‏”‏اَجکل بوہت سارے نوجوان ذہنی صحت دے مسئلیاں دا شکار ہوندے جا رہے نیں تے ایہدی اِک اہم وجہ سوشل میڈیا اے۔“‏—‏ڈاکٹر ویویک مُرتھی، جنرل سرجن، امریکہ، نیو یارک ٹائمز،‏ 17 جون 2024۔‏

 ماں‌پیو اپنے بچیاں نُوں سوشل میڈیا دے خطریاں توں کیویں بچا سکدے نیں؟ اوہ بائبل چ دِتے گئے کجھ مشوریاں تے عمل کر سکدے نیں۔‏

 بائبل دے ایہناں اصولاں تے غور کرو:‏

 اِک سمجھدار بندہ ہر قدم سوچ سمجھ کے چُکدا اے۔—‏اَمثال 14:‏15‏۔‏

 جے توانوں لگدا اے کہ سوشل میڈیا توں تواڈے بچے نُوں نقصان ہو رہیا اے تے اوہنوں سوشل میڈیا استمال ای نہ کرن دَوو۔ اوہنوں سوشل میڈیا استمال کرن دی اجازت دین توں پہلاں کجھ گلاں سمجھاؤ جیویں کہ اوہدے لئی ایہنوں استمال کرن دا اِک وقت مقرر کیتا جائے گا، اوہنوں احتیاط کرنی پئے گی کہ اوہ کِتے بھیڑے لوکاں دی سنگت چ نہ پے جائے تے غیرمناسب ویڈیوز تے فلماں وغیرہ توں بچے۔‏

•   ‏”‏اپنے وقت نُوں سمجھداری نال استمال کرو۔“‏—‏اِفسیوں 5:‏16‏۔‏

 جے تُسی اپنے بچے نُوں سوشل میڈیا استمال کرن دی اجازت دَوو گے تے فیر ایہدے استمال تے کجھ پابندیاں لاؤ تے اپنے بچے نُوں سمجھاؤ کہ ایہہ اصل چ اوہنوں نقصان توں بچان لئی نیں۔ ایس گل تے وی نظر رکھو کہ سوشل میڈیا استمال کرن دی وجہ توں تواڈے بچے دے رویے چ کیہڑیاں تبدیلیاں آ رہیاں نیں۔ ایہدے توں توانوں اندازہ ہوئے گا کہ تُسی ہُن ایہدے استمال نُوں کیویں کنٹرول کرنا اے۔‏

•   سوشل میڈیا دے استمال دی حد مقرر کرن دی اہمیت بارے جانن لئی ایہہ ویڈیو ویکھو:‏ ‏”‏انٹرنیٹ دے خطریاں توں خبردار رہوو‏“‏

 بائبل چ دَسیا گیا اے کہ اَسی آخری زمانے چ رہ رہے آں جدے چ سانوں مشکلاں دا سامنا کرنا پئے گا۔ (‏2-‏تیمُتھیُس 3:‏1-‏5‏)‏ پر ایہدے چ ایہو جہے ودھیا مشورے وی دِتے گئے نیں جنہاں تے عمل کرن نال اَسی مشکلاں تے مسئلیاں توں بچ سکنے آں۔ ایس بارے جانن لئی اُردو زبان چ مضمون ‏”‏نوجوانوں میں بڑھتے ہوئے ذہنی مسائل‏“‏ نُوں ویکھو۔ ایہدے چ دِتی معلومات توں ماں پیو تے بچے دونویں فائدہ حاصل کر سکدے نیں۔‏