1.‏ یسوع نے کیہڑے موقعے تے اپنا پہلا معجزہ کیتا؟‏

 ذرا ایس واقعے دا تصور کر‌و جیہڑا 29 عیسوی چ یسوع دی خدمت دے شروع چ ہویا۔ یسوع، اوہدی ماں مریم تے اوہدے کجھ شاگرد قانا چ اِک شادی تے گئے ہوئے سن۔ ایہہ پِنڈ یسوع دے شہر ناصرت دے شمال چ سی۔ مریم دی اوس خاندان نال چنگی دوستی سی تے ایس لئی شاید اوہ مہماناں دی دیکھ‌بھال وی کر رہی سی۔ پر دعوت دے دوران اِک مسئلہ ہو گیا جدی وجہ توں گھر والیاں نُوں تے دُلہا دُلہن نُوں بڑی شرمندگی ہو سکدی سی۔ شادی چ مے ختم ہو گئی سی۔‏ b ایہدی وجہ شاید ایہہ سی کہ مہمان زیادہ آ گئے سن۔ مریم فوراً اپنے پُتر یسوع کول گئی تے اوہنوں کہیا:‏ اوہناں کول مے مُک گئی اے۔ (‏یوحنا 2:‏1-‏3‏)‏ فیر یسوع نے کیہہ کیتا؟ اوہنے اِک بڑا ای حیران کر دین والا کم کیتا۔ اوہنے پانی نُوں ودھیا مے بنا دِتا۔—‏یوحنا 2:‏9، 10‏۔‏

2، 3.‏ (‏الف)‏ یسوع نے معجزے کر‌ن د ی اپنی طاقت نُوں کیویں استمال کیتا؟ (‏ب)‏ یسوع دے معجزیاں تے غور کر‌ن نال سانوں کیہہ فائدہ ہوندا اے؟‏

² زمین تے یہوواہ دی خدمت کر‌دے ویلے یسوع نے ہور وی بڑے معجزے کیتے۔‏ c ایہناں معجزیاں دے ذریعے یسوع نے ہزاراں لوکاں دی مدد کیتی۔ مثال لئی، دو موقعیاں تے اوہنے بوہت سارے لوکاں نُوں کھانا کھوایا۔ پہلے موقعے تے اوہنے 5 ہزار بندیاں نُوں تے دُوجے موقعے تے 4 ہزار بندیاں نُوں کھانا کھوایا۔ ایہدے علاوہ اوتھے کجھ بچے تے عورتاں وی سن۔ جے اَسی اوہناں نُوں وی شامل  کر‌ئیے تے ایہہ 27 ہزار توں وی زیادہ لوک بن دے نیں۔ (‏متی 14:‏15-‏21؛‏ 15:‏32-‏38‏)‏ ایہناں دونواں موقعیاں تے یسوع نے بیمار لوکاں نُوں شفا وی دِتی سی۔ (‏متی 14:‏14؛‏ 15:‏30، 31‏)‏ ذرا تصور کر‌و کہ جدوں یسوع نے بیماراں نُوں شفا دِتی ہوئے گی تے لوکاں نُوں کھانا کھوایا ہوئے گا تے اوہ کِنّے حیران ہوئے ہون گے۔‏

³ اَج وی اَسی یسوع دے معجزیاں توں بوہت کجھ سکھ سکنے آں۔ ایس مضمون چ اَسی ایہو جہیاں گلاں تے غور کر‌اں گے جیہڑیاں اَسی یسوع دے معجزیاں توں سکھنے آں تے جنہاں توں ساڈا ایمان مضبوط ہوندا اے۔ فیر اَسی ویکھاں گے کہ اَسی یسوع وانگوں خاکساری تے ہمدردی کیویں وکھا سکنے آں۔‏

