مارچ 2020 چ صحت دے عالمی اِدارے نے اعلان کیتا کہ کورونا وائرس دی وبا اِک عالمی وبا بن چُکی اے۔ اوس ویلے بوہت سارے لوکاں نے سوچیا وی نئیں سی کہ ایہہ وبا اِک سال توں زیادہ عرصے بعد وی ختم نئیں ہوئے گی۔ ایس وبا دی وجہ توں یہوواہ دے گواہواں سمیت لکھاں لوکاں نُوں کئی مشکلاں دا سامنا کر‌نا پیا جیویں کہ ذہنی پریشانی تے مالی تنگی وغیرہ۔ ایس وبا دے دوران یہوواہ دے گواہواں نے اپنے ہمایماناں دی مدد کر‌ن لئی کیہہ اِنتظام کیتا؟‏

 یہوواہ دے گواہواں دی گورننگ باڈی دی منتظمین دی کمیٹی نے امدادی کمیٹیاں بنان دی ہدیت دِتی تاکہ کورونا دی وبا دے دوران پیدا ہون والیاں مشکلاں نال نبڑیا جا سکے۔ ایس لئی یہوواہ دے گواہواں نے اپنے ہمایماناں دی مدد کر‌ن لئی پوری دُنیا چ 950 توں زیادہ امدادی کمیٹیاں بنائیاں۔ کجھ یہوواہ دے گواہواں نے ایہناں کمیٹیاں توں مدد لئی تے کجھ نے حکومت وَلّوں مِلن والی مدد توں فائدہ حاصل کیتا۔ یہوواہ دے گواہواں دی امدادی کمیٹیاں نے بوہت وڈے وڈے کم وی کیتے۔‏

 ذرا ایہدی اِک مثال تے غور کر‌و۔ ملک پیراگوئے دے اِک اخبار چ دَسیا گیا کہ کورونا دی وبا دی وجہ توں ملک چ پیسیاں دی تنگی ہو گئی اے جدی وجہ توں کئی لوک اپنے گھراں چ بُھکھے مر رہے نیں۔ پر اوس ملک چ یہوواہ دے گواہواں دی امدادی کمیٹیاں نے اپنے ہمایماناں نُوں پہلاں توں ای ضرورت دا سامان پونچانا شروع کر دِتا سی۔ سامان دا اِک ڈبہ گھر دے چار جیاں لئی سی تے اوہدے چ جیہڑا سامان سی اوہدے نال دو ہفتیاں تک گزارہ کیتا جا سکدا سی۔ اوہدے چ کھان پین، صفائی ستھرائی تے نہان دھون لئی شیواں سن۔ ہر اِک ڈبے دی کل قیمت 30 ڈالر سی۔‏

 ایس سامان نُوں پونچان والے یہوواہ دے گواہ اپنے آپ نُوں تے دُوجیاں نُوں کورونا وائرس توں محفوظ رکھن لئی کیہہ کر‌دے سن؟ اوہ ماسک پاند‌ے سن تے دُوجیاں توں فاصلہ رکھدے سن۔ اوہ ایس گل دا وی خیال رکھدے سن کہ اوہ جیہڑیاں کمپنیاں توں کھان پین دا سامان لے رہے نیں، اوتھے کم کر‌ن والے وی صفائی ستھرائی دا خیال رکھن تے احتیاط کر‌ن۔ جیویں کہ اوہ سامان نُوں صاف ستھری جگہ تے پیک کر‌ن، ماسک تے دستانے پان، سامان پونچان والی گڈیاں نُوں صاف رکھن تے پیک ہوئے ڈبیاں نُوں صاف ستھری جگہ تے رکھن۔ ایہدے علاوہ جیہڑے لوک بھین بھراواں نُوں سامان پونچان لئی جان اوہ اوہناں توں فاصلہ رکھن۔‏

 جنوری 2021 تک منتظمین دی کمیٹی نے کورونا وائرس دی وبا دے دوران امدادی کم لئی ڈھائی کر‌وڑ ڈالر خرچ کر‌ن دی منظوری دِتی۔ برانچاں تے امدادی کمیٹیاں نے پوری کوشش کیتی کہ اوہ عطیات نُوں بڑے دھیان نال خرچ کر‌ن تے چیزاں نُوں مناسب قیمت تے خریدن۔ مثال لئی، ملک چلی وچ امدادی کمیٹی چ کم کر‌ن والے بھرا 750 کلو دالاں خریدنا چاہندے سن۔ پر صرف اِک مہینے چ ای دالاں دی قیمت دُگنی ہو گئی سی۔ جدوں بھرا مجبوراً زیادہ قیمت تے دالاں خریدن تے راضی ہو گئے تے دکاند‌ار نے بھراواں نُوں دَسیا کہ اِک خریدار نے دالاں دا آرڈر واپس بھیج دِتا اے۔ ایس لئی اوہ واپس کیتیاں ہوئیاں دالاں نُوں پرانی قیمت تے ای بھراواں نُوں ویچ دَوے گا۔‏

