مطالعے دا مضمون نمبر 16
تیرا بھرا زندہ ہو جائے گا!
یسوع نے [مارتھا نُوں] کہیا: تیرا بھرا زندہ ہو جائے گا۔—یوحنا 11:23۔
گیت نمبر 145: نوِیں دُنیا دا وعدہ
مضمون تے اِک نظر a
1. اِک بچے نے کیویں ظاہر کیتا کہ اوہنوں مُردیاں دے جی اُٹھن دی امید تے پورا یقین اے؟
میتھیو نُوں اِک ایہو جہی بیماری اے جدی وجہ توں اوہدے وار وار آپریشن ہوئے نیں۔ جدوں اوہ سَت سالاں دا سی تے اوہ تے اوہدے گھر والے جےڈبلیو براڈکاسٹنگ دا اِک پروگرام ویکھ رہے سن۔پروگرام دے آخر چ اِک گیت سی جدے چ وکھایا گیا سی کہ لوک اپنے اوہناں عزیزاں نُوں دُبارہ مِل رہے نیں جیہڑے فوت ہو گئے سن۔ پروگرام ختم ہون توں بعد میتھیو اپنے ماں پیو کول گیا۔ اوہنے اوہناں دا ہتھ پھڑیا تے کہیا: ”تُسی ویکھیا! جے مَیں مر وی گیا تے مَیں زندہ ہو جاواں گا۔ تُسی میرا اِنتظار کرنا، سب ٹھیک ہو جائے گا۔“ ذرا سوچو کہ میتھیو دے ماں پیو ایہہ ویکھ کے کِنّے خوش ہوئے ہون گے کہ اوہناں دا پُتر مُردیاں دے جی اُٹھن دی امید تے ایناں مضبوط ایمان رکھدا اے۔
2، 3. ایہہ کیوں ضروری اے کہ اَسی مُردیاں دے جی اُٹھن دی امید تے سوچوچار کریئے؟
2 سانوں بائبل چ لکھے ایس وعدے تے سوچ وچار کردے رہنا چاہی دا اے کہ مُردے جی اُٹھن گے۔ (یوحنا 5:28، 29) پر کیوں؟ کیونکہ ہوسکدا اے کہ اچانک سانوں کوئی جان لیوا بیماری ہو جائے یاں فیر ساڈا کوئی عزیز فوت ہو جائے۔ (واعظ 9:11؛ یعقوب 4:13، 14) مُردیاں دے جی اُٹھن دی امید دی وجہ توں اَسی ایہو جہیاں مشکلاں نُوں برداشت کرن دے قابل ہُنے آں۔ (1-تھسلُنیکیوں 4:13) بائبل چ سانوں یقین دَوایا گیا اے کہ یہوواہ سانوں بڑی چنگی طرحاں جان دا اے تے سانوں بوہت پیار کردا اے۔ (لُوقا 12:7) اوہ سانوں اینی چنگی طرحاں جان دا اے کہ جدوں اوہ سانوں زندہ کرے گا تے اِنج زندہ کرے گا کہ ساڈی شخصیت اوہی ہوئے گی جیہڑی مرن توں پہلاں سی۔ تے سانوں اپنے مرن توں پہلے دِیاں ساریاں گلاں وی یاد ہون گیاں۔یہوواہ سانوں بوہت پیار کردا اے ایس لئی اوہ چاہندا اے کہ اَسی ہمیشاں تک زندہ رہیے۔ تے جے اَسی مر وی گئے تے اوہ سانوں فیر توں زندہ کر دَوے گا۔
3 ایس مضمون چ اَسی سب توں پہلاں ایس بارے گل کراں گے کہ اَسی مُردیاں دے جی اُٹھن دے وعدے تے کیوں یقین رکھ سکنے آں۔ فیر اَسی بائبل چوں اوس واقعے تے غور کراں گے جدے توں ساڈی مرکزی ایت لئی گئی اے: تیرا بھرا زندہ ہو جائے گا۔ (یوحنا 11:23) آخر چ اَسی ویکھاں گے کہ اَسی مُردیاں دے جی اُٹھن دی امید تے اپنے ایمان نُوں ہور مضبوط کیویں کر سکنے آں۔
