‏”‏کجھ سال پہلاں اَسی سوچ وی نئیں سکنے ساں کہ سانوں ایناں سارا روحانی کھانا انٹرنیٹ دے ذریعے ملے گا۔“‏ تُسی وی ضرور ایس گل نال اِتفاق کر‌و گے۔ ایہہ گل بھرا جیفری جیکسن نے ‏”‏2020 لئی گورننگ باڈی وَلّوں تازہ خبر—‏نمبر 6“‏ چ کہی سی۔ بھرا نے اَگے کہیا:‏ ”‏پر ہُن سوچو کہ ایس وبا دے دوران جے ڈبلیو لائبریری ایپ تے ویب‌سائٹ دے بغیر سانوں روحانی کھانا کیویں مِلدا؟ اَسی ویکھ سکنے آں کہ پچھلے کجھ سالاں توں ای یہوواہ سانوں ایہناں حالاتاں لئی تیار کر رہیا سی۔“‏

 پر یہوواہ سانوں وقت دے نال نال کیویں تیار کر‌دا رہیا اے؟ جے ڈبلیو لائبریری ایپ نُوں تیار کر‌ن لئی کیہڑے کم کیتے گئے؟ تے کیہڑے کم کیتے جاند‌ے نیں تاکہ ایہہ ایپ صحی طرحاں کم کر‌دی رہوے تے ایہنوں بہتر توں بہتر بنایا جا سکے؟‏

 مئی 2013 چ گورننگ باڈی نے ساڈے ہیڈکوارٹر چ میپس پروگرامنگ دے شعبے نُوں کہیا کہ اوہ اِک ایہو جہی ایپ تیار کر‌ے جدے چ انگریزی زبان چ ترجمہ نوِیں دُنیا دا نظر ثانیشُدہ ایڈیشن ہووے۔ ایس شعبے چ کم کر‌ن والا اِک بھرا پال وِلس کہندا اے:‏ ”‏اوس ویلے تک ساڈی کوئی وی ایپ نئیں سی۔ پر فیر اَسی اِک ٹیم بنائی تے کجھ ہور کماں نُوں اوتھے ای چھڈ کے دُوجے شعبیاں نال کم کر‌نا شروع کر دِتا تاکہ اَسی اِک ایپ بنا سکئے۔ اَسی ایس کم لئی وار وار دُعا کر‌نے ساں۔ یہوواہ دی مدد نال پنج مہینے بعد ای سالانہ اجلاس تے ایہہ ایپ ریلیز وی ہو گئی۔“‏

 اگلی مشکل ایہہ سی کہ اصل لائبریری وانگوں ایس کتاب چ ہور کتاباں کیویں پائیاں جان جیہڑیاں زیادہ زباناں چ وی ہون۔ جنوری 2015 تک ایس ایپ چ ساڈیاں انگریزی زبان دِیاں زیادہ‌تر نوِیاں کتاباں تے رسالے موجود سن۔ تے چھ مہینے بعد ای ایہناں کتاباں تے رسالیاں نُوں کئی سو ہور زباناں چ وی ڈاؤن‌لوڈ کیتا جا سکدا سی۔‏

 اوس ویلے توں لے کے ہُن تک بھراواں نے ایس ایپ نُوں کئی طریقیاں نال بہتر بنایا اے۔ جیویں کہ ایہدے چ ویڈیوز پائیاں نیں تے عبادتاں چ استمال ہون والیاں کتاباں، رسالے، قاعدے تے ویڈیوز نُوں اِک ای حصے چ پا دِتا اے۔ نالے ایہدے چ ایہہ تبدیلی وی کیتی اے کہ ایہنوں استمال کر‌ن والے بائبل دی کسے ایت تے کلک کر کے فوراً اُردو زبان چ ‏”‏مطالعے کے حوالے“‏ تے جا سکدے نیں۔‏

