موسیقی یہوواہ وَلّوں اِک تحفہ اے۔ ایہہ ساڈے دل تے اثر کر‌دی اے، سانوں خوش کر‌دی اے تے ساڈے اند‌ر کسے کم نُوں کر‌ن دی خواہش پیدا کر دی اے۔ایہہ گل ساڈے گیتاں بارے وی بالکل سچ اے۔ ساڈے گیت تے ہور وی زیادہ خاص نیں کیونکہ ایہہ سانوں یہوواہ دے نیڑے لے کے جاند‌ے نیں۔‏

 2014 توں لے کے ہُن تک ساڈے 70 توں وی زیادہ گیت تیار ہوئے نیں تے اوہناں وچوں کجھ گیت تے 500 توں وی زیادہ زباناں چ نیں۔ پر شاید تُسی سوچیا ہوئے کہ ایہناں گیتاں نُوں کون تیار کر‌دا اے تے ایہہ کیویں تیار ہوند‌ے نیں؟‏

 آڈیو ویڈیو دے شعبے چ اِک موسیقی والی ٹیم اے جیہڑی گیت تیار کر‌دی اے۔ ایہہ ٹیم گورننگ باڈی دی تلیمی کمیٹی دی ہدیتاں دے مطابق کم کر‌دی اے۔ ایس ٹیم چ 13 بھین بھرا نیں جیہڑے طرزاں تیار کر‌دے نیں، موسیقی بناند‌ے نیں، فرق فرق کماں دے شیڈول بناند‌ے نیں تے ہور کئی کم کر‌دے نیں۔ ایہدے علاوہ تلیمی کمیٹی نے ایہہ منظوری وی دِتی اے کہ پُوری دُنیا چوں کئی بھین بھرا اپنے اپنے گھر چوں ای ایس کم چ حصہ لے سکدے نیں جیویں کہ کجھ طرزاں تیار کر‌دے نیں، کجھ موسیقی بناند‌ے نیں تے کجھ گیتاں نُوں گاند‌ے نیں۔ ایہہ بھین بھرا خاکساری نال اپنیاں صلاحیتاں نُوں ایس کم لئی استمال کر‌دے نیں تے اپنی واہ واہ نئیں چاہندے۔‏

 اِک گیت کیویں تیار کیتا جاند‌ا اے؟ سب توں پہلے تلیمی کمیٹی ایہہ فیصلہ کر دی اے کہ گیت نُوں کیہڑیاں ایتاں دی بنیاد تے تیار کر‌نا اے تے اوہنوں سُنن والیاں دے اند‌ر کیہو جہے جذبات پیدا ہونے چاہی دے نیں۔ فیر موسیقی والی ٹیم کجھ بھین بھراواں نُوں اوہدی طرز تیار کر‌ن دی تے کجھ نُوں اوہدے بول لکھن دی ذمےداری دیندی اے۔ فیر اوس گیت دی اِک عارضی ریکارڈنگ تیار کیتی جاند‌ی اے۔ تلیمی کمیٹی اوس ریکارڈنگ نُوں سُن دی اے تے اوہدے چ ردوبدل کر‌ن لئی ہور ہدیتاں دیندی اے۔ اوہناں ہدیتاں دے مطابق موسیقی والی ٹیم اوس گیت چ تبدیلیاں کر‌دی اے تے اوہنوں فیر توں ریکارڈ کر‌دی اے۔ ایہناں گیتاں نُوں فرق فرق تھانواں تے ریکارڈ کیتا جاند‌ا اے جیویں کہ برانچ دے اند‌ر یاں بھین بھراواں دے گھراں چ۔‏

 کسے گیت نُوں تیار کر‌ن تے اوہنوں ریکارڈ کر‌ن لئی ساڈے بھرا کمپیوٹر دے کئی پروگرام استمال کر‌دے نیں۔ ایس کم لئی فرق فرق چیزاں دی ضرورت ہوند‌ی اے جیویں کہ مختلف ساز، سپیکر تے مائیک وغیرہ۔ اِک مائیک دی قیمت تقریباً 17 ہزار روپے توں لے کے تقریباً 2 لکھ روپے تک ہو سکدی اے۔ 2020 چ اَسی ریکارڈنگ دِیاں چیزاں خریدن لئی 2 کر‌وڑ روپے توں زیادہ پیسے خرچ کیتے۔‏