4.‏ یسوع دے معجزیاں توں اَسی ہور کدے بارے سکھنے آں؟‏

⁴ یسوع دے معجزیاں توں اَسی نہ صرف اوہدے بارے سگوں اوہدے اسمانی باپ بارے وی بوہت کجھ سکھنے آں تے ایہناں گلاں توں ساڈا ایمان مضبوط ہوندا اے۔ اصل چ یسوع نے جیہڑے معجزے کیتے اوہ یہوواہ دی طاقت نال ای کیتے سن۔ اعمال 10:‏38 چ ایہہ دَسیا گیا اے:‏ خدا نے یسوع ناصری نُوں پاک روح نال مسح کیتا تے اوہنوں طاقت بخشی تے اوہ سارے ملک چ پھریا تے اوہنے لوکاں نال بھلائی کیتی تے ایہو جہے لوکاں نُوں شفا دِتی جیہڑے اِبلیس دے ستائے ہوئے سن کیونکہ خدا اوہدے نال سی۔ سانوں ایہہ گل وی یاد رکھنی چاہی دی اے کہ یسوع نے اپنی تلیم تے معجزیاں توں اپنے باپ دی سوچ تے جذبات نُوں ظاہر کیتا۔ (‏یوحنا 14:‏9‏)‏ آؤ ویکھئے کہ اَسی یسوع دے معجزیاں توں کیہڑیاں تِن گلاں سکھنے آں۔‏

5.‏ یسوع نے معجزے کیوں کیتے؟ (‏متی 20:‏30-‏34‏)‏

⁵ پہلی گل، یسوع تے اوہدا اسمانی باپ سانوں بوہت پیار کر‌دے نیں‏۔ جدوں یسوع زمین تے سی تے اوہنے معجزے کر کے لوکاں دِیاں تکلیفاں نُوں دُور کیتا جدے توں ظاہر ہویا کہ اوہنوں انساناں نال بوہت پیار اے۔ اِک موقعے تے دو اَنھے بندیاں نے یسوع کولوں مدد لئی اِلتجا کیتی‏۔ (‏متی 20:‏30-‏34 نُوں پڑھو۔)‏ غور کر‌و کہ یسوع نُوں اوہناں تے ”‏ترس آیا“‏ تے فیر اوہنے اوہناں نُوں ٹھیک کیتا۔ ایس ایت چ جیہڑے یونانی لفظاں دا ترجمہ ”‏ترس آیا“‏ کیتا گیا، اوہ ہمدردی دے اوس احساس وَل اشارہ کر‌دے نیں جیہڑا انسان دے اندروں اُٹھدا اے تے بڑا گُوڑھا ہوندا اے۔ یسوع لوکاں نال پیار کر‌دا سی ایس لئی اوہنوں اوہناں نال ہمدردی سی۔ ایسے وجہ توں اوہنے بُھکھے لوکاں نُوں کھانا کھوایا تے اِک کوڑھی نُوں وی ٹھیک کیتا۔ (‏متی 15:‏32؛‏ مرقس 1:‏41‏)‏ اَسی ایس گل تے پورا یقین رکھ سکنے آں کہ ساڈا رحم‌دل خدا یہوواہ تے اوہدا پُتر سانوں بڑا پیار کر‌دے نیں تے سانوں تکلیف چ ویکھ کے اوہناں نُوں بڑا دُکھ ہوندا اے۔ (‏لُوقا 1:‏78؛‏ 1-‏پطرس 5:‏7‏)‏ ایہدے چ کوئی شک نئیں کہ اوہ دلوں چاہندے نیں کہ اوہ انساناں دِیاں ساریاں تکلیفاں نُوں ختم کر دین۔‏

