1، 2.‏ نوِیں دُنیا دا اِنتظار کر‌ن دے نال نال سانوں ہور کیہہ کر‌نا چاہی دا اے؟‏

 اَسی یہوواہ دے ایس وعدے لئی بڑے شکرگزار آں کہ چھیتی اوہ ایس بھیڑی دُنیا نُوں اِک نوِیں دُنیا چ بدل دے گا جتھے صرف نیکی ہوئے گی۔ (‏2-‏پطرس 3:‏13‏)‏ ایہہ سچ اے کہ اَسی نئیں جان‌دے کہ نوِیں دُنیا کدوں آئے گی۔ پر ساڈے آلے دوالے جو کجھ وی ہو رہیا اے، اوہدے توں صاف پتہ چلدا اے کہ ایہہ بوہت چھیتی آن والی اے۔—‏متی 24:‏32-‏34،‏ 36؛‏ اعمال 1:‏7‏۔‏

² بھانویں سانوں یہوواہ دا گواہ بنے کِنّے ای سال کیوں نہ ہو گئے ہون، فیر وی سانوں نوِیں دُنیا دا اِنتظار کر‌ن دے نال نال ایہدے آن دے وعدے تے اپنے ایمان نُوں مضبوط کر‌دے رہنا چاہی دا اے۔ پر کیوں؟کیونکہ مضبوط ایمان وی کمزور پے سکدا اے۔ ایس بارے پولُس رسول نے کہیا کہ کمزور ایمان اوس گُناہ وانگوں اے جیہڑا سانوں آسانی نال پھسا لیندا اے۔ (‏عبرانیوں 12:‏1‏)‏ جے اَسی چاہنے آں کہ ساڈا ایمان کمزور نہ ہووے تے سانوں باقاعدگی نال ایہو جہے ثبوتاں تے غور کر‌نا چاہی دا اے جنہاں توں ثابت ہوندا اے کہ نوِیں دُنیا صرف اِک خواب نئیں اے۔—‏عبرانیوں 11:‏1‏۔‏

3.‏ ایس مضمون چ اَسی کیہڑیاں گلاں تے غور کر‌اں گے؟‏

³ ایس مضمون چ اَسی تِن ایہو جہے طریقیاں بارے گل کر‌اں گے جنہاں دے ذریعے اَسی نوِیں دُنیا بارے یہوواہ دے وعدے تے اپنے ایمان نُوں مضبوط کر سکنے آں۔ اوہ تِن طریقے ایہہ نیں:‏ (‏1)‏ فدیے بارے سوچ‌وچار کر‌نا، (‏2)‏ یہوواہ دی طاقت بارے سوچ‌وچار کر‌نا تے (‏3)‏ اوہناں کماں چ مصروف رہنا جنہاں دے ذریعے اَسی یہوواہ دے ہور نیڑے ہو جانے آں۔ ایہدے بعد اَسی ایس بارے وی گل کر‌اں گے کہ یہوواہ نے جیہڑا پیغام حبقوق نبی نُوں دِتا سی، اوہدے توں اَج ساڈا ایمان کیویں مضبوط ہوندا اے۔  پر آؤ، سب توں پہلاں کجھ ایہو جہے حالاتاں تے غور کر‌یئے جنہاں دا اَج سانوں سامنا ہوندا اے تے ویکھئے کہ اوہناں حالاتاں چ نوِیں دُنیا بارے یہوواہ دے وعدے تے مضبوط ایمان رکھنا ضروری کیوں اے۔‏

اوہ حالات جنہاں چ مضبوط ایمان دی ضرورت اے

4.‏ کیہڑے فیصلے لیندے ویلے مضبوط ایمان دا ہونا ضروری اے؟‏

⁴ ہر روز اَسی کئی ایہو جہے فیصلے کر‌نے آں جنہاں لئی مضبوط ایمان دا ہونا ضروری اے۔ مثال لئی سانوں دوستاں، بچیاں، تفریح، تلیم، شادی تے نوکر‌ی بارے کئی اہم فیصلے کر‌نے ہوندے نیں۔ایس لئی فیصلہ کر‌دے ویلے سانوں اپنے آپ کولوں پچھنا چاہی دا اے کہ ”‏کیہہ میرے فیصلیاں توں ثابت ہوندا اے کہ مینوں یقین اے کہ ایہہ دُنیا چھیتی ختم ہون والی اے تے ایہدی جگہ خدا دی نوِیں دُنیا قائم ہوئے گی؟“‏ یاں ”‏کیہہ میرے فیصلے ایہو جہے لوکاں ورگے ہوندے نیں جیہڑے نئیں من دے کہ اَسی ہمیشاں تک زندہ رہ سکنے آں؟“‏ (‏متی 6:‏19، 20؛‏ لُوقا 12:‏16-‏21‏)‏ جے اَسی ایس گل تے اپنے ایمان نُوں مضبوط کر‌اں گے کہ نوِیں دُنیا چھیتی آن والی اے تے اَسی چنگے فیصلے کر‌اں گے۔‏

