سال 2020 چ دُنیا بھر چ کئی لوک قدرتی آفتاں تے کورونا دی وبا دا شکار ہوئے۔ ایس دوران یہوواہ دے گواہواں نے اپنے ہم ایماناں دی مدد کر‌ن لئی کیہہ کیتا؟‏

 2020 دے خدمتی سال a دے دوران یہوواہ دے گواہواں دی گورننگ باڈی دی منتظمین دی کمیٹی نے آفتاں دے دوران مدد کر‌ن لئی 28 ملین ڈالر b استمال کر‌ن دی منظوری دِتی۔ ایہناں پیسیاں نال پوری دُنیا چ اوہناں بھین بھراواں دی مدد کیتی گئی جنہاں نُوں فرق فرق آفتاں دا سامنا کر‌نا پیا جیویں کہ کورونا دی وبا، طوفان، سیلاب، وینزیلا چ خوراک دی کمی تے زمبابوے چ کال وغیرہ۔ بھین بھراواں لئی کھان پین دِیاں شیواں، پانی، کپڑے، دوائیاں، صفائی ستھرائی لئی ضروری چیزاں تے رہن لئی ٹینٹ وغیرہ خریدے گئے۔ ایہدے علاوہ کجھ بھین بھراواں دے گھراں دی مرمت وی کیتی گئی۔ ویکھو کہ ایہہ امدادی کم کیویں کیتا گیا۔‏

 کورونا دی وبا۔‏ کورونا دی وبا توں ساڈے بوہت سارے بھین بھراواں نُوں جسمانی، ذہنی تے مالی نقصان پونچیا اے۔ اوہناں دی مدد کر‌ن لئی دُنیا بھر چ 800 توں زیادہ ایہو جہیاں کمیٹیاں بنائیاں گئیاں نیں جنہاں دا کم قدرتی آفت دے دوران مدد کر‌نا اے۔ ایہناں امدادی کمیٹیاں نے بھین بھراواں دی ضرورتاں دا حساب لایا تے منتظمین دی کمیٹی نُوں رپورٹ گھلی تاکہ اوہناں دی چنگی طرحاں مدد کیتی جا سکے۔‏

 ایہناں امدادی کمیٹیاں نے پورے سال دے دوران کئی سارے بھین بھراواں نُوں کھانا، پانی، دوائیاں تے صفائی ستھرائی لئی ضروری چیزاں پونچائیاں۔ کجھ علاقیاں چ امدادی کمیٹیاں نے اوتھوں دے بزرگاں نال مل کے بھین بھراواں دی مدد کیتی تاکہ اوہ حکومت وَلّوں مِلن والی اِمداد لے سکن۔‏

 ساڈے ایس کم دا دُوجے لوکاں تے وی بڑا اثر ہویا۔ مثال لئی، زمبیا دے شہر ناکونڈے دے کمِشنر نے ساڈے بھراواں نُوں کہیا:‏ ”‏اَسی تواڈے بڑے شکر گزار آں کہ تُسی آفت دے شکار لوکاں کول فوراً پونچے تے اوہناں دی مدد کیتی۔“‏

 ملک انگولا چ خوراک دی کمی۔‏ ملک انگولا چ کورونا دی وبا دی وجہ توں کھان پین دِیاں چیزاں دی کمی ہو گئی سی ایس لئی چیزاں دِیاں قیمتاں کافی ودھ گئیاں سن۔ ایس لئی ساڈے بوہت سارے بھین بھراواں لئی کھانا خریدنا بڑا مشکل ہو گیا سی۔‏

 برازیل دی برانچ نُوں کہیا گیا کہ اوہ انگولا چ رہن والے ساڈے بھین بھراواں لئی کھان پین دِیاں چیزاں دا بندوبست کر‌ے۔ عطیات دا بہتر استمال کر‌ن لئی، بھراواں نے چنگی طرحاں تحقیق کیتی کہ کھان پین دِیاں چیزاں دے بیگ گھلن لئی کیہڑا ذریعہ استمال کیتا جائے۔ ایہدے علاوہ کافی زیادہ تعداد چ کھان پین دِیاں چیزاں خریدیاں گئیاں۔ ایس طرحاں کھان پین دِیاں چیزاں دے ہر بیگ نُوں خریدن تے گھلن چ صرف 22 ڈالر خرچ ہوئے جد کہ ہر بیگ چ تقریباً 20 کلوِگرام چیزاں سن جدے چ چاول، لوبیا تے کھانا پکان لئی تیل وغیرہ شامل سی۔ ہُن تک اوتھے کھان پین دِیاں چیزاں دے 33 ہزار 544 بیگ گھلے جا چُکے نیں (‏یعنی 721 امریکی ٹن)‏۔ ایس طرحاں 50 ہزار توں وی زیادہ لوکاں لئی کھان پین دِیاں چیزاں گھلیاں گئیاں نیں۔‏