6.‏ خدا نے یسوع نُوں کیہہ کر‌ن دی طاقت دِتی اے؟‏

⁶ دُوجی گل، خدا نے یسوع نُوں انساناں دے سارے مسئلے حل کر‌ن دی طاقت دِتی اے۔‏ یسوع دے معجزیاں توں ظاہر ہویا کہ اوہدے کول ساڈے اوہناں مسئلیاں نُوں وی ختم کر‌ن دی طاقت اے جنہاں نُوں حل کر‌نا ساڈے وَسوں باہر اے۔ مثال لئی، یسوع کول انساناں دِیاں مصیبتاں دی اصل جڑ یعنی اوس گُناہ نُوں ختم کر‌ن دی طاقت اے جیہڑا سانوں آدم کولوں ملیا اے۔ ایہدے مطلب اے کہ اوہ گُناہ دی وجہ توں آن والیاں مشکلاں یعنی بیماری تے موت نُوں وی ختم کر سکدا اے۔ (‏متی 9:‏1-‏6؛‏ رومیوں 5:‏12،‏ 18، 19‏)‏ یسوع دے معجزیاں توں ثابت ہویا کہ اوہ ”‏ہر طرحاں دی بیماری“‏ نُوں ٹھیک کر سکدا اے، ایتھوں تک کہ مُردیاں نُوں وی زندہ کر سکدا اے۔ (‏متی 4:‏23؛‏ یوحنا 11:‏43، 44‏)‏ ایہدے علاوہ اوہدے چ خطرناک طوفاناں نُوں روکن تے لوکاں چوں بُرے فرشتیاں نُوں کڈھن دی طاقت وی اے۔ (‏مرقس 4:‏37-‏39؛‏ لُوقا 8:‏2‏)‏ سانوں ایہہ جان کے بڑا حوصلہ مِلدا اے کہ یہوواہ نے اپنے پُتر نُوں اینی طاقت دِتی اے۔‏

7، 8.‏ (‏الف)‏ یسوع دے معجزیاں دی وجہ توں کیہڑی گل تے ساڈا بھروسا ودھدا اے؟ (‏ب)‏ نوِیں دُنیا چ تُسی خاص طور تے کیہڑے معجزے نُوں ویکھنا چاہندے او؟‏

⁷ تیجی گل، اَسی پورا یقین رکھ سکنے آں کہ خدا دی بادشاہی چ سانوں بوہت ساریاں برکتاں مِلن گیاں۔‏ یسوع دے معجزیاں توں پتہ چلدا اے کہ اوہ خدا دی بادشاہی دے بادشاہ دے طور تے انساناں لئی کیہہ کجھ  کر‌ے گا۔ ذرا اوہناں برکتاں بارے سوچو جیہڑیاں بوہت چھیتی مسیح دی حکمرانی چ سانوں مِلن گیاں۔ ساڈی صحت چنگی ہوئے گی کیونکہ یسوع ہر طرحاں دی بیماری تے معذوری نُوں ختم کر دَوے گا۔ (‏یسعیاہ 33:‏24؛‏ 35:‏5، 6؛‏ مکاشفہ 21:‏3، 4‏)‏ سانوں کدی وی بُھکھیاں نئیں سونا پووے گا تے نہ ای کدی قدرتی آفتاں دا سامنا کر‌نا پووے گا۔ (‏یسعیاہ 25:‏6؛‏ مرقس 4:‏41‏)‏ سانوں اپنے اوہناں عزیزاں نُوں مِل کے وی بڑی خوشی ہوئے گی جیہڑے قبراں وچوں نکل آن گے۔ (‏یوحنا 5:‏28، 29‏)‏ نوِیں دُنیا چ تُسی خاص طور تے کیہڑے معجزے نُوں ویکھن لئی بےتاب او؟‏

⁸ معجزے کر‌ن نال یسوع نے خاکساری تے ہمدردی ظاہر کیتی۔ ایہو جہیاں خوبیاں سانوں وی ظاہر کر‌نیاں چاہی دِیاں نیں۔ آؤ، ایس بارے دو مثالاں تے غور کر‌یئے۔ سب توں پہلاں اَسی اوس معجزے بارے گل کر‌نے آں جیہڑا یسوع نے قانا چ شادی دے موقعے تے کیتا سی۔‏