5، 6.‏ سانوں مشکل ویلے چ مضبوط ایمان دی ضرورت کیوں ہوندی اے؟ مثال دَوو۔‏

⁵ سانوں کجھ ایہو جہیاں مشکلاں دا وی سامنا کر‌نا پے سکدا اے جنہاں چ سانوں مضبوط ایمان دی ضرورت ہوندی اے۔ ہو سکدا اے کہ اَسی ظلم دا سامنا کر رہے آں، کافی لمے عرصے توں بیمار آں یاں کسے وجہ توں بےحوصلہ ہو گئے آں۔ شاید سانوں لگے کہ اَسی اپنی مشکل نال نبڑ لوَاں گے پر جے مشکلاں چھیتی ختم نئیں ہوندیاں تے سانوں اپنے ایمان نُوں مضبوط کر‌ن دی لوڑ اے تاکہ اَسی ایہناں نُوں برداشت کر سکئے تے خوشی نال یہوواہ دی خدمت کر‌دے رہیے۔—‏رومیوں 12:‏12؛‏ 1-‏پطرس 1:‏6، 7‏۔‏

⁶ جدوں اَسی کسے مشکل چوں لنگھ رہے ہُنے آں تے شاید سانوں لگے کہ نوِیں دُنیا کدی نئیں آئے گی۔ کیہہ ایہدا مطلب ایہہ وے کہ ساڈا ایمان کمزور اے؟ جی نئیں۔ ذرا اِک مثال تے غور کر‌و۔ جدوں بوہت زیادہ گرمی پیندی اے تے شاید سانوں لگے کہ سردیاں کدی نئیں آن گیاں۔ پر اوہ فیر وی آندیاں نیں۔ ایسے طرحاں جدوں اَسی بےحوصلہ ہونے آں تے شاید سانوں لگے کہ نوِیں دُنیا کدی نئیں آئے گی۔ پر جے ساڈا ایمان مضبوط ہوئے گا تے سانوں پورا یقین ہوئے گا کہ یہوواہ دے وعدے ضرور پورے ہون گے۔ (‏زبور 94:‏3،‏ 14، 15؛‏ عبرانیوں 6:‏17-‏19‏)‏ ایسے یقین دی وجہ توں اَسی اپنی زندگی چ یہوواہ دی عبادت نُوں سب توں زیادہ اہمیت دیندے رہواں گے۔‏

7.‏ سانوں کیہو جہی سوچ توں بچنا چاہی دا اے؟‏

⁷ مُنادی کر‌ن لئی وی سانوں مضبوط ایمان دی ضرورت ہوندی اے۔ جنہاں لوکاں نُوں اَسی خدا دی نوِیں دُنیا بارے ”‏خوش‌خبری“‏ سنانے آں، شاید اوہ سوچن کہ ایہہ تے بس اِک خیالی دُنیا اے۔ (‏متی 24:‏14؛‏ حِزقی‌ایل 33:‏32‏)‏ اَسی نئیں چاہندے کہ اوہناں دی سوچ دا ساڈے تے وی اثر پووے تے اَسی اوہناں گلاں تے شک کر‌ن لگ پئیے جیہڑیاں یہوواہ سانوں سکھاندا اے۔ جے اَسی چاہنے آں کہ اِنج نہ ہووے تے سانوں اپنے ایمان نُوں مضبوط کر‌دے رہنا چاہی دا اے۔ آؤ ویکھئے کہ اَسی کیہڑے تِن طریقیاں نال اِنج کر سکنے آں۔‏

