پوری دُنیا چ یہوواہ دے گواہواں لئی جولائی تے اگست 2020 دے دوران تِن روزہ کنونشن دا پروگرام ویکھن دا اِنتظام کیتا گیا اے۔ ایہہ یہوواہ دے گواہواں دی تاریخ چ پہلی وار ہوئے گا کہ سارے گواہ اِکو ویلے تے کنونشن ویکھ رہے ہون گے۔ ایس پروگرام دا ترجمہ 500 توں زیادہ زباناں چ کیتا گیا اے۔ عموماً ایس طرحاں دے کم چ اِک سال یاں ایس توں بوہتا وقت لگدا اے۔ پر کورونا وائرس دی وبا دی وجہ توں ترجمہ کر‌ن والیاں نُوں ایس کنونشن دے پروگرام دا ترجمہ کر‌ن لئی 4 مہینیاں توں وی گھٹ وقت ملیا۔‏

 ساڈے عالمی ہیڈکوارٹر توں دو شعبیاں نے ایس کم چ مدد کیتی۔ اِک شعبے دا کم ترجمہ کر‌ن والیاں دی مدد کر‌نا سی تے دُوجے دا کم ضروری چیزاں خریدنا سی۔ ترجمہ کر‌ن والیاں دی مدد کر‌ن والے شعبے نے دَسیا کہ جیہڑیاں ٹیماں ایہہ کم کر‌ن گیاں اوہناں وچوں کجھ نُوں کمپیوٹر تے ہور چیزاں چاہی دِیاں ہون گیاں جیویں کہ بہترین مائیکروفون وغیرہ۔ چیزاں خریدن والے شعبے نے 1000 مائیکروفون خریدے تے اوہناں نُوں تقریباً 200 فرق فرق تھانواں دے پونچایا۔‏

 پیسے بچان لئی مائیکروفون تھوک دے حساب نال خریدے گئے، اوہناں نُوں اک ایہو جہی تھاں بھیجیا گیا جیہڑی اوہناں سارے مُلکاں توں نیڑے پیندی سی جتھے ترجمے دا کم ہو رہیا سی۔ فیر اوتھوں ایہہ مائیکروفون دبارہ ڈبیاں چ بند کر کے اوہناں مُلکاں نُوں گھلے گئے۔ تھوک چ خریدن دی وجہ توں ہر مائیکروفون دی قیمت کوئی 170 ڈالر پئی جدے چ ایہنوں بھیجن دی قیمت وی شامل سی۔ پر جے ہر مائیکروفون کلا کلا خریدیا جاند‌ا تے ایہدی قیمت 20 فیصد بوہتی ہونی سی۔‏

 چیزاں خریدن والے شعبے نُوں سارا سامان اپریل تے مئی 2020 دے دوران خریدنا تے بھیجنا پیا بھانویں کہ اوہدوں کورونا وائرس دی وجہ توں بوہت ساریاں کمپنیاں پوری طرحاں کم نئیں کر رہیاں سن۔ بہرحال مئی دے آخر تک اوہناں ساریاں تھانواں تے ایہہ سامان پونچ گیا جِتھے ترجمے دا کم ہو رہیا سی۔‏

 چیزاں خریدن والے شعبے دے نگران نے کہیا کہ ”‏بیت‌ایل دے فرق فرق شعبیاں تے دُوجیاں کمپنیاں نے آپس چ بوہت تعاون کیتا تاکہ ایہہ کم وقت سر پورا ہو سکے۔ یہوواہ واقعی اپنی پاک روح دے ذریعے ایس کم چ ساڈی مدد کر رہیا اے تاں ای تے اَسی ایہہ کم نہ صرف سستے سگوں بہترین طریقے نال کر سکے۔“‏

 ترجمہ کر‌ن والیاں دی مدد کر‌ن والے شعبے دے اِک ممبر نے کہیا کہ ”‏ترجمہ کر‌ن والے جیہڑے گواہ اوس ویلے لاک ڈاؤن چ سن اوہ کم کر‌ن لئی نواں سامان حاصل کر کے بڑے خوش ہوئے۔ بھانویں کہ اوہ اپنی ٹیم دے دُوجے ممبراں نُوں مِل نئیں سکدے سن پر فیر وی اوہناں نے ایس سامان دی بدولت 500 توں زیادہ زباناں چ تقریراں، گیتاں تے ڈرامیاں دا ترجمہ کیتا۔“‏

 پوری دُنیا چ 2020 لئی کنونشن ”‏ہمیشاں خوش رہوو“‏ دا پرگرام پیش کر‌ن لئی ایہدا ترجمہ کر‌ن توں علاوہ ہور وی بھتیرے کم کیتے گئے۔ ایہہ سارے کم اوہناں عطیات دے ذریعے کیتے گئے جیہڑے تُسی دِتے نیں۔ ایس کنونشن لئی ضروری سامان وی ایہناں عطیات توں ای خریدیا گیا۔‏