 ایس مدد بارے ساڈے بھین بھرا کیہو جیہا محسوس کر‌دے نیں؟ الیگزانڈرے جیہڑا کہ انگولا دے اِک دُور دے علاقے چ رہندا اے، اوہنے کہیا:‏ ”‏ایہہ مدد ایس گل دا ثبوت اے کہ یہوواہ مینوں پیار کر‌دا اے تے میں کلا نئیں آں۔ یہوواہ دی تنظیم میری بڑی فکر کر‌دی اے۔“‏ ماریزا جیہڑی کہ کلّی اپنے بچیاں نُوں پال رہی اے، کہندی اے:‏”‏یہوواہ نے میریاں دُعاواں سن لئیاں نیں۔ میں یہوواہ دی تے اوہدی تنظیم دی دِلوں شکرگزار آں۔“‏

 زمبابوے چ قحط دے شکار بھین بھراواں لئی مدد۔‏ 2020 دے خدمتی سال دے دوران ملک زمبابوے چ سخت کال پیا جدی وجہ توں لکھاں لوکاں نُوں بُھکھ دا سامنا کر‌نا پیا۔ ہزاراں یہوواہ دے گواہواں کول وی ضرورت مطابق خوراک نئیں سی۔‏

 ایہناں بھین بھراواں تک کھان پین دا سامان پونچان لئی 5 امدادی کمیٹیاں بنائیاں گئیاں۔ کئی سو مبشراں نے کھان پین دے سامان دے تھیلے تیار کر‌ن تے اوہناں نُوں گڈیاں چ رکھن چ مدد کیتی۔کئیاں نے تے اپنیاں گڈیاں امدادی سامان پونچان لئی دے دِتیاں۔‏ c 2020 دے خدمتی سال دے دوران 22 ہزار 700 لوکاں لئی کھان پین دِیاں چیزاں خریدن تے اوہناں تک پونچان لئی 6 لکھ 91 ہزار 561 ڈالر خرچ ہوئے۔‏

 کئی وار تے اِنج وی ہویا کہ اِمداد عین اوس وقت پونچی جدوں بھراواں کول کھان پین دِیاں چیزاں ختم ہو چُکیاں سن۔ جدوں اِمداد پونچی تے بھین بھراواں نے یہوواہ دا بڑا شکر ادا کیتا۔ کجھ نے تے گیت گا کے یہوواہ دی وڈیائی کیتی۔‏

 اِک علاقے چ دو گواہ بھیناں جیہڑیاں بیوہ سن اوتھے گئیاں جِتھے کسے این جی او وَلّوں کھان پین دِیاں چیزاں ونڈن بارے اِک اجلاس ہو رہیا سی۔ پر اوہ گل بات سیاسی جلسے چ بدل گئی تے اِمداد حاصل کر‌ن لئی کجھ شرطاں وی رکھیاں گئیاں۔ ایس لئی بھیناں نے فیصلہ کیتا کہ اوہ ایہہ مدد نئیں لین گیاں۔ جدوں بھیناں اوتھوں واپس جان لگیاں تے کجھ لوکاں نے اوہناں دا مذاق اُڈایا تے اوہناں نُوں کہیا:‏ ”‏کھانا منگن لئی ساڈے کول نہ آنا۔“‏ صرف دو ہفتیاں بعد ای ساڈے بھرا این جی او دی مدد پونچن توں وی پہلاں اوس علاقے چ پونچ گئے تے بھیناں دی مدد کیتی۔‏

 زمبابوے چ امدادی کم دی وجہ توں دُوجے لوکاں نُوں گواہی ملی۔ مثال لئی پرسکا دے تجربے تے غور کر‌و۔ اوہ اِک چھوٹے جہے پِنڈ چ رہندی اے جِتھے سخت کال دی وجہ توں گزارا کر‌نا بڑا مشکل سی۔ ایہدے باوجود پرسکا پوری لگن نال ہر بدھ تے جمعے والے دن مُنادی کر‌دی سی۔ ایتھوں تک کہ فصل بیجن دے موسم چ وی۔ پرسکا دے پِنڈ دے لوک اوہدا مذاق اُڈاند‌ے ہوند‌ے سن تے کہندے سن:‏ ”‏تیرے مُنادی کر‌ن دی وجہ توں تیرے گھر والے بُھکھے مرن گے۔“‏ جواب چ پرسکا اوہناں نُوں کہندی سی:‏ ”‏یہوواہ خدا اپنے بندیاں دا ساتھ کدی وی نئیں چھڈ دا۔“‏ تھوڑے دِناں بعد ای اوہنوں ساڈی تنظیم وَلّوں اِمداد مِل گئی۔ ایہہ ویکھ کے پرسکا دے گوانڈھی بڑے حیران ہوئے۔ اوہناں نے پرسکا نُوں کہیا:‏ ”‏خدا نے واقعی تیرا ساتھ نئیں چھڈیا، اَسی وی اوہدے بارے سکھنا چاہنے آں۔“‏ ہُن اوہناں وچوں سَت لوک ساڈیاں عبادتاں نُوں ریڈیو دے ذریعے سُن دے نیں۔‏

 سانوں پتہ اے کہ جیویں جیویں ایس بُری دُنیا دا خاتمہ نیڑے آ رہیا اے قدرتی آفتاں وی ودھدیاں رہن گیاں۔ (‏متی 24:‏3،‏7‏)‏ اَسی تواڈے بڑے شکرگزار آں کیونکہ تُسی donate.pr418.com دے ذریعے دل کھول کے عطیات دیندے او۔ ایہناں دے ذریعے اَسی وقت سر آفت دے شکار بھین بھراواں دی مدد کر پانے آں۔‏