچو۔
14 جے مسیح دے ناں دی وجہ توں تواڈی بےعزتی کیتی جاندی اے تے خوش ہووو کیونکہ خدا دی شاندار طاقت، ہاں، اوہدی پاک روح تواڈے تے وے۔
15 تواڈے چوں کوئی وی قاتل، چور، مُجرم یاں دُوجیاں دے معاملیاں چ لت اَڑان والا نہ ہووے، نئیں تے اوہنوں دُکھ سہنے پین گے۔
16 پر جے کوئی مسیح دے ناں دی خاطر دُکھ سہندا اے تے اوہ شرمندگی محسوس نہ کرے سگوں مسیحی دے طور تے زندگی گزاردا رہوے تے خدا دی وڈیائی کردا رہوے
17 کیونکہ عدالت دا طے کیتا ہویا ویلا آ گیا اے تے عدالت خدا دے گھر* توں شروع ہوئے گی۔ جے عدالت ساڈے توں شروع ہوئے گی تے سوچو کہ اوہناں دا کیہہ حشر ہوئے گا جیہڑے خدا دی خوشخبری دے مطابق نئیں چلدے۔
18 ”جے اِک نیک بندہ مشکل نال نجات پائے گا تے فیر بھیڑے تے گُناہگار بندے دا کیہہ حال ہوئے گا؟“
19 ایس لئی جیہڑے لوک خدا دی مرضی تے چلن دی وجہ توں دُکھ سہہ رہے نیں، اوہ اَگے وی اپنی زندگی اپنے وفادار خالق دے حوالے کرن تے چنگے کم کردے رہن۔
فٹ نوٹ
^ یاں، ”ارادہ۔“
^ یاں، ”بےشرم چال چلن۔“ یونانی چ: ”اسیلگیا۔“ ”لفظاں دی وضاحت“ نُوں ویکھو۔
^ ایہہ اوہ لوک نیں جیہڑے اپنے گُناہواں دی وجہ توں اِک لحاظ نال مرے ہوئے نیں۔ اِفسیوں 2:1 نُوں ویکھو۔
^ یعنی دُنیا دے لوک مسیحیاں نُوں اپنے معیاراں دے مطابق پَرکھدے نیں۔
^ یاں، ”چوکس، جاگدے۔“
^ یونانی چ: ”محبت بوہت سارے گُناہواں نُوں ڈھک دیندی اے۔“
^ یونانی چ: ”بُڑبُڑ کیتے بغیر مہماننوازی کرو۔“
^ یاں، ”صلاحیت۔“
^ یونانی چ: ”اَگ ورگیاں۔“
^ یعنی خدا دے لوکاں۔
