یوحنا دا تیجا خط 1:1-14
1 مَیں بزرگ ایہہ خط اپنے پیارے گِیُس نُوں لکھ رہیا واں جنہوں مَیں دلوں پیار کرنا واں۔
2 میرے پیارے بھرا، میری دُعا اے کہ جیویں تُوں ہُن خوشحال ایں، اَگے وی خوشحال تے تندرست رہویں۔
3 جدوں کجھ بھراواں نے آ کے مینوں دَسیا کہ تُوں سچائی چ پکا ایں تے ایہدے مطابق چل رہیا ایں تے مینوں بڑی خوشی ہوئی۔
4 میرے لئی ایس توں وڈی خوشی* دی گل ہور کوئی نئیں کہ مَیں سُناں کہ میرے بچے سچائی دی راہ تے چل رہے نیں۔
5 میرے پیارے بھرا، ایہہ تیری وفاداری دا ثبوت اے کہ تُوں اوہناں بھراواں لئی بوہت کجھ کر رہیا ایں جنہاں نُوں تُوں جان دا وی نئیں۔
6 اوہناں نے کلیسیا دے سامنے تیرے پیار دی گواہی دِتی اے۔ مہربانی نال تُوں اوہناں لئی سفر دا ایہو جیہا اِنتظام کریں جدے توں خدا خوش ہووے
7 کیونکہ اوہ اوہدے ناں دی خاطر سفر تے نکلے نیں تے اوہ غیرایمان لوکاں کولوں کجھ نئیں لیندے۔
8 ایس لئی ساڈا فرض اے کہ اَسی ایہو جہے بھراواں دی مہماننوازی کرئیے تاکہ اَسی سچائی پھیلان چ اوہناں دا ساتھ دَئیے۔
9 مَیں کلیسیا نُوں خط لکھیا سی پر دیُترِفیس جیہڑا کلیسیا چ سب توں وڈا بننا چاہندا اے، ساڈی کسے گل لئی عزت نئیں وکھاندا۔
10 اوہ سانوں بدنام کرن والیاں گلاں پھیلاندا اے تے اوہنوں اینے چ وی چین نئیں آندا سگوں اوہ بھراواں نُوں خوشی تے عزت نال مِلدا وی نئیں تے جیہڑے ملنا چاہندے نیں، اوہناں نُوں روکن تے کلیسیا چوں کڈھن دی کوشش کردا اے۔ ایس لئی جے مَیں آیا تے مَیں اوہدیاں ایہناں کرتُوتاں تے دھیان دَواں واں گا۔
11 میرے پیارے بھرا، بھیڑے لوکاں دی رِیس نہ کریں سگوں چنگے لوکاں دی رِیس کریں۔ جیہڑا چنگے کم کردا اے، اوہ خدا ورگی سوچ رکھدا اے۔ جیہڑا بھیڑے کم کردا اے، اوہنے خدا نُوں نئیں ویکھیا۔
12 سارے دیمیتریُس دِیاں تعریفاں کردے نیں تے ایہہ صحی وی اے کیونکہ اوہ سچائی دے مطابق چل رہیا اے۔ اصل چ اَسی وی اوہدے بارے ایہی گواہی دینے آں تے تینوں پتہ اے کہ ساڈی گواہی سچی اے۔
13 مَیں تیرے نال ہور وی بڑیاں گلاں کرنا چاہنا واں پر خط* دے ذریعے نئیں
14 سگوں مینوں امید اے کہ مَیں تیرے کول آواں گا تے اَسی آمنے سامنے بہہ کے گل کراں گے۔
دُعا اے کہ تُوں سلامت رہویں۔
ایتھوں دے دوست تینوں سلام کہندے نیں تے اوتھوں دے دوستاں وچوں ہر اِک نُوں میرا سلام کہویں۔
