1.‏ اَسی عبادتاں تے جواب کیوں دینے آں؟‏

 اَسی عبادتاں تے کیوں جانے آں؟ ایہدی سب توں خاص وجہ ایہہ وے کہ اَسی یہوواہ دی وڈیائی کر‌نا چاہنے آں۔ (‏زبور 26:‏12؛‏ 111:‏1‏)‏ اَسی ایس لئی وی عبادتاں تے جانے آں تاکہ اَسی ایس مشکل دَور چ اِک دُوجے دا حوصلہ ودھا سکئے۔ (‏1-‏تھسلُنیکیوں 5:‏11‏)‏ عبادتاں تے جواب دین نال اَسی ایہہ دونویں کم کر رہے ہُنے آں۔‏

2.‏ سانوں عبادتاں تے کدوں جواب دین دا موقع مِلدا اے؟‏

² ساڈے کول ہر ہفتے عبادتاں تے جواب دین دے بوہت موقعے ہوندے نیں۔ مثال لئی، ہفتے دے آخر چ ہون والی عبادت چ ساڈے کول ‏”‏مینارِنگہبانی“‏ دے مطالعے دے دوران جواب دین دا موقع ہوندا اے۔ ‏”‏ساڈی مسیحی زندگی تے خدمت“‏ والی عبادت چ اَسی سنہری گلاں والے حصے چ، کلیسیا دے طور تے بائبل دے مطالعے چ تے دُوجے ایہو جہے حصیاں چ جواب دے سکنے آں جیہڑے گل بات دی صورت چ پیش کیتے جاندے نیں۔‏

3.‏ سانوں کیہڑیاں مشکلاں دا سامنا ہوسکدا اے تے ایس بارے عبرانیوں 10:‏24، 25 ساڈی مدد کیویں کر سکدی اے؟‏

³ اَسی سارے یہوواہ دی وڈیائی کر‌نا تے اپنے ہم‌ایماناں دا حوصلہ ودھانا چاہنے آں۔ پر جواب دیندے ویلے شاید سانوں کجھ مشکلاں دا سامنا ہوئے۔ ہو سکدا اے کہ سانوں جواب دین چ گھبراہٹ محسوس ہووے یاں فیر سانوں جواب دینا بڑا پسند ہووے پر ہتھ کھڑا کر‌ن دے باوجود ہر وار ساڈے کولوں جواب نہ پچھیا جائے۔ ایس سلسلے چ سانوں اوس گل توں بڑی مدد مِل سکدی اے جیہڑی پولُس رسول نے عبرانیوں دے ناں اپنے خط چ کہی۔ اوہنے اِک دُوجے نال جمع ہون دی اہمیت تے گل کر‌دے ہوئے کہیا:‏ سانوں اپنا دھیان اِک دُوجے دا حوصلہ ودھان تے رکھنا چاہی دا اے۔ ‏(‏عبرانیوں 10:‏24، 25 نُوں پڑھو۔)‏ جدوں اَسی ایہہ گل سمجھ جانے آں کہ جواب دین نال اَسی اپنے ایمان دا اظہار کر رہے ہُنے آں  نالے ساڈے سادے جہے جواب توں وی دُوجیاں دا حوصلہ ودھ سکدا اے تے سانوں جواب دین لئی ہتھ کھڑا کر‌دے ویلے گھبراہٹ نئیں ہوئے گی۔ ایہدے علاوہ جے ساڈے کولوں ہر وار جواب نئیں پچھیا جاندا تے اَسی ایس گل توں خوش ہو سکنے آں کہ دُوجیاں نُوں جواب دین دا موقع مِل رہیا اے۔—‏1-‏پطرس 3:‏8‏۔‏

