دُنیا چ کھان پین دِیاں چیزاں دی کمی بارے بائبل کیہہ دَسدی اے؟
سیاسی لیڈر انساناں دے اِک وڈے مسئلے یعنی کھان پین دِیاں چیزاں دی کمی نُوں حل کرن لئی بڑے منصوبے بناندے نیں۔ a پر کیہہ کدی اوہ وقت آئے گا جدوں کوئی وی بُھکھا نئیں رہوے گا؟ بائبل ایہدے بارے کیہہ دَسدی اے؟
بائبل چ پہلاں ای دَس دِتا گیا سی کہ کھان پین دِیاں چیزاں دی کمی ہوئے گی
بائبل چ پہلاں توں ای دَس دِتا گیا سی کہ ایس آخری زمانے چ کھان پین دِیاں چیزاں دی کمی ہوئے گی۔ (2-تیمُتھیُس 3:1) پر ایس مسئلے دا ذمےدار خدا نئیں اے سگوں اوہنے تے سانوں ایہدے بارے آگاہ کیتا اے۔ (یعقوب 1:13) ذرا بائبل دِیاں 2 پیشینگوئیاں تے غور کرو۔
”تھاں تھاں کال پین گے۔“ متی 24:7 چ پیشینگوئی کیتی گئی سی کہ دُنیا بھر چ کال پین گے۔ اَج بالکل اِنج ای ہور رہیا اے۔ غور کرو کہ خوراک دی پیداوار تے تقسیم دا مطالعیا کرن والیاں نے اپنی رپورٹ چ کیہہ دَسیا۔ اوہناں نے کہیا: ”کوششاں دے باوجود دُنیا خوراک دی کمی نُوں ختم کرن چ ناکام رہی اے۔ کجھ لوکاں نُوں یاں تے بوہت ای تھوڑا یاں فیر بالکل ای کھانا نئیں مِلدا۔“ b بوہت سارے مُلکاں چ کروڑاں لوکاں نُوں اوناں کھانا نئیں مِلدا جِنّاں زندہ رہن لئی ضروری اے۔ افسوس دی گل اے کہ ایس وجہ توں کئی لوک مر جاندے نیں۔
مَیں اِک کالا گھوڑا ویکھیا تے اوہدے سوار دے ہتھ چ اِک تکڑی سی۔ مکاشفہ 6:5 چ لکھی ایس پیشینگوئی چ گھوڑا تے اوہدا سوار آخری زمانے چ پین والے کال وَل اشارہ کردے نیں۔ c گُھڑسوار دے ہتھ چ تکڑی ایس گل وَل اشارہ کردی اے کہ ہر اِک نُوں ناپ تول کے یعنی تھوڑا کھانا ملے گا۔ نالے اوس گُھڑسوار دے نکلدیاں ای اِک آواز ایہہ اعلان کردی اے کہ کھان پین دِیاں چیزاں بوہت مہنگیاں ہو جان گیاں۔ نالے لوکاں نُوں خبردار کردی اے کہ اوہ کھان پین دِیاں چیزاں نُوں ضائع نہ کرن۔ (مکاشفہ 6:6) اَج پوری دُنیا چ خوراک دی کمی توں صاف نظر آندا اے کہ ایہہ پیشینگوئی پوری ہو رہی اے۔ ارباں لوک نیں جنہاں نُوں کھانا نئیں مِلدا یاں اوہ ایہنوں خرید ای نئیں سکدے۔
کھان پین دِیاں چیزاں دی کمی دا مسئلہ کیویں حل ہوئے گا
ماہر کہندے نیں کہ زمین تے اینی خوراک پیدا ہوندی اے کہ ایہدے تے رہن والے سارے جاندار رَج کے کھا سکدے نیں۔ پر فیر وی ساریاں نُوں پیٹ بھر کھانا کیوں نئیں مِلدا؟ تے بائبل کیہہ دَسدی اے کہ ساڈا خالق یہوواہ d ایس مسئلے نُوں کیویں حل کرے گا؟
مسئلہ: حکومتاں غریبی تے نااِنصافی نُوں ختم نئیں کر سکدیاں جدی وجہ توں کئی لوکاں نُوں بُھکھ سہنی پیندی اے۔
حل: خدا دُنیا دِیاں حکومتاں دی جگہ زمین تے اپنی بادشاہی قائم کرے گا۔ (دانیایل 2:44؛ متی 6:10) اَج بوہت سارے غریب لوکاں لئی کھانا خریدنا اوکھا اے۔ پر خدا دی بادشاہی چ کسے نُوں وی کھانے دی کمی نئیں ہوئے گی۔ بائبل چ خدا دی بادشاہی دے بادشاہ یسوع بارے دَسیا گیا اے: اوہ مدد لئی پکاردے ہوئے غریباں نُوں بچائے گا۔ نالے اوہناں نُوں وی جیہڑے محتاج تے بےسہارا نیں۔ زمین تے بےشمار اناج ہوئے گا۔ پہاڑاں دِیاں چوٹیاں اُتے اناج دی بھرمار ہوئے گی۔—زبور 72:12، 16۔
مسئلہ: جنگاں دی وجہ توں بڑی تباہی ہوندی اے تے مالی حالات وِگڑ جاندے نیں جدی وجہ توں لوکاں لئی خوراک حاصل کرنا مشکل ہو جاندا اے۔
