1.‏ سانوں کیہڑیاں گلاں دا یقین اے؟‏

 اَسی یہوواہ دے بندے آں ایس لئی سانوں پتہ اے کہ اوہ سانوں بڑا پیار کر‌دا اے نالے اوہ چاہندا اے کہ اَسی خوشیاں بھری زندگی گزاریئے۔ (‏رومیوں 8:‏35-‏39‏)‏ سانوں ایس گل تے وی یقین اے کہ بائبل دے اصولاں دے مطابق زندگی گزار کے سانوں ہمیشاں فائدہ ہوندا اے۔ (‏یسعیاہ 48:‏17، 18‏)‏ پر فیر وی جدوں سانوں ایہو جہیاں مشکلاں دا سامنا کر‌نا پیندا اے جنہاں بارے اَسی سوچیا وی نئیں ہوندا تے اَسی کیہہ کر سکنے آں؟‏

2.‏ (‏الف)‏ سانوں کیہڑیاں مشکلاں دا سامنا ہو سکدا اے؟ (‏ب)‏ مشکلاں دا سامنا کر‌دے ویلے ساڈے دل چ کیہڑیاں گلاں آ سکدیاں نیں؟‏

² یہوواہ دے سارے بندیاں نُوں مشکلاں دا سامنا کر‌نا پیندا اے۔ مثال لئی شاید ساڈے گھر والیاں دے کسے کم توں سانوں تکلیف پونچے یاں شاید سانوں کوئی ایہو جہی بیماری ہو جائے جدی وجہ توں اَسی یہوواہ دی خدمت پہلے وانگوں نہ کر پائیے۔ ایہہ وی ہو سکدا اے کہ کسے قدرتی آفت دی وجہ توں سانوں بڑا نقصان پونچے یاں شاید سانوں ساڈے ایمان دی وجہ توں ظلم سہنا پووے۔ ایہو جہیاں مشکلاں دا سامنا کر‌دے ویلے شاید اَسی سوچن لگ پئیے کہ ”‏میرے نال ایہہ سب کجھ کیوں ہو رہیا اے؟ کیہہ مَیں کجھ غلط کیتا اے؟ کیہہ یہوواہ میرے توں ناراض اے؟“‏ کیہہ توانوں کدی اِنج محسوس ہویا  اے؟ جے تواڈا جواب ہاں اے تے مایوس نہ ہووو کیونکہ یہوواہ دے بوہت سارے وفادار بندیاں دے دل چ ایہو جہیاں گلاں آئیاں سن۔—‏زبور 22:‏1، 2؛‏ حبقوق 1:‏2، 3‏۔‏

3.‏ اَسی زبور 34:‏19 توں کیہہ سکھنے آں؟‏

³ زبور 34:‏19 نُوں پڑھو۔‏ اَسی ایس زبور توں ایہہ دو اہم گلاں سکھنے آں:‏ (‏1)‏ صادق یعنی نیک لوکاں تے مشکلاں آندیاں نیں۔ (‏2)‏ یہوواہ سانوں ساڈیاں مصیبتاں توں بچاندا اے۔ پر یہوواہ اِنج کیویں کر‌دا اے؟ اِک طریقہ ایہہ وے کہ اوہ ساڈی ایہہ سمجھن چ مدد کر‌دا اے کہ شیطان دی بُری دُنیا چ ساڈے تے مشکلاں آن گیاں۔ اوہنے ساڈے نال وعدہ کیتا اے کہ جے اَسی اوہدی خدمت کر‌اں گے تے سانوں خوشی ملے گی۔ پر اوہنے ایہہ نئیں کہیا کہ ساڈے تے کدی کوئی مشکل نئیں آئے گی‏۔‏ (‏یسعیاہ 66:‏14‏)‏ اوہ سانوں کہندا اے کہ اَسی اپنا دھیان آن والے ویلے تے رکھیئے جدوں اَسی ہمیشاں تک خوشیاں بھری زندگی گزاراں گے۔ (‏2-‏کُرنتھیوں 4:‏16-‏18‏)‏ پر جدوں تک اوہ ویلا نئیں آندا، یہوواہ ساڈی مدد کر‌دا اے تاکہ اَسی ہمت نہ ہاریئے۔—‏نوحہ 3:‏22-‏24‏۔‏