4.‏ ایس مضمون چ اَسی کیہڑیاں تِن گلاں تے غور کر‌اں گے؟‏

⁴ ایس مضمون چ اَسی سب توں پہلاں ایس بارے گل کر‌اں گے کہ جے اَسی اِک چھوٹی کلیسیا چ آں جتھے جواب دین لئی زیادہ بھین بھرا نئیں نیں تے اَسی اِک دُوجے دا حوصلہ کیویں ودھا سکنے آں۔ فیر اَسی ایس گل تے غور کر‌اں گے کہ جے اَسی اِک وڈی کلیسیا چ آں جتھے جواب دین لئی بوہت سارے بھین بھرا ہتھ کھڑا کر‌دے نیں تے اَسی اِک دُوجے دا حوصلہ کیویں ودھا سکنے آں۔ آخر چ اَسی ویکھاں گے کہ اَسی ایہو جہے جواب کیویں دے سکنے آں جنہاں توں دُوجیاں دا حوصلہ ودھے۔‏

5.‏ جے اَسی گروپ یاں چھوٹی کلیسیا چ آں تے اَسی اِک دُوجے دا حوصلہ ودھان لئی کیہہ کر سکنے آں؟‏

⁵ گروپ یاں چھوٹی کلیسیا چ جواب دین لئی زیادہ بھین بھرا نئیں ہوندے۔ ایس لئی ہو سکدا اے کہ مطالعیا لین والے بھرا نُوں جواب آن دا تھوڑا اِنتظار کر‌نا پووے۔ اِنج بھین بھرا عبادت چ بور ہو سکدے نیں تے شاید اوہناں دا حوصلہ وی نہ ودھے۔ ایہو جہے حالات چ تُسی کیہہ کر سکدے او؟ جواب دین لئی زیادہ توں زیادہ ہتھ کھڑا کر‌و۔ اِنج دُوجے بھین بھراواں دا حوصلہ ودھے گا کہ اوہ وی زیادہ توں زیادہ جواب دین۔‏

6، 7.‏ جے سانوں جواب دین چ گھبراہٹ محسوس ہوندی اے تے اَسی ایہدے تے قابو کیویں پا سکنے آں؟‏

⁶ جے توانوں جواب دین بارے سوچ کے ای گھبراہٹ محسوس ہون لگ پیندی اے تے تُسی کیہہ کر سکدے او؟ بوہت سارے بھین بھراواں نُوں اِنج ای محسوس ہوندا اے۔ پر جے تُسی اپنے بھین بھراواں دا حوصلہ ودھانا چاہندے او تے ایس گھبراہٹ تے قابو پان لئی کجھ طریقے لبھو۔ تُسی اِنج کیویں کر سکدے او؟‏

⁷ توانوں اوہناں مشوریاں توں بوہت فائدہ ہو سکدا اے جیہڑے ساڈے کجھ ‏”‏مینارِنگہبانی“‏ رسالیاں چ دِتے گئے سن۔‏ b جیویں کہ چنگی تیاری کر‌و۔ (‏امثال 21:‏5‏)‏ جے توانوں پہلے توں پتہ ہوئے گا کہ مضمون چ کیہہ کجھ دَسیا گیا اے تے تواڈے لئی جواب دینا زیادہ اسان ہوئے گا۔ ایہدے علاوہ چھوٹے جواب دَوو۔ (‏امثال 15:‏23؛‏ 17:‏27‏)‏ اِک چھوٹا جواب دین چ توانوں اونی گھبراہٹ نئیں ہوئے گی جِنّی اِک لما جواب دین ویلے ہوندی اے۔ جے تواڈا جواب اِک یاں دو جملیاں دا ہوئے گا تے بھین بھراواں لئی ایہنوں سمجھنا اسان ہوئے گا۔ جے تُسی اپنے لفظاں چ اِک چھوٹا جواب دَوو گے تے ایہدے توں پتہ چلے گا کہ تُسی چنگی تیاری کیتی ہوئی اے تے تُسی اوس مضمون چ دَسیاں گلاں نُوں چنگی طرحاں سمجھ گئے او۔‏