اَسی مُردیاں دے جی اُٹھن دے وعدے تے یقین کیوں رکھ سکنے آں
4. کسے وعدے تے بھروسا کرن لئی سانوں کیہڑی گل دا یقین ہونا چاہی دا اے؟ مثال دَوو۔
4 کسے وعدے تے یقین کرن لئی سانوں ایس گل دا بھروسا ہونا چاہی دا اے کہ جنہے ایہہ وعدہ کیتا اے، اوہ ایہنوں پورا کرن دی خواہش تے طاقت رکھدا اے۔ ایہدے بارے ذرا اِک مثال تے غور کرو۔ فرض کرو کہ اِک طوفان دی وجہ توں تواڈے گھر نُوں بڑا نقصان ہوندا اے۔ تواڈا اِک دوست تواڈے کول آ کے ایہہ وعدہ کردا اے کہ ”مَیں ایس گھر نُوں بنان چ تواڈی مدد کراں گا۔“ تواڈے اوس دوست دا دل بوہت چنگا اے تے توانوں ایس گل دا یقین اے کہ اوہ تواڈی مدد کرن دی خواہش رکھدا اے۔ نالے جے اوہدے کول گھر بنان دی مہارت تے اوزار نیں تے توانوں پتہ ہوئے گا کہ اوہ گھر بنا وی سکدا اے۔ ایس لئی تُسی اوہدے وعدے تے ضرور بھروسا کرو گے۔ ہُن ذرا مُردیاں دے جی اُٹھن دے وعدے بارے سوچو جیہڑا خدا نے ساڈے نال کیتا اے۔ کیہہ اوہ ایس وعدے نُوں پورا کرن دی خواہش رکھدا اے؟ تے کیہہ اوہدے کول ایہنوں پورا کرن دی طاقت ہے وے؟
5، 6. اَسی ایس گل دا یقین کیوں رکھ سکنے آں کہ یہوواہ مُردیاں نُوں زندہ کرن دی خواہش رکھدا اے؟
5 کیہہ یہوواہ مُردیاں نُوں زندہ کرن دی خواہش رکھدا اے؟ جی بالکل۔ اوہنے اپنے کئی بندیاں کولوں بائبل چ ایہہ وعدہ لکھوایا کہ مستقبل چ اوہ مُردیاں نُوں زندہ کرے گا۔ (یسعیاہ 26:19؛ ہوسیع 13:14؛ مکاشفہ 20:11-13) تے جدوں یہوواہ کوئی وعدہ کردا اے تے اوہ ایہنوں ضرور پورا کردا اے۔ (یشوع 23:14) اوہ تے مُردیاں نُوں زندہ کرن دی بڑی خواہش رکھدا اے۔ اَسی اِنج کیوں کہہ سکنے آں؟
6 ذرا ایوب دی گل تے غور کرو۔ اوہنوں ایس گل دا یقین سی کہ جے اوہ مر وی گیا تے یہوواہ دی بڑی خواہش ہوئے گی کہ اوہ اوہنوں زندہ کرے۔ (ایوب 14:14، 15) یہوواہ اپنے اوہناں سارے بندیاں لئی وی ایہی خواہش رکھدا اے جیہڑے فوت ہو گئے نیں۔ اوہ دلوں چاہندا اے کہ اوہ اوہناں نُوں زندہ کر دَوے تے اوہناں نُوں خوشیاں بھری زندگی تے تندرستی دَوے۔ پر اوہناں کروڑاں لوکاں دا کیہہ ہوئے گا جنہاں نُوں مرن توں پہلاں یہوواہ بارے جانن دا موقع نئیں ملیا؟ ساڈا پیار کرن والا خدا یہوواہ اوہناں نُوں وی زندہ کرنا چاہندا اے۔ (اعمال 24:15) اوہ چاہندا اے کہ اوہناں لوکاں نُوں اوہدے دوست بنن تے زمین تے ہمیشاں تک زندہ رہن دا موقع ملے۔ (یوحنا 3:16) ایہدے توں صاف پتہ چلدا اے کہ یہوواہ مُردیاں نُوں زندہ کرن دی دلی خواہش رکھدا اے۔
