19 مئی 2022 نُوں اقوامِ‌متحدہ دی سلامتی کونسل نُوں ایہدے 75 توں زیادہ وڈے افسراں نے ایہہ خبر دِتی کہ ”‏کورونا دی وبا تے زمین دے ماحول چ آن والی تبدیلی دی وجہ توں پوری دُنیا چ خوراک دی جیہڑی کمی شروع ہوئی سی، اوہ یوکرین چ ہون والی جنگ دی وجہ توں کال چ بدل رہی اے۔“‏ ایہدے تھوڑے چِر بعد ای ماہرین نے ایہہ اعلان کیتا کہ ”‏ایس دُنیا چ پہلے ای اینے زیادہ مسئلے نیں تے اُتوں ایس جنگ دی وجہ توں ہور زیادہ لوکاں دے بُھکھے مرن دا خطرہ وی ودھدا جا رہیا اے۔“‏ بائبل چ ایہہ پیشین‌گوئی کیتی گئی سی کہ ساڈے زمانے چ خوراک دی کمی ہوئے گی۔ پر ایہدے چ ایہہ وی دَسیا گیا اے کہ اَسی ایس مسئلے نال کیویں نبڑ سکنے آں۔‏

•    یسوع نے پیشین‌گوئی کیتی سی کہ آخری زمانے چ قوماں اِک دُوجے تے چڑھائی کرن گیاں تے حکومتاں اِک دُوجے دے خلاف اُٹھ کھلون گیاں تے تھاں تھاں کال پین گے۔‏‏—‏متی 24:‏7‏۔‏

•    مکاشفہ دی کتاب چ چار گھوڑیاں تے اوہناں دے سواراں دا ذکر ہویا اے۔ اوہناں وچوں اِک گھوڑا جنگاں وَل اشارہ کردا اے۔ اوہدے بعد آن والا گھوڑا کال وَل اشارہ کردا اے یعنی اِک ایہو جہے دَور وَل جدے چ کھان پین دِیاں شیواں اسانی نال نئیں مِلن گیاں تے ایہناں دِیاں قیمتاں وی بوہت زیادہ ودھ جان گیاں۔ ایس گھوڑے بارے مکاشفہ دی کتاب چ لکھیا اے:‏ میں اِک کالا گھوڑا ویکھیا تے اوہدے سوار دے ہتھ چ اِک تکڑی سی۔ میں چاراں جانداراں دے وچکاروں اِک آواز جہی ایہہ کہندے سنی:‏”‏ اِک کلو کنک اِک دینار دی تے تِن کلو جَو اِک دینار دی تے زیتون دے تیل تے مے نُوں ضائع نہ کرِیں۔“‏—‏مکاشفہ 6:‏5، 6‏۔‏

 خوراک دی کمی بارے ایہہ پیشین‌گوئیاں اَج ساڈے زمانے چ پوریاں ہو رہیاں نیں جنہوں بائبل چ آخری زمانہ کہیا گیا اے۔ (‏2-‏تیمُتھیُس 3:‏1‏)‏ آخری زمانے بارے تے مکاشفہ چ دَسے گئے چار گھوڑیاں تے اوہناں دے سواراں بارے ہور جانن لئی ویڈیو ‏”‏1914 توں دُنیا بالکل بدل گئی اے‏“‏ نُوں ویکھو تے اُردو زبان چ ایس مضمون نُوں پڑھو:‏ ”‏چار گُھڑسوار آخر کون ہیں؟‏‏“‏

•    بائبل چ ایہو جہے اصول دِتے گئے نیں جنہاں دی مدد نال اَسی ماڑے حالات، مہنگائی ایتھوں تک کہ خوراک دی کمی نال وی نبڑ سکنے آں۔ ایہناں وچوں کجھ اصولاں بارے جانن لئی ایس مضمون نُوں پڑھو:‏ ”‏کیہہ قرضے تے پیسے دھیلے دی تنگی دا سامنا کرن لئی پاک کلام میری مدد کر سکدا اے؟‏‏“‏

•    بائبل سانوں ایہہ امید وی دیندی اے کہ حالات بہتر ہو جان گے۔ ایہہ وعدہ کردی اے کہ اِک ایہو جیہا وقت آئے گا جدوں زمین تے بے‌حساب اناج ہوئے گا تے ہر بندہ رَج کے کھائے گا۔ (‏زبور 72:‏16‏)‏ جے تُسی جاننا چاہندے او کہ بائبل چ مستقبل بارے کیہڑے وعدے کیتے گئے نیں تے توانوں ایہناں تے بھروسا کیوں رکھنا چاہی دا اے تے اُردو زبان چ ایس مضمون نُوں پڑھو:‏ ”‏نئی دُنیا قریب ہے!‏‏“‏