8.‏ یہوواہ ساڈیاں کوششاں بارے کیہو جیہا محسوس کر‌دا اے؟‏

⁸ جے ایہناں مشوریاں تے عمل کر‌ن دے بعد وی توانوں اِک یاں دو توں زیادہ جواب دین چ گھبراہٹ ہوندی اے تے تُسی کیہہ کر سکدے او؟ ایس گل دا یقین رکھو کہ تُسی جواب دین لئی جیہڑیاں کوششاں کر‌دے او، یہوواہ اوہناں دی بوہت قدر کر‌دا اے۔ (‏لُوقا 21:‏1-‏4‏)‏ یہوواہ سانوں کوئی ایہو جیہا کم کر‌ن لئی نئیں کہندا جیہڑا ساڈے وَسوں باہر ہووے۔ (‏فِلپّیوں 4:‏5‏)‏ ایس لئی سوچو کہ تُسی کیہہ کر سکدے او۔ فیر اوہنوں کر‌ن دا منصوبہ بناؤ تے یہوواہ کولوں دُعا کر‌و۔ شروع چ شاید تُسی اِک چھوٹا جیہا جواب دین دا منصوبہ بنا سکدے او۔‏

9.‏ وڈیاں کلیسیاواں چ جواب دینا مشکل کیوں ہوسکدا اے؟‏

⁹ جے تواڈی کلیسیا چ بوہت سارے بھین بھرا نیں تے شاید توانوں اِک فرق قسم دے مسئلے دا سامنا ہوئے۔ ہو سکدا اے کہ جواب دین لئی اینے زیادہ بھین بھرا ہتھ کھڑا کر‌ن کہ توانوں جواب دین دا موقع ای نہ ملے۔ مثال لئی، ڈیبرا ناں دی اِک بھین نے دَسیا کہ اوہنوں ہمیشاں توں ای عبادتاں  تے جواب دینا بڑا چنگا لگدا اے۔‏ c اوہ کہندی اے:‏ ”‏ایہہ نہ صرف یہوواہ دی عبادت دا اِک حصہ اے سگوں ایہدے توں دُوجیاں دا حوصلہ ودھدا اے تے بائبل دِیاں سچائیاں تے ساڈا اپنا ایمان وی مضبوط ہوندا اے۔“‏ جدوں بھین ڈیبرا اِک وڈی کلیسیا چ چلی گئی تے اوہنوں جواب دین دا گھٹ ای موقع مِلدا سی۔ کدی کدار تے پوری عبادت دے دوران اوہنوں اِک وار وی جواب دین دا موقع نئیں سی مِلدا۔ اوہنے کہیا:‏ ”‏مینوں بوہت غصہ آن لگ پیا۔ مینوں اِنج لگ رہیا سی کہ جیویں میرے کولوں کوئی اعزاز کھو لیا گیا اے۔ تے جدوں تواڈے نال اِنج وار وار ہوندا اے تے تُسی سوچن لگ پیندے او کہ شاید جان‌بجھ کے تواڈے کولوں جواب نئیں پچھیا جا رہیا۔“‏