4.‏ ایس مضمون چ اَسی کیس بارے گل کر‌اں گے؟‏

⁴ آؤ غور کر‌ئیے کہ اَسی پرانے زمانے تے اَج دے زمانے دے یہوواہ دے بندیاں توں کیہہ سکھنے آں۔ اَسی ویکھاں گے کہ سانوں ایہو جہیاں مشکلاں دا سامنا ہو سکدا اے جنہاں بارے شاید اَسی سوچیا وی نہ ہووے۔ پر جے اَسی یہوواہ تے بھروسا کر‌اں گے تے اوہ ہر حال چ سانوں سنبھالے گا۔ (‏زبور 55:‏22‏)‏ ایہناں لوکاں دِیاں مثالاں تے غور کر‌دے ویلے سوچو کہ ”‏جے مَیں اوہناں دی جگہ تے ہوندا تے مَیں کیہہ کر‌دا؟ اوہناں دی زندگی تے غور کر‌ن نال یہوواہ تے میرا بھروسا کیویں ودھدا اے؟ اوہناں دی مثال توں مَیں جو کجھ سکھیا اے، اوہدے تے مَیں کیویں عمل کر سکنا واں؟“‏

5.‏ لابن دی وجہ توں یعقوب نُوں کیہڑیاں مشکلاں دا سامنا کر‌نا پیا؟ (‏پہلے صفحے دی تصویر نُوں ویکھو۔)‏

⁵ پرانے زمانے چ وی خدا دے بندیاں نُوں ایہو جہیاں مشکلاں دا سامنا کر‌نا پیا جنہاں بارے اوہناں نے سوچیا وی نئیں سی۔ ذرا یعقوب دی مثال تے غور کر‌و۔ اوہدے پیو نے اوہنوں کہیا سی کہ اوہ اپنے ماموں لابن دِیاں دِھیاں وچوں کسے اِک نال ویاہ کر‌ے کیونکہ اوہ وی یہوواہ دی عبادت کر‌دا سی۔ یعقوب دے پیو نے اوہنوں ایہہ وی کہیا سی کہ جے اوہ اوہدی گل منے گا تے یہوواہ اوہنوں بوہت ساریاں برکتاں دَوے گا۔ (‏پیدایش 28:‏1-‏4‏)‏ یعقوب نے اِنج ای کیتا۔ اوہ کنعان توں سفر کر کے لابن دے گھر پونچیا۔ لابن دِیاں دو دِھیاں سن، لیاہ تے راخل۔ یعقوب نُوں لابن دی چھوٹی دھی راخل نال محبت ہو گئی تے اوہ اوہدے نال شادی کر‌ن لئی سَت سالاں تک اوہدے پیو دی خدمت کر‌ن لئی تیار ہو گیا۔ (‏پیدایش 29:‏18‏)‏ پر یعقوب نے سوچیا کجھ سی تے ہویا کجھ۔ لابن نے دھوکھے نال اپنی وڈی دھی لیاہ دی شادی یعقوب نال کر‌ا دِتی۔ لابن نے یعقوب نُوں کہیا کہ اوہ اِک ہفتے بعد راخل نال وی اوہدا ویاہ کر‌وا دَوے گا پر اوہنوں ہور سَت سالاں تک اوہدے لئی کم کر‌نا پووے گا۔ (‏پیدایش 29:‏25-‏27‏)‏ لابن نے کاروباری معاملیاں چ وی یعقوب نال دھوکھا کیتا۔ اوہ 20 سالاں تک اوہدے نال ناانصافی کر‌دا رہیا۔—‏پیدایش 31:‏41، 42‏۔‏