9.‏ یسوع نے شادی د ی دعوت چ کیہہ کیتا؟ (‏یوحنا 2:‏6-‏10‏)‏

⁹ یوحنا 2:‏6-‏10 نُوں پڑھو‏۔ جدوں شادی چ مے ختم ہو گئی تے کیہہ یسوع لئی لازمی سی کہ اوہ کجھ کر‌دا؟ نئیں۔ مسیح بارے ایہو جہی کوئی پیشین‌گوئی نئیں کیتی گئی سی جدے چ ایہہ دَسیا گیا ہوئے کہ اوہ معجزہ کر کے مے بنائے گا۔ پر ذرا سوچو کہ جے تواڈی شادی تے کوئی ایہو جہی چیز مُک جاندی تے توانوں کیہو جیہا لگدا؟ شاید یسوع نے اوس خاندان لئی، خاص کر کے دُلہا دُلہن لئی ہمدردی محسوس کیتی ہوئے گی تے اوہ چاہندا ہوئے گا کہ اوہ شرمندہ ہون توں بچ جان۔ ایس لئی اوہنے معجزہ کر کے مے بنائی جیویں کہ ایس مضمون دے شروع چ دَسیا گیا سی۔ اوہنے تقریباً 390 لیٹر پانی نُوں چنگی مے چ بدل دِتا۔ ایہہ اینی زیادہ مے سی کہ ایہنوں بعد چوں وی استمال کیتا جا سکدا سی یاں فیر ایہنوں ویچ کے پیسے دُلہا  دُلہن نُوں دِتے جا سکدے سن۔ ایس سب لئی دُلہا دُلہن کِنّے خوش ہوئے ہون گے۔‏

10.‏ اَسی یوحنا 2 باب چ لکھے واقعے چ کیہڑیاں خاص گلاں تے غور کر سکنے آں؟ (‏تصویر نُوں وی ویکھو۔)‏

¹⁰ ذرا یوحنا 2 باب چ لکھے واقعے دِیاں کجھ گلاں تے غور کر‌و جیہڑیاں بڑیاں خاص نیں۔ ایس واقعے چ کیہہ تُسی غور کیتا کہ یسوع نے آپ گھڑیاں نُوں پانی نال نئیں بھریا سی سگوں اوہنے نوکر‌اں نُوں اِنج کر‌ن لئی کہیا سی کیونکہ اوہ دُوجیاں دا دھیان اپنے اُتے نئیں دَوانا چاہندا سی۔ (‏6، 7 ایت‏)‏ پانی نُوں مے چ بدلن توں بعد اوہ آپ ایہنوں اوس بندے کول نئیں لے کے گیا سی جیہڑا دعوت دا اِنتظام ویکھ رہیا سی۔ ایہدی بجائے اوہنے نوکر‌اں نُوں گھلیا۔ (‏8 ایت‏)‏ نالے یسوع مے دا پیالہ لے کے مہماناں کول وی نئیں گیا ہوئے گا تے نہ ای اوہنے اپنی وڈیائی کر‌دے ہوئے ایہہ کہیا ہوئے گا:‏ ”‏ذرا ایہہ مے تے چکھ کے ویکھو جیہڑی مَیں بنائی اے۔“‏

11.‏ اَسی یسوع دے معجزے توں کیہہ سکھنے آں؟‏

¹¹ اَسی یسوع دے پانی نُوں مے چ بدلن دے معجزے توں کیہہ سکھنے آں؟ اَسی ایہدے توں خاکسار بننا سکھنے آں۔ یسوع نے نہ تے ایس معجزے لئی تے نہ ای اپنے کسے ہور معجزے لئی اپنی وڈیائی کیتی۔ ایہدی بجائے اوہنے خاکساری نال ہمیشاں اپنے باپ دی وڈیائی کیتی تے دُوجیاں نُوں دَسیا کہ اوہ اپنے باپ دی مدد نال سب کجھ کر‌دا اے۔ (‏یوحنا 5:‏19،‏ 30؛‏ 8:‏28‏)‏ جے اَسی یسوع وانگوں خاکسار بناں گے تے اَسی اپنے کسے وی کم لئی شیخی نئیں ماراں گے۔ اَسی یہوواہ دی خدمت چ جو کجھ کر‌نے آں، اوہدے لئی سانوں اپنی واہ واہ نئیں سگوں یہوواہ دی تعریف کر‌نی چاہی دی اے جدی خدمت کر‌ن دا سانوں شرف ملیا اے۔ (‏یرمیاہ 9:‏23، 24‏)‏ یہوواہ ای وڈیائی دا حق‌دار اے کیونکہ اوہدی مدد دے بغیر اَسی کجھ وی نئیں کر سکدے۔—‏1-‏کُرنتھیوں 1:‏26-‏31‏۔‏