7، 8. اَسی ایس گل دا یقین کیوں رکھ سکنے آں کہ یہوواہ کول مُردیاں نُوں زندہ کرن دی طاقت ہے وے؟
7 کیہہ یہوواہ کول مُردیاں نُوں زندہ کرن دی طاقت ہے وے؟ جی بالکل۔ اوہدی طاقت دی کوئی حد نئیں اے۔ (مکاشفہ 1:8) خدا ایناں طاقتور اے کہ اوہ ہر دُشمن نُوں ہرا سکدا اے، ایتھوں تک کہ موت نُوں وی۔ (1-کُرنتھیوں 15:26) ایہہ جان کے سانوں کِنّی ہمت تے تسلی مِلدی اے۔ ایس بارے اِک بھین دے تجربے تے غور کرو جدا ناں ایما آرنلڈ اے۔ دُوجی عالمی جنگ دے دوران بھین ایما تے اوہدے گھر والیاں نُوں بڑیاں سخت مشکلاں چوں لنگھنا پیا۔ نازیاں دے قیدی کیمپاں چ اوہناں دے کجھ عزیز فوت ہو گئے۔ ایس لئی اپنی دھی نُوں تسلی دین لئی اوہنے کہیا: ”جے موت ہمیشاں تک انساناں تے راج کردی رہی تے فیر تے ایہہ خدا توں زیادہ طاقتور ہوئی۔“ کوئی وی چیز یہوواہ توں زیادہ طاقتور نئیں اے! جے خدا سانوں پیدا کر سکدا اے تے فیر اوہ سانوں مُردیاں چوں زندہ وی کر سکدا اے۔
8 اِک ہور گل وی اے جدی وجہ توں اَسی یقین رکھ سکنے آں کہ یہوواہ کول مُردیاں نُوں زندہ کرن دی طاقت ہے وے۔ اوہ ایہہ کہ اوہدی یاد رکھن دی صلاحیت دی کوئی حد نئیں اے۔ اوہ ہر تارے دا ناں لے کے اوہنوں بلاندا اے۔ (یسعیاہ 40:26) ایہدے علاوہ اوہ اوہناں لوکاں نُوں وی یاد رکھدا اے جیہڑے فوت ہو گئے نیں۔ (ایوب 14:13؛ لُوقا 20:37، 38) اوہ اوہناں دِیاں چھوٹیاں چھوٹیاں گلاں وی نئیں بُھلدا۔ اوہنوں اوہناں دی شکل صورت تے شخصیت بارے سب کجھ یاد اے۔ اوہنوں یاد اے کہ اوہناں نُوں زندگی چ کیہڑے تجربے ہوئے سن تے کیہڑیاں گلاں اوہناں دی یادداشت چ محفوظ سن۔
9. توانوں یہوواہ دے ایس وعدے تے یقین کیوں اے کہ اوہ مُردیاں نُوں زندہ کرے گا؟
9 ایہہ گل صاف ظاہر اے کہ اَسی یہوواہ دے ایس وعدے تے پورا یقین رکھ سکنے آں کہ اوہ مُردیاں نُوں زندہ کرے گا کیونکہ اوہ ایس وعدے نُوں پورا کرن دی خواہش وی رکھدا اے تے طاقت وی۔ ذرا ایس وعدے تے بھروسا کرن دی اِک ہور وجہ تے غور کرو۔ یہوواہ نے پہلاں وی کئی مُردیاں نُوں زندہ کیتا اے۔ پرانے زمانے چ اوہنے اپنے کجھ بندیاں نُوں طاقت دِتی کہ اوہ مُردیاں نُوں زندہ کرن جنہاں چ یسوع وی شامل سی۔ آؤ، اَسی یوحنا 11 باب چ لکھے اِک واقعے تے غور کرنے آں جدے چ یسوع نے اِک مُردے نُوں زندہ کیتا۔
