تواڈے عطیات کیویں ورتے جاندے نیں؟
2021 چ آفت دے شکار بھین بھراواں لئی اِمداد
1 جنوری 2022
2021 دے خدمتی سال چ وی a کورونا دی وبا نے پچھا نئیں چھڈیا۔ مضمون ”عالمی وبا دے دوران عالمی اِمداد دا اِنتظام“ چ دَسیا گیا سی کہ کورونا دی وبا دے دوران اَسی بھین بھراواں دی مدد کرن لئی لکھاں ڈالر b خرچ کیتے تے 950 توں زیادہ امدادی کمیٹیاں بنائیاں۔
اِک پاسے وبا زوراں تے سی تے دُوجے پاسے پوری دُنیا چ ساڈے بھین بھرا دُوجیاں مصیبتاں تے قدرتی آفتاں دا سامنا کر رہے سن۔ گورننگ باڈی دی منتظمین دی کمیٹی نے کورونا دے علاوہ 200 توں زیادہ آفتاں لئی 80 لکھ ڈالر خرچ کرن دی منظوری دِتی۔ غور کرو کہ کجھ عرصہ پہلاں ای جیہڑیاں دو آفتاں آئیاں نیں، اوہناں توں متاثر ہون والے بھین بھراواں دی مدد کرن لئی تواڈے عطیات کیویں استمال کیتے گئے۔
نیاراگونگو پہاڑ دا پھٹنا
22 مئی2021 چ کانگو، عوامی جمہوریہ چ نیاراگونگو آتش فشاں پہاڑ پھٹنا شروع ہویا۔ ایس پہاڑ چوں نکلن والے لاوے نیں گھراں تے سکولاں نُوں تباہ کر دِتا تے ندی نالیاں دے پانی نُوں وی خراب کر دِتا۔ پر اوتھوں دے رہن والیاں نُوں صرف لاوے توں ای نئیں سگوں اوس زہریلے دُھویں توں وی خطرہ سی جیہڑا ایس پہاڑ دے پھٹن دے کئی دِناں بعد وی اوہدے چوں نکلدا رہیا تے شہر گوما چ پھیلدا رہیا۔ ایہدے علاوہ شہر چ زلزلے دے جھٹکے وی محسوس کیتے گئے۔ ایہناں حالاتاں دی وجہ توں اَدھے توں زیادہ لوکاں نُوں کہیا گیا کہ اوہ شہر نُوں خالی کر دین۔ ایس لئی لکھاں لوک ملک روانڈا بھج گئے۔
ساڈی اِک عبادتگاہ چ امدادی کمیٹی نے بھین بھراواں نُوں کھان لئی دلیہ دِتا۔
بھجن والیاں چوں تقریباً 5 ہزار لوک یہوواہ دے گواہ سن۔ اوہناں چوں بوہت سارے یہوواہ دے گواہواں دے گھر تباہ ہو گئے سن تے کجھ دے بھجن دے بعد اوہناں دے گھراں نُوں لٹُ لیا گیا سی۔ اوہناں بھین بھراواں دی مدد کرن لئی روانڈا تے کانگو چ امدادی کمیٹیاں نے اپنا کم شروع کر دِتا۔ اِک امدادی کمیٹی بارے کانگو (کنشاسا) دی برانچ نے ایہہ دَسیا: ”شہر چ بڑی افراتفری سی۔ پر ایہنوں خالی کرن دے حکم توں پہلاں ای امدادی کمیٹی نے بھین بھراواں چ کھانا، پانی، بسترے تے کپڑے وَنڈنے شروع کر دِتے سن۔“ اِک شہر جتھے 2 ہزار توں وی زیادہ بھین بھرا جمع سن، اوتھے اِک امدادی کمیٹی نے بھین بھراواں لئی ٹینٹ لائے،اوہناں نُوں ماسک دِتے تے اوہناں نُوں دَسیا کہ اوہ کورونا تے ہیضے دی بیماری توں کیویں بچ سکدے نیں۔
کھان پین دِیاں شیواں دے تھیلیاں نُوں بھین بھراواں تک پونچان توں پہلاں اوہناں دا وزن کیتا جا رہیا اے۔
ایس آفت دے تِن مہینے دے اندر اندر ساڈے بھین بھراواں نُوں 6 ٹن چول، 6 ٹن آٹا، 3 ٹن کھانا پکان والا تیل تے 3 ٹن پین دا پانی دِتا گیا۔ عطیات نُوں سمجھداری نال استمال کرن لئی برانچ نے ایہہ اِنتظام کیتا کہ کھان پین دِیاں چیزاں نُوں باہروں لیان دی بجائے اوسے ملک توں خریدیا جائے۔
اِک بھین دا نواں گھر لاوے دی وجہ توں تباہ ہو گیا۔ اوہنے کہیا: ”ایہہ ویکھ کے سانوں بڑا صدمہ پونچیا۔“ جدوں بھراواں نے اوہدی تے اوہدے خاندان دی مالی طور تے مدد کیتی تے اوہناں نُوں حوصلہ دِتا تے اوہنے کہیا: ”ساڈے کول حالے وی اوہ چیزاں ہے نیں جنہاں دی سانوں لوڑ اے۔ اَسی ایس گل دا تجربہ کیتا اے کہ یہوواہ ساڈا بھار چُکدا اے تے مشکلاں نُوں برداشت کرن چ ساڈی مدد کردا اے۔“