12.‏ اَسی ہور کیہڑے طریقے نال یسوع ورگی خاکساری ظاہر کر سکنے آں؟ اِک مثال دَوو۔‏

¹² یسوع ورگی خاکساری ظاہر کر‌ن لئی اِک ہور طریقے تے غور کر‌و۔ ذرا ایس صورتحال بارے سوچو۔ کلیسیا دا اِک بزرگ اِک نوجوان خادم دی پہلی عوامی تقریر تیار کر‌ن چ مدد کر‌دا اے تے ایہدے چ اوہ کافی وقت لاندا اے۔ ایس وجہ توں بھرا بوہت چنگی تقریر دیندا اے تے کلیسیا دے بھین بھراواں نُوں وی اوہدی تقریر بڑی پسند آندی اے۔ عبادت دے بعد کوئی آ کے اوس بزرگ نُوں کہندا اے:‏ ”‏اوس بھرا نے کِنّی چنگی تقریر دِتی اے نا!‏“‏ کیہہ اوس بزرگ نُوں ایہہ کہنا چاہی دا اے:‏ ”‏تُسی صحی کہہ رہے او پر اوس بھرا نُوں تیاری کر‌ان چ میرا بڑا وقت لگیا اے۔“‏ یاں فیر اوہنوں ایہہ کہنا چاہی دا اے:‏ ”‏ہاں، اوہنے بڑی زبردست تقریر دِتی اے۔ واقعی اوہدی محنت نظر آ رہی سی۔“‏ جدوں اَسی خاکسار ہُنے آں تے اَسی دُوجیاں دے چنگے کماں لئی اپنی تعریف کر‌ان دی کوشش نئیں کر‌دے۔ اَسی ایس گل توں مطمئن رہنے آں کہ یہوواہ ساڈے چنگے کماں نُوں ویکھدا اے تے ایہناں دی بڑی قدر کر‌دا اے۔ (‏متی 6:‏2-‏4؛‏ عبرانیوں 13:‏16 تے غور کر‌و۔)‏ واقعی، جدوں اَسی یسوع وانگوں خاکسار بننے آں تے اَسی یہوواہ نُوں خوش کر‌نے آں۔—‏1-‏پطرس 5:‏6‏۔‏

13.‏ شہر نائین دے نیڑے یسوع نے کیہہ ویکھیا تے فیر اوہنے کیہہ کیتا؟ (‏لُوقا 7:‏11-‏15‏)‏

¹³ لُوقا 7:‏11‏-‏15نُوں پڑھو۔‏ ذرا ایس واقعے بارے سوچو جیہڑا زمین تے یسوع دی خدمت دے دوران ہویا۔ یسوع سفر کر‌کے گلیل دے اِک شہر نائین گیا جیہڑا شونیم توں زیادہ دُور نئیں سی۔ شونیم اوہ شہر سی جتھے 900 سال پہلاں اِلیشع نبی نے اِک عورت دے پُتر نُوں زندہ کیتا سی۔ (‏2-‏سلاطین 4:‏32-‏37‏)‏ جدوں یسوع شہر دے دروازے تے پونچیا تے اوہنے اِک جنازے نُوں ویکھیا جنہوں لوک شہروں باہر لے کے جا رہے سن۔ ایہہ منظر بوہت دُکھی کر دین والا سی کیونکہ مرن والے دی ماں بیوہ سی تے اوہ اپنی ماں دا اکلوتا پُتر سی۔ اوس دکھیاری ماں نال بوہت سارے لوک سن۔ یسوع نے اوس جنازے نُوں روکیا تے اوس دکھیاری ماں لئی بوہت ای زبردست کم کیتا۔ یسوع نے اوہدے پُتر نُوں زندہ کر دِتا۔ ایہہ یسوع دے مُردیاں نُوں زندہ کر‌ن والے معجزیاں وچوں پہلا معجزہ سی جنہاں دا اِنجیلاں چ خاص طور تے ذکر کیتا گیا اے۔‏