یسوع دا پیارا دوست فوت ہو گیا
10. جدوں یسوع دریائےیردن دے پار مُنادی کر رہیا سی تے کیہڑا واقعہ ہویا؟ تے یسوع نے کیہہ کیتا؟ (یوحنا 11:1-3)
10 یوحنا 11:1-3 نُوں پڑھو۔ ذرا اوس واقعے دا تصور کرو جیہڑا 32 عیسوی دے آخر چ بیتعنیاہ چ ہویا۔ بیتعنیاہ اِک پِنڈ سی جتھے یسوع دا اِک قریبی دوست لعزر تے اوہدیاں دو بھیناں مریم تے مارتھا رہندیاں سن۔ (لُوقا 10:38-42) اچانک لعزر بڑا بیمار ہو گیا۔ ایس وجہ توں اوہدیاں بھیناں بڑیاں پریشان سن۔ اوہناں نے دریائےیردن دے پار یسوع نُوں سنیاں گھلیا۔ دریائےیردن توں بیتعنیاہ پیدل آن چ دو دن لگدے سن۔ (یوحنا 10:40) افسوس دی گل اے کہ جدوں تک یسوع کول ایہہ سنیاں پونچیا اوہدوں تک لعزر فوت ہو گیا سی۔ یسوع جان دا سی کہ اوہدا پیارا دوست فوت ہو گیا اے۔ پر فیر وی اوہ ہور دو دن اوتھے رہن توں بعد بیت عنیاہ گیا۔ جدوں تک یسوع اوتھے پونچیا، لعزر نُوں فوت ہوئے چار دن ہو چُکے سن۔ ہُن یسوع اِک ایہو جیہا کم کرن والا سی جدے توں اوہدے پیارے دوستاں نُوں بڑا فائدہ ہونا سی تے یہوواہ دی وڈیائی ہونی سی۔—یوحنا 11:4، 6، 11، 17۔
11. ایس واقعے توں اَسی دوستی بارے کیہہ سکھنے آں؟
11 ایس واقعے توں اَسی دوستی بارے بڑی خاص گل سکھنے آں۔ ذرا ایس گل تے غور کرو۔ جدوں مریم تے مارتھا نے یسوع نُوں لعزر دے بیمار ہون بارے سنیاں گھلیا سی تے اوہناں نے یسوع نُوں بیتعنیاہ آن لئی نئیں کہیا سی۔ اوہناں نے تے بس اوہنوں ایہہ دَسیا سی کہ اوہدا پیارا دوست بیمار اے۔ (یوحنا 11:3) یسوع لعزر نُوں بیتعنیاہ آئے بغیر وی زندہ کر سکدا سی پر فیر وی اوہنے ایہہ فیصلہ کیتا کہ اوہ مریم تے مارتھا کول بیتعنیاہ جائے گا۔ کیہہ تواڈا کوئی اِنج دا دوست ہے وے جیہڑا کہے بغیر ای تواڈی مدد کردا اے؟ جے تواڈا کوئی دوست اِنج کردا اے تے توانوں ایس گل دا یقین ہوندا اے کہ مصیبت دے وقت چ تُسی مدد لئی اوہدے تے بھروسا کر سکدے او۔ (امثال 17:17) سانوں وی دُوجیاں دا اُنج دا ای دوست بننا چاہی دا اے جنج دا یسوع سی۔ آؤ، اَسی دُبارہ ایس واقعے تے غور کرنے آں تے ویکھنے آں کہ اَگے کیہہ ہویا سی۔