6.‏ یعقوب نُوں ہور کیہڑیاں مشکلاں برداشت کر‌نیاں پئیاں؟‏

⁶ یعقوب نے ہور وی بڑیاں مشکلاں برداشت کیتیاں۔ اوہدا خاندان بوہت وڈا سی۔ پر اوہدے پُتراں دی آپس چ نئیں بن دی سی۔ ایتھوں تک کہ اوہناں نے اپنے چھوٹے بھرا یوسف نُوں غلام بنن لئی ویچ دِتا۔ نالے یعقوب دے پُتراں شمعون تے لاوی دی وجہ توں پورے خاندان نُوں شرمندگی چکنی پئی تے یہوواہ دے ناں دی بدنامی ہوئی۔ ایہدے علاوہ اوہدی پیاری بیوی راخل اپنے دُوجے پُتر دی پیدائش دے ویلے فوت ہو گئی۔ نالے جدوں یعقوب بڈھا ہو گیا تے اوہنوں مصر جانا پیا کیونکہ اوہدے ملک چ کال پے گیا سی۔—‏پیدایش 34:‏30؛‏ 35:‏16-‏19؛‏ 37:‏28؛‏ 45:‏9-‏11،‏ 28‏۔‏

7.‏ یہوواہ نے کیویں ثابت کیتا کہ اوہ یعقوب دے نال اے؟‏

⁷ ایہناں ساریاں مشکلاں دے باوجود یعقوب دا یہوواہ تے اوہدے وعدیاں اُتے بھروسا قائم رہیا۔ نالے یہوواہ نے وی ایہہ ثابت کیتا کہ اوہ  یعقوب دے نال اے۔ مثال لئی، بھانویں کہ لابن نے یعقوب نُوں کئی وار دھوکھا دِتا پر فیر وی یہوواہ نے یعقوب نُوں بوہت ساریاں برکتاں دِتیاں۔ ذرا سوچو کہ جدوں یعقوب دُبارہ توں اپنے پُتر یوسف نُوں ملیا تے اوہ یہوواہ دا کِنّاں شکرگزار ہویا ہوئے گا۔ اوہنوں اِنج محسوس ہویا ہوئے گا جیویں کہ اوہدا پُتر دُبارہ زندہ ہو گیا اے۔ یہوواہ نال گُوڑھی دوستی دی وجہ توں یعقوب ایہناں ساریاں مشکلاں نُوں برداشت کر پایا۔ (‏پیدایش 30:‏43؛‏ 32:‏9، 10؛‏ 46:‏28-‏30‏)‏ یہوواہ دے نیڑے رہ کے اَسی وی اوہناں مشکلاں نُوں برداشت کر سکنے آں جنہاں بارے اَسی کدی سوچیا وی نئیں ہوندا۔‏

8.‏ بادشاہ داؤد کیہہ کر‌نا چاہندا سی؟‏

⁸ بادشاہ داؤد یہوواہ لئی اوہ سب کجھ نئیں کر پایا جو اوہ کر‌نا چاہندا سی۔ مثال لئی، داؤد دی بڑی خواہش سی کہ اوہ یہوواہ لئی ہیکل بنائے۔ جدوں اوہنے اپنی ایس خواہش بارے ناتن نبی نُوں دَسیا تے اوہنے کہیا:‏ جو کجھ تیرے دل چ اے اوہ کر کیونکہ خدا تیرے نال اے۔ (‏1-‏تواریخ 17:‏1، 2‏)‏ اَسی سوچ سکنے آں کہ ناتن نبی دی گل سُن کے داؤد نُوں کِنّاں حوصلہ ملیا ہوئے گا۔ شاید اوہنے فوراً ای ایس وڈے منصوبے لئی تیاریاں کر‌نیاں شروع کر دِتیاں ہون۔‏

9.‏ مایوس کر دین والی خبر سُن کے داؤد نے کیہہ کیتا؟‏

⁹ پر کجھ ای دیر بعد ناتن نبی داؤد کول اِک خبر لے کے آیا جنہوں سُن کے اوہ مایوس ہو گیا۔ اوسے رات یہوواہ نے ناتن نبی نُوں دَسیا کہ داؤد ہیکل نئیں بنائے گا سگوں اوہدا اِک پُتر ایہہ کم کر‌ے گا۔ (‏1-‏تواریخ 17:‏3، 4،‏ 11، 12‏)‏ ایہہ خبر سُن کے داؤد نے کیہہ کیتا؟ اوہنے اپنی سوچ یہوواہ دی مرضی مطابق ڈھالی۔ اوہنے ہیکل بنان لئی ضروری سامان تے پیسے کٹھے کیتے تاکہ ایہہ سلیمان دے کم آ سکن۔—‏1-‏تواریخ 29:‏1-‏5‏۔‏

