ہر سال لکھاں لوک یہوواہ دے گواہ بن دے نیں جدی وجہ توں ساڈی تعداد ودھدی جا رہی اے۔ایس لئی سانوں ہور عبادت گاہواں دی ضرورت اے۔ ایس گل نُوں دھیان چ رکھدے ہوئیاں تعمیر دے شعبے نے فیصلہ کیتا کہ 2020 دے دوران پوری دُنیا چ 2700 توں زیادہ عبادت‌گاہواں دی تعمیر تے مرمت کیتی جائے گی۔‏ a

 پر افسوس دی گل اے کہ کورونا دی وبا دی وجہ توں ایہہ سارا کم رُک گیا۔اپنے بھین بھراواں نُوں وبا توں بچان لئی تے حکومت وَلّوں پابندیاں تے عمل کر‌ن لئی گورننگ باڈی دی اشاعت دی کمیٹی نے نوِیاں عمارتاں بنان دے بوہت سارے منصوبے روک دِتے۔ پر خوشی دی گل ایہہ وے کہ ایس وبا تُوں پہلاں ای 1700 توں زیادہ عبادت‌گاہواں دی تعمیر تے مرمت دا کم مکمل کر لیا گیا سی۔ ایہدے نال نال 100برانچاں چ کجھ وڈے تعمیری کم وی مکمل کیتے گئے۔ ویکھو کہ ساڈیاں دو نوِیاں عمارتاں دا ساڈے بھین بھراواں نُوں کیہہ فائدہ ہویا۔‏

 کیمرون دی برانچ۔‏ کیمرون دے شہر ڈوالا چ برانچ دی پرانی عمارت بوہت چھوٹی سی تے اوہنوں بوہت زیادہ مرمت دی لوڑ سی‏۔‏اشاعت دی کمیٹی نے اوہدی مرمت کر‌ن بارے سوچیا پر عمارت دی اپنی قیمت اینی نئیں سی جِنّاں اوہدی مرمت تے خرچہ ہونا سی۔ کمیٹی نے سوچیا کہ یاں تے نوِیں عمارت بنائی جائے یاں فیر اِک بنی بنائی عمارت نُوں خرید کہ اوہدی مرمت کر لئی جائے۔ پر ایہناں چوں کوئی وی کم نہ ہو پایا۔‏

 ایسے عرصے دوران، ساڈے بھراواں نُوں پتہ چلیا کہ ڈوالا چ ساڈے اِک اسمبلی ہال دے نال حکومت نے اِک پکی سڑک بنان دا فیصلہ کیتا اے۔ ایس سڑک دی وجہ توں نہ صرف بھین بھراواں لئی سفر کر‌نا اسان ہو جانا سی سگوں برانچ دی عمارت چ بوہت ساریاں سہولتاں وی آ جانیاں سن۔ ایس لئی گورننگ باڈی نے اسمبلی ہال دے نال ای برانچ دی عمارت بنان دا فیصلہ کیتا۔‏

 ساڈے بھراواں تے دُوجے مزدوراں نے مِل کے ایس عمارت نُوں بنایا جدی وجہ توں ایہہ عمارت گھٹ پیسیاں تے تھوڑے وقت چ تیار ہو گئی۔ ایہنوں بنان چ اند‌ازے توں وی گھٹ خرچہ ہویا تے کوئی 20 لکھ ڈالر بچ وی گئے۔ کورونا دی وبا پھیلن توں پہلاں ای بیت‌ایل دے بھین بھرا ایس نوِیں عمارت چ شفٹ ہو گئے۔‏

 کیمرون دے بیت‌ایل چ رہن والے بھین بھرا ایس نوِیں عمارت تے ایہدے چ موجود سہولتاں توں بوہت خوش نیں۔ اوہ ایس عمارت نُوں یہوواہ وَلّوں اِک تحفہ سمجھدے نیں۔ اِک جوڑے نے دَسیا کہ اوہ پہلے نالوں وی زیادہ محنت نال کم کر‌نا چاہندے نیں تاکہ اوہ ایس تحفے لئی قدر وکھا سکن۔‏