12. یسوع نے مارتھا نال کیہڑا وعدہ کیتا تے اوہ ایس وعدے تے بھروسا کیوں رکھ سکدی سی؟ (یوحنا 11:23-26)
12 یوحنا 11:23-26 نُوں پڑھو۔ جدوں مارتھا نُوں پتہ چلیا کہ یسوع بیتعنیاہ دے نیڑے وے تے اوہ بھج کے اوہنوں مِلن گئی تے اوہنوں کہیا: مالک جے توں ایتھے ہوندا تے میرا بھرا نہ مردا۔ (یوحنا 11:21) سچ اے کہ یسوع لعزر نُوں اوہدی بیماری توں شفا دے سکدا سی پر اوہ ایہدے توں وی وڈا کم کرن بارے سوچ رہیا سی۔ اوہنے مارتھا نال وعدہ کیتا کہ تیرا بھرا زندہ ہو جائے گا۔ اوہنے مارتھا نُوں ایس وعدے تے بھروسا کرن دی وجہ وی دَسی۔ یسوع نے کہیا: میرے ای ذریعے مُردیاں نُوں زندہ کیتا جائے گا تے لوکاں نُوں زندگی ملے گی۔ خدا نے یسوع نُوں مُردیاں نُوں زندہ کرن دی طاقت دِتی اے۔ پہلاں وی یسوع نے اِک بچی نُوں اوہدے مرن توں بعد ای زندہ کر دِتا سی تے اوہنے اِک مُنڈے نُوں وی اوسے دن زندہ کیتا سی جیس دن اوہ فوت ہویا سی۔ (لُوقا 7:11-15؛ 8:49-55) پر کیہہ یسوع کسے ایہو جہے بندے نُوں زندہ کر سکدا سی جنہوں مرے چار دن ہو گئے سن تے جدا جسم ہُن گلنا سڑنا شروع ہو گیا سی؟
لعزر باہر آ جا
13. یوحنا 11:32-35 دے مطابق جدوں یسوع نے مریم تے دُوجے لوکاں نُوں روندیاں ویکھیا تے اوہنوں کیہو جیہا محسوس ہویا؟ (تصویر نُوں وی ویکھو۔)
13 یوحنا 11:32-35 نُوں پڑھو۔ ذرا سوچو کہ اَگے کیہہ ہویا۔ لعزر دی دُوجی بھین مریم یسوع نُوں مِلن گئی۔ اوہنے وی اپنی بھین وانگوں کہیا: مالک جے توں ایتھے ہوندا تے میرا بھرا نہ مردا۔ مریم تے دُوجے لوک بوہت دُکھی سن۔ اوہناں نُوں ویکھ کے یسوع نُوں وی بڑا دُکھ ہویا۔ اوہناں دی تکلیف نُوں ویکھ کے یسوع رون لگ پیا۔ اوہ کسے عزیز دے مرن دے دُکھ نُوں سمجھدا سی۔ یقیناً اوہ اوہناں دے اَتھرواں دی وجہ نُوں ختم کرنا چاہندا سی۔
14. مریم نُوں روندیاں ویکھ کے یسوع نے جیہو جیہا محسوس کیتا، اوہدے توں اَسی یہوواہ بارے کیہہ سکھنے آں؟
14 یسوع نے مریم نُوں روندیاں ویکھ کے جیہو جیہا محسوس کیتا، اوہدے توں پتہ چلدا اے کہ سانوں دُکھی ویکھ کے یہوواہ نُوں وی دُکھ ہوندا اے۔ پر اَسی اِنج کیوں کہہ سکنے آں؟ جیویں کہ اَسی پچھلے مضمون چ ویکھیا، یسوع بالکل اپنے باپ وانگوں سوچدا تے محسوس کردا اے۔ (یوحنا 12:45) ایس لئی جدوں اَسی ایہہ پڑھنے آں کہ اپنے دوستاں دے دُکھ نُوں ویکھ کے یسوع ایناں دُکھی ہو گیا کہ اوہ رون لگ پیا تے سانوں پتہ چلدا اے کہ جدوں یہوواہ سانوں کسے دُکھ دی وجہ توں روندیاں ویکھدا اے تے اوہنوں وی دُکھ ہوندا اے۔ (زبور 56:8) یقیناً ایس وجہ توں ساڈا دل کردا اے کہ اَسی اپنے خدا دے ہور نیڑے ہو جائیے۔