14.‏ لُوقا 7 باب چ لکھے واقعے چ کیہڑیاں خاص گلاں نیں؟ (‏تصویر نُوں وی ویکھو۔)‏

¹⁴ ذرا لُوقا 7 باب چ لکھے واقعے دِیاں کجھ خاص گلاں تے غور کر‌و۔ یسوع نے اوس دکھیاری ماں نُوں ویکھیا تے فیر اوہنوں اوہدے تے ترس آیا۔ (‏13 ایت‏)‏ شاید یسوع نے اوس ماں نُوں اپنے پُتر دے جنازے دے نال نال ٹُردیاں تے روندیاں ویکھیا ہوئے تے اوہدے دل چ اوہدے لئی ہمدردی پیدا ہوئی ہووے۔ یسوع نے اوس ماں لئی صرف ترس ای محسوس نئیں کیتا سگوں اوہدے لئی ہمدردی وی وکھائی‏۔ یسوع نے اوہنوں تسلی دیندے ہوئے بڑے پیار نال کہیا:‏ نہ رو۔ فیر اوہنے اوہدی مدد کر‌ن لئی بڑا خاص کم کیتا۔ اوہنے اوہدے پُتر نُوں زندہ کر دِتا تے اوہنوں اوہدی ماں دے حوالے کر دِتا۔—‏14، 15 ایت‏۔‏

15.‏ یسوع دے معجزے توں اَسی کیہہ سکھنے آں؟‏

¹⁵ اَسی بیوہ دے پُتر نُوں زندہ کر‌ن والے یسوع دے معجزے توں کیہہ سکھنے آں؟ اَسی ایہہ سکھنے آں کہ سانوں اوہناں لوکاں لئی ہمدردی وکھانی چاہی دی اے جنہاں دا کوئی عزیز فوت ہو جاندا اے۔ سچ اے کہ اَسی یسوع وانگوں مُردیاں نُوں زندہ تے نئیں کر سکدے پر اوہدے وانگوں اَسی اپنے آلے دوالے دھیان دے سکنے آں کہ کیہڑے لوک اپنے پیاریاں دے وچھڑن دی وجہ توں دُکھی نیں۔ اِنج اَسی اپنے دل چ اوہناں لئی ہمدردی پیدا کر سکنے آں۔ ایس ہمدردی نُوں ظاہر کر‌ن لئی اَسی اوہناں نال ایہو جہیاں گلاں کر سکنے آں یاں اوہناں لئی ایہو جہے کم کر سکنے آں جنہاں توں اوہناں نُوں مدد تے تسلی ملے۔‏ d (‏امثال 17:‏17؛‏ 2-‏کُرنتھیوں 1:‏3، 4؛‏ 1-‏پطرس 3:‏8‏)‏ ساڈیاں چھوٹیاں چھوٹیاں گلاں تے کماں توں وی کسے نُوں بڑا حوصلہ تے تسلی مِل سکدی اے۔‏

16.‏ جیویں کہ تصویر چ وکھایا گیا اے، تُسی اوس ماں دے تجربے توں کیہہ سکھدے او جدی دھی نُوں فوت ہوئیاں تھوڑا ای چِر ہویا سی؟‏

