عالمی بینک دے صدر نے جون 2022 دی اپنی رپورٹ چ دَسیا کہ ”‏دُنیا چ مہنگائی فیر ودھ رہی اے۔ پر ایس واری نہ صرف چیزاں دِیاں قیمتاں تیزی نال ودھ رہیاں نیں سگوں لوکاں کول پیسے وی نئیں نیں۔“‏

 عالمی مالیاتی فنڈ (‎IMF‎) نے دَسیا کہ ”‏پٹرول تے کھان پین دِیاں شیواں دِیاں قیمتاں تیزی نال ودھ گئیاں نیں جدا سب توں زیادہ اثر غریب مُلکاں تے ہویا اے۔“‏

 بائبل ایہہ سمجھن چ ساڈی مدد کردی اے کہ اَج سانوں اینی مہنگائی دا سامنا کیوں کرنا پے رہیا اے، اَسی ایہدے نال نبڑن لئی کیہہ کر سکنے آں تے کیہہ ایس مسئلے دے حل ہون دی کوئی امید ہے۔‏

•   اَج اَسی جیہڑے دَور چ رہ رہے آں، بائبل چ اوہنوں آخری زمانہ کہیا گیا اے۔—‏2-‏تیمُتھیُس 3:‏1‏۔‏

•   یسوع مسیح نے دَسیا سی کہ آخری زمانے چ خوف‌ناک نظارے یعنی خوف‌ناک واقعے ہون گے۔ (‏لُوقا 21:‏11‏)‏ واقعی اَج ودھدی ہوئی مہنگائی نُوں ویکھ کے لوک خوف‌زدہ نیں۔ اوہناں نُوں اپنے مستقبل دی فکر ستاندی رہندی اے تے اوہ ایہہ سوچ سوچ کے پریشان ہوندے رہندے نیں کہ اوہ اپنے گھر والیاں دِیاں ضرورتاں نُوں کیویں پورا کرن گے۔‏

•   مکاشفہ دی کتاب چ پیشین‌گوئی کیتی گئی سی کہ ساڈے زمانے چ کھان پین دِیاں شیواں دِیاں قیمتاں بوہت زیادہ ہون گیاں۔ ایہدے چ ایہہ دَسیا گیا اے:‏ میں اِک آواز جہی ایہہ کہندے سنی:‏ ”‏اِک کلو کنک اِک دینار دی تے تِن کلو جو اِک دینار دی“‏ ہوئے گی یعنی کہ اوہدی قیمت اِک مزدور دی اِک دن دی دیہاڑی جِنّی ہوئے گی۔—‏مکاشفہ 6:‏6‏۔‏

 آخری زمانے تے مکاشفہ دی کتاب چ دَسیاں گئیاں پیشین‌گوئیاں بارے ہور جانن لئی ویڈیو ‏”‏1914 توں دُنیا بالکل بدل گئی اے‏“‏ نُوں ویکھو تے اُردو زبان چ ایس مضمون نُوں پڑھو:‏ ”‏چار گُھڑسوار آخر کون ہیں؟‏‏“‏

•   اوہ گھر بنان گے تے اوہناں چ وَسن گے۔ اوہ انگوراں دے باغ لان گے تے اوہناں دا پھل کھان گے۔ ایہہ نئیں ہوئے گا کہ اوہ بناؤن تے دُوجا وَسے۔ اوہ لاؤن تے دُوجا کھائے۔—‏یسعیاہ 65:‏21، 22‏۔‏

•   زمین تے بے‌حساب اناج ہوئے گا۔ پہاڑاں دِیاں چوٹیاں تے اناج دی بھرمار ہوئے گی۔—‏زبور 72:‏16‏۔‏

•   ”‏دُکھی لوکاں نُوں ستایا جاندا اے تے غریب ہونکے بھردے نیں۔ ایس لئی میں کاروائی کرن لئی اُٹھاں گا،“‏ یہوواہ کہندا اے۔—‏زبور 12:‏5‏۔‏ a

 بوہت چھیتی خدا مہنگائی نُوں نہ صرف کسے اِک ملک چوں سگوں پوری دُنیا چوں ختم کر دے گا۔ ایہہ جانن لئی کہ خدا اِنج کیویں کرے گا، اُردو زبان چ ایس مضمون نُوں پڑھو:‏ ”‏کیا دُنیا سے غربت ختم ہوسکتی ہے؟‏‏“‏

 بائبل اَج کل وی مہنگائی نال نبڑن چ ساڈی مدد کردی اے۔ پر کیویں؟ ایہدے چ ایہو جہے اصول نیں جیہڑے پیسے نوں سمجھ‌داری نال استمال کرن چ ساڈی مدد کردے نیں۔ (‏امثال 23:‏4، 5؛‏ واعظ 7:‏12‏)‏ ایس موضوع بارے ہور جانن لئی مضمون ”‏کیہہ قرضے تے پیسے دھیلے دی تنگی دا سامنا کرن لئی پاک کلام میری مدد کر سکدا اے؟‏‏“‏ نُوں پڑھو۔‏