 جے ڈبلیو لائبریری نُوں ہر روز 80 لکھ تے ہر مہینے 1 کر‌وڑ 50 لکھ توں زیادہ فوناں، ٹیبلٹ یاں کمپیوٹراں تے کھولیا جاند‌ا اے۔ کیہڑے کم کر‌نے پیندے نیں تاکہ ایہہ ایپ صحی طرحاں کم کر‌دی رہوے؟ ایس بارے بھرا پال وِلس نے دَسیا:‏ ”‏اِک ایپ دا کم کدی وی ختم نئیں ہوند‌ا۔ اَسی ایہدے چ نوِیاں نوِیاں چیزاں پان تے ایہنوں استمال کر‌ن والیاں نُوں ہور سہولتاں دین لئی مسلسل کم کر‌دے رہنے آں۔ موبائلاں، ٹیبلٹ تے کمپیوٹراں چ نویں نویں سسٹم آن دی وجہ توں سانوں ایہدے چ مسلسل تبدیلیاں کر‌نیاں پیندیاں نیں تاکہ ایہہ ہر نویں سسٹم دے مطابق صحی طرحاں کم کر‌ے۔ سانوں اپنے سافٹ‌وئیر نُوں وی ہور بہتر توں بہتر بنانا پیندا اے کیونکہ جے ڈبلیو لائبریری چ کتاباں، رسالے تے ریکارڈنگز وغیرہ ودھدیاں جا رہیاں نیں۔“‏ جے اَسی جے ڈبلیو لائبریری تے ساریاں زباناں دِیاں چیزاں گنیے تے ایہدے چ کوئی 2 لکھ کتاباں تے رسالے وغیرہ نیں تے 6 لکھ توں زیادہ آڈیو ریکارڈنگز تے ویڈیوز نیں۔‏

 ایس ایپ نُوں بہتر بنان دے کم لئی صرف کمپیوٹر دی ضرورت نئیں ہوند‌ی سگوں کئی سافٹ‌وئیر دے لائسنس وی خریدنے پیندے نیں۔ اِک سال چ اِک لائسنس دا خرچہ 1500 امریکی ڈالر (‏تقریباً 2 لکھ 60 ہزار روپے)‏ ہوند‌ا اے۔ ایہدے علاوہ میپس پروگرامنگ دا شعبہ ہر سال فرق فرق کمپنیاں کولوں کمپیوٹر وغیرہ خریدن لئی تقریباً 10 ہزار امریکی ڈالر (‏تقریباً 17 لکھ روپے)‏ خرچ کر‌دا اے تاکہ اوہ ایہہ ویکھ سکے کہ جے ڈبلیو لائبریری ایپ نویں کمپیوٹراں، ٹیبلٹ تے فوناں تے صحی چلدی رہوے۔‏

 پہلے کتاباں تے رسالیاں نُوں چھاپن، اوہناں تے جلد کر‌ن تے اوہناں نُوں فرق فرق تھانواں تے پونچان لئی بوہت زیادہ پیسہ خرچ ہوند‌ا سی۔ پر جے ڈبلیو لائبریری دی وجہ توں ایہہ خرچہ گھٹ گیا اے۔ مثال لئی اَسی 2013 لئی کتاب ‏”‏روز بروز کتابِ مُقدس پر تحقیق کریں“‏ دِیاں 1 کر‌وڑ 20 لکھ کاپیاں چھاپیاں۔ پر 2020 لئی اَسی ایس کتاب دِیاں صرف 50 لکھ کاپیاں چھاپیاں بھانویں کہ اوہدوں توں لے کے ہُن تک پوری دُنیا چ 7 لکھ نویں مبشر بنے نیں۔ ایہہ تبدیلی کیوں کیتی گئی؟ کیونکہ ہُن ساڈے بوہت سارے بھین بھرا جے ڈبلیو لائبریری تے روزانہ دی ایت پڑھدے نیں۔‏ a

 جے ڈبلیو لائبریری نُوں استمال کر‌ن والیاں نُوں کئی طریقیاں نال فائدہ ہوند‌ا اے۔ کینیڈا چ رہن والی اِک بھین، جینیویو ایہہ محسوس کر‌دی اے کہ ایس ایپ دی وجہ توں اوہ باقاعدگی نال بائبل دا مطالعیا کر پاند‌ی اے۔ اوہ کہندی اے:‏ ”‏سچ دَساں تے جے مینوں بائبل دا مطالعیا کر‌ن لئی ڈھیر ساریاں کتاباں لبھ کے لیانیاں پیندیاں تے میں روز ایہدا مطالعیا نہ کر پاند‌ی۔ پر ایس ایپ چ اوہ ساریاں کتاباں نیں جنہاں دی مینوں لوڑ اے۔ ایس لئی میں بس اپنا ٹیبلٹ پھڑنی آں تے مطالعیا کر‌نا شروع کر دینی آں۔ ایہدی وجہ توں میرا ایمان تے یہوواہ نال میرا رشتہ ہور مضبوط ہو گیا اے۔“‏