فدیے تے سوچ وچار کر‌و

8، 9.‏ فدیے تے سوچ وچار کر‌ن نال ساڈا ایمان کیویں مضبوط ہو سکدا اے؟‏

⁸ اپنے ایمان نُوں مضبوط کر‌ن دا پہلا طریقہ ایہہ وے کہ اَسی فدیے تے سوچ وچار کر‌یئے۔ فدیہ ایس گل دی ضمانت اے کہ خدا دے وعدے ضرور پورے ہون گے۔ جدوں اَسی ایس بارے سوچ وچار کر‌نے آں کہ یہوواہ نے فدیے دا بندوبست کر‌ن لئی کیہہ کجھ کیتا اے تے ایس گل تے ساڈا ایمان مضبوط ہوندا اے کہ نوِیں دُنیا بارے یہوواہ دا وعدہ ضرور پورا ہوئے گا۔ اَسی ایہہ کیوں کہہ سکنے آں؟‏

⁹ فدیے دا بندوبست کر‌ن لئی یہوواہ نے کیہہ کجھ کیتا اے؟ یہوواہ نے اپنے پیارے پُتر تے قریبی ساتھی نُوں اسمان توں گھلیا تاکہ اوہ اِک بےعیب انسان دے طور تے زمین تے پیدا ہوئے۔ یسوع جدوں زمین تے سی تے اوہنے ہر طرحاں دِیاں مشکلاں تے تکلیفاں برداشت کیتیاں نالے اوہنوں دردناک موت وی دِتی گئی۔ سوچو یہوواہ نے ساڈے لئی کِنّی وڈی قیمت دِتی اے۔ جے ساڈا پیار کر‌ن والا خدا سانوں بس تھوڑی دیر لئی خوشیاں بھری زندگی دینا چاہندا تے اوہ کدی وی اپنے پُتر نُوں اینیاں تکلیفاں سہہ کے مرن نہ دیندا۔ (‏یوحنا 3:‏16؛‏ 1-‏پطرس 1:‏18، 19‏)‏ اوہنے اینی وڈی قیمت ایس  لئی دِتی اے کیونکہ اوہ سانوں نوِیں دُنیا چ ہمیشاں دی زندگی دینا چاہندا اے جیہڑی اِک خواب نئیں سگوں حقیقت اے۔‏

یہوواہ دی طاقت تے سوچ وچار کر‌و

10.‏ اِفسیوں 3:‏20 دے مطابق یہوواہ کیہہ کر سکدا اے؟‏

¹⁰ اپنے ایمان نُوں مضبوط کر‌ن دا دُوجا طریقہ ایہہ وے کہ اَسی یہوواہ دی طاقت تے سوچ وچار کر‌یئے۔ یہوواہ کول اپنے ہر وعدے نُوں پورا کر‌ن دی طاقت اے۔ ایہہ سچ اے کہ بوہت سارے لوکاں نُوں لگدا اے کہ نوِیں دُنیا چ ہمیشاں دی زندگی دا وعدہ پورا ہونا ناممکن اے۔ پر یہوواہ نے وار وار ایہو جہے وعدے کیتے نیں جیہڑے انساناں نُوں ناممکن لگدے نیں۔ یہوواہ اپنے وعدیاں نُوں پورا کر سکدا اے کیونکہ اوہدی قدرت تے طاقت دی کوئی حد نئیں۔ (‏ایوب 42:‏2؛‏ مرقس 10:‏27‏)‏ ایس لئی جدوں اوہ زبردست چیزاں بارے وعدے کر‌دا اے تے اَسی حیران نئیں ہوندے۔‏‏—‏اِفسیوں 3:‏20 نُوں پڑھو۔‏

11.‏ خدا دے زبردست وعدیاں وچوں کسے اِک بارے دَسو۔ (‏بکس ‏”‏ حیران کر دین والے کجھ وعدے جیہڑے پورے ہوئے‏“‏ نُوں ویکھو۔)‏

¹¹ ذرا یہوواہ دے اوہناں وعدیاں تے غور کر‌و جیہڑے اوہنے پرانے زمانے دے اپنے بندیاں نال کیتے تے جنہاں دا پورا ہونا لوکاں نُوں ناممکن لگ رہیا سی۔ یہوواہ نے ابراہام تے سارہ نُوں یقین دَوایا کہ اوہناں دا پُتر پیدا ہوئے گا، بھانویں کہ اوہ دونویں بُڈھے ہو گئے سن۔ (‏پیدایش 17:‏15-‏17‏)‏ اوہنے ابراہام نُوں ایہہ وی کہیا کہ اوہ اوہدی اولاد نُوں ملک کنعان وراثت چ دَوے گا۔ پر ابراہام دی نسل یعنی اِسرائیلیاں نُوں کئی سالاں تک مصر چ غلامی کر‌نی پئی جدی وجہ توں لوکاں نُوں لگ رہیا سی کہ خدا دا وعدہ پورا نئیں ہوئے گا۔ پر ایہہ وعدہ پورا ہویا۔ بعد چوں یہوواہ نے الیشبع نُوں اوہدے بڑھاپے چ دَسیا کہ اوہدا اِک پُتر پیدا ہوئے گا۔ یہوواہ نے کنواری مریم نُوں وی دَسیا کہ اوہدا اِک پُتر پیدا ہوئے گا جنہوں خدا دا پُتر کہیا جائے گا۔ اِنج خدا دا اوہ وعدہ وی پورا ہو جانا سی جیہڑا اوہنے ہزاراں سال پہلاں عدن دے باغ وچ کیتا سی۔—‏پیدایش 3:‏15‏۔‏