10.‏ اَسی کیہہ کر سکنے آں تاکہ سانوں جواب دین دا زیادہ موقع ملے؟‏

¹⁰ کیہہ تُسی وی کدی بھین ڈیبرا وانگوں محسوس کیتا اے؟ جے ہاں، تے شاید تُسی ہمت ہار جاؤ تے ایہہ سوچن لگ پوو کہ مَیں صرف عبادت سُناں گا پر جواب نئیں دَواں گا۔ پر جواب دین دی کوشش کر‌دے رہوو۔ تُسی اِنج کیویں کر سکدے او؟ ہر عبادت لئی زیادہ توں زیادہ جواب تیار کر‌و۔ اِنج تواڈے کول موقع ہوئے گا کہ جے مطالعے دے شروع چ تواڈے کولوں جواب نئیں پچھیا جاندا تے تُسی اگلے پیراگرافاں تے جواب دے سکدے او۔ جدوں تُسی ‏”‏مینارِنگہبانی“‏ دی تیاری کر رہے ہوندے او تے سوچو کہ ہر پیراگراف دا موضوع نال کیہہ تعلق اے۔ اِنج کر‌ن نال تُسی پورے مطالعے دے دوران کوئی نہ کوئی جواب ضرور دے سکو گے۔ ایہدے علاوہ تُسی کجھ ایہو جہے پیراگرافاں دے جواب تیار کر سکدے او جنہاں چ بائبل دِیاں ایہو جہیاں سچائیاں بارے گل کیتی جا رہی ہوندی اے جنہاں دی وضاحت کر‌نا اسان نئیں ہوندا۔ (‏1-‏کُرنتھیوں 2:‏10‏)‏ پر کیوں؟ کیونکہ ایہو جہے حصے تے گھٹ ای بھین بھرا جواب دیندے نیں۔ جے ایہناں مشوریاں تے عمل کر‌ن دے بعد وی توانوں جواب دین دا موقع نئیں مِلدا تے تُسی کیہہ کر سکدے او؟ تُسی عبادت دے شروع ہون توں پہلاں مطالعیا لین والے بھرا نُوں دَس سکدے او کہ تُسی کیہڑے سوال دا جواب دینا چاہندے او۔‏

11.‏ فِلپّیوں 2:‏4 چ سانوں کیہہ کر‌ن دی ہلاشیری دِتی گئی اے؟‏

¹¹ فِلپّیوں 2:‏4 نُوں پڑھو۔‏ پاک روح دی رہنمائی چ پولُس رسول نے مسیحیاں نُوں ہلاشیری دِتی کہ اوہ دُوجیاں دے بھلے بارے سوچن۔ اَسی عبادتاں دے دوران ایس گل تے کیویں عمل کر سکنے آں؟ سانوں یاد رکھنا چاہی دا اے کہ ساڈے وانگوں دُوجے وی جواب دینا چاہندے نیں۔‏

12.‏ عبادتاں چ دُوجیاں دا حوصلہ ودھان دا اِک طریقہ کیہہ اے؟ (‏تصویر نُوں وی ویکھو۔)‏

¹² ذرا ایس بارے سوچو:‏ کیہہ تُسی اپنے دوستاں نال گل بات کر‌دے  ویلے ایناں زیادہ بولو گے کہ اوہناں نُوں گل کر‌ن دا موقع ای نہ ملے؟ بالکل نئیں، سگوں تُسی چاہوو گے کہ اوہ وی گل کر‌ن۔ ایسے طرحاں اَسی چاہنے آں کہ عبادتاں تے وی زیادہ توں زیادہ بھین بھرا جواب دین۔ اصل چ اپنے بھین بھراواں دا حوصلہ ودھان دا اِک ودھیا طریقہ ایہہ وے کہ اَسی اوہناں نُوں اپنے ایمان دا اظہار کر‌ن دا موقع دَئیے۔ (‏1-‏کُرنتھیوں 10:‏24‏)‏ آؤ ویکھئے کہ اَسی اِنج کیویں کر سکنے آں؟‏

13.‏ اَسی کیہہ کر سکنے آں تاکہ زیادہ توں زیادہ بھین بھراواں نُوں جواب دین دا موقع ملے؟‏

¹³ اِک طریقہ ایہہ وے کہ اَسی چھوٹے جواب دَئیے۔‏ اِنج وقت بچے گا تے زیادہ توں زیادہ لوک جواب دے سکن گے۔ ایس حوالے نال بزرگ تے تجربہ کار بھین بھرا چنگی مثال قائم کر سکدے نیں۔ جے تواڈا جواب چھوٹا وی اے تے پیراگراف چ دَسے سارے نکتیاں تے گل نہ کر‌و۔‏ جے تُسی پیراگراف چ دَسی ہر گل دَس دَوو گے تے دُوجیاں کول دَسن لئی کجھ نئیں بچے گا۔ مثال لئی، ایس پیراگراف چ دو مشورے دِتے گئے نیں۔ اِک تے ایہہ وے کہ تُسی چھوٹا جواب دَوو تے دُوجا ایہہ وے کہ پیراگراف چ دَسے گئے ہر نکتے تے گل نہ کر‌و۔ جے تواڈے کولوں ایس پیراگراف تے سب توں پہلاں جواب پچھیا جاندا اے تے کوشش کر‌و کہ تُسی ایہناں دو نکتیاں چوں کسے اِک بارے دَسو۔‏

