‏”‏میں 19 سالاں توں ایہدا اِنتظار کر رہیا ساں۔“‏ ساڈا ایہہ بھرا کیہڑی چیز دا اِنتظار کر رہیا سی؟ اوہ اپنی زبان یعنی بنگالی چ ‏”‏ترجمہ نئی دُنیا“‏ دا اِنتظار کر رہیا سی۔ بوہت سارے بھین بھرا اوہدوں ایہو جیہا ای محسوس کر دے نیں جدوں اوہناں دی زبان چ ‏”‏ترجمہ نئی دُنیا“‏ آند‌ا اے۔ پر کیہہ تُسی کدی سوچیا اے کہ بائبل دا ترجمہ تے چھپائی دا کم کیویں ہوند‌ا اے؟‏

 سب توں پہلے گورننگ باڈی دی تحریری کمیٹی دی ہدیتاں مطابق اِک ٹیم نُوں چُنیا جاند‌ا اے جیہڑی بائبل دا ترجمہ کر‌ے گی۔ پر بائبل دا ترجمہ کر‌ن چ کِنّاں وقت لگدا اے؟ وار وِک دے بیت‌ایل چ ترجمے دے شعبے نال کم کر‌ن والا بھرا نکوِلس ایہلادِس دَسدا اے:‏ ”‏کئی چیزاں بائبل دے ترجمے تے اثر پاند‌یاں نیں جیویں کہ ترجمہ کر‌ن والی ٹیم چ کِنّے بھین بھرا ہون گے، جیس زبان چ ترجمہ ہونا اے اوہ کِنّی مشکل اے، کیہہ اوس زبان نُوں پڑھن والے لوک سمجھدے نیں کہ جدوں بائبل لکھی گئی سی تے اوہدوں لوکاں دا رہن‌سہن کیہو جیہا سی نالے ایہہ کہ علاقے دے حساب نال زبان چ کسے حد تک فرق آ جاند‌ا اے۔ عام طور تے پاک کلام دے یونانی صحیفیاں دا ترجمہ کر‌ن چ اِک ٹیم نُوں شاید 1 توں 3 سال تے پوری بائبل دا ترجمہ کر‌ن چ 4 سال یاں ایس توں زیادہ وقت لگ سکدا اے۔ پر اشاریاں دی زبان چ ایہدا ترجمہ کر‌ن چ ایس توں وی زیادہ وقت لگدا اے۔“‏

 ایس کم چ ترجمہ کر‌ن والی ٹیم دے علاوہ ہور بھین بھراواں دی وی ضرورت پیندی اے۔ فرق فرق عمراں تے علاقیاں دے بھین بھراواں نُوں کہیا جاند‌ا اے کہ اوہ ایس ترجمے نُوں پڑھن تے دَسن کہ اوہ ایہدے بارے کیہہ سوچدے نیں۔ کدی کدار دُوجے مُلکاں توں وی بھین بھرا ایس کم چ مدد کر‌دے نیں پر اوہ ایہدے لئی کوئی پیسے نئیں لیندے۔اوہناں دی رائے دی وجہ توں ترجمہ کر‌ن والی ٹیم بائبل دا ایہو جیہا ترجمہ کر پاند‌ی اے جیہڑا اسان تے درست ہوند‌ا اے۔ جنوبی افریقہ چ بائبل دے ترجمے لئی تربیت دین والے اِک بھرا نے کہیا کہ ”‏ترجمہ کر‌ن والے بھین بھرا من دے نیں کہ ایہہ اِک وڈی ذمےداری اے جدے لئی اوہ یہوواہ تے لوکاں دے سامنے جواب‌دہ نیں۔“‏

 ترجمہ ہون دے بعد بائبل نُوں چھاپیا جاند‌ا اے۔ ایہدے لئی چھاپا خانیاں چ کئی چیزاں استمال ہوند‌یاں نیں جیویں کہ کاغذ، سیاہی، گوند تے جلداں بنان دا سامان۔ 2019 چ ایہہ سارا سامان خریدن لئی 2 کر‌وڑ ڈالر خرچ کیتے گئے۔ نالے بائبل چھاپن تے ایہنوں دُوجے علاقیاں چ بھیجن لئی بھین بھراواں نے ساڈے چھاپہ خانیاں چ تقریباً 3 لکھ گھنٹے کم کیتا۔‏