 تجول ابال، ترجمے دا دفتر ۔‏ کافی سالاں توں تجول‌ابال زبان چ ترجمہ کر‌ن والے بھین بھرا وسطی امریکہ دی برانچ توں کم کر رہے سن جیہڑی میکسیکو شہر دے نیڑے سی۔ پر ایہہ زبان الطامیرانو تے لاس مارگریتاس دے علاقیاں چ بولی جاند‌ی اے جیہڑے برانچ توں تقریباً 1000کلومیڑ (‏ 620 میل)‏ دُور نیں۔کیونکہ ترجمہ کر‌ن والے بھین بھرا ایہناں علاقیاں توں دُور رہندے سن ایس لئی اوہناں لئی ایہہ جاننا مشکل سی کہ زبان چ کیہڑیاں تبدیلیاں ہو رہیاں نیں۔ نالے دفتر دے نیڑے ایہو جہے بھین بھرا لبھنا وی مشکل سی جیہڑے ایس زبان چ ترجمے تے آڈیو ریکارڈنگ دے کم چ مدد کر سکن۔‏

 ایہناں گلاں دی وجہ توں، مضمون‌نویسی دی کمیٹی چاہندی سی کہ ترجمے دا دفتر اوسے علاقے چ کھولیا جائے جِتھے تجول‌ابال زبان بولی جاند‌ی اے۔ایس لئی برانچ نے اِک عمارت خرید کے اوہدی مرمت کر‌ن دا فیصلہ کیتا۔ ایہہ طریقہ نوِیں عمارت بنان یاں کر‌ائے تے دفتر لین توں بوہت سستا سی۔‏

 ایس زبان چ ترجمہ کر‌ن والے اِک بھرا نے دَسیا کہ اوہنوں ایس تبدیلی دا کیہہ فائدہ ہویا۔ اوہنے کہیا کہ اوہ میکسیکو چ دس سالاں توں ایس زبان چ ترجمے دا کم کر رہیا سی پر ایس دوران اوہنوں اِک وی ایسا خاند‌ان نئیں ملیا جیہڑا اوہدی زبان بولدا ہووے۔ پر ہُن ترجمے دا دفتر اوسے علاقے وچ اے جِتھے تجول‌ابال زبان بولی جاند‌ی اے۔ہُن اوہ ہر روز ایہہ زبان بولن والے لوکاں نال گل بات کر‌دا اے جدی وجہ توں اوہ ہور وی چنگی طرحاں ترجمے دا کم کر پاند‌ا اے۔‏

 جے حالات بہتر ہو گئے تے 2021 دے دوران 75 ایہو جہیاں عمارتاں بنائیاں جان گیاں جنہاں چوں کجھ ترجمے دے کم لئی استمال ہون گیاں تے کجھ بائبل چوں تلیم دین لئی سکولاں دے طور تے استمال ہون گیاں۔ نالے اَٹھ ہور وڈیاں عمارتاں وی بنائیاں جان گیاں جیہڑیاں نیویارک دے شہر ریماپو چ ہیڈکوارٹر، ارجنٹینا تے اِٹلی دِیاں برانچاں لئی استمال ہون گیاں۔ ایہدے علاوہ 1000 توں وی زیادہ نوِیاں عبادت‌گاہواں دی لوڑ اے۔ نالے ساڈیاں6000 توں زیادہ عبادت‌گاہواں دی حالت بوہت خراب اے تے ایس لئی اوہناں نُوں بدلن دی لوڑ اے۔ نالے 4,000 عبادت‌گاہواں نُوں مرمت دی وی ضرورت اے۔‏

 ایہناں ساریاں عمارتاں نُوں بنان تے ایہناں دی مرمت دا خرچہ کیویں پورا ہو رہیا اے؟ ایس سوال دا جواب وسطی امریکہ دی برانچ کمیٹی دے ممبر بھرا لزارو گونزیلز نے دِتا جدوں اوہ تجول‌ابال زبان چ ترجمے دا دفتر بنان بارے گل کر رہے سن۔ اوہناں نے کہیا:‏ ”‏ساڈے کول ایناں وڈا کم کر‌ن لئی ضروری سہولتاں نئیں نیں۔ پر بھین بھراواں دی مدد نال اَسی ایہہ ترجمے دا دفتر بنان چ کامیاب ہو جانواں گے تاکہ تجول‌ابال زبان بولن والے بھین بھراواں لئی روحانی خوراک تیار کر سکئے۔ پوری دُنیا چوں بھین بھراواں دے عطیات دے ذریعے ترجمہ کر‌ن والے بھین بھراواں نُوں اوہناں علاقیاں چ لیانا ممکن ہویا اے جنہاں چ تجول‌ابال زبان بولی جاند‌ی اے۔ اَسی ایہناں عطیات لئی بڑے شکرگزار آں۔“‏ اَسی پوری دُنیا چ ایہو جہیاں عمارتاں صرف تواڈے دِتے گئے عطیات دی وجہ توں ای بنان دے قابل ہنے آں۔ سانوں بوہت سارے عطیات donate.pr418.com دے ذریعے دِتے جاند‌ے نیں۔.‏