پطرس دا پہلا خط 5:1-14
5 ایس لئی مَیں اِک بزرگ، مسیح دے دُکھاں دا گواہ تے اوس شان چ شریک ہون دے ناتے جیہڑی ظاہر ہوئے گی، توانوں بزرگاں نُوں درخاست* کرنا واں
2 کہ چرواہیاں وانگوں خدا دِیاں اوہناں بھیڈاں دی دیکھبھال چنگی طرحاں کرو جیہڑیاں تواڈے حوالے کیتیاں گئیاں نیں۔ خدا دے حضور نگہباناں دے طور تے خدمت کرو۔* پر مجبوری نال نئیں سگوں خوشی نال۔ لالچ نال نئیں سگوں شوق نال۔
3 خدا دی ملکیت اُتے حکم نہ چلاؤ سگوں بھیڈاں لئی مثال بنو۔
4 فیر جدوں عظیم چرواہا ظاہر ہوئے گا تے توانوں اوہ تاج ملے گا جدی شان کدی ختم نئیں ہوئے گی۔
5 ایسے طرحاں جوان بھراوو، تُسی بزرگاں* دے تابع رہوو۔ تُسی سارے اِک دُوجے نال خاکساری نال پیش آؤ* کیونکہ خدا مغرور لوکاں دی مخالفت کردا اے۔ پر خاکسار لوکاں نُوں اپنی عظیم رحمت بخشدا اے۔
6 ایس لئی خاکسار بنو تے خدا دے طاقتور ہتھ دے تھلے رہوو تاکہ اوہ ویلا آن تے توانوں عزت بخشے۔
7 نالے اپنیاں ساریاں پریشانیاں اوہدے تے پا دَوو کیونکہ اوہنوں تواڈی فکر اے۔
8 ہوش قائم رکھو تے چوکس رہوو! تواڈا دُشمن اِبلیس اِک گرجدے ہوئے ببر شیر وانگوں لبھدا پھردا اے کہ کسے نُوں کھا جائے۔
9 پر تُسی ڈٹ کے اوہدا مقابلہ کرو تے اپنے ایمان تے قائم رہوو۔ یاد رکھو کہ پوری دُنیا چ تواڈے ہمایمان ایہو جہے ای دُکھ سہہ رہے نیں۔
10 پر جدوں تُسی تھوڑے چِر لئی دُکھ سہہ لوو گے تے عظیم رحمت دا مالک خدا جنہے توانوں مسیح دے ذریعے اپنی ابدی شان چ بلایا اے، آپ تواڈی چنگی طرحاں تربیت کرے گا۔ اوہ توانوں مضبوط بنائے گا، توانوں تگڑا کرے گا تے توانوں ڈولن نئیں دَوے گا۔
11 ساری طاقت ہمیشاں تک اوہدی اے۔ آمین۔
12 مَیں توانوں ایہہ چھوٹا جیہا خط اِک وفادار بھرا سِلوانُس* دے ہتھیں لکھوایا اے تاکہ توانوں حوصلہ دَواں تے سچے دل نال گواہی دَواں کہ تواڈے تے واقعی خدا دی عظیم رحمت ہوئی اے۔ ایہدے سائے تھلے قائم رہوو۔
13 بابل وچ تواڈے وانگوں چُنی ہوئی بھین* توانوں سلام کہندی اے۔ میرا پُتر مرقس وی توانوں سلام گھلدا اے۔
14 گلے مِل کے* اِک دُوجے نُوں سلام کہوو تے اِنج محبت ظاہر کرو۔
میری دُعا اے کہ خدا توانوں ساریاں نُوں سلامتی بخشے جیہڑے مسیح نال اِک مُٹھ او۔
فٹ نوٹ
^ یاں، ”تاکید۔“
^ یاں، ”بڑے دھیان نال بھیڈاں دی دیکھ بھال کرو۔“
^ یونانی چ: ”وڈیرے بھراواں۔“
^ یاں، ”خاکساری نُوں کپڑے وانگوں اپنی کمر دَوالے بنھ لوو۔“
^ یعنی سیلاس۔
^ ایتھے لفظ ”بھین“ دا اشارہ کلیسیا وَل اے۔
^ یونانی چ: ”چُم کے۔“