10.‏ یہوواہ نے داؤد نُوں کیویں برکت دِتی؟‏

¹⁰ داؤد نُوں ایہہ دَسن توں فوراً بعد کہ اوہ ہیکل نُوں نئیں بنائے گا، یہوواہ نے اوہدے نال اِک عہد بنھیا۔ یہوواہ نے داؤد نال وعدہ کیتا کہ اوہدی نسل چوں اِک شخص ہمیشاں تک حکمرانی کر‌ے گا۔ (‏2-‏سموئیل 7:‏16‏)‏ ذرا سوچو کہ یسوع مسیح دی ہزار سالہ حکمرانی دے دوران داؤد نُوں ایہہ جان کے کِنّی خوشی ہوئے گی کہ خدا دی بادشاہی دا حکمران اوہدی نسل چوں اے۔ ایس واقعے توں اَسی سکھنے آں کہ بھانویں اَسی یہوواہ لئی اوہ سب کجھ نہ کر پائیے جو اَسی کر‌نا چاہنے آں پر فیر وی اوہ سانوں شاید ایہو جہیاں برکتاں دَوے جنہاں بارے اَسی سوچیا وی نئیں۔‏

11.‏ بھانویں کہ بادشاہی اوہدوں نئیں آئی جدوں پہلی صدی دے مسیحی ایہدی توقع کر رہے سن پر فیر وی اوہناں نے کیہڑیاں چنگیاں گلاں دا تجربہ کیتا؟ (‏اعمال 6:‏7‏)‏

¹¹ پہلی صدی دے مسیحیاں نُوں کجھ ایہو جہیاں مشکلاں دا سامنا کر‌نا پیا جنہاں بارے اوہناں نے سوچیا وی نئیں سی۔ مثال لئی، اوہ خدا دی بادشاہی دا بےصبری نال اِنتظار کر رہے سن پر اوہ ایہہ نئیں جان دے سن کہ ایہہ کدوں آئے گی۔ (‏اعمال 1:‏6، 7‏)‏ فیر اوہناں نے کیہہ کیتا؟ اوہ مُنادی کر‌ن چ لگے رہے۔ جیویں جیویں اوہناں نے زیادہ توں زیادہ علاقیاں چ بادشاہی دی خوش‌خبری نُوں پھیلایا، اوہناں نے ویکھیا کہ یہوواہ ایس کم چ اوہناں دی مدد کر رہیا اے۔‏‏—‏اعمال 6:‏7 نُوں پڑھو۔‏

12.‏ جدوں اِک بوہت وڈا کال پیا تے پہلی صدی دے مسیحیاں نے کیہہ کیتا؟‏

¹² اِک واری پورے ملک چ بڑا وڈا کال پیا۔ (‏اعمال 11:‏28‏)‏ ذرا سوچو کہ کھان پین دِیاں چیزاں دی کمی دی وجہ توں پہلی صدی دے مسیحیاں نُوں کِنّیاں مشکلاں دا سامنا کر‌نا پیا ہوئے گا۔ گھر دے سربراہ ایس گل دی وجہ توں پریشان ہو گئے ہون گے کہ اوہ اپنے گھر والیاں دِیاں ضرورتاں نُوں کیویں پورا کر‌ن گے۔ نالے اوہ جوان جیہڑے زیادہ توں زیادہ مُنادی کر‌ن دا منصوبہ بنا رہے سن اوہناں تے ایہدا کیہہ اثر پیا ہوئے گا؟ شاید اوہ ایہہ سوچ رہے ہون کہ اوہناں نُوں اوہدوں تک اپنے منصوبیاں نُوں روک دینا چاہی دا اے، جدوں تک کال مُک نئیں جاندا۔ ایہناں حالاتاں دے باوجود اوہناں مسیحیاں نے اپنے آپ نُوں نویں حالاتاں مطابق ڈھالیا۔ اوہناں نے فرق فرق طریقیاں نال مُنادی کر‌نی شروع کیتی تے اوہناں نے بڑی خوشی نال یہودیہ چ رہن والے اپنے ہم‌ایماناں دے نال اپنیاں چیزاں وَنڈیاں۔—‏اعمال 11:‏29، 30‏۔‏