15. جیویں کہ یوحنا 11:41-44 چ دَسیا گیا اے، جدوں یسوع لعزر دی قبر تے گیا تے اوتھے کیہہ ہویا؟ (تصویر نُوں وی ویکھو۔)
15 یوحنا 11:41-44 نُوں پڑھو۔ جدوں یسوع لعزر دی قبر تے پونچیا تے اوہنے لوکاں نُوں قبر دے موُنہہ توں پتھر ہٹان لئی کہیا۔ایہہ گل سُن کے مارتھا نے کہیا: ہُن تے اوہدی لاش وچوں بو آندی ہونی اے۔ یسوع نے اوہنوں جواب دِتا: کیہہ مَیں تینوں ایہہ نئیں سی کہیا کہ جے تُوں ایمان رکھیں گی تے تُوں خدا دے جلال نُوں ویکھیں گی؟ (یوحنا 11:39، 40) فیر یسوع نے اسمان وَل ویکھ کے ساریاں دے سامنے یہوواہ کولوں دُعا کیتی۔ اوہ چاہندا سی کہ جو اوہ کرن والا اے، اوہدی وجہ توں یہوواہ دی وڈیائی ہوئے۔ فیر اوہنے کہیا: لعزر،باہر آ جا! تے لعزر قبر چوں باہر آ گیا۔ یسوع نے اِک ایہو جیہا کم کیتا سی جیہڑا دُوجیاں نُوں ناممکن لگ رہیا سی۔ b
16. یوحنا 11 باب چ لکھے واقعے توں مُردیاں دے جی اُٹھن دی امید تے ساڈا ایمان کیویں مضبوط ہوندا اے؟
16 یوحنا 11 باب چ لکھے واقعے توں مُردیاں دے جی اُٹھن دی امید تے ساڈا ایمان مضبوط ہوندا اے۔پر کیویں؟ یاد کرو کہ یسوع نے مارتھا نال وعدہ کیتا سی کہ تیرا بھرا زندہ ہو جائے گا۔ (یوحنا 11:23) اپنے باپ وانگوں یسوع چ ایس وعدے نُوں پورا کرنا دی خواہش وی اے تے طاقت وی۔ لعزر دی موت تے یسوع دے رون توں پتہ چلدا اے کہ اوہ موت تے ایہدی وجہ توں ہون والے دُکھ نُوں ختم کرن دی شدید خواہش رکھدا اے۔ تے جدوں لعزر قبر چوں باہر آیا تے یسوع نے ثابت کر دِتا کہ اوہدے کول مُردیاں نُوں زندہ کرن دی طاقت ہے وے۔ ذرا اوس گل بارے وی سوچو جیہڑی یسوع نے مارتھا نُوں یاد دَوائی۔ اوہنے کہیا: کیہہ مَیں تینوں ایہہ نئیں سی کہیا کہ جے توں ایمان رکھیں گی تے خدا دے جلال نُوں ویکھیں گی؟ (یوحنا 11:40) ایہناں گلاں دی وجہ توں اَسی خدا دے ایس وعدے تے یقین رکھ سکنے آں کہ مُردے جی اُٹھن گے۔ پر اَسی کیہہ کرسکنے آں تاکہ ایس وعدے تے ساڈا بھروسا ہور ودھے؟
اَسی مُردیاں دے جی اُٹھن دی امید تے اپنے ایمان نُوں ہور مضبوط کیویں کر سکنے آں