 پر جدوں بھرا اوہدے کول دالاں لین لئی گئے تے دکاند‌ار مُکر گیا۔ نالے اوہنے بھراواں تے اِلزام لایا کہ اوہ وی دُوجیاں تنظیماں دی طرحاں کھان پین دِیاں شیواں نُوں اوہناں لوکاں تک نئیں پونچا رہے جیہڑے اصل چ ضرورت‌مند نیں تے اوہ سامان نُوں وَنڈن چ ناانصافی کر رہے نیں۔ ایہہ ویکھ کے اِک بھرا نے دل چ چھوٹی جہی دُعا کیتی تے فیر دکاند‌ار نُوں کہیا کہ اوہناں نے پہلاں توں ای کلیسیاواں دا جائزہ لے کے ایہہ ویکھ لیا اے کہ اوہناں دے کیہڑے ہمایمان واقعی ضرورت‌مند نیں۔ بھراواں نے اوس دکاند‌ار نُوں ایہہ وی دَسیا کہ اوہ اپنے جیہڑے ہمایماناں لئی کھان پین دا سامان لے کے جا رہے نیں اوہناں دا تعلق فرق فرق ثقافتاں نال اے۔ ایس لئی اوہناں دی ثقافت تے ضرورت دے مطابق ای اوہناں نُوں سامان دِتا جا رہیا اے۔ آخر چ اوہناں نے دکاند‌ار نُوں ایہہ وی دَسیا کہ یہوواہ دے گواہواں دا کم خوشی نال دِتے گئے عطیات نال ہوند‌ا اے تے اوہ اپنے ہمایماناں دی مدد کر‌ن لئی جو وی کم کر‌دے نیں اوہدے لئی اوہ کوئی تنخواہ یاں پیسے نئیں لیندے۔ ایہہ سُن کے اوہ دکاند‌ار بوہت متاثر ہویا۔ اوہ نہ صرف بھراواں نُوں گھٹ قیمت تے دالاں دین تے راضی ہو گیا سگوں اوہنے ایہہ وی کہیا کہ اوہ اگلے آرڈر تے 400 کلو دالاں مُفت دَوے گا۔‏

 ملک لائبیریا چ لُوسُو ناں دی اِک بیوہ بھین اپنی دھی، جوائی تے اوہناں دے تِن بچیاں نال رہندی اے۔ اِک دن ناشتہ کر‌ن تے روزانہ دی ایت نُوں پڑھن دے بعد بھین لُوسُو دے سَت سال دے دوہترے نے ویکھیا کہ گھر چ کھان لئی ہُن کجھ وی نئیں بچیا۔ اوہنے بھین کولوں پچھیا:‏ ”‏اَسی ہُن کیہہ کھاواں گے؟“‏ بھین نے اوہنوں دَسیا کہ اوہنے یہوواہ کولوں ایس بارے دُعا کیتی اے تے اوہنوں یقین اے کہ یہوواہ اوہناں دی مدد ضرور کر‌ے گا۔ اوسے دن دوپہر چ بھین لُوسُو نُوں کلیسیا دے بزرگاں دا فون آیا جنہاں نے بھین نُوں کہیا کہ اوہ آ کے کھان پین دا کجھ سامان لے جائے۔ بعد چ بھین نے دَسیا؛ ”‏میرا دوہترا کہندا اے کہ مینوں ہُن پتہ چل گیا اے کہ یہوواہ دُعاواں نُوں سُن دا اے تے اوہناں دا جواب وی دیندا اے کیونکہ اوہنے میری دُعا سنی اے۔“‏

 ہُن ذرا عوامی جمہوریہ کانگو چ رہن والی اِک عورت دی مثال تے وی غور کر‌و۔ اوہدے گوانڈھی یہوواہ دے گواہ سن۔ جدوں اوہنے ویکھیا کہ اوہدے گوانڈھیاں نُوں اوہناں دے ہمایمان وبا دے دوران کھان پین دِیاں شیواں پونچا رہے نیں تے اوہنے اپنے شوہر نُوں کہیا:‏ ”‏وبا ختم ہون دے بعد اَسی وی یہوواہ دے گواہ بن جاواں گے کیونکہ مَیں ویکھیا اے کہ اوہناں نے ایس مشکل گھڑی چ وی اِک دُوجے دا بڑا خیال رکھیا اے۔“‏ اوہدے شوہر نے اوہنوں پچھیا:‏ ”‏توں بس تھوڑے جہے چولاں لئی یہوواہ دی گو اہ بننا چاہنی ایں؟“‏ اوہنے کہیا:‏ ”‏نئیں، گل چولاں دی نئیں اے سگوں ایہہ وے کہ اوہناں دے ایس کم دی وجہ توں اوہناں دی سچی محبت ظاہر ہوئی اے۔“‏

 یہوواہ دے گواہ تواڈے عطیات دی وجہ توں ای ایس وبا دے دوران اپنے ہمایماناں دی مدد کر پائے نیں۔ اَسی تواڈے بڑے شکرگزار آں کہ تُسی donate.pr418.com دے ذریعے کُھلے دل نال عطیات دے رہے او۔‏