13.‏ کال دے دوران یہوواہ نے پہلی صدی دے مسیحیاں نُوں کیہڑیاں برکتاں دِتیاں؟‏

¹³ کال دے دوران وی یہوواہ نے پہلی صدی دے مسیحیاں نُوں  کیہڑیاں برکتاں دِتیاں؟ یہوواہ نے اوہناں دِیاں ضرورتاں نُوں پورا کر‌ن لئی اوہناں دے ہم‌ایماناں نُوں استمال کیتا۔ (‏متی 6:‏31-‏33‏)‏ ایہدی وجہ توں اوہناں بھین بھراواں دا آپس چ پیار کِنّاں ودھیا ہوئے گا۔ نالے جیہڑے مسیحیاں نے عطیات دِتے تے امدادی کماں چ حصہ لیا، اوہناں نُوں وی اِنج کر کے بڑی خوشی ملی۔ (‏اعمال 20:‏35‏)‏ یہوواہ نے اوہناں ساریاں مسیحیاں نُوں برکتاں دِتیاں جنہاں نے بدلدے حالاتاں مطابق اپنے نُوں ڈھالیا۔‏

14.‏ پولُس تے برنباس نال کیہہ ہویا تے ایہدا کیہہ نتیجہ نکلیا؟ (‏اعمال 14:‏21، 22‏)‏

¹⁴ پہلی صدی دے کجھ مسیحیاں تے اکثر ظلم کیتا جاندا سی۔ کدی کدار تے اِنج اوہدوں ہویا جدوں اوہناں نے سوچیا وی نئیں سی۔ ذرا غور کر‌و کہ پولُس تے برنباس نال اوس ویلے کیہہ ہویا جدوں اوہ لِسترہ دے علاقے چ مُنادی کر رہے سن۔ شروع شروع چ تے لوک اوہناں نُوں بڑی خوشی نال ملے تے اوہناں دے پیغام نُوں سُنیا۔ پر بعد چ مخالفت کر‌ن والے کجھ یہودیاں نے لوکاں نُوں اُکسایا جدی وجہ توں کجھ لوکاں نے پولُس نُوں پتھراں نال ماریا تے اوہنوں مُردہ سمجھ کے چھڈ گئے۔ (‏اعمال 14:‏19‏)‏ پر پولُس تے برنباس دُوجے علاقیاں چ مُنادی کر‌دے رہے۔ ایہدا کیہہ نتیجہ نکلیا؟ بوہت سارے لوک شاگرد بن گئے تے پولُس تے برنباس دِیاں گلاں تے اوہناں دی مثال توں اوہناں دے ہم‌ایماناں نُوں بڑی ہمت ملی۔ ‏(‏اعمال 14:‏21، 22 نُوں پڑھو۔)‏ بوہت سارے لوکاں نُوں ایس لئی فائدہ ہویا کیونکہ پولُس تے برنباس نے ظلم دے باوجود ہمت نئیں ہاری سگوں اوہ مُنادی کر‌دے رہے۔ جے اَسی وی ہمت ہارے بغیر اوس کم نُوں کر‌دے رہواں گے جیہڑا یہوواہ نے سانوں دِتا اے تے اوہ سانوں برکتاں دیندا رہوے گا۔‏