12.‏ یشوع 23:‏14 تے یسعیاہ 55:‏10، 11 چ سانوں یہوواہ دی طاقت بارے کیس گل دا یقین دَوایا گیا اے؟‏

¹² جدوں اَسی یہوواہ دے وعدیاں بارے سوچنے آں تے ایس گل تے وی غور کر‌نے آں کہ اوہنے اپنے وعدیاں نُوں کیویں پورا کیتا تے اَسی سمجھ جانے آں کہ اوہدے چ بوہت طاقت اے۔ اِنج نوِیں دُنیا بارے یہوواہ دے وعدے تے ساڈا ایمان ہور مضبوط ہو جاندا اے۔ ‏(‏یشوع 23:‏14؛‏ یسعیاہ 55:‏10، 11 نُوں پڑھو۔)‏ اِنج اَسی دُوجیاں دی وی ایہہ سمجھن چ مدد کر سکنے آں کہ نوِیں دُنیا بارے یہوواہ دا وعدہ کوئی خواب نئیں اے۔ نویں اسمان تے نوِیں زمین بارے یہوواہ نے آپ ایہہ کہیا اے کہ ایہہ گلاں بھروسےمند تے سچیاں نیں۔—‏مکاشفہ 21:‏1،‏ 5‏۔‏

اوہ کم جیہڑے یہوواہ دے نیڑے رہن چ ساڈی مدد کر‌دے نیں

13.‏ عبادتاں تے جان نال ساڈا ایمان کیویں مضبوط ہوندا اے؟ وضاحت کر‌و۔‏

¹³ اپنے ایمان نُوں مضبوط کر‌ن دا تیجا طریقہ ایہہ وے کہ اَسی ایہو جہے کماں چ مصروف رہیے جیہڑے یہوواہ دے نیڑے رہن چ ساڈی مدد کر‌دے نیں۔ مثال لئی، ذرا ایس گل تے غور کر‌و کہ عبادتاں تے جان نال سانوں کیہہ فائدہ ہوندا اے۔ بھین اینا جنہے کئی سالاں تک فرق فرق طریقیاں نال کل وقتی طور تے یہوواہ دی خدمت کیتی اے، اوہ کہندی اے:‏ ”‏عبادتاں تے جان نال میرا ایمان مضبوط ہوندا اے۔ بھانویں کہ تقریر کر‌ن والا بھرا چنگا اُستاد نہ ہووے یاں اوہ کوئی نوِیں گل نہ دَسے، پر فیر وی مینوں ایہو جہیاں بوہت ساریاں گلاں پتہ چلدیاں نیں جنہاں نال مَیں بائبل دِیاں سچائیاں نُوں ہور چنگی طرحاں سمجھ جانی آں تے اِنج میرا ایمان مضبوط ہوندا اے۔“‏ b عبادتاں تے بھین بھراواں دے جواب سُن کے وی ساڈا ایمان مضبوط ہوندا اے۔—‏رومیوں 1:‏11، 12؛‏ 10:‏17‏۔‏

14.‏ مُنادی کر‌ن نال ساڈا ایمان کیویں مضبوط ہوندا اے؟‏

¹⁴ مُنادی کر‌ن نال وی ساڈا ایمان مضبوط ہوندا اے۔ (‏عبرانیوں 10:‏23‏)‏ بھین باربرا جیہڑی 70 سالاں توں وی زیادہ عرصے توں یہوواہ دی خدمت کر رہی اے، کہندی اے:‏ ”‏مُنادی کر‌ن نال میرا ایمان ہمیشاں مضبوط ہویا اے۔ جِنّاں زیادہ مَیں دُوجیاں نُوں یہوواہ دے شان‌دار وعدیاں بارے دسنی آں، اوناں ای زیادہ ایہناں وعدیاں تے میرا اپنا ایمان وی مضبوط ہوندا اے۔“‏