¹⁶ ذرا ایس تجربے تے غور کر‌و۔ کجھ سال پہلاں عبادت چ گیت گاندے ہوئے اِک بھین نے ویکھیا کہ اوہدے نیڑے ای اِک بھین رو رہی اے۔ اوہ گیت مُردیاں دے جی اُٹھن بارے سی تے اوس بھین دی دھی نُوں فوت ہوئے تھوڑا ای چِر ہویا سی۔ ایہہ ویکھ کہ اوہ بھین فوراً اوس دُکھی ماں کول گئی تے اوہنوں گلے لایا تے اوہدے موڈھے تے ہتھ رکھ کے باقی گیت اوہدے نال گایا۔ بعد چوں اوس ماں نے کہیا:‏ ”‏میرا دل بھین  بھراواں لئی محبت نال بھر گیا۔“‏ اوہ بڑی خوش سی کہ اوہ عبادت تے گئی۔ اوہنے دَسیا:‏ ”‏عبادتاں تے جاکے ای سانوں حوصلہ تے تسلی مِلدی اے۔“‏ اَسی پورا یقین رکھ سکنے آں کہ جدوں اَسی اپنے چھوٹے چھوٹے کماں نال وی اوہناں بھین بھراواں لئی ہمدردی وکھانے آں جنہاں دا دل ٹُٹیا ہویا اے تے یہوواہ ایہناں کماں نُوں ویکھدا اے تے ایہناں دی بڑی قدر کر‌دا اے۔—‏زبور 34:‏18‏۔‏

17.‏ ایس مضمون توں اَسی کیہہ سکھیا اے؟‏

¹⁷ جدوں اَسی بائبل چوں یسوع دے معجزیاں بارے پڑھنے آں تے سانوں بڑا حوصلہ مِلدا اے۔ ایہناں توں اَسی سکھنے آں کہ یہوواہ تے یسوع سانوں بوہت پیار کر‌دے نیں، یسوع کول انساناں دے سارے مسئلیاں نُوں ختم کر‌ن دی طاقت اے تے اَسی پورا یقین رکھ سکنے آں کہ بوہت چھیتی خدا دی بادشاہی چ اوہدے سارے وعدے پورے ہون گے۔ یسوع دے معجزیاں تے غور کر‌دے ویلے سانوں ایس گل تے سوچ‌وچار کر‌نا چاہی دا اے کہ اَسی اپنے اندر یسوع ورگیاں خوبیاں کیویں پیدا کر سکنے آں۔ ایہہ بوہت چنگا ہوئے گا کہ اَسی اپنے ذاتی مطالعے یاں خاندانی عبادت چ یسوع دے ہور معجزیاں بارے وی پڑھیئے تے ایہناں تے سوچ‌وچار کر‌یئے۔ ویکھو کہ تُسی ایہناں توں کیہہ سکھدے او۔ تُسی جو کجھ وی سکھدے او، اوہدے بارے دُوجیاں نُوں دَسو۔ دُوجیاں نال ایہو جہی گل بات کر‌ن نال نہ صرف تواڈا حوصلہ ودھے گا سگوں تُسی دُوجیاں دا حوصلہ وی ودھا رہے ہووو گے۔—‏رومیوں 1:‏11، 12‏۔‏

18.‏ اگلے مضمون چ اَسی کیس بارے گل کر‌اں گے؟‏

¹⁸ زمین تے یسوع دی خدمت دے آخری دِناں چ اوہنے اِک ہور مُردے نُوں زندہ کیتا۔ ایہہ یسوع دے کسے مُردے نُوں زندہ کر‌ن دا تیسرا معجزہ سی جدا بائبل چ ذکر کیتا گیا اے۔ پر ایہہ معجزہ دُوجے معجزیاں توں فرق سی کیونکہ ایہدے چ یسوع نے اپنے اِک دوست نُوں زندہ کیتا جنہوں فوت ہوئے چار دن ہو گئے سن۔ ایس معجزے توں اَسی کیہہ سکھنے آں؟ نالے اَسی مُردیاں دے جی اُٹھن دی امید تے اپنے ایمان نُوں مضبوط کیویں کر سکنے آں؟ اگلے مضمون چ اَسی ایہناں گلاں تے غور کر‌اں گے۔‏