15.‏ تُسی بھرا میک‌مِلن دی مثال توں کیہہ سکھیا اے؟‏

¹⁵ 1914 توں پہلاں یہوواہ دے بندے کجھ گلاں دی توقع کر رہے سن۔ ذرا بھرا میک‌مِلن دی مثال تے غور کر‌و۔ اوس ویلے بوہت سارے بھین بھراواں وانگوں اوہ وی سوچ رہیا سی کہ اوہ بوہت چھیتی اسمان تے چلا جائے گا۔ ستمبر 1914 چ اوہنے اِک تقریر چ کہیا:‏ ”‏شاید ایہہ میری آخری تقریر اے۔“‏ پر اوہ اوہدی آخری تقریر نئیں سی۔ بعد چوں بھرا میک‌مِلن نے ایہہ کہیا:‏ ”‏ساڈے وچوں کجھ نے بوہت چھیتی ایہہ سوچ لیا سی کہ اَسی فوراً اسمان تے چلے جاواں گے۔ پر اصل چ سانوں مالک دی خدمت چ مصروف رہن دی ضرورت سی۔“‏ بھرا میک‌مِلن نے اِنج ای کیتا۔ اوہنے بڑے جوش نال مُنادی کیتی۔ اوہنوں بوہت سارے ایہو جہے بھراواں دا حوصلہ ودھان دا اعزاز ملیا جیہڑے اوس ویلے فوج چ بھرتی نہ ہون دی وجہ توں قید چ سن۔ بھرا میک‌مِلن نے اوس ویلے وی عبادتاں تے جانا نئیں چھڈیا جدوں اوہ بوہت وڈیرا ہو گیا سی۔ یہوواہ دی خدمت چ مصروف رہن نال بھرا نُوں کیہہ فائدہ ہویا؟ بھرا نے 1966 چ اپنی موت توں کجھ دیر پہلاں کہیا:‏ ”‏میرا ایمان ہُن پہلاں توں وی زیادہ مضبوط ہو گیا اے۔“‏ سانوں ساریاں نُوں بھرا میک‌مِلن دی مثال تے عمل کر‌نا چاہی دا اے، خاص طور تے اوس ویلے جدوں اَسی کافی لمے عرصے توں مشکلاں نُوں برداشت کر رہے ہُنے آں۔—‏عبرانیوں 13:‏7‏۔‏

16.‏ بھرا ہربرٹ تے اوہدی بیوی نُوں کیہڑی مشکل دا سامنا ہویا جدے بارے اوہناں نے سوچیا وی نئیں سی؟ (‏یعقوب 4:‏14‏)‏

¹⁶ یہوواہ دے بوہت سارے بندیاں نُوں صحت دے ایہو جہے مسئلیاں دا سامنا کر‌نا پیندا اے جنہاں بارے اوہناں نے کدی سوچیا وی نئیں ہوندا۔ مثال لئی، اپنی آپ‌بیتی چ بھرا ہربرٹ جیننگز نے دَسیا کہ جدوں اوہ تے اوہدی بیوی ملک گھانا چ مشنریاں دے طور تے خدمت کر رہے سن تے اوہ بڑے خوش سن۔‏ b پر کجھ چِر بعد اوہنوں اِک ایہو جہی بیماری ہو گئی جدا اوہدے مزاج تے اثر پیندا سی۔ بھرا ہربرٹ نے دَسیا کہ اوہدے حالات اوس گل نال رَلدے مِلدے سن جیہڑی یعقوب 4:‏14 چ لکھی اے۔ ‏(‏ایس ایت نُوں پڑھو۔)‏ اوہنے کہیا:‏ ”‏ایس بیماری دی وجہ توں اَسی فیصلہ کیتا کہ اَسی گھانا چ اپنے دوستاں نُوں چھڈ کے علاج کر‌ان لئی واپس کینیڈا جاواں گے۔“‏ یہوواہ نے بھرا ہربرٹ تے اوہدی بیوی دی مدد کیتی کہ اوہ ایس مشکل دے باوجود وفاداری نال اوہدی خدمت کر‌دے رہن۔‏

17.‏ بھرا ہربرٹ دی مثال تے غور کر‌ن نال اوہناں دے ہم ایماناں نُوں کیویں فائدہ ہویا؟‏