حل: زبور 46:9 چ دَسیا گیا اے کہ یہوواہ پوری زمین تے لڑائیاں نُوں ختم کر دے گا۔ اوہ کمان نُوں توڑے گا تے نیزے دے ٹوٹے ٹوٹے کردے گا۔ اوہ فوجی رتھاں نُوں اَگ نال ساڑ دے گا۔ خدا نہ صرف جنگی ہتھیاراں نُوں تباہ کرے گا سگوں اوہناں لوکاں نُوں وی جیہڑے جنگ کردے نیں۔ خدا دی بادشاہی چ امن ہوئے گا تے ہر کوئی اسانی نال کھانا حاصل کر سکے گا۔ بائبل چ وعدہ کیتا گیا اے کہ نیک لوک ودھن پُھلن گے تے سارے پاسے امن ہوئے گا۔—زبور 72:7۔
مسئلہ: خراب موسم تے قدرتی آفتاں دی وجہ توں فصلاں تے مال ڈنگر نُوں بڑا نقصان ہوندا اے۔
حل: خدا قدرتی آفتاں تے وِگڑدے موسم نُوں ٹھیک کر دَوے گا جدی وجہ توں خوراک دی پیداوار وی ودھے گی۔ بائبل چ یہوواہ خدا بارے دَسیا گیا اے کہ اوہ نھیری نُوں روک دیندا اے تے سمندر دِیاں لہراں چپ ہو جاندیاں نیں۔ اوہ ریگستان نُوں تلا بنا دیندا اے تے سُکی زمین نُوں پانی دے چشمے بنا دیندا اے۔ اوہ بُھکھے لوکاں نُوں اوتھے وساندا اے۔ اوہ کھیتاں وچ بیہہ بوندے نیں تے انگوراں دے باغ لاندے نیں جنہاں توں ڈھیر سارا پھل پیدا ہوندا اے۔—زبور 107:29، 35-37۔
مسئلہ: لالچی تے خودغرض لوک اپنے فائدے لئی لوکاں تک خوراک پونچن نئیں دیندے یاں فیر ایہدے چ ملاوٹ کردے نیں۔
حل: خدا دی بادشاہی سارے بےایمان تے بھیڑے لوکاں نُوں ختم کر دَوے گی۔ (زبور 37:10، 11؛ یسعیاہ 61:8) بائبل چ دَسیا گیا اے کہ یہوواہ خدا اوہناں لوکاں نال اِنصاف کردا اے جنہاں نال دھوکھا ہوندا اے۔ اوہ بُھکھیاں نُوں روٹی دیندا اے۔— زبور 146:7۔
مسئلہ: ہر سال دُنیا بھر چ پیدا ہون والی خوراک دا تیجا حصہ ضائع ہو جاندا اے۔
حل: خدا دی بادشاہی چ کھان پین دِیاں چیزاں صحی طریقے نال وَنڈیاں جان گیاں۔ جدوں یسوع مسیح زمین تے سی تے اوہنے کھانے نُوں ضائع نئیں کیتا۔ مثال لئی، اِک وار یسوع نے معجزہ کر کے 5000 لوکاں نُوں کھانا کھوایا۔ بعد چ اوہنے اپنے شاگرداں نُوں کہیا: ”سارے بچے ہوئے ٹکڑے جمع کر لوو تاکہ کجھ ضائع نہ ہووے۔“—یوحنا 6:5-13۔
خدا دی بادشاہی ایہناں مسئلیاں دی جڑ نُوں ای ختم کر دَوے گی۔ ایس لئی اوہدوں سارے انسان رَج کے ودھیا توں ودھیا کھانا کھان گے۔ (یسعیاہ 25:6) ایہہ جانن لئی کہ خدا دی بادشاہی ایہہ کدوں کرے گی، اُردو زبان چ ایس مضمون نُوں ویکھو: ”خدا کی بادشاہت زمین پر کب حکمرانی کرے گی؟“
a 2015 چ اقوامِمتحدہ دے ممبراں نے ارادہ کیتا کہ اوہ 2030 تک فرق فرق مسئلیاں نُوں حل کرن گے جنہاں وچوں اِک خوراک دی کمی دا مسئلہ اے۔
b ایہہ رپورٹ ایہناں تنظیماں نے مِل کے تیار کیتی: فوڈ اینڈ ایگریکلچر آرگنائزیشن آف دی یونائٹڈ نیشنز، دی اِنٹرنیشنل فنڈز فار ایگریکلچرل ڈیویلپمنٹ، دی یونائٹڈ نیشنز چلڈرنز فنڈ، دی یونائٹڈ نیشنز ورلڈ فوڈ پروگرام تے دی ورلڈ ہیلتھ آرگنائزیشن۔
c مکاشفہ دی کتاب چ دَسے گئے چار گُھڑسواراں بارے ہور جانن لئی، اُردو زبان چ ایہہ مضمون ویکھو: ”چار گُھڑسوار آخر کون ہیں؟“
d خدا دا ناں یہوواہ اے۔ (زبور 83:18) ایہہ مضمون ویکھو: ”یہوواہ کون اے؟“
ایہہ وی ویکھو
پاک کلام چوں سوال جواب
آخری زمانے یاں آخری وقت دی نشانی کیہہ اے؟
بائبل چ دَسیا گیا اے کہ آخری زمانے چ کیہہ کجھ ہوئے گا۔ نالے ایہہ وی دَسیا گیا اے کہ ایہہ سب کجھ اِکو ای وقت چ ہوئے گا جدے توں پتہ چلے گا کہ اَسی آخری زمانے چ رہ رہے آں۔
اہم تلیم
خدا دی بادشاہی کیہہ اے؟
جدوں یسوع مسیح زمین تے سن تے اوہ لوکاں نُوں سب توں زیادہ خدا دی بادشاہی دے بارے سکھاؤندے سن۔ کئی صدیاں توں لوک دعا کر رہے نیں کہ ایہہ بادشاہی آوے۔