14.‏ اَسی ایہہ فیصلہ کیویں کر سکنے آں کہ اَسی جواب دین لئی کِنّی واری ہتھ کھڑا کر‌اں گے؟ (‏تصویر نُوں وی ویکھو۔)‏

¹⁴ اَسی سمجھداری نال ایس گل دا فیصلہ کر سکنے آں کہ اَسی جواب دین لئی کِنّی واری ہتھ کھڑا کر‌اں گے۔ جے اَسی وار وار ہتھ کھڑا کر‌اں گے تے شاید مطالعیا یاں عبادت دا کوئی ہور حصہ لین والا بھرا ساڈے کولوں جواب پچھن تے مجبور ہو جائے جد کہ دُوجے بھین بھراواں نُوں حالے تک جواب دین دا موقع نہ ملیا ہوئے۔ اِنج دُوجے بھین بھرا بےحوصلہ ہو جان گے تے جواب دین لئی ہتھ نئیں کھڑا کر‌ن گے۔—‏واعظ 3:‏7‏۔‏

15.‏ (‏الف)‏ جے ساڈے کولوں جواب نئیں پچھیا جاندا تے سانوں کیہہ نئیں کر‌نا چاہی دا؟ (‏ب)‏ عبادت چ کوئی حصہ لین والا بھرا کیہہ کر سکدا اے تاکہ ساریاں نُوں جواب دین دا موقع ملے؟ (‏بکس ‏”‏ جے تُسی مطالعیا یاں عبادت دا کوئی ہور حصہ لے رہے او‏“‏ نُوں ویکھو۔)‏

¹⁵ جے جواب دین لئی بوہت سارے بھین بھرا ہتھ کھڑا کر‌دے نیں تے شاید سانوں اونی وار جواب دین دا موقع نہ ملے جِنّی وار اَسی چاہنے  آں۔ کدی کدار شاید مطالعیا یاں عبادت دا کوئی ہور حصہ لین والا بھرا ساڈے کولوں اِک وی جواب نہ پچھے۔ ایس گل دی وجہ توں شاید اَسی مایوس ہو جائیے۔ پر سانوں ناراض نئیں ہونا چاہی دا۔—‏واعظ 7:‏9‏۔‏

16.‏ اَسی اوہناں بھین بھراواں دا حوصلہ کیویں ودھا سکنے آں جیہڑے جواب دیندے نیں؟‏

¹⁶ جے توانوں اونی وار جواب دین دا موقع نئیں ملیا جِنّی وار تُسی چاہندے او تے تُسی دُوجیاں دے جواب دھیان نال سُنو تے عبادت دے بعد اوہناں دی تعریف کر‌و۔ بھین بھراواں نُوں اپنے جواباں دی تعریف سُن کے اوناں ای حوصلہ ملے گا جِنّاں تواڈا جواب سُن کے مِلدا۔ (‏امثال 10:‏21‏)‏ ایہہ بھین بھراواں دا حوصلہ ودھان دا اِک ہور طریقہ اے۔‏

17.‏ (‏الف)‏ ماں پیو اِک چنگا جواب تیار کر‌ن چ اپنے بچیاں دی مدد کیویں کر سکدے نیں؟ (‏ب)‏ جیویں کہ ویڈیو چ وکھایا گیا اے، اِک چنگا جواب تیار کر‌ن لئی اَسی کیہڑے چار کم کر سکنے آں؟ (‏فٹ‌نوٹ نُوں وی ویکھو۔)‏