 اَسی ایس کم چ ایناں پیسہ تے وقت کیوں لانے آں؟ ساڈے چھپائی دے بین‌الاقوامی شعبے چ کم کر‌ن والے بھرا جوئیل نے کہیا کہ ”‏بائبل اوہ سب توں اہم کتاب اے جیہڑی اَسی چھاپنے آں۔ ایس لئی اَسی چاہنے آں کہ بائبل توں ساڈے خدا دی وڈیائی ہوئے تے مُنادی دے کم چ ہور ترقی ہوئے۔“‏

 ‏”‏ترجمہ نئی دُنیا“‏ اوہناں لوکاں لئی وی تیار کیتی جاند‌ی اے جیہڑے کسے قسم دی معذوری دا سامنا کر رہے نیں۔ مثال لئی جیہڑے لوک ویکھ نئیں سکدے اوہناں لئی ‏”‏ترجمہ نئی دُنیا“‏ بریل چ تیار کیتا گیا اے۔ اِک بریل بائبل بنان چ تقریباً 8 گھنٹے لگدے نیں تے ایہنوں رکھن لئی 7 فٹ توں وی زیادہ جگہ چاہی دی اے۔ ایہدے علاوہ قیدیاں لئی وی خاص طرحاں دی بائبل تیار کیتی جاند‌ی اے۔ ایس بائبل نُوں جلد دے بغیر تیار کیتا جاند‌ا اے کیونکہ جیل چ جلداں والیاں کتاباں لے کے جان دی اجازت نئیں ہوند‌ی۔‏

 ‏”‏ترجمہ نئی دُنیا“‏ توں بوہت سارے لوکاں نُوں فائدہ ہویا اے۔ ذرا عوامی جمہوریہ کانگو دے علاقے ٹومبے چ کلوبا زبان دی کلیسیا دی مثال تے غور کر‌و۔ ایہہ علاقہ کانگو دے سب توں وڈے شہر توں 1700 کلومیٹر دُور اے۔ اوتھے رہن والے یہوواہ دے گواہواں کول کلوبا زبان چ صرف اِک ای بائبل سی تے اوہدا ترجمہ وی بوہت پرانا سی۔ عبادتاں لئی اپنے حصے تیار کر‌ن لئی سارے بھرا واری واری ایسے بائبل نُوں استمال کر‌دے سن۔ ایس لئی اگست 2018 چ جدید کلوبا زبان دے مطابق ‏”‏ترجمہ نئی دُنیا“‏ چھاپیا گیا جیہڑا بڑا اسان اے۔ ہُن کلیسیا دے ہر بھین بھرا کول اپنی بائبل موجود اے۔‏

 جرمن زبان بولن والی اِک بھین نے ‏”‏ترجمہ نئی دُنیا“‏ دے ترمیم‌شُدہ ایڈیشن بارے کہیا کہ ”‏ہُن میں مجبوری نال بائبل نئیں پڑھدی سگوں مینوں بائبل پڑھن دا بڑا مزہ آند‌ا اے۔“‏ اِک قیدی نے ایہدے بارے لکھیا کہ ”‏ کسے نے مینوں ‏”‏ترجمہ نئی دُنیا“‏ دِتا سی تے ایہنوں پڑھ کے میری زند‌گی بدل رہی اے۔ ایس توں پہلے کدی وی مینوں بائبل دی سمجھ نئیں آئی سی۔ میں یہوواہ دے گواہواں بارے ہور جاننا چاہنا واں تے ایہہ وی کہ میں یہوواہ دا گواہ کیویں بن سکنا واں۔“‏

 ‏”‏ترجمہ نئی دُنیا“‏ نُوں استمال کر‌ن والے سارے لوک اوہناں عطیات لئی بڑے شکرگزار نیں جنہاں دی مدد نال ایہنوں چھاپیا جاند‌ا اے۔ پوری دُنیا چ مُنادی دے کم لئی ایہہ عطیات donate.pr418.com تے دَسے گئے فرق فرق طریقیاں نال دِتے جاند‌ے نیں۔ اَسی تواڈے عطیات لئی دلوں شکرگزار آں۔‏