15.‏ ذاتی مطالعیا کر‌ن نال ساڈا ایمان کیویں مضبوط ہوندا اے؟ (‏تصویراں نُوں وی ویکھو۔)‏

¹⁵ ذاتی مطالعیا کر‌ن نال وی ساڈا ایمان مضبوط ہوندا اے۔ بھین سوزین نے دَسیا کہ جدوں اوہ پہلاں توں سوچدی اے کہ اوہ کیس بارے مطالعیا کر‌ے گی تے ایہدا اوہنوں زیادہ فائدہ ہوندا اے۔ اوہنے کہیا:‏ ”‏اِتوار والے دن مَیں اگلے ہفتے دے ‏”‏مینارِنگہبانی“‏ دے مطالعے دی تیاری کر‌نی آں۔ پیر تے منگل نُوں مَیں ‏”‏مسیحی زندگی تے خدمت“‏ والی عبادت دی تیاری کر‌نی آں تے باقی دِناں چ مَیں بائبل چوں کجھ ہور موضوعاں تے تحقیق کر‌نی آں۔“‏ ذاتی مطالعیا کر‌ن دے ایس شیڈول دی وجہ توں بھین سوزین نُوں اپنا ایمان مضبوط رکھن چ بڑی مدد مِلدی اے۔ بھین آئرین جنہے کئی سالاں تک ساڈے مرکزی دفتر چ خدمت کیتی اے، اوہنوں بائبل دِیاں پیشین‌گوئیاں دا مطالعیا کر‌ن نال اپنا ایمان مضبوط رکھن چ مدد مِلدی اے۔ اوہنے کہیا:‏ ”‏مَیں ایہہ ویکھ کے حیران رہ جانی آں کہ یہوواہ نے جیہڑیاں پیشین‌گوئیاں کیتیاں نیں، اوہناں چ دَسی گئی چھوٹی توں چھوٹی گل وی پوری ہوئی اے۔“‏ c

ایہہ ضرور پوری ہوئے گی

16.‏ یہوواہ نے حبقوق نبی نُوں جیس گل دا یقین دَوایا، کیہہ اوہ ساڈے لئی وی اہم اے؟ (‏عبرانیوں 10:‏36، 37‏)‏

¹⁶ یہوواہ دے کجھ بندے کئی سالاں توں شیطان دی ایس دُنیا دے ختم ہون دا اِنتظار کر رہے نیں۔ شاید کجھ لوکاں نُوں لگے کہ نوِیں دُنیا بارے یہوواہ دا وعدہ پورا ہون چ دیر ہو رہی اے۔ یہوواہ جان‌دا اے کہ ایس بارے اوہدے بندے کیہو جیہا محسوس کر‌دے نیں۔ ایس لئی اوہنے اپنے نبی حبقوق نُوں یقین دَوان لئی ایہہ کہیا:‏ ایہہ رویا اِک مقررہ وقت لئی اے۔ ایہہ چھیتی پوری ہوئے گی تے جھوٹھی ثابت نئیں ہوئے گی۔ بھانویں کہ ایہدے چ دیر ہووے فیر وی ایہدے اِنتظار چ رہ کیونکہ ایہہ ضرور پوری ہوئے گی۔ دیر نئیں کر‌ے گی۔ (‏حبقوق 2:‏3‏)‏ یہوواہ نے جیہڑی گل کہی، کیہہ اوہ صرف حبقوق نُوں تسلی دین لئی سی؟ یاں کیہہ ایہہ گل اَج ساڈے لئی وی اہم اے؟ پولُس رسول نے پاک روح دی رہنمائی چ ایہہ گل اوہناں مسیحیاں نُوں کہی جیہڑے نوِیں دُنیا دا بڑی بےصبری نال اِنتظار کر رہے نیں۔ ‏(‏عبرانیوں 10:‏36، 37 نُوں پڑھو۔)‏ اَسی ایس گل دا پورا یقین رکھ سکنے آں کہ یہوواہ نے نوِیں دُنیا بارے جیہڑیاں گلاں کہیاں نیں، اوہناں وچوں ہر اِک ضرور پوری ہوئے گی، دیر نئیں کر‌ے گی۔‏

17.‏ اِک بھین نے اوس نصیحت تے کیویں عمل کیتا جیہڑی یہوواہ نے حبقوق نبی نُوں کیتی سی؟‏

