24 فروری 2022 نُوں سویرے سویرے روس دی فوج نے یوکرین تے حملہ کر دِتا۔ بھانویں کہ دُنیا دے سیاسی لیڈراں نے ایس جنگ نُوں روکن دی بڑی کوشش کیتی۔ ایس جنگ دا پوری دُنیا تے کیہہ اثر پے سکدا اے؟ اقوامِ‌متحدہ دے سیکریٹری جنرل انتونیوں گویئتیرش نے کجھ دن پہلے کہیا:‏ ”‏اَسی سوچ وی نئیں سکنے آں کہ ایس جنگ توں کِنّاں جانی تے مالی نقصان ہوئے گا تے یورپ تے پوری دُنیا دے امن تے سلامتی تے کِنّاں بُرا اثر پووے گا۔“‏

•   یسوع مسیح نے پہلاں ای دَس دِتا سی کہ اِک وقت آئے گا جدوں قوماں اِک دُوجے تے چڑھائی کرن گیاں تے حکومتاں اِک دُوجے دے خلاف اُٹھن گیاں۔ (‏متی 24:‏7‏)‏ ایہہ جانن لئی کہ بائبل توں کیویں پتہ چلدا اے کہ جنگاں بارے یسوع دی پیشین‌گوئی اَج پوری ہو رہی اے ایہہ مضمون پڑھو:‏ ”‏آخری زمانے یاں آخری وقت دی کیہہ نشانی اے؟‏‏“‏

•   بائبل چ مکاشفہ دی کتاب چ جنگ نُوں اِک گھوڑسوار نال تشبیہ دِتی گئی اے۔ جیہڑا لال سُرخ رنگ دے گھوڑے تے بیٹھا اے تے زمین توں امن چُک لیندا اے۔ (‏مکاشفہ 6:‏4‏)‏ ایہہ جانن لئی کہ ایہہ پیشین‌گوئی ساڈے زمانے چ ہون والیاں جنگاں بارے کیویں پوری ہو رہی اے، اُردو زبان چ ایہہ مضمون پڑھو:‏ ”‏چار گھوڑسوار آخر کون ہیں؟‏‏“‏

•   دانی‌ایل دی کتاب چ شاہِ‌شمال تے شاہِ‌جنوب چ دُشمنی بارے پیشین‌گوئی کیتی گئی اے۔ ایہہ جانن لئی کہ اَسی ایہہ کیوں کہہ سکنے آں کہ روس تے اوہدے ساتھی ملک شاہِ‌شمال دا کردار ادا کر رہے نیں ایہہ ویڈیو ویکھو:‏ ”‏دانی‌ایل 11 باب دی پیشین‌گوئی پوری ہو گئی‏۔“‏ a

•   مکاشفہ دی کتاب چ خدا دے عظیم دن دی جنگ بارے وی دَسیا گیا اے۔ (‏مکاشفہ 16:‏14،‏ 16‏)‏ پر ایہہ جنگ قوماں وچ نئیں ہوئے گی جیویں اَج جنگاں ہوندیاں نیں۔ مستقبل چ ہون والی ایس جنگ بارے ہور جانن لئی ایہہ مضمون پڑھو:‏ ”‏ہرمجِدّون کیہہ اے؟‏‏“‏

•   پاک کلام چ دَسیا گیا اے کہ خدا زمین توں جنگاں ختم کر دَوے گا۔ (‏زبور 46:‏9‏)‏ ایہہ جانن لئی کہ خدا نے شان‌دار مستقبل بارے کیہڑے وعدے کیتے نیں ایہہ مضمون پڑھو:‏ ”‏خدا دی بادشاہی کیہہ کجھ کرے گی؟‏‏“‏

•   یسوع مسیح نے اپنے پیروکاراں نُوں سکھایا کہ اوہ دُعا کرن کہ خدا دی بادشاہی آئے۔ (‏متی 6:‏9، 10‏)‏ خدا دی بادشاہی اِک حکومت اے جیہڑی اسمان توں زمین تے حکمرانی کرے گی۔ ایہہ بادشاہی زمین تے خدا دی مرضی پوری کرے گی۔ خدا چاہندا اے کہ زمین تے امن ہووے۔ ایہہ جانن لئی کہ خدا دی بادشاہی وَلّوں برکتاں پان لئی توانوں کیہہ کرنا چاہی دا اے ایہہ ویڈیو ویکھو:‏ ”‏خدا دی بادشاہی کیہہ اے؟‏‏“‏

 یوکرین چ 1 لکھ 29 ہزار توں زیادہ یہوواہ دے گواہ نیں۔ دُوجے مُلکاں چ رہن والے یہوواہ دے گواہواں وانگوں یوکرین چ رہن والے گواہ وی سیاسی معاملیاں چ کسے دی طرف‌داری نئیں کردے تے جنگاں چ وی حصہ نئیں لیندے‏۔ (‏یوحنا 18:‏36‏)‏ پوری دُنیا چ یہوواہ دے گواہ سارے لوکاں نُوں ایہہ خوش‌خبری سنا رہے نیں کہ صرف خدا دی بادشاہی انساناں دے ہر مسئلے نُوں حل کر سکدی اے ایتھوں تک کہ جنگاں نُوں وی ختم کر سکدی اے۔ (‏متی 24:‏14‏)‏ ساڈی دلی خواہش اے کہ تُسی بائبل چ پائے جان والے اُمید دے پیغام بارے ہور جانن لئی ساڈے نال رابطہ کرو۔‏