ساڈیاں کنونشناں تے وکھائیاں جان والیاں ویڈیوز ساڈے دل نُوں چُھو لیندیاں نیں نالے اَسی ایہناں توں پاک کلام دِیاں گلاں نُوں ہور چنگی سمجھن دے قابل وی ہنے آں۔ 2020 لئی ساڈی کنونشن ”‏ہمیشاں خوش رہوو“‏ تے 114 ویڈیوز وکھائیاں گئیاں جنہاں چ اوہ 43 تقریراں وی شامل سن جیہڑیاں گورننگ باڈی دے ممبراں تے اوہناں دے مددگاراں نے دِتیاں سن۔ کیہہ تُسی کدی سوچیا اے کہ ایہہ ساریاں ویڈیوز بنان چ کِنّی محنت لگدی اے تے کِنّاں پیسہ خرچ ہوند‌ا اے۔‏

 پوری دُنیا چ تقریباً 900 بھین بھراواں نے ایہہ ویڈیوز تیار کر‌ن چ مدد کیتی۔ اوہناں نے ایس کم لئی اپنا وقت تے ہنر دل کھول کے استمال کیتا۔ اوہناں نے ایس کم چ 2 سال توں وی زیادہ عرصے چ تقریباً 1 لکھ گھنٹے لائے۔ ایہناں وچوں 70 ہزار گھنٹے تے صرف 76 منٹ دا ڈرامہ بنان چ لگے جدا ناں سی:‏ ‏”‏نحمیاہ‏—‏یہوواہ وَلّوں مِلن والی خوشی تواڈی پناہ اے۔‏‏“‏

 ایہہ ویڈیوز تیار کر‌ن چ بوہت پیسہ خرچ ہویا۔ جیہڑے بھین بھراواں نے حصہ لیا اوہناں دی رہائش تے کھان‌پین دا بندوبست کر‌نا پیا۔ اوہناں نُوں اوہ سارا ضروری سامان وغیرہ دِتا گیا جیہڑا ایس کم لئی ضروری سی۔ ایہناں ساریاں چیزاں دا اِنتظام کر‌نا کوئی آسان تے سستا کم نئیں سی۔‏

 آڈیو ویڈیو دے شعبے چ کم کر‌ن والے اِک بھرا جیرڈ گوسمین نے کہیا:‏ ”‏گورننگ باڈی دی تلیمی کمیٹی چاہندی اے کہ ساڈیاں ویڈیوز چ فرق فرق تھانواں وکھائیاں جان تے فرق فرق ثقافتاں دے لوک وکھائے جان۔ ایس توں پتہ چلے گا کہ اَسی اِک عالم‌گیر برادری آں۔ ایس لئی اَسی 11 فرق فرق مُلکاں چ 24 ٹیماں بنایاں۔ پوری دُنیا وچوں لوکاں نُوں ایس کم لئی منظم کر‌ن چ نہ صرف بوہت محنت لگدی اے سگوں خرچہ وی چوکھا ہوند‌ا اے۔“‏

 کجھ ویڈیوز بنان لئی خاص قسم دے سامان تے سیٹ دی ضرورت ہوند‌ی اے۔ مثال لئی، نحمیاہ والے ڈرامے لئی امریکہ چ ساڈے اپنے سٹوڈیو چ سیٹ لائے گئے۔ بھراواں نے یروشلیم دِیاں دیواراں دی اِک نقل بنائی جدا بھار بوہت ای ہولا سی۔ اِنج عطیات وی سمجھ‌داری نال استمال ہوئے تے ڈرامہ وی تاریخی لحاظ نال صحی بنیا۔ ہر دیوار 20 فٹ اوچے لکڑی دے فریم نال بنائی گئی جدے چ فوم بھریا گیا سی۔ فیر ایہنوں ایہو جیہا رنگ کیتا گیا جدے نال لگ رہیا سی کہ جیویں ایہہ پتھراں نال بنی ہوئی اے۔ ایہناں دیواراں نُوں فرق فرق سیناں چ استمال کیتا گیا تے انج سیٹ گھٹ لانے پئے۔ فیر وی صرف ڈرامے دے سیٹ لان چ کوئی 1 لکھ ڈالر خرچ ہوئے۔‏ a

 ایہہ سب کجھ جان کے ساڈے دل چ ایس سال دی کنونشن لئی قدر ہور وی ودھ جاند‌ی اے۔ سانوں یقین اے کہ ایس کنونشن دے پروگرام توں پوری دُنیا چ یہوواہ دی وڈیائی ہو رہی اے۔ جیہڑے عطیات تُسی jw.org دے ذریعے یاں ہور طریقیاں نال دے رہے او، اَسی اوہناں دی بڑی قدر کر‌نے آں تے اوہناں لئی تواڈے دلوں شکرگزار آں۔‏