 ¹⁷ بھرا ہربرٹ دی مثال دا دُوجیاں تے بڑا گُوڑھا اثر ہویا۔ اِک بھین نے کہیا:‏ ”‏بھرا دی آپ‌بیتی نے میرے دل نُوں چُھو لیا۔ جدوں مَیں ایہہ پڑھیا کہ بھرا ہربرٹ نُوں اپنی بیماری دی وجہ توں اپنی خدمت چھڈنی پئی تے مینوں حالاتاں بارے صحی سوچ رکھن چ مدد ملی۔“‏ ایسے طرحاں اِک بھرا نے کہیا:‏ ”‏دس سال تک کلیسیا چ بزرگ دے طور تے خدمت کر‌ن توں بعد مینوں اپنی ذہنی بیماری دی وجہ توں ایس خدمت نُوں چھڈنا پیا۔ اکثر مینوں اِنج لگدا سی کہ مَیں کسے کم دا نئیں آں تے میرا دل نئیں کر‌دا سی کہ مَیں آپ‌بیتیاں پڑھاں۔ پر جدوں مَیں بھرا ہربرٹ دی آپ‌بیتی پڑھی تے مینوں بوہت حوصلہ ملیا۔“‏ واقعی، جدوں اَسی مشکلاں نُوں برداشت کر‌نے آں تے ساڈی مثال توں دُوجیاں دا حوصلہ ودھدا اے۔ کدی کدار تے ساڈی زندگی چ ایہو جہے موڑ آ جاندے نیں جنہاں بارے اَسی سوچیا وی نئیں ہوندا۔ پر اوہدوں وی اپنے ایمان تے قائم رہ کے اَسی دُوجیاں لئی چنگی مثال بننے آں۔—‏1-‏پطرس 5:‏9‏۔‏

18.‏ جیویں کہ تصویر چ وکھایا گیا اے، تُسی نائیجیریا چ رہن والی بیوہ دی مثال توں کیہہ سکھدے او؟‏

¹⁸ کجھ آفتاں جیویں کہ کورونا دی وبا دی وجہ توں یہوواہ دے بوہت سارے بندے وی متاثر ہوئے۔ مثال لئی، نائیجیریا چ رہن والی اِک بیوہ بھین کول کھان پین دِیاں شیواں تے پیسے بوہت گھٹ سن۔ اِک سویر جدوں اوہنے بچے ہوئے تھوڑے جہے چول پکا لئے تے اوہدی دھی نے اوہنوں پچھیا کہ ہُن اوہ کیہہ کر‌ن گے۔ بھین نے اوہنوں کہیا کہ اوہناں کول نہ تے کجھ کھان نُوں بچیا اے تے نہ ای پیسے نیں۔ پر اوہناں نُوں صارپت چ رہن والی بیوہ وانگوں یہوواہ اُتے پورا بھروسا رکھنا چاہی دا اے۔ (‏1-‏سلاطین 17:‏8-‏16‏)‏ ایس توں پہلے کہ اوہ ایہہ سوچدے کہ دوپہری اوہ کیہہ کھان گے، اوہناں نُوں اپنے ہم‌ایماناں وَلّوں راشن مِل گیا۔ اوہدے چ کھان پین دِیاں اینیاں چیزاں سن کہ اوہ دو ہفتیاں توں وی زیادہ چل سکدیاں سن۔ بھین نے کہیا کہ اوہنوں ایس گل دا اندازہ وی نئیں سی کہ یہوواہ اوہناں گلاں نُوں کِنّے دھیان نال سُن رہیا اے جیہڑیاں اوہ اپنی دھی نال کر رہی سی۔ ایہدے چ کوئی شک نئیں کہ جدوں اَسی یہوواہ تے بھروسا کر‌نے آں تے زندگی دِیاں  مشکلاں وی سانوں اوہدے ہور نیڑے لے جاندیاں نیں۔—‏1-‏پطرس 5:‏6، 7‏۔‏