¹⁷ اَسی ہور کیہڑے طریقیاں نال عبادت چ اِک دُوجے دا حوصلہ ودھا سکنے آں؟ جے تُسی ماں پیو او تے اپنے بچیاں نُوں اوہناں دی عمر دے حساب نال چنگا جواب تیار کر‌ن چ مدد کر‌و۔ (‏متی 21:‏16‏)‏ کدی کدار مطالعے دے دوران شادی‌شُدہ زندگی دے مسئلیاں بارے یاں اپنے چال چلن نُوں پاک رکھن بارے گل ہو رہی ہوندی اے۔ پر اوہدے چ اِک یاں دو پیراگراف ایہو جہے وی ہو سکدے نیں جنہاں تے کوئی بچہ جواب دے سکدا  اے۔ ایہدے علاوہ اپنے بچیاں نُوں ایہہ وی سمجھاؤ کہ ہر وار اوہناں کولوں جواب کیوں نئیں پچھیا جائے گا۔ اِنج اوہ اوس ویلے بےحوصلہ نئیں ہون گے جدوں اوہناں دی بجائے کسے ہور کولوں جواب پچھیا جاندا اے۔—‏1-‏تیمُتھیُس 6:‏18‏۔‏ d

18.‏ اَسی جواب دیندے ویلے اپنے آپ تے دھیان دَوان توں کیویں بچ سکنے آں؟ (‏امثال 27:‏2‏)‏

¹⁸ اَسی سارے ایہو جہے جواب تیار کر سکنے آں جنہاں توں یہوواہ دی وڈیائی ہووے تے ساڈے بھین بھراواں دا حوصلہ ودھے۔ (‏امثال 25:‏11‏)‏ ہو سکدا اے کہ کجھ موقعیاں تے اَسی اپنے ذاتی تجربے دَسیئے۔ پر سانوں اپنے بارے بوہتی گل نئیں کر‌نی چاہی دی۔ ‏(‏امثال 27:‏2 نُوں پڑھو؛‏ 2-‏کُرنتھیوں 10:‏18‏)‏ ایہدی بجائے ساڈے جواباں توں نظر آنا چاہی دا اے کہ ساڈے لئی یہوواہ،اوہدا کلام تے اوہدے بندے بوہتے اہم نیں۔ (‏مکاشفہ 4:‏11‏)‏ جے کسے پیراگراف دے سوال چ ساڈی ذاتی رائے پچھی جاندی اے تے سانوں ایہہ دسنی چاہی دی اے۔ ایہدی اِک مثال اَسی اگلے پیراگراف دے سوال چ ویکھ سکنے آں۔‏

19.‏ (‏الف)‏ جدوں اَسی عبادت تے آئے سارے بھین بھراواں بارے سوچاں گے تے ایہدا کیہہ نتیجہ نکلے گا؟ (‏رومیوں 1:‏11، 12‏)‏ (‏ب)‏ توانوں عبادتاں چ جواب دین بارے کیہڑی گل سب توں چنگی لگدی اے؟‏

¹⁹ ایہدے لئی کوئی سخت قانون نئیں اے کہ اَسی کیویں جواب دے سکنے آں تے کیویں نئیں۔ پر سانوں ساریاں نُوں کوشش کر‌نی چاہی دی اے کہ اَسی اپنے جواباں توں اِک دُوجے دا حوصلہ ودھائیے۔ ایہدا مطلب ایہہ ہوسکدا اے کہ اَسی زیادہ جواب دین دی کوشش کر‌ئیے۔ یاں ایہدا ایہہ مطلب وی ہو سکدا اے کہ سانوں جواب دین دا جِنّاں وی موقع ملیا اے اَسی اوہدے توں خوش ہوئیے تے ایس گل توں وی خوش ہوئیے کہ دُوجیاں نُوں وی جواب دین دا موقع ملیا اے۔ جدوں اَسی عبادت تے اپنے نالوں بوہتا دُوجیاں بارے سوچاں گے تے اِنج سانوں ساریاں نُوں اِک دُوجے توں حوصلہ ملے گا۔—‏رومیوں 1:‏11، 12 نُوں پڑھو۔‏