 عطیات نُوں سمجھداری نال استمال کر‌ن لئی کیہڑیاں کوششاں کیتیاں جاند‌یاں نیں؟ اِک وڈی جہی موسیقی والی ٹیم نُوں بیت‌ایل بلا‌ن دی بجائے ایہو جہے بھین بھراواں نُوں استمال کیتا جاند‌ا اے جیہڑے اپنے گھر توں کم کر سکن۔ ایہدے علاوہ ساز وجان والے بھین بھراواں نُوں اِکو تھاں تے بلا‌ن دی بجائے ساڈے بھرا کمپیوٹر تے پروگراماں دے ذریعے فرق فرق سازاں دی آواز شامل کر دے نیں۔

 بھین بھرا بڑے شوق نال گیت سُن دے نیں۔ جرمنی چ رہن والی اِک بھین ٹیرا کہندی اے:‏ ”‏میں جدوں وی پریشان ہنی آں تے ایہناں گیتاں نُوں سُن کے مینوں سکون مِلدا اے۔ ایہناں نُوں اپنی زبان چ سُن کے مینوں محسوس ہوند‌ا اے کہ جیویں یہوواہ مینوں گلے لا رہیا اے۔“‏ قازقستان چ رہن والا اِک بھرا جدا ناں دیمیتری اے، اوہ کہندا اے:‏ ”‏مینوں ایہہ گل بڑی چنگی لگدی اے کہ ایہناں گیتاں نُوں سُن دے ویلے مینوں ایہہ نئیں سوچنا پیندا کہ میں ایہناں نُوں سُناں کہ نہ سُناں کیونکہ مینوں پتہ ہوند‌ا اے کہ ایہہ بائبل دے اصولاں دے مطابق ای نیں۔ ایہدے علاوہ ایہناں توں مینوں اپنا دھیان یہوواہ دی خدمت تے رکھن چ وی مدد مِلدی اے۔“‏

 جنوبی افریقہ چ رہن والی اِک بھین ڈیلیا نے ایہناں گیتاں بارے ایہہ دَسیا:‏ ”‏جدوں میں مایوس ہنی آں یاں کسے مشکل دا سامنا کر رہی ہنی آں تے مینوں کوئی نہ کوئی ایہو جیہا گیت ضرور مِل جاند‌ا اے جیہڑا میرے ایمان نُوں فیر توں مضبوط کر دیندا اے۔ اکثر اِنج ہوند‌ا اے کہ گیتاں دی ا موسیقی سُن کے ای میری پریشانی غائب ہو جاند‌ی اے۔“‏

 کجھ گیت تے بھین بھراواں نُوں بوہت پسند نیں۔ جنوبی افریقہ چ رہن والی اِک ہور بھین جدا ناں لیریٹو اے، کہندی اے:‏ ”‏گیت ”‏جسٹ اراؤنڈ دی کورنر“‏ تے ”‏نویں دنیا آ گئی‏“‏ مینوں اوس وقت چ لے جاند‌ے نیں جدوں میں اپنی پیاری امی نُوں فیر توں ملاں گی۔ جدوں وی میں ایہہ گیت سننی آں تے مینوں لگدا اے کہ میری امی بانہواں کھول کے دوڑدی ہوئی مینوں مِلن آ رہی اے۔“‏

 سری‌لنکا چ اِک کُڑی نُوں اِک گیت توں بڑی مدد ملی۔ اوہنے دَسیا کہ میری سائنس دی ٹیچر نے مینوں یہوواہ دی گواہ ہون دی وجہ توں پوری کلاس دے سامنے بوہت ڈانٹیا۔ میں بوہت گھبرا گئی۔ مینوں سمجھ نئیں آرہیا سی کہ میں اوہنوں کیہہ کہواں۔ جدوں میں گھر آئی تے میری امی نے مینوں کہیا کہ میں گیت ”‏سٹڈی میکس یو سٹرانگ“‏ سُناں۔ اوس گیت توں میں سمجھ گئی کہ مینوں تحقیق کر‌نی چاہی دی اے تاکہ میں اپنی ٹیچر نُوں جواب دے سکاں۔ اگلے دن میں اپنی ٹیچر نال گل کیتی۔ اوہنے میری گل غور نال سنیُ تے نالے کہیا کہ ہن اوہ یہوواہ دے گواہواں دے عقیدیاں نُوں بہتر طور تے سمجھ گئی اے۔ میں یہوواہ دی تنظیم دی بڑی شکرگزار آں کہ اوہنے ساڈے لئی اینے ودھیا گیت بنائے نیں۔“‏

 ایہناں گیتاں نُوں تیار کر‌ن دا خرچہ کیویں پورا ہوند‌ا اے؟ تواڈے عطیات دے ذریعے جیہڑے تُسی donate.pr418.com تے دَسے گئے فرق فرق طریقیاں دے ذریعے دیندے او۔ اَسی تواڈے عطیات لئی بڑے شکرگزار آں۔‏