 کورونا وائرس دی وبا دے دوران تے ایس ایپ توں ہور وی زیادہ فائدہ ہویا اے۔ امریکہ چ رہن والی اِک بھین، شارلین کہندی اے:‏ ”‏پوری دُنیا چ کورونا وائرس پھیلن دی وجہ توں مینوں اِک سال توں زیادہ عرصے توں کوئی وی چھپی ہوئی کتاب یاں رسالہ نئیں ملیا۔ پر جے ڈبلیو لائبریری دی وجہ توں سانوں روحانی کھانے دی کمی نئیں ہوئی۔ میں ایس ایپ لئی یہوواہ دی بڑی شکرگزار آں۔“‏

 بوہت سارے بھین بھراواں دے جذبات فلپائن چ رہن والی بھین فئے ورگے ہون گے۔ اوہ کہندی اے:‏ ”‏میں یہوواہ دے نیڑے رہن لئی باقاعدگی نال جیہڑے کم کر‌نی آں اوہ سارے ایس زبردست ایپ نال جُڑے ہوئے نیں۔ ایس ایپ چوں میں صبح اُٹھ کے ایت پڑھنی آں، کم کر‌دے ہوئے آڈیو ریکارڈنگز سننی آں، عبادتاں دی تیاری تے بائبل دا ذاتی مطالعیا کر‌نی آں تے فارغ وقت چ ویڈیوز ویکھنی آں۔ ایہدے علاوہ جدوں باہر کسے جگہ مینوں اِنتظار کر‌ن لئی لین چ کھلونا پیندا اے تے اوس دوران میں ایہدے چوں کوئی مضمون یاں بائبل پڑھنی آں۔ ایہہ واقعی اِک نعمت اے۔“‏

 ایہہ ایپ مُنادی دے کم لئی وی بڑی فائدہ‌مند ثابت ہوند‌ی اے۔ مثال لئی ملک کیمرون چ ساڈی اِک بھین مُنادی دے دوران اوہ ایت استمال کر‌نا چاہندی سی جیہڑی کجھ ہفتیاں پہلے کسے ہور بھین نے استمال کیتی سی۔ پر اوہنوں یاد نئیں آ رہیا سی کہ اوہ ایت کتھے لکھی اے۔ اوہنے دَسیا:‏ ”‏شکر اے کہ مینوں اوس ایت چوں کجھ لفظ یاد سن۔ میں فوراً جے ڈبلیو لائبریری چ بائبل کھولی تے اوہدے چ اوہ لفظ لکھ کے ایت لبھ لئی۔ایس ایپ دی وجہ توں میں بوہت ساریاں ایہو جہیاں ایتاں نُوں لبھ لینی آں جنہاں دے حوالے مینوں یاد نئیں رہندے۔“‏

 تواڈے عطیات دی وجہ توں ای اَسی پوری دُنیا چ بھین بھراواں دے فائدے لئی جے ڈبلیو لائبریری ایپ نُوں بنان دے قابل ہوئے آں تے ایہنوں ہور بہتر بنان لئی کم کر رہے آں۔ عطیات دین دے کجھ طریقیاں بارے donate.pr418.com تے دَسیا گیا اے۔ کُھلے دل نال عطیات دین لئی تواڈا بوہت شکریہ۔‏

1. اکتوبر 2013—‏ایہہ ایپ ریلیز ہوئی جدے چ انگریزی زبان چ ترجمہ نوِیں دُنیا دا نظرثانیشُدہ ایڈیشن سی۔‏

2. جنوری 2015—‏پہلے انگریزی چ تے بعد چ کئی سو زباناں چ ہور کتاباں تے رسالے آئے۔‏

3. نومبر 2015—‏فرق فرق رنگاں دے نشان لان دی سہولت آ گئی۔‏

4. مئی 2016—‏عبادتاں والے حصے دا اضافہ کیتا گیا۔‏

5. مئی 2017—‏نوٹس لین دی سہولت دا اضافہ ہویا۔‏

6. دسمبر 2017—‏سٹڈی بائبل نال جُڑیاں اضافی چیزاں ویکھن دی سہولت پائی گئی۔‏

7. مارچ 2019—‏آڈیو ریکارڈنگز نُوں ڈاؤن‌لوڈ کر‌ن، ویڈیوز نُوں ڈاؤن‌لوڈ کیتے بغیر انٹرنیٹ دے ذریعے چلان تے ایتاں تے کلک کر کے ‏”‏مطالعے کے حوالے“‏ ویکھن دی سہولت دا اضافہ ہویا۔‏

8. جنوری 2021—‏کتاب ‏”‏خوشیاں بھری زندگی پاؤ“‏ چ دِتیاں گئیاں چیزاں دے حوالے پائے گئے۔‏