19.‏ بھرا الکسی یرشوو نُوں کیس طرحاں دے ظلم دا سامنا کر‌نا پیا؟‏

¹⁹ پچھلے کجھ سالاں چ ساڈے بھین بھراواں نُوں ایہو جہے ظلم دا سامنا وی کر‌نا پیا اے جدے بارے اوہناں نے سوچیا وی نئیں سی۔ ذرا بھرا الکسی یرشوو دی مثال تے غور کر‌و جیہڑا روس چ رہندا اے۔ جدوں 1994 چ اوہدا بپتسمہ ہویا تے اوس ویلے اوہدے علاقے چ یہوواہ دے لوک کسے حد تک آزادی نال اوہدی عبادت کر سکدے سن۔ پر ایہدے کجھ سالاں بعد روس دے حالات بدلن لگ پئے۔ 2020 چ بھرا الکسی دے گھر چ چھاپا پیا تے تلاشی ہوئی۔ نالے اوہدیاں بوہت ساریاں چیزاں تے وی قبضہ کر لیا گیا۔ ایہدے کئی مہینیاں بعد حکومت نے اوہدے خلاف مُقدمہ درج کر لیا۔ ایہہ مُقدمہ اوہناں ویڈیوز دی بنیاد تے کیتا گیا سی جیہڑیاں اوس بندے نے بنائیاں سن جیہڑا اِک سال توں بائبل کورس کر‌ن دا دِکھاوا کر رہیا سی۔ ایہہ کِنّاں وڈا دھوکھا سی۔‏

20.‏ بھرا الکسی نے یہوواہ نال اپنی دوستی نُوں کیویں مضبوط کیتا؟‏

²⁰ بھرا نُوں جیس ظلم دا سامنا کر‌نا پیا کیہہ اوہدا کوئی چنگا نتیجہ وی نکلیا؟ جی۔ یہوواہ دے نال اوہدی دوستی ہور گُوڑھی ہو گئی۔ بھرا کہندا اے کہ ”‏ہُن مَیں تے میری بیوی مِل کے ہور زیادہ دُعا کر‌نے آں۔ مَیں سمجھ گیا واں کہ یہوواہ دی مدد دے بغیر مَیں ایس مشکل نال کدی نئیں نبڑ سکنا ساں۔“‏ اوہنے ایہہ وی دَسیا کہ ”‏جدوں مَیں بےحوصلہ ہُنا واں تے ذاتی مطالعیا کر‌ن توں مینوں بڑی مدد مِلدی اے۔ مَیں یہوواہ دے وفادار بندیاں دی مثال تے سوچ‌وچار کر‌نا واں۔ بائبل چ ایہو جہے بوہت سارے واقعے لکھے نیں جنہاں توں پتہ چلدا اے کہ اِطمینان نال رہنا تے یہوواہ اُتے بھروسا رکھنا کِنّاں ضروری اے۔“‏

21.‏ ایس مضمون چ اَسی کیہہ سکھیا اے؟‏

²¹ ایس مضمون چ اَسی کیہہ سکھیا اے؟ شیطان دی ایس دُنیا چ سانوں کدی کدار ایہو جہیاں مشکلاں دا سامنا کر‌نا پیندا اے جنہاں بارے اَسی سوچیا وی نئیں ہوندا۔ پر یہوواہ ہمیشاں اپنے اوہناں بندیاں دی مدد کر‌دا اے جیہڑے اوہدے تے بھروسا کر‌دے نیں۔ جیویں کہ ایس مضمون دی مرکزی ایت چ دَسیا گیا اے:‏ صادق دِیاں مصیبتاں بوہت نیں پر یہوواہ اوہنوں اوہناں ساریاں چوں بچاندا اے۔ (‏زبور 34:‏19‏)‏ آؤ، اَسی اپنیاں مشکلاں تے نئیں سگوں ایس گل تے دھیان دیندے رہیے کہ یہوواہ سانوں ایہناں مشکلاں چوں کڈھن دی طاقت رکھدا اے۔ فیر اَسی وی پولُس رسول وانگوں کہہ سکاں گے:‏ جیہڑا مینوں طاقت دیندا اے، اوہدے ذریعے مَیں سب کجھ کر سکنا واں۔—‏فِلپّیوں 4:‏13‏۔‏