¹⁷ یہوواہ دے بوہت سارے بندیاں نے اوس نصیحت تے عمل کیتا اے جیہڑی یہوواہ نے حبقوق نبی نُوں کیتی سی۔ یہوواہ نے اوہنوں کہیا سی:‏ ایہدے اِنتظار چ رہ۔ مثال لئی، بھین لوئس جنہے 1939 چ یہوواہ دی خدمت کر‌نی شروع کیتی، اوہ کہندی اے:‏ ”‏اوس ویلے مینوں لگ رہیا سی کہ میری سکول دی پڑھائی ختم ہون توں پہلاں ای ہر مجدون آ جائے گی۔ پر اِنج نئیں ہویا۔ ایہناں سالاں دے دوران مَیں بائبل چوں بوہت سارے ایہو جہے لوکاں دے واقعے پڑھے جیہڑے یہوواہ دے وعدے پورے ہون دا اِنتظار کر رہے سن۔ ایہناں واقعیاں نُوں پڑھن نال مینوں حوصلہ ملیا کہ مَیں وی یہوواہ دے وعدے پورے ہون دا اِنتظار کر‌اں۔ مَیں نوح، ابراہام، یوسف تے دُوجے کئی ایہو جہے لوکاں بارے پڑھیا جنہاں نُوں اوہ برکت پان لئی کئی سال اِنتظار کر‌نا پیا جدا خدا نے اوہناں نال وعدہ کیتا سی۔ ایس گل تے بھروسا رکھن نال کہ یہوواہ دے وعدے پورے ہون گے، مینوں تے ہور بوہت سارے لوکاں نُوں ایس گل دا یقین ہو گیا اے کہ نوِیں دُنیا چھیتی آن والی اے۔“‏ یہوواہ دے اوہ سارے بندے اوس گل نُوں منن گے جیہڑے کئی سالاں توں اوہدی خدمت کر رہے نیں۔‏

18.‏ یہوواہ دِیاں بنائیاں ہوئیاں چیزاں تے غور کر‌ن نال نوِیں دُنیا تے ساڈا ایمان کیویں مضبوط ہوندا اے؟‏

¹⁸ ایہہ گل سچ اے کہ نوِیں دُنیا حالے نئیں آئی۔ پر ذرا اوہناں چیزاں بارے سوچو جیہڑیاں ساڈیاں نظراں دے سامنے نیں جیویں کہ تارے، درخت، جانور تے انسان۔ کوئی وی ایس گل تے شک نئیں کر‌ے گا کہ ایہہ ساریاں چیزاں موجود نیں۔ پر اِک وقت ایہو جیہا وی سی جدوں ایہہ چیزاں موجود نئیں سن۔ ایہہ سانوں صرف ایس لئی نظر آندیاں نیں کیونکہ یہوواہ نے ایہناں نُوں بنایا اے۔ (‏پیدایش 1:‏1،‏ 26، 27‏)‏ ساڈے خدا نے ایہہ وعدہ وی کیتا اے کہ اوہ اِک نوِیں دُنیا قائم کر‌ے گا۔ یہوواہ اپنا ایہہ وعدہ ضرور پورا کر‌ے گا۔ اوس نوِیں دُنیا چ ساڈی صحت چنگی ہوئے گی تے اَسی ہمیشاں تک زندہ رہواں گے۔ جیویں کائنات دی ہر چیز حقیقت چ موجود اے، اونویں ای اپنے مقررہ وقت تے یہوواہ ایہہ ثابت کر دَوے گا کہ نوِیں دُنیا کوئی خواب نئیں سگوں حقیقت اے۔—‏یسعیاہ 65:‏17؛‏ مکاشفہ 21:‏3، 4‏۔‏

19.‏ تُسی اپنے ایمان نُوں مضبوط کیویں کر سکدے او؟‏

¹⁹ جدوں تک نوِیں دُنیا نئیں آندی اوہدوں تک اپنے ایمان نُوں مضبوط کر‌ن لئی اوہ سب کجھ کر‌و، جو تُسی کر سکدے او۔ اپنے دل چ فدیے لئی قدر ودھاؤ، یہوواہ دی طاقت بارے سوچ وچار کر‌و تے ایہو جہے کماں چ مصروف رہوو جنہاں دے ذریعے تُسی یہوواہ دے ہور وی نیڑے ہو جاؤ۔ اِنج کر‌ن نال تُسی وی اوہناں لوکاں چ شامل ہووو گے جیہڑے اپنے ایمان تے صبر دی وجہ توں وعدیاں دے وارث نیں۔—‏عبرانیوں 6:‏11، 12؛‏ رومیوں 5:‏5‏۔‏