یوحنا دا پہلا خط 1:1-10
1 اَسی توانوں اوہدے بارے لکھ رہے آں جیہڑا شروع توں سی، جدیاں گلاں اَسی سُنیاں، جنہوں اَسی اپنیاں اَکھاں نال ویکھیا تے اپنے ہتھاں نال چُھویا، جدے وَل اَسی دھیان دِتا تے جنہے سانوں زندگی دا پیغام دِتا۔
2 (بےشک زندگی ظاہر ہوئی تے اَسی اوس ہمیشاں دی زندگی نُوں ویکھیا جیہڑی باپ وَلّوں مِلدی اے* تے ساڈے تے ظاہر کیتی گئی۔ اَسی اوہدے بارے گواہی دے رہے آں تے توانوں دَس رہے آں۔)
3 اَسی جو ویکھیا تے سُنیا، اوہی توانوں وی دَس رہے آں تاکہ تُسی ساڈے نال اِک مُٹھ* ہو جاؤ۔ اِنج اَسی سارے اپنے اسمانی باپ تے اوہدے پُتر یسوع مسیح نال اِک مُٹھ ہونواں گے۔
4 اَسی ایہہ گلاں ایس لئی لکھ رہے آں تاکہ سانوں بوہت زیادہ خوشی ملے۔
5 جیہڑا پیغام اَسی مسیح کولوں سُنیا اے، اوہی اَسی توانوں سُنا رہے آں تے اوہ پیغام ایہہ وے: خدا چانن اے تے اوہدے چ نھیرا بالکل وی نئیں۔
6 جے اَسی کہیے کہ ”اَسی اوہدے نال اِک مُٹھ آں“ پر فیر وی نھیرے چ چلدے رہیے تے اَسی جھوٹھ بول رہے آں تے سچائی دے مطابق نئیں چل رہے۔
7 پر جے اَسی چانن چ چل رہے آں جیویں خدا آپ چانن وچ اے تے اَسی سارے آپس چ اِک مُٹھ آں تے اوہدے پُتر یسوع دا خون سانوں سارے گُناہواں توں پاک کر دیندا اے۔
8 جے اَسی کہنے آں کہ ”اَسی گُناہگار نئیں آں“ تے اَسی اپنے آپ نُوں دھوکھا دے رہے آں تے ساڈے چ سچائی نئیں۔
9 جے اَسی اپنے گُناہواں دا اعتراف کرنے آں تے اوہ ساڈے گُناہ معاف کردا اے تے سانوں ساری بُرائی توں پاک کردا اے کیونکہ اوہ وفادار تے اِنصاف کرن والا اے۔
10 پر جے اَسی کہنے آں کہ ”اَسی کدی گُناہ نئیں کیتا“ تے اَسی خدا نُوں جھوٹھا ٹھہرانے آں تے اوہدا کلام ساڈے چ نئیں۔