17. جدوں اَسی بائبل چ مُردیاں دے جی اُٹھن دے واقعیاں نُوں پڑھ رہے ہُنے آں تے سانوں کیہڑی گل ذہن چ رکھنی چاہی دی اے؟
17 ماضی دے اوہناں واقعیاں تے سوچ وچار کرو جنہاں چ مُردیاں نُوں زندہ کیتا گیا سی۔ بائبل چ اَٹھ ایہو جہے لوکاں بارے دَسیا گیا اے جنہاں نُوں مُردیاں چوں زندہ کیتا گیا سی۔ c چنگا ہوئے گا کہ اَسی ایہناں وچوں ہر واقعے نُوں پڑھئے تے ایہدے تے سوچوچار کرئیے۔ اِنج کردے ویلے یاد رکھو کہ اوہ لوک حقیقت چ ہے سن۔ اوہناں چ مرد، عورتاں تے بچے شامل سن۔ ویکھو کہ تُسی ایہناں واقعیاں توں کیہہ سکھدے او۔ ایس بارے وی سوچو کہ ہر واقعے توں ایہہ کیویں پتہ چلدا اے کہ خدا مُردیاں نُوں زندہ کرن دی خواہش تے طاقت رکھدا اے۔ سب توں ودھ کے یسوع دے مُردیاں چوں زندہ ہون دے واقعے تے غور کرو کیونکہ ایہہ سب توں خاص واقعہ سی۔ ایس گل نُوں یاد رکھو کہ بوہت سارے لوک ایس گل دے گواہ سن کہ یسوع نُوں مُردیاں چوں زندہ کیتا گیا سی۔ ایس وجہ توں مُردیاں دے جی اُٹھن دی امید تے ساڈا ایمان ہور مضبوط ہوندا اے۔—1-کُرنتھیوں 15:3-6، 20-22۔
18. اَسی اوہناں گیتاں توں فائدہ کیویں حاصل کر سکنے آں جنہاں چ مُردیاں دے جی اُٹھن بارے دَسیا گیا اے؟ (فٹنوٹ نُوں وی ویکھو۔)
18 اوہناں گیتاں توں پورا فائدہ حاصل کرو جنہاں چ مُردیاں دے جی اُٹھن بارے دَسیا گیا اے۔ d (اِفسیوں 5:19) ایہہ گیت تواڈی مدد کرن گے تاکہ تُسی مُردیاں دے جی اُٹھن دی امید تے اپنے ایمان نُوں ہور مضبوط کر سکو۔ ایہناں گیتاں نُوں سنو، ایہناں نُوں گان دی پریکٹس کرو تے اپنی خاندانی عبادت چ ایس بارے گل کرو کہ ایہناں گیتاں دے بولاں توں اَسی کیہہ سکھنے آں۔ ایہناں نُوں اپنے دل تے لکھ لوو۔ فیر جدوں زندگی چ توانوں ایہو جہی کسے مشکل دا سامنا ہوئے گا جدے چ تواڈی اپنی جان خطرے چ ہوئے یاں تواڈا کوئی عزیز فوت ہو جائے تے اوس ویلے یہوواہ دی پاک روح توانوں ایہہ گیت یاد دَوائے گی تاکہ تُسی ایہناں توں ہمت پا سکو۔
19. اَسی اپنے ذہن چ مُردیاں دے جی اُٹھن بارے کیہڑے منظر دی تصویر بنا سکنے آں؟ (بکس ” تُسی اوہناں کولوں کیہہ پچھو گے؟“ نُوں ویکھو۔)
