یوحنا دا پہلا خط 5:1-21
5 جیہڑے ایہہ من دے نیں کہ یسوع ای مسیح اے، اوہ خدا دے بچے نیں۔ تے جیہڑے خدا نال پیار کردے نیں، اوہ اوہدے بچیاں نال وی پیار کردے نیں۔
2 اَسی خدا نال پیار کر کے تے اوہدے حکماں تے عمل کر کے ظاہر کرنے آں کہ اَسی خدا دے بچیاں نال پیار کرنے آں۔
3 خدا نال پیار کرن دا مطلب ایہہ وے کہ اَسی اوہدے حکماں تے عمل کرئیے تے اوہدے حکم ساڈے لئی کوئی بوجھ نئیں
4 کیونکہ خدا دے بچے دُنیا تے فتح پاندے نیں۔ تے جیس چیز دے ذریعے اَسی دُنیا تے فتح پائی اے، اوہ ساڈا ایمان اے۔
5 دُنیا تے فتح کون پاندا اے؟ کیہہ اوہ نئیں جیہڑا ایمان رکھدا اے کہ یسوع خدا دا پُتر اے؟
6 یسوع مسیح اوہی اے جیہڑا پانی تے خون دے ذریعے آیا۔ اوہ صرف پانی نال ای نئیں سگوں پانی تے خون دے نال آیا۔ تے پاک روح ایس گل دی گواہی دیندی اے کیونکہ اوہ سچی اے۔
7 گواہی دین والیاں تِن چیزاں نیں
8 یعنی پاک روح، پانی تے خون تے ایہہ تِنے اِک ای گواہی دیندیاں نیں۔
9 جے اَسی انساناں دی گواہی نُوں مننے آں تے فیر خدا دی گواہی تے ایہناں نالوں کِتے وڈی اے کیونکہ خدا آپ اپنے پُتر بارے گواہی دیندا اے۔
10 جیہڑا خدا دے پُتر اُتے ایمان رکھدا اے، اوہ اوس گواہی نُوں وی من دا اے جیہڑی اوہنوں دِتی گئی اے۔ جیہڑا خدا تے ایمان نئیں رکھدا، اوہ خدا نُوں جھوٹھا ٹھہراندا اے کیونکہ اوہ اوس گواہی تے ایمان نئیں رکھدا جیہڑی خدا نے اپنے پُتر بارے دِتی اے۔
11 تے خدا دی گواہی ایہہ وے کہ اوہنے سانوں ہمیشاں دی زندگی دِتی اے تے ایہہ زندگی اوہدے پُتر دے ذریعے مِلدی اے۔
12 جیہڑا پُتر نُوں من دا اے، اوہنوں ہمیشاں دی زندگی مِلدی اے تے جیہڑا خدا دے پُتر نُوں نئیں من دا، اوہنوں ہمیشاں دی زندگی نئیں مِلدی۔
13 خدا دے پُتر دے ناں تے ایمان رکھن والیو، مَیں توانوں ایہہ گلاں ایس لئی لکھ رہیا واں تاکہ تُسی جان جاؤ کہ توانوں ہمیشاں دی زندگی ملی اے۔
14 سانوں اوہدے تے بھروسا اے کہ* اَسی اوہدی مرضی مطابق جو کجھ وی منگنے آں، اوہ ساڈی سُن دا اے۔
15 تے جے سانوں ایہہ بھروسا اے کہ اَسی جو کجھ وی منگنے آں، اوہ ساڈی سُن دا اے تے فیر سانوں ایس گل دا وی بھروسا اے کہ سانوں اوہ چیزاں ضرور مِلن گیاں جیہڑیاں اَسی اوہدے کولوں منگیاں نیں۔
16 جے کوئی اپنے بھرا نُوں ایہو جیہا گُناہ کردے ویکھدا اے جدی سزا موت نئیں اے تے اوہ اپنے بھرا لئی دُعا کرے تے خدا اوہنوں زندگی دَوے گا۔ ہاں، اوہ اوہناں نُوں زندگی دَوے گا جنہاں کولوں ایہو جیہا گُناہ ہو جاندا اے جدی سزا موت نئیں اے۔ پر ایہو جیہا گُناہ وی اے جدی سزا موت اے۔ جیہڑے لوک ایہہ گُناہ کردے نیں، مَیں اوہناں لئی دُعا کرن لئی نئیں کہہ رہیا۔
17 ہر طرحاں دی بُرائی گُناہ اے، پر ایہو جیہا گُناہ وی اے جدی سزا موت نئیں اے۔
18 سانوں پتہ اے کہ خدا دے بچے گُناہ نئیں کردے رہندے سگوں خدا دا پُتر* اوہناں دی حفاظت کردا اے تے شیطان اوہناں دا کجھ وی نئیں وگاڑ سکدا۔*
19 سانوں پتہ اے کہ اَسی خدا دے آں پر ساری دُنیا شیطان دے قبضے وچ اے۔
20 پر اَسی جاننے آں کہ خدا دا پُتر آیا تے اوہنے سانوں ڈُونگی سمجھ* بخشی تاکہ اَسی سچے خدا بارے علم حاصل کر سکئے۔ اوہدے پُتر یسوع مسیح دے ذریعے اَسی اوہدے نال اِک مُٹھ آں۔ اوہی سچا خدا اے تے ہمیشاں دی زندگی دا سرچشمہ اے۔
21 پیارے بچیو، بُتاں توں بچ کے رہوو۔
فٹ نوٹ
^ یاں، ”اَسی اوہدے سامنے بغیر جھجکے گل کر سکنے آں کیونکہ“
^ یعنی یسوع مسیح۔
^ یونانی چ: ”اپنے قابو چ نئیں کر سکدا۔“
^ یونانی چ: ”سوچن سمجھن دی صلاحیت۔“