وینزویلا چ مالی تنگی
وینزویلا دے ملک چ کئی سالاں توں مالی حالات بوہت خراب نیں۔ اوتھے بھین بھراواں لئی زندگی گزارنا بوہت ای مشکل ہوندا جا رہیا اے کیونکہ اوتھے کھان پین دِیاں چیزاں چ کمی ہوندی جا رہی اے تے جُرم وی ودھدا جا رہیا اے۔ پر یہوواہ دی تنظیم نے اوہناں نُوں نئیں چھڈیا۔
چولاں دِیاں بوریاں نُوں وینزویلا دے فرق فرق علاقیاں چ پونچان لئی کنٹینر چ لدیا جا رہیا اے۔
پچھلے خدمتی سال چ کھان پین دِیاں تے ضرورت دِیاں دُوجیاں چیزاں جیویں کہ صابن وغیرہ نُوں خریدن تے اوہناں نُوں ضرورتمند بھین بھراواں تک پونچان لئی 15 لکھ ڈالر توں زیادہ پیسے خرچ کیتے گئے۔ وینزویلا دی برانچ نے دَسیا: ”ہر مہینے 130 ٹن کھانے نُوں ملک دے کونے کونے تک پونچانا تے ایس گل دا خیال رکھنا آسان کم نئیں اے کہ ایہہ ضرورتمند بھین بھراواں تک پونچے وی۔“ بھرا ضرورتمند بھین بھراواں نُوں ایہو جہیاں کھان پین دِیاں چیزاں بھیج دے نیں جیہڑیاں زیادہ دیر تک محفوظ رہ سکدیاں نیں۔ برانچ نے ایہہ وی دَسیا: ”اَسی کھان پین دِیاں چیزاں نُوں زیادہ مقدار چ تے موسم دے حساب نال خریدنے آں تاکہ ایہہ سانوں سستیاں پین۔ فیر اَسی ایہناں نُوں ضرورتمند بھین بھراواں تک ایس طریقے نال بھیجنے آں جدے چ زیادہ پیسے نہ لگن۔“
ملک چ پٹرول یاں گیس نہ مِلن دی وجہ توں نوجوان بھرا سائیکل تے 18 کلومیٹر دا سفر کر کے اپنی کلیسیا تک کھان پین دِیاں شیواں پونچا رہے نیں۔
بھرا لیونل وینزویلا چ اِک امدادی کمیٹی دا ممبر اے۔ اوہنوں اپنا ایہہ کم بوہت ای پسند اے۔ اوہ کہندا اے:”ایہہ کم بوہت ای خاص اے۔ جدوں توں میری بیوی کورونا دی وجہ توں فوت ہوئی اے، اوہدوں توں ایسے کم دی وجہ توں میں سنبھل پایا واں۔ میں ایس کم چ بڑا مصروف رہنا واں تے مینوں ایہہ سوچ کے بڑی خوشی ہوندی اے کہ میں ضرورتمند بھین بھراواں دے کم آ رہیا واں۔ میں اپنی زندگی چ یہوواہ دا ایہہ وعدہ پورا ہوندیاں ویکھیا اے کہ اوہ کدی وی اپنے بندیاں نُوں کلّا نئیں چھڈدا۔“
اِک بھرا جیہڑا پہلاں کدی امدادی کمیٹی چ ہوندا سی، اوہدی وی مدد کیتی گئی۔ اوہنے کہیا: ”ہن مینوں مدد دی ضرورت سی۔ بھراواں نے سانوں صرف پیسے تے کھان پین دِیاں چیزاں ای نئیں دِتیاں سگوں اوہناں نے مینوں تے میری بیوی نُوں تسلی وی دِتی تاکہ اَسی حد توں زیادہ پریشان نہ ہوئیے۔ اوہناں نے ساڈا بوہت خیال رکھیا تے ساڈا حوصلہ ودھایا۔“
کجھ آفتاں تے اچانک آ جاندیاں نیں جد کہ کجھ آفتاں دے آن توں بس تھوڑی دیر پہلاں ای ایہناں بارے پتہ چلدا اے۔ پر یہوواہ دی تنظیم فوراً ضرورت دِیاں چیزاں دا بندوبست کردی اے تے اوہناں نُوں آفت دے شکار بھین بھراواں تک فوراً پونچاندی اے۔ ایہہ سب کجھ تواڈے عطیات دی وجہ توں ای ہوندا اے۔ donate.pr418.com تے عطیات دین دے کجھ طریقیاں بارے دَسیا گیا اے۔ اَسی تواڈے کُھلے دل نال دِتے گئے عطیات دی دلوں قدر کرنے آں۔
ایہہ وی ویکھو
اوہ سوال جیہڑے لوک اکثر ساڈے بارے پچھدے نیں
یہوواہ دے گواہواں دی تنظیم دے خرچے کیویں پورے ہوندے نیں؟
یہوواہ دے گواہ چرچاں وانگوں چندا نئیں منگدے۔