19 اپنے ذہن چ تصویر بناؤ تے سوچو۔ یہوواہ نے سانوں ایہہ صلاحیت دِتی اے کہ اَسی اپنے ذہن چ تصویر بنا سکنے آں کہ اَسی نوِیں دُنیا چ آں۔ ایس بارے اِک بھین نے کہیا: ”مَیں نوِیں دُنیا بارے ایناں زیادہ سوچنی آں کہ مینوں اِنج لگدا اے کہ جیویں مَیں فردوس چ کھڑن والے گلاباں دی خوشبو وی سونگھ سکنی آں۔“ سوچو کہ تُسی فردوس چ او تے یہوواہ دے اوہناں وفادار بندیاں نُوں مِل رہے او جنہاں بارے تُسی بائبل چ پڑھیا سی۔ تُسی نوِیں دُنیا چ کنہوں ملنا چاہندے او؟ تُسی اوہدے کولوں کیہڑے سوال پچھو گے؟ ذرا ایہہ وی سوچو کہ تُسی اپنے اوہناں عزیزاں نُوں مِل رہے او جیہڑے زندہ ہو گئے نیں۔ سوچو کہ تُسی سب توں پہلے اوہناں نُوں کیہہ کہوو گے، تُسی کِنّے پیار نال اوہناں نُوں گلے لاؤ گے تے تواڈیاں اَکھاں چ خوشی دے آنسو ہون گے۔
20. سانوں کیہہ عزم کرنا چاہی دا اے؟
20 اَسی یہوواہ دے بڑے شکرگزار آں کہ اوہنے مُردیاں نُوں زندہ کرن دا وعدہ کیتا اے۔ اَسی پورا یقین رکھ سکنے آں کہ ایہہ وعدہ ضرور پورا ہوئے گا کیونکہ یہوواہ ایہنوں پورا کرن دی خواہش وی رکھدا اے تے طاقت وی۔ آؤ، اَسی عزم کرئیے کہ اَسی ایس وعدے تے اپنے بھروسے نُوں ودھاندے رہواں گے۔ اِنج کرن نال اَسی اپنے خدا دے ہور نیڑے ہو جاواں گے جنہے ساڈے نال ایہہ وعدہ کیتا اے کہ تواڈے عزیز زندہ ہو جان گے۔
گیت نمبر 147: سدا دی زندگی، رَب دا وعدہ
a جے تواڈا کوئی عزیز فوت ہو گیا اے تے یقیناً توانوں مُردیاں دے جی اُٹھن دے وعدے توں بڑی تسلی مِلدی ہوئے گی۔ پر تُسی دُوجیاں نُوں ایہہ کیویں دَس سکدے او کہ توانوں ایس وعدہ تے پورا یقین کیوں اے؟ نالے تُسی ایس وعدے تے اپنے ایمان نُوں مضبوط کیویں کر سکدے او؟ ایہہ مضمون مُردیاں دے جی اُٹھن دی امید تے تواڈے ایمان نُوں ہور مضبوط کرے گا۔
b اُردو زبان چ 1 جنوری 2008 دے ”مینارِنگہبانی“ چ مضمون ”لعزر کی موت کے بعد یسوع مسیح کو اُس کی قبر پر پہنچنے میں چار دن کیوں لگے؟“ نُوں ویکھو۔
c ایہناں واقعیاں نُوں پڑھن لئی ایہناں ایتاں نُوں ویکھو: 1-سلاطین 17:17-24؛ 2-سلاطین 4:32-37؛ 13:20، 21؛ لُوقا 7:11-15؛ 8:41-56؛ یوحنا 11:38-44؛ اعمال 9:36-42؛ 20:7-12۔
d ایہناں گیتاں نُوں کتاب ”یہوواہ دے حضور خوشی نال گاؤ“ چ ویکھو: ”خود کو نئی دُنیا میں تصور کریں“ (گیت نمبر 139 اُردو چ)، ”انعام تے نظر رکھو“ (گیت نمبر 144) تے ”خدا مُردوں کو آواز دے گا“ (گیت نمبر 151 اُردو چ)۔ ایہدے علاوہ ویبسائٹ jw.org تے ایہہ گیت وی ویکھو: ”نویں دُنیا آ گئی“تے ”ویکھ توں وی ہے دُنیا نویں۔“